Abisalo mesuleꞌ i Ierusale
14
Ioabiꞌ ánáꞌna Seruiaa moisá miꞌi kamabilana Datu Daudiꞌ i Abisalo, 2 onoꞌ haneꞌi nahuoꞌ tauna lao i wánuá Tekoa,b lao mokióꞌ hadua towawine to bukeꞌ timbá. I kahaweꞌna, nauliꞌ Ioabiꞌ i towawine iti, “Hangaa-ngaa mampe to wiorakoꞌ, mewaruꞌkoꞌ waruꞌ ngkasusa lalu, hai ineeꞌkoꞌ mewongi-wongi. Nubábehi nodokoꞌ hadua towawine to marue miꞌi motóráꞌ tauna to mate. 3 Roo onoꞌ, laomokoꞌ i datu haneꞌi nupahaweꞌá apa to ina kuhángáꞌáꞌákoꞌ.” Mewaliꞌ napaturoꞌ miꞌi Ioabiꞌ apa to ina napolaluita towawine iti i datu.4 Mewaliꞌ lao mpuꞌu miꞌi towawine iti i datu, hai kahaweꞌna, molingkudu hai molaluita, nauliꞌ, “Pueꞌkuꞌ datu to kubiláꞌ, tulungiaꞌ wongkódóꞌá.” 5 Mekuneꞌ datu, “Apa to nuparaluu?”
Mehániꞌ towawine iti, “Kódóꞌ deꞌe hadua towawine to bembaꞌ láwiꞌ toámángkuꞌ mate miꞌi. 6 Hawiꞌmu deꞌe moánáꞌ rodua tobaleilo, agáiáná mohakaꞌheꞌ i pádá. Ánti katiꞌárána ara to mogááꞌheꞌ, mewaliꞌ hadua mobóbáꞌ to haduána hai napapate. 7 Deꞌe-deꞌe upu-upuheꞌ tinángkuꞌ rapoewaliámoꞌ, hai rauliꞌ, ‘Nihuhuꞌ miꞌi i kaiꞌ to mopapate halaluna iti, bona kipapate woꞌo moháwángi kamopapatena halaluna iti, hai ina kipatuna miꞌi pueꞌ sosora iti.’ Mewaliꞌ ina mopatunaheꞌ pemuleꞌángkuꞌ to mentárá iti, álána tiꞌara piꞌi ina ara pemuleꞌána toámángkuꞌ i duniáꞌ deꞌe hai hangaꞌna ina matántá.”
8 Mewaliꞌ molaluita miꞌi Daudiꞌ i towawine iti, nauliꞌ, “Mesuleꞌmokoꞌ i katoroꞌámu. Ina kuꞌurusi kara-kara deꞌe.”
9 Mehániꞌ towawine iti, nauliꞌ, “Ó pueꞌkuꞌ datu, kódóꞌ hai tinángkuꞌ to ina mokili kamasalaꞌ iti {láwiꞌ tiꞌara kuhuhuꞌ ánáꞌkuꞌ to tueꞌ mani bona rahuku mate mopaháwángi kanapapatena miꞌi ádina}. Agáiáná datu hai tinána datu tiꞌara masalaꞌ {ane moámpungi ánáꞌkuꞌ iti}.”c
10 Mewaliꞌ molaluita miꞌi datu, nauliꞌ, “Ane arai tauna to mopamasusakoꞌ, nuánti mai tauna iti i kódóꞌ bona tiꞌarakoꞌ napakasusa.”
11 Nauliꞌ towawine iti, “Ane noꞌonoꞌi, kupembiáꞌ datu modándi i lalu hangaꞌna PUEꞌ, Pueꞌ Ala to nupenómbái, bona tauna to ina moháwángi kamatena ánáꞌkuꞌ iti, tiꞌaraheꞌ mobábehi dake to mahile hai mopapate ánáꞌkuꞌ to haduána.”
Nahániki datu, “Kudándi miꞌi i lalu hangaꞌna PUEꞌ Ala to tueꞌ, tiꞌara ara to ina mobábehi ba apa peá i ánáꞌmu iti.”
