Amono hai Tama
13
Roo onoꞌ, mewaliꞌ miꞌi to hampákáꞌna. Abisalo ánáꞌna Daudiꞌ ara ádina hadua towawine to malásáꞌ, hangaꞌna Tama. Tama iti napokaelu Amono ánáꞌna Daudiꞌ tobaleilo to hanginána. 2 Rumihi ntepuꞌu pepokaeluna Amono i Tama, álána napoduꞌa. Halaluna iti ánáꞌntawine mani, hai naisá Amono katiꞌárána peisá ina napopoapa.3 Amono ara balena to rahangaꞌ Ionada. Ia ánáꞌna Simea wutuꞌna Daudiꞌ. Ionada iti hadua tauna to moakala. 4 Napekuneꞌ i Amono, nauliꞌ, “Ee ánáꞌna datu, moapa riꞌi masusa oaꞌ lalumu? Apa to nupekiri? Maikoꞌ, nupolaluita i kódóꞌ.”
Nahániki Amono, “Mampokaeluaꞌ Tama ádina Abisalo, agáiáná ia woꞌo halalungkuꞌ.”
5 Molaluita miꞌi Ionada i hia, nauliꞌ, “Maturukoꞌ i paturuámu, hai mampe to tiꞌara nulalu. Ane mai miꞌi umámu mampeitakoꞌ, hangaa-ngaa nuhángáꞌá node: ‘Ane maroꞌai, nuhuoꞌ mai Tama ádingkuꞌ mopasilólónga pandeꞌ i lindoꞌkuꞌ. Ane kuita tempóna mompaihó, ina kuꞌundeꞌ mandeꞌ.’ ” 6 Roo onoꞌ, maturu miꞌi Amono hai mampe to maduꞌa. I tempóna datu lao mampeita, molaluita miꞌi Amono i datu, nauliꞌ, “Ane maroꞌai, nuhuoꞌ mai Tama ádingkuꞌ, maiaꞌ napobábehiá hambuaꞌ ba rombuaꞌ rótiꞌ bona napahimpóiaꞌ.”
7 Mewaliꞌ Daudiꞌ mohuoꞌ tauna lao i támbina mopahaweꞌ tewáina i Tama node: “Laokoꞌ i támbina Amono wutuꞌmu, hai nupasilólónga pandeꞌna.” 8 Mewaliꞌ lao mpuꞌu miꞌi Tama i támbina Amono wutuꞌna to tangaꞌna maturu-turu, haneꞌi ánáꞌntawine iti mobábehi rótiꞌ i lindoꞌna. 9 Roo onoꞌ, nahore miꞌi Tama rótiꞌ iti hangko i kawaliꞌ hai nahuhuꞌá, agáiáná Amono tiꞌara mau mandeꞌ. Nauliꞌ, “Nuhuoꞌ upu-upu tauna mesuwuꞌ.” Mewaliꞌ upu-upu tauna mopálehi Amono.
10 Roo onoꞌ, molaluita miꞌi Amono i Tama, nauliꞌ, “Ánti mai rótiꞌ iti i lintuꞌkuꞌ bona nupahimpóiaꞌ.” Mewaliꞌ Tama moala rótiꞌ to napatimama miꞌi iti hai naꞌántiá Amono wutuꞌna i lintuꞌna. 11 Kanahuhuꞌna Tama rótiꞌ iti i hia bona naꞌandeꞌ, natibaaꞌ riꞌi Amono ánáꞌntawine iti, nauliꞌ, “Ádingkuꞌ, maikoꞌ moiluhikeꞌ.”
12 Agáiáná nauliꞌ riꞌi ánáꞌntawine iti, “Ineeꞌ wutuꞌkuꞌ, ineeꞌaꞌ nupári-pári mobábehi iti. Bábehiá to noꞌonoꞌ tiꞌara hintotoꞌ hai ádántaꞌ toSáráeliꞌ. Ineeꞌaꞌ nupasaꞌ mobábehi to kadake to noꞌonoꞌ. 13 Ina mahili ntepuꞌuaꞌ! Hai io, bateꞌmu ina rasasalaꞌi tauna i tampoꞌ Sáráeliꞌ deꞌe. Rángina riꞌi nupolaluita i datu, bateꞌna ina napokana ane nupotoinaꞌaꞌ.” 14 Agáiáná Amono tiꞌara mau mampehádingi laluitana Tama, hai ánti kamaróhóraꞌ tiꞌara hibali, manangi miꞌi Tama, onoꞌ miꞌi haneꞌi towawine iti napoiluhi miꞌi Amono.
15 Agáiáná roo onoꞌ, rumihi pekáhihiꞌna Amono i Tama, hai pekáhihiꞌna iti melumbuꞌ hangko i pepokaeluna ininá, haneꞌi ia mohuoꞌ ádina iti mesuwuꞌ.
16 Nauliꞌ Tama, “Tiꞌara wutuꞌkuꞌ! Kanuwurangkuꞌ iti melumbuꞌ kakadakena hangko i to nubábehi miꞌi i kódóꞌ!”
Agáiáná apa to nauliꞌ Tama iti tiꞌara napehádingi Amono. 17 Ia mokióꞌ huoꞌána, nahángáꞌá, “Ánti towawine iti i rawa, hai nugili babaꞌ.” 18 Mewaliꞌ huoꞌána Amono iti mampopesuwuꞌ Tama, hai pasi mesuwuꞌ, kásáliu mogili babaꞌ. Tempó iti, Tama mewaruꞌ to malóe hai mababe ntepuꞌu to biásá rapakeꞌ ánáꞌ datu to ánáꞌntawine maniheꞌ. 19 I pesuwuꞌna, Tama moawui wuáꞌna hai mohepaꞌ waruꞌna haneꞌi mesuleꞌ lao i támbina. Ia moháláꞌ lindoꞌna hai taena, hai teriaꞌ napasimbuku.
