Abisalo moliwo ina moewaꞌ Datu Daudiꞌ
15
Bahangapa kamaruena hangko ionoꞌ, Abisalo mopatimama hambuaꞌ kereta pombeala hai dárá, hai lima puloꞌna tauna bona melangkaheꞌ ioruna. 2 Alo-alona mearó mepulo-pulo lao meángkáꞌ i wiwi rárá to menóntó i babaꞌá pesuaꞌá kótá. Heáná peá topoliu to ina lao mopahaweꞌ kara-karana i datu, tauna iti nakióꞌ Abisalo, napekuneꞌ, “Hangko iumbákoꞌ mai?” Ane tauna iti mohániki, “Hawiꞌmu deꞌe toSáráeliꞌaꞌ,” haneꞌi mopahaweꞌ hangaꞌna wánuána, 3 Abisalo molaluita, nauliꞌ, “Pehádingi! Kara-karamu iti toꞌu hai hintotoꞌ rabutusi, agáiáná tiꞌara haweꞌ hadua sulewátána datu to ina mampehádingikoꞌ.”4 Hai molaluita wopiꞌi Abisalo, nauliꞌ, “Kekódóꞌi to ralántiꞌ mewaliꞌ topobutusi i tampoꞌ deꞌe, upu-upu tauna to ara kara-karana, ba tauna to ara posisalaꞌraꞌ, peisáheꞌ mai i kódóꞌ, hai kódóꞌ to mourusi kara-kararaꞌ i kanótó-nótóána.”
5 Ane ara tauna to lao mehungkuki ina motóngkóꞌ i bitina, Abisalo moꞌónáꞌ taena, mokápui tauna iti haneꞌi naꞌángki. 6 Rárá itimiꞌe to nabábehi Abisalo i upu-upu toSáráeliꞌ to ina laoheꞌ membiáꞌ bona datu mopáresáꞌ kara-kararaꞌ i kanótó-nótóána. Noꞌonoꞌ miꞌi rárána Abisalo moala laluraꞌ toSáráeliꞌ.
7 Liu miꞌi iba parena, molaluita miꞌi Abisalo i Datu Daudiꞌ, nauliꞌ, “Umaꞌ! Nupaliuaꞌ lao i Hebero mobukeki dándingkuꞌ i PUEꞌ, 8 láwiꞌ tempóngkuꞌ mani toroꞌ i Gesuri i tampoꞌraꞌ toÁrá, modándiaꞌ node: Ane napaliuaꞌ PUEꞌ mesuleꞌ i Ierusale, ina laoaꞌ i Hebero bona ionoꞌ menómbáꞌaꞌ i PUEꞌ.”
9 Molaluita miꞌi Datu Daudiꞌ i hia, nauliꞌ, “Laomokoꞌ. Maroꞌa-roꞌakoꞌ i rárá,” mewaliꞌ mangkádipurá mpuꞌu miꞌi Abisalo haneꞌi pohuꞌ lao i Hebero.
10 Agáiáná hangko tiꞌara mani mesabiꞌ i Datu Daudiꞌ, Abisalo mohuoꞌmoheꞌ huoꞌána lao i humalele tináraꞌ toSáráeliꞌ, moántiheꞌ laluita to manguliꞌ node: “Ane nihádi miꞌi tamburuꞌ mokániꞌ, mohoraꞌ-horaꞌmokou niuliꞌ, ‘Abisalo mewaliꞌ miꞌi datu i Hebero!’ ” 11 Hangko i Ierusale, ara rongatu tauna to meuláꞌ i Abisalo. Kalaoraꞌ iti, tiꞌara raisá apa tunggáiána Abisalo, hai tiꞌara naduuꞌ pekiriraꞌ apa to ina mewaliꞌ.
12 I tempóna Abisalo ina mohuhuꞌ popenómbána i Pueꞌ Ala, ia mohuoꞌ tauna lao i wánuá Gilo moala Ahitope. Tauna iti hadua topepatentena Datu Daudiꞌ. Ánti kahaweꞌna Ahitope, tunggáiána Abisalo to kadake iti mewaliꞌ maróhó hai kahandaꞌ-handaꞌáheꞌ tauna meuláꞌ i hia.