12 Roo onoꞌ, nauliꞌ towawine iti i datu, “Ane peisá molaluita maniaꞌ hampaiꞌ i pueꞌkuꞌ datu.”
Nauliꞌ datu, “Maroꞌa.”
13 Mewaliꞌ molaluita miꞌi towawine iti, nauliꞌ, “Moapa riꞌi haneꞌi datu moliwo to noꞌonoꞌ i taunána Pueꞌ Ala? Laluita to nahuwárá datu ininá mopatongawaꞌ kamasalaꞌna datu, láwiꞌ ánáꞌna datu to nutibe miꞌi tiꞌara nupaliu mesuleꞌ. 14 Manótó kitaꞌ upu-upu ina mate, nodo uwai to tebubuha i tampoꞌ tiꞌara peisá rarámpu huleꞌ. Agáiáná tiꞌara noꞌonoꞌ pekirina Pueꞌ Ala. Ngkáliꞌna riꞌi, tauna to karaoꞌ hangko i Hia, Naundeꞌ bona ara ráráraꞌ mesuleꞌ.
15 Mewaliꞌ deꞌe-deꞌe, maiaꞌ mopahaweꞌ laluita deꞌe i pueꞌkuꞌ datu, láwiꞌ handaꞌ halalungkuꞌ to mampopalááꞌmoꞌ. Onoꞌ haneꞌi kupekiri node: Maroꞌa ane molaluitaꞌaꞌ hampaiꞌ i datu, babilaꞌ datu ina mampokana pembiáꞌkuꞌ deꞌe. 16 Láwiꞌ pueꞌkuꞌ datu ina mampehádingiaꞌ, hai ina mokábáháꞌaꞌ hangko i taeraꞌ tauna to ina mopapateaꞌ hingkakani hai ánáꞌkuꞌ. Tunggáiáraꞌ ina rawuraꞌangkaiꞌ hangko i tampoꞌ to naweꞌiheꞌ PUEꞌ Ala i taunána. 17 Kupekiri woꞌo node: Laluitana pueꞌkuꞌ datu ina mopatinda lalungkuꞌ, láwiꞌ datu nodo malaꞌekana Pueꞌ Ala, to naisá mampopontaniꞌ to maroꞌa hai to kadake. Hai kupembiáꞌ bona PUEꞌ Ala to kupenómbái mowátiꞌkoꞌ.”
18 Roo onoꞌ, molaluita miꞌi datu i towawine iti, nauliꞌ, “Maroꞌa. Ineeꞌaꞌ nuwuniángi hánikina apa to ina kupekuneꞌ i hio.”
Nauliꞌ towawine iti, “Pueꞌkuꞌ datu, mekuneꞌmokoꞌ i kódóꞌ.”
19 Haneꞌi mekuneꞌ miꞌi datu, nauliꞌ, “Upu-upu laluitamu ininá, ara napesuaꞌi Ioabiꞌ?”
Mehániꞌ towawine iti, nauliꞌ, “Tiꞌaraꞌaꞌ ina mengkairawa hangko i pekuneꞌna datu. Toꞌu, pueꞌkuꞌ, napaturoꞌámoꞌ aha Ioabiꞌ apa to hangaa-ngaa kubábehi hai kupolaluita. 20 Tunggáiána Ioabiꞌ mobábehi noꞌonoꞌ, bona kara-kara to pewaliꞌ deꞌe, maroꞌa kahópóꞌána, láwiꞌ pueꞌkuꞌ miꞌi datu to bukeꞌ timbá nodo malaꞌekana Pueꞌ Ala, to moisá hinángkáꞌ to mewaliꞌ i duniáꞌ.”
