Daudiꞌ hai Batseba
11
I pombeháwáꞌá pare,a i tempóraꞌ datu-datu paka lao mombeala, Daudiꞌ mohuoꞌ Ioabiꞌ hingkakani hai surudadoꞌ toSáráeliꞌ lao mombeala. Monangiheꞌ toAmoni, hai molibuꞌheꞌ kótá Raba, agáiáná Daudiꞌ roo-roo peá i kótá Ierusale.2 Hangkani tempó, kalumbaꞌ miꞌi, Daudiꞌ mearó hangko i paturuána haneꞌi molulumao i wongko atuꞌ to hirante i támbi kadatuá. Ia mampetiro hai moita hadua towawine to tangaꞌna medói. Towawine iti malásáꞌ ntepuꞌu, 3 onoꞌ miꞌi haneꞌi Daudiꞌ mohuoꞌ hadua taunána lao mekuneꞌ heáná towawine iti. Nauliꞌ tauna iti i Daudiꞌ, “Towawine iti Batseba ánáꞌna Eliama. Ia toinána Uria toHeti.” 4 Batseba iti hangko roo mobábehi ádá popamagasaꞌ wátána láwiꞌ hangko roo nahumba.b Daudiꞌ mohuoꞌ tauna lao moala Batseba. Lao mpuꞌu miꞌi towawine iti, mewaliꞌ napoiluhi Daudiꞌ. Roo onoꞌ, mesuleꞌ miꞌi towawine iti lao i támbina. 5 Tiꞌara marue hangko ionoꞌ, morodua miꞌi towawine iti, hai mohuoꞌ tauna lao mopahaweꞌ i Daudiꞌ kamoroduána miꞌi.
6 Hangko ionoꞌ, Daudiꞌ mohuoꞌ tauna lao i Ioabiꞌ bona mopahaweꞌ tewáina node: “Nuhuoꞌ Uria toHeti mai i kódóꞌ.” Mewaliꞌ Ioabiꞌ mohuoꞌ mpuꞌu miꞌi Uria lao i Daudiꞌ. 7 I tempóna Uria mampohidupaꞌá Daudiꞌ, datu mampekuneꞌ noumbá bámbárina Ioabiꞌ hai surudadoꞌna toSáráeliꞌ, hai noumbá polumaona pombeala. 8 Roo onoꞌ, molaluita miꞌi Daudiꞌ i Uria, nauliꞌ, “Mesuleꞌmokoꞌ i támbimu hai mengkakarooꞌkoꞌ hampaiꞌ.” Pesuwuꞌna peá Uria hangko i támbi kadatuá, metutuhámoheꞌ tauna moánti parasee hangko i datu. 9 Agáiáná Uria maturu peá i babaꞌ támbi kadatuá hingkakani hai hawiꞌnaheꞌ datu, tiꞌara mesuleꞌ i támbina.
10 Ara to mohángáꞌá Daudiꞌ node: “Uria tiꞌara mesuleꞌ lao i támbina.”
Mewaliꞌ mekuneꞌ miꞌi Daudiꞌ i Uria, nauliꞌ, “Tiꞌara paꞌi hangko mesuleꞌkoꞌ hangko i polumaoámu to karaoꞌ? Moapa riꞌi haneꞌi tiꞌarakoꞌ mesuleꞌ lao i támbimu?”
11 Nahániki Uria, nauliꞌ, “Surudadoꞌ toSáráeliꞌ hai toIudá tangaꞌna rumihi pombealaraꞌ, hai Petiꞌ Podándina PUEꞌ ara woꞌo ionoꞌ. Ioabiꞌ tadulakongkuꞌ hai upu-upuheꞌ surudadoꞌna pueꞌkuꞌ datu mobambaruꞌ peheꞌ i pádá. Noumbá kapeisángkuꞌ mesuleꞌ i támbingkuꞌ, mandeꞌ hai mainu, pelumbuꞌna mani moiluhi hai toinángkuꞌ? Kudándi i hio, kódóꞌ huoꞌámu deꞌe, tiꞌaraꞌaꞌ ina mobábehi noꞌonoꞌ tangaꞌraꞌ surudadoꞌmu mombeala maniheꞌ.”
12 Hangko ionoꞌ, nauliꞌ Daudiꞌ, “Noꞌonoꞌ miꞌi. Ieneꞌmokoꞌ sieruꞌ dehangaloá. Kahalo peisámokoꞌ lao mombeala.” Mewaliꞌ Uria hambengi mani i kótá Ierusale. Kahalona, 13 Daudiꞌ mokióꞌ Uria mandeꞌ hai mainu i támbina, mewaliꞌ mandeꞌ mpuꞌu miꞌi Uria, hai rapopainu duuꞌna malangu, agáiáná káindi iti Uria lao peá maturu hingkakani hai topobágóꞌna datu, tiꞌaranto lao i támbina.