Daudiꞌ melangka hangko i kótá Ierusale
13 Roo onoꞌ, haweꞌ miꞌi hadua tauna mopahaweꞌ bámbári i Datu Daudiꞌ, nauliꞌ, “ToSáráeliꞌ meuláꞌmoheꞌ i Abisalo.”
14 Hangko ionoꞌ, molaluita miꞌi Daudiꞌ i upu-upu topobágóꞌna to ara hingkakani hai ia i Ierusale, nauliꞌ, “Mangkádipurákou. Hangaa-ngaa melangkakeꞌ hangko ieneꞌ bona tiꞌarakeꞌ nalámbiꞌ Abisalo. Hawiáꞌkeꞌ! Tiꞌara piꞌi marue ina haweꞌ miꞌi. Hawiáꞌ-wiáꞌkeꞌ. Ane nadápáꞌkeꞌ hai nanangikeꞌ, upu-upu to i kótá deꞌe ina napapate.”
15 Topobágóꞌnaheꞌ datu molaluita i hia, rauliꞌ, “Pueꞌkiꞌ datu peá to mopakanótó! Kaiꞌ deꞌe, apa to nauliꞌ datu, iti miꞌi to kipeuláꞌi.”
16 Hangko ionoꞌ, pohuꞌ miꞌi datu rauláꞌ upu-upu tinána hai topobágóꞌna i kadatuána, bateꞌna perái hampuloꞌ towawine to napiaraꞌ to napálehi bona mokádipuráheꞌ támbi kadatuá.
17 Tangaꞌraꞌ datu hai tauna to meuláꞌ i hia molumao mopálehi kótá Ierusale, mengkarooheꞌ hungkuꞌ i támbi to kahópóꞌána. 18 Upu-upu topobágóꞌna to mamporángá datu molumaoheꞌ melempó i datu, noꞌonoꞌ woꞌo topokámpái datu, iamoheꞌ toKereti hai toPeleti.a Araheꞌ woꞌo ini áturaꞌ surudadoꞌ hangko i kótá Gatib to mouláꞌ datu. Molumaoheꞌ woꞌo moliungi Daudiꞌ.
19 Mewaliꞌ, mekuneꞌ miꞌi datu i Itai, tadulakoraꞌ surudadoꞌ hangko i Gati, nauliꞌ, “Moapa riꞌi haneꞌi molumaokoꞌ woꞌo hingkakani hai kaiꞌ? Rángina miꞌi mesuleꞌkoꞌ i kótá Ierusale, hai toroꞌkoꞌ hai Abisalo, datu to woꞌu, láwiꞌ tohaweꞌ pekoꞌ, pelumbuꞌna miꞌi io tauna to ratibekoꞌ hangko i tampoꞌmu. 20 Tiꞌara manikoꞌ marue ieneꞌ. Tiꞌara maroꞌa ane alo deꞌe kuwáwáhákoꞌ molilo hingkakani hai kaiꞌ. Mogalo riꞌi kódóꞌ, tiꞌara kuisá iumbá kalaoángkuꞌ. Mewaliꞌ mesuleꞌmokoꞌ lao i Ierusale, hai nuántiheꞌ woꞌo halalumu. Kupembiáꞌ i PUEꞌ bona Ia mopatongawaꞌ kamaꞌahiꞌNa hai katetidaꞌna i hio.”
21 Agáiáná nahániki Itai, “Modándimoꞌ i lindoꞌna PUEꞌ, hai i lindoꞌna pueꞌkuꞌ datu, iumbá kalaoána datu, maroꞌa tueꞌ ba mate, ionoꞌaꞌ woꞌo hawiꞌmu.”
22 Nauliꞌ Daudiꞌ, “Maroꞌa. Ane noꞌonoꞌi, molumaokoꞌ.” Mewaliꞌ molumao mpuꞌu miꞌi Itai toGati hingkakani hai surudadoꞌna hai upu-upu tináraꞌ to meuláꞌ i hia.
23 Upu-upu tauna to moitaheꞌ, teriaꞌheꞌ rapasimbuku i tempóraꞌ surudadoꞌna Daudiꞌ hai tauna to meuláꞌ i hia mopálehi kótá Ierusale. Hai datu woꞌo moweta i uwai Kidero haneꞌi upu-upuheꞌ monóntóhi pádá loriꞌ.
