Husai moháláꞌ tunggáiána Ahitope
17
Alo iti, Ahitope molaluita wopiꞌi i Abisalo, nauliꞌ, “Nupaliuaꞌ mopileꞌi tauna hampuloꞌ hai rosábu, bona i káindi deꞌe pemiꞌi mopatimamaꞌangkaiꞌ pohuꞌ modápáꞌ Daudiꞌ. 2 Ina kipombealaꞌá i tempóna mawonggoꞌ hai maledeꞌ. Ina kipatingkáráꞌ, hai upu-upu taunána ina melangkaheꞌ. Daudiꞌ peá to ina kipapate. 3 Agáiáná upu-upu surudadoꞌna ina kupopesuleꞌheꞌ mai i hio, nodo towawine to ratauna to mesuleꞌ i toámána. Láwiꞌ hadua peá to nupeliꞌ bona nupapate, agáiáná tauna ntániꞌna, tiꞌaraheꞌ ina moapa-apa.” 4 Tunggáiána Ahitope iti napokana Abisalo hai upu-upu totosaeraꞌ toSáráeliꞌ.5 Agáiáná kehapiꞌ noꞌonoꞌ, Abisalo molaluita, nauliꞌ, “Deꞌe-deꞌe hangaa-ngaa rakióꞌ woꞌo Husai toAki iti, bona tahádi woꞌo apa to ina napolaluita.” 6 I kahaweꞌna Husai i Abisalo, napahaweꞌ miꞌi Abisalo poliwona Ahitope, nauliꞌ, “Onoꞌ miꞌi tunggáiána Ahitope. Mewaliꞌ noumbá mouláꞌ pekirimu? Ba tapeuláꞌi ba tiꞌara? Ane tiꞌara, nupakanótó, babilaꞌ ara pekirimu ntaniꞌ.”
7 Nahániki Husai, “Deꞌe-deꞌe, tunggáiána Ahitope tiꞌara maroꞌa. 8 Io haduduámu moisá, umámu hai surudadoꞌnaheꞌ pebáiꞌ hai keateheꞌ. Nodoheꞌ beruá to matántá ánáꞌna. Pelumbuꞌna miꞌi umámu. Ia hadua tadulako pombeala to mapánde ntepuꞌu. Ia tiꞌara ina maturu hingkakani hai surudadoꞌnaheꞌ. 9 Bateꞌna deꞌe-deꞌe ia mebuni miꞌi i lalu balamba ba i katoroꞌá ntániꞌna. Ane rápáꞌna surudadoꞌmu mombeala hai Daudiꞌ hai araheꞌ to mate, mewaliꞌ heáná peá to mohádi bámbári iti ina manguliꞌ, ‘Surudadoꞌna Abisalo manangimoheꞌ.’ 10 Mogalo riꞌi surudadoꞌ to keate ntepuꞌu hai to pebáiꞌ nodo kapebáiꞌna singá, ina maledeꞌheꞌ ánti kamalááꞌraꞌ. Láwiꞌ upu-upu toSáráeliꞌ moisá, umámu iti tadulako pombeala, hai tauna to meuláꞌ i hia, tauna to keate.
11 Onoꞌ haneꞌi mouláꞌ kódóꞌ, to hangaa-ngaa nibábehi node: Nikióꞌheꞌ upu-upu surudadoꞌ toSáráeliꞌ, bona maiheꞌ morámpu i hio, mantepuꞌu hangko i kótá Daa tándáꞌ i wongko, haweꞌ i kótá Baraseba tándáꞌ i wóiꞌ, álána kahandaꞌraꞌ nodo kahandaꞌna wungi i wiwi tahiꞌ. Hai Abisalo, hangaa-ngaa meuláꞌkoꞌ woꞌo mombeala. 12 Ane talámbiꞌi i hamboloꞌ katoroꞌá, tapombealaꞌá nodo kamaránáꞌna namu i tampoꞌ, álána tiꞌara peisá melangka, maroꞌa ia, maroꞌa tauna to meuláꞌ i hia. 13 Hai ane mosuliꞌheꞌ i hambuaꞌ kótá, upu-upu taunántaꞌ ina moala gulaꞌ modiiꞌ watu bentena haweꞌ i lokeꞌna, duuꞌna watu to kókóiꞌ tiꞌara piꞌi ara i kótá iti.”
