Nata mokámbáróá Daudiꞌ
12
PUEꞌ mohuoꞌ nabiꞌ Nata lao i Daudiꞌ bona mopahaweꞌ laluitaNa. Kahaweꞌna Nata i Daudiꞌ, napodarita node: “Ara rodua tauna to toroꞌ i hamboloꞌ wánuá, hadua pebuku hai hadua meahiahiꞌ. 2 Topebuku handaꞌ bekeꞌna, dimbána hai gapiꞌna. 3 Topeahiahiꞌ tiꞌara ara aga-agana, bateꞌna peá hambaꞌa ánáꞌ dimbá lundara to kókóiꞌ to nahóló hai nakádipurá. Ánáꞌ dimbá iti mewaliꞌ mahile hingkakani hai ánáꞌnaheꞌ tauna iti, mandeꞌ hangko i pepahimpóina, mainu hangko i painuána, hai molukuꞌ i hintáiꞌna. Iti napomahile nodo ánáꞌna haduduána. 4 Hangkani tempó, topebuku iti ara torarena, agáiáná láwiꞌ tiꞌara mau mosambale hambaꞌa hangko i bekeꞌna ba dimbána ba gapiꞌna bona rapaihóá torarena, onoꞌ miꞌi haneꞌi ia moala ánáꞌ dimbána topeahiahiꞌ bona rapaihóá torarena.”5 Kanahádina Daudiꞌ darita iti, rumihi ntepuꞌu kamabukoꞌna i topebuku iti, haneꞌi nauliꞌ, “I lalu hangaꞌna PUEꞌ to makuasaꞌ, tauna to mobábehi noꞌonoꞌ hangaa-ngaa rahuku mate! 6 Hai ánáꞌ dimbá lundara iti hangaa-ngaa napaháwángi iba kánina kahandaꞌnaa láwiꞌ ia mobábehi miꞌi to noꞌonoꞌ, hai tiꞌara naisá maꞌahiꞌ.”
7 Roo onoꞌ, molaluita miꞌi Nata i Daudiꞌ, nauliꞌ, “Io miꞌi tauna iti! Node laluitana PUEꞌ, Pueꞌ Ala to rapenómbái toSáráeliꞌ, Nauliꞌ: ‘Kódóꞌ miꞌi to mopileꞌimokoꞌ mewaliꞌ daturaꞌ toSáráeliꞌ, hai Kódóꞌ miꞌi to mokábáhákoꞌ hangko i taena Saulu. 8 Kadatuána Saulu hai upu-upu towawinena Kuweꞌimokoꞌ. Kupileꞌimokoꞌ mewaliꞌ daturaꞌ toSáráeliꞌ hai toIudá. Ane tiꞌara mani nuporái apa to Kubábehi iti, ina Kupoweꞌi manikoꞌ to melumbuꞌ hangko ionoꞌ. 9 Moapa riꞌi haneꞌi NupakóiꞌAꞌ hai tiꞌara nupeuláꞌi párentáNgkuꞌ? Moapa riꞌi haneꞌi nubábehi to kadake iti i peitáNgkuꞌ? Uria toHeti nupehuoꞌá rapapate toAmoni. Toinána nuala nupotoina. 10 Onoꞌ miꞌi haneꞌi mantepuꞌu deꞌe-deꞌe haweꞌ i rue-ruena, hangko i pemuleꞌámuheꞌ, ara to ina rapapate,b láwiꞌ tiꞌarakoꞌ mampeuláꞌi párentáNgkuꞌ, hai moalakoꞌ toinána Uria toHeti iti mewaliꞌ toinámu.’
11 Node miꞌi ngkóráꞌna PUEꞌ: ‘Ina Kupaꞌara kapári i hio to mentóáꞌ hangko i tinámu haduduámu. Ina nuita mata kaKualana towawinemuheꞌ, Kuhuhuꞌáheꞌ tauna ntaniꞌ hai rapoiluhi kalialó mpase. 12 To kadake iti nubábehi ngkaniiꞌ-niiꞌ, agáiáná háwángina iti ina Kupatongawaꞌ tempó mabaa bona raita toSáráeliꞌ.’ ”c
13 Kanahádina apa to napahaweꞌ Nata iti, molaluita miꞌi Daudiꞌ, nauliꞌ, “Madósámoꞌ i PUEꞌ.”
Nahániki Nata i Daudiꞌ, nauliꞌ, “Naꞌámpungi miꞌi PUEꞌ dósámu iti, mewaliꞌ tiꞌarakoꞌ ina mate. 14 Agáiáná kehapiꞌ noꞌonoꞌ, ánáꞌmu to mesupaꞌ miꞌi bateꞌna ina mate ánti kakadakena gaga bábehiámu i PUEꞌ.”
15 Roo onoꞌ, mesuleꞌ miꞌi Nata i támbina, hai PUEꞌ mopaꞌara hakiꞌ i ánángkóiꞌ to napoánáka bembaꞌna Uria. 16 Daudiꞌ mekakae i Pueꞌ Ala ánti katiꞌárána nalalu ánángkóiꞌ iti. Ia tiꞌara mandeꞌ, hai ane mesuaꞌ i lintuꞌna, hambengiá-ngiá ia tiꞌara letaꞌ, maturu-turu peá i daula. 17 Laomoheꞌ topobágóꞌ to mapángkáꞌ lántiꞌraꞌ i támbina Daudiꞌ, membiáꞌheꞌ bona ia mearó hangko i daula, agáiáná tiꞌara mau, hai ia tiꞌara woꞌo mandeꞌ hingkakani hai hira.
