Daudiꞌ mampombealaꞌá toAmoni hai toÁrá
10
Bahangapa kamaruena hangko ionoꞌ, mate miꞌi Nahasa daturaꞌ toAmoni, hai napaháwángi Hanu ánáꞌna mewaliꞌ datu. 2 Datu Daudiꞌ molaluita, nauliꞌ, “Ina kupatongawaꞌ kamaroꞌana lalungkuꞌ i Hanu ánáꞌna Nahasa, hibali hai umána hangkoia mopatongawaꞌ kamaroꞌana laluna i kódóꞌ.” Mewaliꞌ Daudiꞌ mohuoꞌ bahangapa huoꞌána lao i tampoꞌ Amoni bona mopahaweꞌ kamapepeꞌna woꞌo hulena i kamatena umána Hanu.Kahaweꞌraꞌ i tampoꞌ onoꞌ, 3 tadulakoraꞌ toAmoni molaluitaheꞌ i daturaꞌ, rauliꞌ, “Ineeꞌ riꞌi nupekiri Daudiꞌ mohuoꞌ mai taunána mopahaweꞌ kamapepeꞌna hulena ánti pebiláꞌna i umámu. Tiꞌara paꞌi tunggáiána ina mampenongkoki kótántaꞌ deꞌe bona peisá ragero.”
4 Roo onoꞌ, Hanu mohuoꞌheꞌ taunána mohakaꞌ huoꞌánaheꞌ Daudiꞌ iti, mokáiꞌ dánggóraꞌ hambali, hai mobóhóꞌ waruꞌraꞌ hangko i hopeꞌraꞌ haweꞌ i paloraꞌ. Roo onoꞌ, rapaliuheꞌ mesuleꞌ.
5 Apa to mewaliꞌ iti rapahaweꞌ i Daudiꞌ. Hangko ionoꞌ, Daudiꞌ mohuoꞌheꞌ tauna lao mampohidupaꞌáheꞌ, láwiꞌ rumihi karapakahiliáraꞌ. Daudiꞌ metewái i hira, nauliꞌ, “Toroꞌmokou hampaiꞌ i kótá Ieriko haweꞌ tueꞌ huleꞌ dánggómi, hangko mesuleꞌrakou mai.”
6 I karahádina miꞌi toAmoni, Daudiꞌ mokáhihiꞌheꞌ ánti bábehiáraꞌ iti, mosaroheꞌ rompuloꞌ sáburaꞌ surudadoꞌ toÁrá to toroꞌ i Beꞌ-Reho hai Sobá, hai mosaroheꞌ woꞌo hampuloꞌ hai rosábu surudadoꞌ hangko i Toba, hingkakani hai daturaꞌ toMaꞌaka hai taunánaheꞌ hasábu.
7 I kanahádina miꞌi Daudiꞌ bámbári iti, ia mohuoꞌ tadulako surudadoꞌna, ia miꞌi Ioabiꞌ, hai upu-upu surudadoꞌ lao molindoꞌ ewáliraꞌ. 8 Mewaliꞌ toAmoni mesuwuꞌ hai mobaresiheꞌ i lindoꞌ babaꞌá kótá Raba, pehodaꞌána topopárentáraꞌ, ina mombealaheꞌ. ToÁrá to hangko i Sobá hai hangko i Reho, hai upu-upu surudadoꞌ to hangko i Toba hai Maꞌaka, mobaresiheꞌ i pádá.
9 Kanaisána Ioabiꞌ toSáráeliꞌ rahipiꞌmoheꞌ ewáliraꞌ i lindoꞌ hai i taleuꞌ, ia mopileꞌi bahangapa surudadoꞌ to keate ntepuꞌu mobaresi molindoꞌ toÁrá. 10 Surudadoꞌ toSáráeliꞌ to ntániꞌna natadulakoiheꞌ Abisai ádina Ioabiꞌ mampombealaꞌáheꞌ toAmoni iti. 11 Mewaliꞌ molaluita miꞌi Ioabiꞌ i ádina, nauliꞌ, “Ane rápáꞌna toÁrá iti melumbuꞌ kamaróhóraꞌ hangko i kódóꞌ, nutulungiaꞌ. Agáiáná ane rápáꞌna toAmoni iti melumbuꞌ kamaróhóraꞌ hangko i hio, ina laokoꞌ woꞌo kutulungi. 12 Nupakaróhó lalumu hai hangaa-ngaa mohintuwuꞌkeꞌ, mampetawaꞌi taunántaꞌ hai wánuántaꞌ to Naweꞌimokeꞌ Pueꞌ Ala. Hampoáꞌworia PUEꞌ ina mobábehi apa to maroꞌa i peitáNa.”
13 Mewaliꞌ Ioabiꞌ hai surudadoꞌna laoheꞌ mampombealaꞌá toÁrá, hai upu-upu toÁrá melangkaheꞌ. 14 Karaitána peá toAmoni, melangkamoheꞌ toÁrá, melangkamoheꞌ woꞌo hangko i lindoꞌna Abisai hai mesuaꞌheꞌ i lalu kótá. Rooheꞌ mombeala hai toAmoni, mesuleꞌmoheꞌ Ioabiꞌ lao i Ierusale.
15 Karaisána miꞌi toÁrá kamanangiraꞌ hangko i toSáráeliꞌ, morámpu wopaheꞌ upu-upu. 16 Noꞌonoꞌ woꞌo Hadadese mohuoꞌheꞌ taunána mokióꞌ toÁrá to i hambali uwai Epara, bona meuláꞌheꞌ mombeala. Haweꞌmoheꞌ toÁrá iti i Helama, natadulakoiheꞌ Sobaꞌ tadulako pombealana Hadadese.
17 Kanahádina Daudiꞌ bámbári iti, ia hawiáꞌ-wiáꞌ morámpu surudadoꞌna toSáráeliꞌ haneꞌi mowetaheꞌ i uwai Iarade, hai liliuheꞌ lao i Helama. Ionoꞌ, toÁrá mobaresimoheꞌ hai mampombealaꞌáheꞌ surudadoꞌna Daudiꞌ. 18 Agáiáná toÁrá melangkaheꞌ hangko i lindoꞌraꞌ toSáráeliꞌ. Daudiꞌ hai surudadoꞌna mopapateheꞌ toÁrá iti, pitu átuna tauna to moánti kereta dárá, hai iba puloꞌna sáburaꞌ surudadoꞌ to modárá. Sobaꞌ tadulakoraꞌ rumihi tobelána álána mate i pombeala iti. 19 Karaitána upu-upu datu to nakuasaꞌi Hadadese karanangiraꞌ miꞌi toSáráeliꞌ, mopaꞌaramoheꞌ podame hai toSáráeliꞌ hai mengkoruꞌheꞌ. Roo onoꞌ, malááꞌmoheꞌ toÁrá modurei huleꞌ toAmoni.