24 Tadulako menómbá Sadoꞌ hai Abiata araheꞌ woꞌo ionoꞌ hingkakani hai toLewi to moántiheꞌ Petiꞌ Podándina Pueꞌ Ala. Petiꞌ iti rapatóá, hai tiꞌara mani raꞌángkáꞌ ane tiꞌara mani upu tauna limba. 25 Mewaliꞌ molaluita datu i Sadoꞌ, nauliꞌ, “Ántimode Petiꞌ Podándina Pueꞌ Ala iti mesuleꞌ i kótá Ierusale. Ane napokagóeꞌ maniaꞌ PUEꞌ, bateꞌna ina Napaliu maniaꞌ mesuleꞌ hai moita mani Petiꞌ Podándi iti hai katoroꞌána. 26 Agáiáná ane Ia manguliꞌ, ‘Tiꞌarapokoꞌ Kuꞌundeꞌ,’ ina kupaisarenga perái i Hia apa peundeꞌáNa i kódóꞌ.”
27 Datu mopaliliu laluitana i Sadoꞌ, nauliꞌ, “Mewaliꞌ io hai Abiata, mesuleꞌmokou i kótá hingkakani hai Ahimasa ánáꞌmu hai Ionata ánáꞌna Abiata, bona tiꞌara ara to mewaliꞌ i kómu. 28 Bona niꞌisá, ina mepegiaꞌaꞌ hungkuꞌ i pengkalimbaꞌá i pádá loriꞌ duuꞌna ara bámbári hangko i kómu.” 29 Hangko ionoꞌ, Sadoꞌ hai Abiata moántiheꞌ Petiꞌ Podándina Pueꞌ Ala iti mesuleꞌ i Ierusale hai toroꞌheꞌ ionoꞌ.
30 Daudiꞌ teriaꞌ ngkalao mempanaiꞌ i buluꞌ Saitu, ia motótókungi wuáꞌna hai mopósu sapatuꞌna ánti kawiorana laluna. Noꞌonoꞌheꞌ woꞌo tauna to meuláꞌ i hia, hadua-haduaheꞌ motótókungiheꞌ wuáꞌraꞌ hai teriaꞌheꞌ ngkalao mempanaiꞌ. 31 Ara to mopahaweꞌ i Daudiꞌ, “Ahitope hadua topepatentemu moewaꞌkoꞌ hai deꞌe-deꞌe meuláꞌ i Abisalo.” Onoꞌ miꞌi haneꞌi Daudiꞌ mekakae node: “Ó PUEꞌ, Nubáliki laluitana Ahitope bona tiꞌara mewaliꞌ tunggáiána.”
32 Kahaweꞌna Daudiꞌ i tutuꞌ buluꞌ Saitu i katoroꞌá to biásá rapakeꞌ tauna menómbá i Pueꞌ Ala, haweꞌ miꞌi Husai toAki mampombelámbiꞌá Daudiꞌ. Ia mewaruꞌ to mahepaꞌ hai moawui miꞌi wuáꞌna. 33 Nauliꞌ Daudiꞌ, “Ane meuláꞌkoꞌ i kódóꞌ, ina masusa kuhádi. 34 Agáiáná maroꞌa ane mesuleꞌkoꞌ i kótá Ierusale, nupahaweꞌ i Abisalo node: ‘Datu, kódóꞌ deꞌe huoꞌámu. Hangkoia huoꞌánaꞌaꞌ umámu, agáiáná deꞌe-deꞌe kódóꞌ mewaliꞌaꞌ huoꞌámu.’ Mewaliꞌ ane nubábehi noꞌonoꞌ, peisáꞌaꞌ nutulungi, hai mosalempori paturoꞌna Ahitope bona Abisalo tiꞌara mampeuláꞌi. 35 Sadoꞌ hai Abiata tadulako menómbá, ina araheꞌ woꞌo hingkakani hai io i Ierusale. Nupahaweꞌáheꞌ hinángkáꞌ to nuhádi i lalu támbi kadatuá. 36 Bona nuisá, ionoꞌ araheꞌ woꞌo ánáꞌraꞌ rodua, iamoheꞌ Ahimasa ánáꞌna Sadoꞌ hai Ionata ánáꞌna Abiata. Mewaliꞌ ánáꞌntomoaneheꞌ iti peisá rahuoꞌ mai i kódóꞌ bona rapahaweꞌáꞌaꞌ hinángkáꞌ to nuhádi.”
37 Hangko ionoꞌ mesuleꞌ miꞌi Husai balena Daudiꞌ iti lao i Ierusale, hai ia haweꞌ i kótá iti i tempó to hibali hai kahaweꞌna Abisalo.