18 I kapituna alona, mate miꞌi ánángkóiꞌ iti. Topobágóꞌna Daudiꞌ malááꞌheꞌ mampehángáꞌá kamatena miꞌi ánáꞌna iti, láwiꞌ rauliꞌ, “Tempóna mani tueꞌ ánángkóiꞌ iti, molaluitamokeꞌ i hia, agáiáná tiꞌarakeꞌ napehádingi. Pelumbuꞌna mani deꞌe-deꞌe, ánáꞌna iti mate miꞌi. To tapokalááꞌ, ane tapopaisáꞌá, babilaꞌ ia ina mopakarugiꞌ wátána.”
19 Kanaitána Daudiꞌ topobágóꞌna mombekuwi-kuwiheꞌ, naisá miꞌi kamatena ánángkóiꞌ iti. Mewaliꞌ mekuneꞌ miꞌi Daudiꞌ i topobágóꞌnaheꞌ, nauliꞌ, “Mate mipaꞌi ánángkóiꞌ iti?”
Rahániki, “Mate miꞌi.”
20 Mewaliꞌ mearó miꞌi Daudiꞌ hangko i daula, medói, mekarabiꞌ, mopaháwángi waruꞌna, haneꞌi mesuaꞌ i lalu támbina PUEꞌ molingkudu menómbá. Roo onoꞌ, mesuleꞌ miꞌi lao i támbina, hai ánti pembiáꞌna, rapatimamaꞌá pandeꞌ hangko naꞌandeꞌ riꞌi. 21 Karaitána topobágóꞌnaheꞌ apa to nabábehi iti, molaluitaheꞌ rauliꞌ, “Apa lempóna to nubábehi deꞌe? I tempóna ánáꞌmu iti tueꞌ mani, tiꞌarakoꞌ mandeꞌ hai teriaꞌkoꞌ, agáiáná deꞌe-deꞌe mate miꞌi, mearórakoꞌ hai mandeꞌ.”
22 Nahánikiheꞌ Daudiꞌ, nauliꞌ, “I tempóna ánángkóiꞌ iti tueꞌ mani, tiꞌaraꞌaꞌ mandeꞌ hai teriaꞌaꞌ, láwiꞌ kupekiri babilaꞌ napokaꞌahiꞌ maniaꞌ PUEꞌ, bona ánángkóiꞌ iti peisá mani tueꞌ. 23 Agáiáná deꞌe-deꞌe, mate miꞌi. Apa mani paꞌi bunduꞌkuꞌ mopuasaꞌ oaꞌ? Peisá paꞌi ia ina tueꞌ huleꞌ? Kódóꞌ riꞌi to ina lao i hia, agáiáná ia tiꞌara piꞌi ina mesuleꞌ mai i kódóꞌ.”
24 Hangko ionoꞌ, Daudiꞌ mopalindó laluna Batseba toinána, hai napoiluhi. Onoꞌ miꞌi haneꞌi towawine iti moánáka hadua tobaleilo, hai Daudiꞌ mohangaꞌ ánángkóiꞌ iti Salomo. PUEꞌ mampokakaia ánángkóiꞌ iti, 25 onoꞌ miꞌi haneꞌi Ia mohuoꞌ nabiꞌ Nata mohangaꞌ ánángkóiꞌ iti Iedida, lempóna “PUEꞌ mampokakaia.”
Pengkaroona poewaꞌraꞌ toSáráeliꞌ hai toAmoni
26 Tempó iti woꞌo, Ioabiꞌ hai surudadoꞌnaheꞌ mampombealaꞌá mani kótá Raba, pehodaꞌána popárentáraꞌ toAmoni, hai mokuasaꞌimoheꞌ bente kótá. 27 Ioabiꞌ mohuoꞌ tauna lao i Daudiꞌ mopahaweꞌ tewáina node: “Tangaꞌkuꞌ mombeala i Raba deꞌe-deꞌe, hai mokuasaꞌimoꞌ kótáraꞌ ewálintaꞌ iti, tepasuaꞌ poalaꞌáraꞌ uwai. 28 Mewaliꞌ deꞌe-deꞌe, kupembiáꞌ bona nurámpuheꞌ upu-upu surudadoꞌtaꞌ to ara maniheꞌ i Ierusale, hai nutadulakoiheꞌ mai molibuꞌ kótá deꞌe bona io to mokuasaꞌi. Ane noꞌonoꞌi, tiꞌara hangaꞌkuꞌ to napohangaꞌ kótá iti.”
29 Mewaliꞌ Daudiꞌ morámpu mpuꞌumoheꞌ upu-upu surudadoꞌ haneꞌi laoheꞌ mampombealaꞌá Raba. Nanangiheꞌ hai nakuasaꞌi kótá iti. 30 Daudiꞌ moala tatali datu hangko i wuáꞌna daturaꞌ toRaba. Kamatimina tálu puloꞌna hai iba kiló buláwá, hai raparamatai to masuliꞌ ntepuꞌu hólóna. Tatali datu iti naposóngkó miꞌi Daudiꞌ. Ia moánti woꞌo handaꞌ párewá ntániꞌna. 31 Tiꞌara onoꞌ peá. ToRaba iti rapohawiꞌ, hai rapasaꞌ moánti garagadiꞌ, pemángki, hai uwahe, hai rapopobágóꞌheꞌ i pobábehiá watu telá. Noꞌonoꞌ woꞌo nabábehi Daudiꞌ i upu-upu kótáraꞌ toAmoni. Roo onoꞌ, mesuleꞌ miꞌi Daudiꞌ hai surudadoꞌnaheꞌ lao i kótá Ierusale.