14 Kahalo mepulo, Daudiꞌ moukiꞌ sura i Ioabiꞌ hai mohuoꞌ Uria moánti sura iti. 15 To naukiꞌ i lalu sura iti node: “Nupailindoꞌ Uria i pombealaꞌá to rumihi ntepuꞌu, hai mosuliꞌkou bona rapapate.”
16 Mewaliꞌ tangaꞌna Ioabiꞌ molibuꞌ kótá Raba, ia mohuoꞌ miꞌi Uria lao i kaꞌaraꞌá to naisá miꞌi ami, ionoꞌ araheꞌ ewali to keate hai maróhó. 17 Tempóraꞌ surudadoꞌ ewali iti mampombealaꞌá Ioabiꞌ, mateheꞌ bahangapa surudadoꞌna Daudiꞌ, tepasuaꞌ Uria.
18 Hangko ionoꞌ, Ioabiꞌ mohuoꞌ hadua tauna lao mopahaweꞌ i Daudiꞌ noumbá polumaoána pombealaraꞌ. 19 Ioabiꞌ mopárentá huoꞌána iti, nauliꞌ, “Ane roo miꞌi nupahaweꞌá datu noumbá polumaona pombealantaꞌ deꞌe, 20 hai ane mabukoꞌ datu, babilaꞌ ina nakuneꞌkoꞌ node: ‘Moapa riꞌi haneꞌi pebáiꞌkou gaga mohungkuki kótá iti, nipombealaꞌáheꞌ? Tiꞌara paꞌi niꞌisá ewali ina mepanaꞌheꞌ hangko i wongko bente? 21 Nikáláliꞌá miꞌi paꞌi noumbá kamatena Abimeleꞌ ánáꞌna Gibeo i Tebes? Nandulingi hadua towawine hai watu pogiliá hangko i bente kótá. Mewaliꞌ moapa riꞌi haneꞌi báiꞌkou gaga lao hungkuꞌ i bente iti?’ Mewaliꞌ ane datu mekuneꞌ noꞌonoꞌ, nupahaweꞌá node: ‘Uria huoꞌámu mate miꞌi woꞌo!’ ”
22 Mewaliꞌ pohuꞌ mpuꞌu miꞌi huoꞌána Ioabiꞌ iti lao i Datu Daudiꞌ, hai mopahaweꞌ apa to napárentáiá Ioabiꞌ i hia, 23 nauliꞌ, “Ewálingkiꞌ melumbuꞌ kamaróhóraꞌ hangko i kaiꞌ, hai mesuwuꞌheꞌ mai hangko i kótá, rapombealaꞌáꞌangkaiꞌ i pádá. Agáiáná kipári-pári molindoꞌheꞌ álána mosuliꞌheꞌ haweꞌ i babaꞌá kótá. 24 I tempó iti, araheꞌ topepanaꞌ to meángkáꞌ i wongko bente, hai mopanaꞌheꞌ surudadoꞌna datu álána araheꞌ bahangapa to mate, tepasuaꞌ woꞌo Uria huoꞌámu.”
25 Roo onoꞌ, molaluita miꞌi Daudiꞌ i taunána Ioabiꞌ iti, nauliꞌ, “Nupahaweꞌ i Ioabiꞌ node: ‘Ineeꞌ nuposusa lalu kana i apa to pewaliꞌ iti, láwiꞌ noꞌonoꞌ miꞌi polumaoána pombeala. Ara tauna to mate hai mata pihoꞌ, ara woꞌo to tiꞌara. Onoꞌ haneꞌi hangaa-ngaa nipakaróhó pesuakimi hai nigero kótá iti.’ Noꞌonoꞌ rárámu mopakaróhó laluna Ioabiꞌ.”
26 Kanahádina Batseba, toinána Uria, kamatena miꞌi toámána, wiora ntepuꞌu laluna. 27 Liu miꞌi tempóna kawiorana Batseba, Daudiꞌ mohuoꞌheꞌ tauna lao moala towawine iti raꞌánti i támbi kadatuána, hai napotoina. Bahangapa wulána hangko ionoꞌ, towawine iti moánáka hadua ánángkóiꞌ tobaleilo. Agáiáná apa to nabábehi Daudiꞌ iti kadake i peitána PUEꞌ.