Daudiꞌ mohidupaꞌ hai Siba
16
Kapohuꞌna peá Daudiꞌ hangko i tutuꞌ buluꞌ, haweꞌ miꞌi Siba hawiꞌna Mepibose mampombelámbiꞌá. Ia moánti rombaꞌa kalide to napopasawiꞌi rótiꞌ rongatu wuaꞌna, hangatu wulina wuaꞌ anggoroꞌ to rapabangi, hangatu wuaꞌna wuaꞌngkau to mangka miꞌi, hai hambuaꞌ pemboliá uwai anggoroꞌ.2 Mewaliꞌ mekuneꞌ miꞌi datu i Siba, nauliꞌ, “Apa tunggáiámu moánti mai hinángkáꞌna deꞌe?”
Mehániꞌ Siba, “Kalide deꞌe kuántiá mai datu bona napesaweꞌi tinána datu. Rótiꞌ hai wuaꞌ anggoroꞌ deꞌe kuántiáheꞌ mai taunámu bona raꞌandeꞌ, hai uwai anggoroꞌ deꞌe peisá rainu taunámu ane mawonggoꞌmoheꞌ i pádá loriꞌ.”
3 Hangko ionoꞌ, mekuneꞌ datu, nauliꞌ, “Iumbá miꞌi Mepibose ueꞌna Saulu tuámu?”
Mehániꞌ Siba, “Ia ara mani i Ierusale, láwiꞌ nauliꞌ, ‘I alo deꞌe, toSáráeliꞌ ina mampopesuleꞌheꞌ kadatuána pueꞌkuꞌ i kódóꞌ.’ ”
4 Mewaliꞌ molaluita miꞌi datu i Siba, nauliꞌ, “Ane noꞌonoꞌi, hinángkáꞌ to ara i Mepibose io miꞌi pueꞌna.”
Nauliꞌ Siba, “Mengkoruꞌaꞌ i hio. Hampóáꞌworia kupokagóeꞌkoꞌ oaꞌ datu.”
Simei hai Daudiꞌ
5 Kahaweꞌna Daudiꞌ i wánuá Bahuri, haweꞌ miꞌi hadua tauna hangko i wánuá iti, hai mohungkuki datu. Tauna iti hangaꞌna Simei ánáꞌna Gera, hadua hangko i tinána Saulu. Ia mokambo datu, 6 hai mowatui Daudiꞌ hai upu-upu topobágóꞌnaheꞌ, kehapiꞌ Daudiꞌ ratolelingi surudadoꞌna hai topokámpáina to keate ntepuꞌu. 7 Node laluitana Simei i datu: “Pohuꞌkoꞌ hangko ieneꞌ! Ee topepapate to kadake! Pohuꞌkoꞌ hangko ieneꞌ! 8 PUEꞌ moháwángi miꞌi i hio kamopapatemu tinána Saulu, tauna to nupaháwángi mewaliꞌ datu. PUEꞌ mampeweꞌi miꞌi kadatuámu i Abisalo ánáꞌmu. Deꞌe-deꞌe narampemokoꞌ kapári, láwiꞌ topepapatekoꞌ!”
9 Hangko ionoꞌ, molaluita miꞌi Abisai ánáꞌna Seruiaa i datu, nauliꞌ, “Moapa riꞌi haneꞌi ahu to mate iti peisá mokambo pueꞌkuꞌ datu? Ina lao kusambale hai kubóhóki támbólóna.”
