Daudiꞌ hai Mepibose
9
Hangkani tempó, Daudiꞌ mekuneꞌ i taunána, “Ara mani paꞌi pemuleꞌána Saulu to tueꞌ? Ane ara maniꞌi, ina kupatongawaꞌ kamaroꞌana lalungkuꞌ i hia, láwiꞌ mambuhinaoaꞌ kamaroꞌana Ionata i kódóꞌ.”a2 Ara hadua topokádipurá támbina Saulu iatoliu miꞌi to rahangaꞌ Siba. Ia rahuoꞌ lao i Datu Daudiꞌ. I kahaweꞌna, napekuneꞌ datu i hia, nauliꞌ, “Ba io miꞌi to rahangaꞌ Siba?”
Nahániki, nauliꞌ, “Kódóꞌ miꞌi datu.”
3 Roo onoꞌ, mekuneꞌ wopiꞌi datu, nauliꞌ, “Ba ara mani pemuleꞌána Saulu to tueꞌ? Kupoinao mopatongawaꞌ kamaꞌahiꞌkuꞌ i hira nodo to kudándi miꞌi i Pueꞌ Ala.”
Nahániki Siba, “Ara mani ánáꞌna Ionata tobaleilo, agáiáná polumaona mongkuha.”
4 Mekuneꞌ wopiꞌi datu i hia, nauliꞌ, “Iumbá miꞌi?”
Mehániꞌ Siba, “Ia toroꞌ i támbina Maki ánáꞌna Amieli i kótá Lodeba.”
5 Hangko ionoꞌ, Datu Daudiꞌ mohuoꞌheꞌ tauna lao moala ánáꞌna Ionata tobaleilo iti.
6 Haweꞌ miꞌi Mepibose ánáꞌna Ionata iti, kásáliu molingkudu i bitina Datu Daudiꞌ, tandaꞌ pebiláꞌna. Mekuneꞌ Daudiꞌ, “Ba io miꞌi Mepibose?”
Nahániki Mepibose, “Ió, pueꞌkuꞌ, kódóꞌ miꞌi Mepibose.”
7 Nauliꞌ Daudiꞌ i hia, “Ineeꞌkoꞌ malááꞌ, láwiꞌ ina kupatongawaꞌ kamaroꞌana lalungkuꞌ i hio. Mambuhinaoaꞌ Ionata umámu, mewaliꞌ ina kupopesuleꞌ upu-upu tampoꞌna Saulu pueꞌmu i hio, hai ina mandeꞌkoꞌ oaꞌ i támbi kadatuá hingkakani hai kódóꞌ.”
8 Molingkudu wopiꞌi Mepibose, nauliꞌ, “Apa miꞌi paꞌi katueꞌkuꞌ deꞌe, haneꞌi datu mohaileꞌaꞌ, tauna to tiꞌara piꞌi ara pobunduꞌána, nodo peaꞌ ahu to mate.”b
9 Roo onoꞌ, datu mokióꞌ Siba, nahángáꞌá, “Hinángkáꞌ to napálehi Saulu hai tinána, kuweꞌi ueꞌna Saulu deꞌe. 10 Mewaliꞌ io, ánáꞌmuheꞌ hai topobágóꞌmuheꞌ, hangaa-ngaa nipobágóꞌ tampoꞌna iti hai wuaꞌna powiáꞌmi niántiáheꞌ pemuleꞌána Saulu to ntániꞌna bona ara pandeꞌraꞌ. Agáiáná Mepibose ueꞌna Saulu ina mandeꞌ oaꞌ hingkakani hai kódóꞌ.” (Siba araheꞌ ánáꞌna tobaleilo hampuloꞌ hai lima, hai hawiꞌna rompuloꞌheꞌ.)
11 Mehániꞌ Siba i datu, nauliꞌ, “Kódóꞌ hawiꞌmu ina mampeuláꞌi upu-upu párentána datu.”
Mewaliꞌ Mepibose mandeꞌ hingkakani hai datu, hibali woꞌo hai ia hadua ánáꞌna datu. 12 Mepibose ara ánáꞌna tobaleilo to kókóiꞌ mani, hangaꞌna Mika.c Upu-upu tauna to toroꞌ i támbina Siba mewaliꞌheꞌ topobágóꞌna Mepibose. 13 Noꞌonoꞌ miꞌi daritána Mepibose to mongkuha iti toroꞌ i kótá Ierusale hai mandeꞌ oaꞌ i támbi kadatuá.