14 Karahádina laluitana Husai iti, Abisalo hai upu-upu toSáráeliꞌ manguliꞌ, “Poliwona Husai toAki iti maroꞌa mani hangko i poliwona Ahitope.” Rauliꞌ noꞌonoꞌ láwiꞌ napakanótó miꞌi PUEꞌ, poliwona Ahitope to katoꞌuána maroꞌa iti, tiꞌara ina mewaliꞌ, bona Abisalo molámbiꞌ rugiꞌ.a
Daudiꞌ pohuꞌ lao i Mahanai
15 Roo onoꞌ, Husai mopahaweꞌ i Sadoꞌ hai Abiata, tadulako-tadulako menómbá iti, kana i poliwona Ahitope hai laluitana haduduána i Abisalo hai i tadulakoraꞌ toSáráeliꞌ, 16 nauliꞌ, “Hawiáꞌ nihuoꞌ tauna lao mopahaweꞌ i Daudiꞌ node: ‘Ineeꞌkou hambengi i wiwi poweta-wetaꞌá uwai i pádá loriꞌ, agáiáná hangaa-ngaa hawiáꞌkou moweta i uwai Iarade. Ane tiꞌara, io hai surudadoꞌmuheꞌ ina rapapate upu-upu.’ ”
17 Ionata hai Ahimasa mampegiáheꞌ i En-Rogeli, i wiwi kótá Ierusale. Tiꞌaraheꞌ pebáiꞌ mesuaꞌ i kótá iti láwiꞌ malááꞌheꞌ raita tauna. Agáiáná biásá ara hadua hawiꞌ towawine to lao mopahaweꞌ bámbári i hira bona moántiheꞌ bámbári iti i Datu Daudiꞌ. 18 Agáiáná tempó iti, ara hadua ánángkóiꞌ tobaleilo to moitaheꞌ, hai mopahaweꞌ i Abisalo. Onoꞌ miꞌi haneꞌi Ionata hai Ahimasa manggagu pohuꞌ, hai mebuniheꞌ i támbina hadua tauna i Bahuri. I hintáiꞌ támbina iti ara tibubuꞌ, hai mebuniheꞌ i lalu tibubuꞌ iti. 19 Roo onoꞌ, toinána pueꞌ támbi iti moala báná nabinihi hai mohawuka pare i wongkona. Tiꞌara ara to moisá ara to mebuni.
20 Kahaweꞌraꞌ huoꞌána Abisalo i támbina towawine iti, mekuneꞌheꞌ, rauliꞌ, “Iumbámoheꞌ Ahimasa hai Ionata?”
Nahániki towawine iti, “Tiꞌara mani marue powetaraꞌ i uwai iti.” Hangko ionoꞌ, laoheꞌ mepeliꞌ, agáiáná tiꞌara ralámbiꞌ, onoꞌ miꞌi haneꞌi mesuleꞌheꞌ i Ierusale.
21 Katepohuꞌraꞌ tauna iti, Ahimasa hai Ionata mesuwuꞌheꞌ hangko i tibubuꞌ, hai laoheꞌ mohángáꞌá Datu Daudiꞌ node: “Pohuꞌmokoꞌ! Hawiáꞌ-wiáꞌkoꞌ mengkalimba i uwai deꞌe, láwiꞌ Ahitope moliwo ina motungka datu.” 22 Mewaliꞌ pohuꞌ mpuꞌu miꞌi datu hai upu-upuheꞌ tauna to meuláꞌ i hia, haneꞌi mowetaheꞌ i uwai Iarade.
23 Kanaisána pemiꞌi Ahitope katiꞌárána rapeuláꞌi laluitana, ia moala kalidena, nalámpiꞌi haneꞌi pohuꞌ lao i wánuána. Roo onoꞌ, ia mopawali aha hinángkáꞌ bágóꞌna, haneꞌi lao menoꞌo mengkálintóe. Noꞌonoꞌ daritána kamatena Ahitope, hai ia ratawu i popatawuána umána. 24 I tempóna Abisalo moweta i uwai Iarade hingkakani hai upu-upu surudadoꞌ toSáráeliꞌ to meuláꞌ i hia, haweꞌ miꞌi Daudiꞌ i kota Mahanai. 25 Abisalo molántiꞌ Amasa mopaháwángi Ioabiꞌ motadulakoi surudadoꞌna. Amasa ia miꞌi ánáꞌna Itera, hadua toSumaila to mampotoina Abigai ánáꞌna Nahasa, halaluna Seruia inána Ioabiꞌ. 26 Mewaliꞌ toSáráeliꞌ hai Abisalo mobambaruꞌheꞌ i tampoꞌ Gileaꞌ.
27 Kahaweꞌna Daudiꞌ i Mahanai, radupaꞌheꞌ Sobiꞌ ánáꞌna Nahasa, hangko i Raba wánuáraꞌ toAmoni, hai Maki ánáꞌna Amieli hangko i Lodeba, Barasilai toGileaꞌ hangko i Rogeli. 28 Moántiheꞌ aleꞌ, mangku hai kori. Moántiheꞌ woꞌo bailoꞌ, bahiꞌ, tinámpu, bailoꞌ to rahangge, hai tambue to malei. 29 Moántiheꞌ woꞌo tináháꞌ, susu, bekeꞌ, dimbá hai keju. Upu-upu to raꞌántiá Daudiꞌ hai taunánaheꞌ iti bona raꞌandeꞌ, láwiꞌ rauliꞌ, “Bateꞌna marimiheꞌ, mawonggoꞌ hai mangkadoꞌu, láwiꞌ molumaoheꞌ i pádá loriꞌ.”