10 Agáiáná nauliꞌ datu i Abisai hai Ioabiꞌ wutuꞌna, “Ee ánáꞌna Seruia. Moapa riꞌi haneꞌi nipesuaꞌi urusiángkuꞌ hai moewaꞌ peundeꞌángkuꞌ? Patodáhi ia mokamboaꞌ, láwiꞌ ane PUEꞌ to mohuoꞌ, heáná to pebáiꞌ mampekuneꞌ, ‘Moapa riꞌi haneꞌi nubábehi noꞌonoꞌ?’ ”
11 Roo onoꞌ, molaluita wopiꞌi datu i Abisai hai upu-upu topobágóꞌna, nauliꞌ, “Mogalo riꞌi paꞌi wátá ánáꞌkuꞌ haduduángkuꞌ, napári-pári mampeliꞌ ina mopapateaꞌ, pelumbuꞌna miꞌi toBenami deꞌe. Patodáhimode. Ineeꞌ nikóntó-kóntó. Ia mokamboaꞌ láwiꞌ PUEꞌ to mehuoꞌ mobábehi noꞌonoꞌ. 12 Babilaꞌ PUEꞌ ina moita kamapáringkuꞌ deꞌe, hai PUEꞌ to ina moháwángi roꞌa i kódóꞌ kambaꞌ háwángina pekambo i kódóꞌ alo deꞌe.”
13 Hangko ionoꞌ, Daudiꞌ hai taunánaheꞌ mopaliliuheꞌ polumaoraꞌ, agáiáná Simei meuláꞌ oaꞌ i biti buluꞌ. Tangaꞌna molumao ia mokambo, mowatui hai moawui datu. 14 Kahaweꞌraꞌ datu hai taunánaheꞌ i uwai Iarade, mawonggoꞌmoheꞌ haneꞌi mengkarooheꞌ ionoꞌ.
Husai hai Ahitope lao i Abisalo
15 Tempó iti woꞌo, Abisalo hai upu-upu toSáráeliꞌ haweꞌmoheꞌ i kótá Ierusale, tepasuaꞌ woꞌo Ahitope. 16 Kahaweꞌna Husai toAki balena Daudiꞌ iti i Abisalo, molaluita miꞌi nauliꞌ, “Tueꞌ miꞌi datu! Tueꞌ miꞌi datu!”
17 Mewaliꞌ mekuneꞌ miꞌi Abisalo i Husai, nauliꞌ, “Iumbá miꞌi katetidaꞌmu i Daudiꞌ balemu?”
18 Mehániꞌ Husai, nauliꞌ “Tiꞌara. Ina meuláꞌ peaꞌ i tauna to napileꞌi miꞌi PUEꞌ, to raꞌángkáꞌ miꞌi taunámu deꞌe hai upu-upu toSáráeliꞌ mewaliꞌ daturaꞌ. Ina tetidaꞌaꞌ i hia. 19 Pelumbuꞌna miꞌi, i heánámoꞌ ina mobágóꞌ? Tiꞌara paꞌi i ánáꞌna pueꞌkuꞌ? Noumbá kamampobágóꞌángkuꞌ umámu, noꞌonoꞌ woꞌo pobágóꞌkuꞌ i hio.”
20 Roo onoꞌ, molaluita miꞌi Abisalo i Ahitope, nauliꞌ, “Nuꞌuliꞌ miꞌi. Apa to hangaa-ngaa tabábehi?”
21 Mehániꞌ Ahitope, “Ara bahangapa towawine to napálehi umána bona mokádipuráheꞌ támbi kadatuá. Maroꞌa ane nupoiluhiheꞌ. Ane upu-upu toSáráeliꞌ mohádi kaꞌárána bábehiámu to nakáhihiꞌákoꞌ umámu, mewaliꞌ iti miꞌi to ina mopaꞌara kapebáiꞌraꞌ taunámu.”
22 Onoꞌ haneꞌi nabábehiá miꞌi Abisalo bambaruꞌ i wongko támbi kadatuá, hai ionoꞌ ia mampoiluhiheꞌ towawine to napiaraꞌ umána. Bábehiána iti raita mataheꞌ toSáráeliꞌ.b
23 I tempó iti, upu-upu paturoꞌna Ahitope rarekeꞌ maroꞌa, nodo to napahaweꞌ miꞌi Pueꞌ Ala, onoꞌ haneꞌi Abisalo mampeuláꞌi laluitana Ahitope, hibali hai Daudiꞌ.