21 Roo onoꞌ, datu mokióꞌ Ioabiꞌ, nahángáꞌá node: “Peundeꞌámu iti ina kupeuláꞌi. Lao mai nuala Abisalo iti.”
22 Molingkudu miꞌi Ioabiꞌ motóngkóꞌ haweꞌ i tampoꞌ i bitina Daudiꞌ, nauliꞌ, “Kupembiáꞌ bona PUEꞌ Ala mowátiꞌ datu. Alo deꞌe, kuisá miꞌi kanapogóeꞌkuꞌ pueꞌkuꞌ datu, láwiꞌ pueꞌkuꞌ mopabukeꞌi miꞌi pembiáꞌna huoꞌána deꞌe.” 23 Roo onoꞌ, meángkáꞌ miꞌi Ioabiꞌ lao i tampoꞌ Gesuri bona moánti Abisalo mesuleꞌ i Ierusale.
24 Agáiáná nauliꞌ datu, “Ia hangaa-ngaa toroꞌ i támbina haduduána, tiꞌara kuꞌundeꞌ moita ánáꞌkuꞌ iti.” Mewaliꞌ mesuleꞌ miꞌi Abisalo i támbina, agáiáná tiꞌara lao mampohidupaꞌá datu.
25 I humalele tampoꞌ Sáráeliꞌ, tiꞌara ara hasibaliána Abisalo. Ia ratóiá ánti kamalápákána. Hangko i pálántáꞌ bitina haweꞌ-haweꞌ i tutuꞌ wuáꞌna, upu-upuna maroꞌa ntepuꞌu. 26 Weluáꞌna magumbu, hai biásá nabóhóki hangkani i lalu hampare láwiꞌ matimi gaga nahádi. Pobóhókiána weluáꞌna iti melábi hangko i rokiló mouláꞌ popetimbána datu.
27 Abisalo araheꞌ tálu ánáꞌna tobaleilo, hai hadua ánáꞌna towawine to rahangaꞌ Tama. Ia malásáꞌ ntepuꞌu.
28 Gáná miꞌi rompare Abisalo toroꞌ i Ierusale, hai tiꞌara haweꞌ hangkani lao i datu, 29 onoꞌ miꞌi haneꞌi Abisalo mampopeala Ioabiꞌ, láwiꞌ ia mohárungá Ioabiꞌ ina moánti tewáina i datu, agáiáná Ioabiꞌ tiꞌara mau lao i Abisalo. Mewaliꞌ napopekióꞌ wopiꞌi, agáiáná bateꞌ-bateꞌna tiꞌara lao. 30 Hangko ionoꞌ, molaluita miꞌi Abisalo i huoꞌánaheꞌ, nauliꞌ, “Hinoena Ioabiꞌ to natudaꞌi pare, aranto i hintáiꞌna hinoengkuꞌ. Lao miꞌi nihunu.” Mewaliꞌ lao mpuꞌumoheꞌ huoꞌána Abisalo mohunu hinoe iti.
31 Hangko ionoꞌ, lao miꞌi Ioabiꞌ mampombelámbiꞌá Abisalo i támbina, hai mekuneꞌ i hia, nauliꞌ, “Moapa riꞌi haneꞌi huoꞌámuheꞌ mohunu hinoengkuꞌ?”
32 Mehániꞌ Abisalo, “Mohuoꞌmoꞌ tauna laokoꞌ mokióꞌ, agáiáná tiꞌarakoꞌ mau mai, mole riꞌi tunggáiángkuꞌ bona kuhuoꞌkoꞌ lao i datu, hai nupekuneꞌ node: ‘Apa bunduꞌkuꞌ mai hangko i tampoꞌ Gesuri? Rángingkuꞌ miꞌi toroꞌ peaꞌ ionoꞌ.’ Mewaliꞌ deꞌe-deꞌe kupoinao lao i datu. Ane masalaꞌaꞌ, tiꞌaranto moapa ane nahuku mateaꞌ datu.”
33 Mewaliꞌ lao mpuꞌu miꞌi Ioabiꞌ i datu hai mopahaweꞌ pembiáꞌna Abisalo. Hangko ionoꞌ, Datu Daudiꞌ mokióꞌ Abisalo hai lao mpuꞌu miꞌi Abisalo molingkudu motóngkóꞌ haweꞌ i bitina datu. Datu modupaꞌ Abisalo haneꞌi naꞌángki.