20 Kanaitána, Abisalo wutuꞌna mekuneꞌ miꞌi i hia, nauliꞌ, “Moapa riꞌi? Ineeꞌ mpuꞌu nadáiꞌimokoꞌ Amono wutuꞌmu. Deꞌe-deꞌe, maniiꞌmokoꞌ. Tiꞌara paꞌi Amono iti wutuꞌmumonto. Ineeꞌ gaga nuposusa lalu apa to mewaliꞌ miꞌi i hio.” Mantepuꞌu hangko ionoꞌ, Tama toroꞌ haduduána i támbina Abisalo.
21 Kanahádina Daudiꞌ apa to mewaliꞌ iti, rumihi ntepuꞌu kamabukoꞌna. 22 Abisalo mepailalu peá, hai tiꞌara piꞌi mau molaluita hai Amono, ánti podáiꞌina miꞌi Tama ádina.
Abisalo mopapate Amono
23 Rompare hangko ionoꞌ, Abisalo mopaꞌara posusa láwiꞌ wulu dimbána ragundiꞌ i Baꞌal-Hasoa hungkuꞌ i wánuá Eparai, hai mokióꞌheꞌ upu-upu ánáꞌ datu tobaleilo. 24 Abisalo lao i Datu Daudiꞌ hai molaluita, nauliꞌ, “Umaꞌ, kódóꞌ hawiꞌmu deꞌe ina mopaꞌara posusa, láwiꞌ mogundiꞌaꞌ wulu dimbá. Kupembiáꞌ i datu bona mai i posusaꞌá iti hingkakani hai tauna to mapángkáꞌ lántiꞌraꞌ i kadatuá.”
25 Agáiáná mehániꞌ datu, nauliꞌ, “Ineeꞌ ánáꞌkuꞌ, láwiꞌ ane laoangkaiꞌ upu-upu, ina kipamapárikoꞌ.” Abisalo mopasimbuku oaꞌ umána bona mouláꞌ susa pogundiꞌ wulu dimbá, agáiáná datu tiꞌara mau lao, ngkáliꞌna riꞌi nawátiꞌ peá.
26 Roo onoꞌ, molaluita wopiꞌi Abisalo, nauliꞌ, “Ane noꞌonoꞌi, kupembiáꞌ bona nupaliu Amono halalungkuꞌ lao hingkakani hai kaiꞌ.”
Agáiáná mekuneꞌ datu, “Moapa riꞌi haneꞌi ia riꞌi to lao?”
27 Agáiáná ánti kamepári-párina oaꞌ Abisalo, kahópóꞌána Daudiꞌ mopaliu ánáꞌnaheꞌ tobaleilo tepasuaꞌ Amono, lao hingkakani hai Abisalo.
28 I posusa iti, Abisalo mampohawaꞌáheꞌ taunána, nauliꞌ, “Nipeita maroꞌa-roꞌa. Ane malangu miꞌi Amono, ina kupárentáikou node: ‘Nipapate!’ Ineeꞌkou malááꞌ mopapate, láwiꞌ kódóꞌ to mopárentáikou. Nipakaróhó lalumi hai nipatongawaꞌ kakómuna miꞌi tauna to keate.” 29 Mewaliꞌ mopapate mpuꞌuheꞌ Amono. Karaitána peá ánáꞌ datu to ntániꞌna Amono rapapate miꞌi, meángkáꞌheꞌ, mosaweꞌiheꞌ dáráraꞌ hai melangkaheꞌ.
30 Tangaꞌraꞌ mani i polumaoáraꞌ, ara miꞌi bámbári haweꞌ i Daudiꞌ node: “Abisalo mopapateheꞌ upu-upu ánáꞌ datu, tiꞌara haweꞌ hadua to mentárá.” 31 Onoꞌ miꞌi haneꞌi meángkáꞌ miꞌi Datu Daudiꞌ, mohepaꞌ waruꞌna, hai mopálumbá i daula, hai upu-upu topobágóꞌna mohepaꞌheꞌ woꞌo waruꞌraꞌ. 32 Roo onoꞌ, molaluita miꞌi Ionada ánáꞌna Simea wutuꞌna Daudiꞌ, nauliꞌ, “Ineeꞌ masusa lalumu, ba nupekiri upu-upu ánáꞌmu matemoheꞌ. To mate, bateꞌna peá Amono, láwiꞌ ia miꞌi to natunggái Abisalo hungkáꞌna Tama ádina nasilakai Amono. 33 Mewaliꞌ ineeꞌ nupoinálái bámbári to manguliꞌ ánáꞌmu iti matemoheꞌ upu-upu, láwiꞌ to mate bateꞌna peá Amono.”
34 Tempó iti, Abisalo melangka miꞌi.
Tempóna to mokámpái bente kótá moita ngkaraoꞌ, ia moita handaꞌ tauna to handaꞌ molumao i biti buluꞌ hangko i Horonai monóntóhiheꞌ Ierusale. 35 Roo onoꞌ, molaluita miꞌi Ionada i datu, nauliꞌ, “Peita, ánáꞌnaheꞌ datu itimoheꞌ mai! Toꞌu apa to kuꞌuliꞌ ininá.”
36 Karoona molaluita, haweꞌmoheꞌ ánáꞌna datu iti. Teriaꞌheꞌ rapasimbuku. Noꞌonoꞌ woꞌo datu hai topobágóꞌna, rumihi kateriaꞌraꞌ.
37-38 Abisalo melangka miꞌi lao i Talamai ánáꞌna Amihu,b datu i tampoꞌ Gesuri, hai toroꞌ ionoꞌ tálu parena kamaruena.