Karanangina Abisalo hai kamatena
18
Daudiꞌ morámpuheꞌ surudadoꞌna to meuláꞌ i hia. Ia molántiꞌ bahangapa tauna to ina motadulakoiheꞌ to hasábu hai to hangatu. 2 Roo onoꞌ, pohuꞌmoheꞌ lao mombeala, hai nagáláꞌheꞌ tálu gáláꞌna. Hanggáláꞌ natadulakoiheꞌ Ioabiꞌ, hanggáláꞌ natadulakoiheꞌ Abisai ánáꞌna Seruia ádina Ioabiꞌ, hai to hanggáláꞌna natadulakoiheꞌ Itai toGati. Mewaliꞌ hangko ionoꞌ, molaluita miꞌi Daudiꞌ i taunánaheꞌ, nauliꞌ, “Kódóꞌ woꞌo ina meuláꞌaꞌ lao mombeala hingkakani hai kómu.”3 Agáiáná mehániꞌheꞌ surudadoꞌna, rauliꞌ, “Kipembiáꞌ bona datu ineeꞌ meuláꞌ mombeala, láwiꞌ ane tiꞌara piꞌi kidada mombeala, hai melangkaꞌangkaiꞌ ba matemongkaiꞌ hantángáꞌ, tiꞌaraꞌangkaiꞌ to ina rajpehaileꞌ ewálintaꞌ. Datu peá to rapeliꞌ, láwiꞌ datu hibali bunduꞌna hai hampuloꞌ sábungkiꞌ surudadoꞌ. Mewaliꞌ maroꞌa mani ane datu i kótá peá, timama motulungiangkaiꞌ.”
4 Hangko ionoꞌ, nahániki datu, “Apa to nipekiri maroꞌa, iti miꞌi to ina kubábehi.”
Mewaliꞌ meángkáꞌ miꞌi datu i hintáiꞌna babaꞌá kótá Mahanai, hai upu-upu surudadoꞌna molumaoheꞌ mesuwuꞌ mouláꞌ gáláꞌraꞌ to i áturaꞌ hai i sáburaꞌ. 5 Hai datu mopárentá Ioabiꞌ, Abisai hai Itai, rahádi woꞌo upu-upu surudadoꞌna, nauliꞌ, “Ánti kanibiláꞌkuꞌ, ineeꞌ nibelai Abisalo ánáꞌntomoane iti.”
6 Mewaliꞌ pohuꞌmoheꞌ surudadoꞌna Daudiꞌ lao mombeala hai toSáráeliꞌ, onoꞌ miꞌi haneꞌi mewaliꞌ pombeala i pándulu Eparai. 7 Surudadoꞌ toSáráeliꞌ ranangiheꞌ surudadoꞌna Daudiꞌ, hai i alo iti mewaliꞌ pombeala mahile, láwiꞌ ionoꞌ rompuloꞌ sáburaꞌ tauna mate. 8 Pombeala iti memburereꞌ i tampoꞌ iti, hai handaꞌ mani tauna to mate láwiꞌ ara to mepahurewuꞌ i pándulu haneꞌi to rapapate i pombeala.
9 Tiꞌara naisá-isá, Abisalo mohidupaꞌ hai bahangapa surudadoꞌna Daudiꞌ. Ia tangaꞌna mampopelangka kalidena. I poliuna kalidena i hiliꞌna kau to marumbu, kalidena melangka liliu álána tekáika wuáꞌna i dáꞌá kau iti hai tekálintóe wátána Abisalo i dáꞌá kau. 10 Tempó onoꞌ, ara hadua hangko i surudadoꞌna Daudiꞌ to moita, hai kásáliu lao napolaluita i Ioabiꞌ, nauliꞌ, “Tuá, ininá kuita Abisalo tetóe i kau to marumbu.”
11 Mehániꞌ Ioabiꞌ, “Apa? Nuita paꞌi? Moapa riꞌi tiꞌara nupapate pemiꞌi? Ane kenupapate, kehangaa-ngaa kuweꞌikoꞌ hampuloꞌ pepaꞌna dóiꞌ peráꞌ hai pámpóu hambuaꞌ.”
12 Agáiáná tauna iti mehániꞌ, “Kehapiꞌ miꞌi nuweꞌiaꞌ hasábu dóiꞌ peráꞌ, tiꞌaraꞌaꞌ mau mopamahái ánáꞌna datu, láwiꞌ upu-upuangkaiꞌ mohádi apa to napárentái datu i hio, i Abisa hai i Itai. Nauliꞌ, ‘Nikámpái Abisalo ánáꞌntomoane iti, láwiꞌ ia ánáꞌkuꞌ.’ 13 Ane kekupapatei Abisalo ininá, apa to mewaliꞌ iti bateꞌna ina nahádi datu, hai manótó tiꞌaraꞌaꞌ ina nuperuruꞌi.”
14 Agáiáná nauliꞌ Ioabiꞌ, “Gáná miꞌi! Tiꞌaraꞌaꞌ mau motibe-tibe tempó mombehániꞌ-hániꞌ hai io.” Tempó iti, Abisalo tueꞌ mani i kau katetóeána, mewaliꞌ Ioabiꞌ moala miꞌi tálu mátána tawalaꞌ hai lao motohuꞌ pondána Abisalo. 15 Roo onoꞌ, hampuloꞌ taunána Ioabiꞌ to moánti párewá pombealana, motolelingiheꞌ Abisalo, rabóbáꞌ-bóbáꞌ haweꞌ mate.
16 Roo onoꞌ, Ioabiꞌ motawueꞌ tamburuꞌ, álána mengkarooheꞌ surudadoꞌna modápáꞌ toSáráeliꞌ. 17 Wátámandoꞌna Abisalo raꞌala hai ratibe i lalu taroboꞌ to mahile i lalu pándulu. Taroboꞌ iti ratámbungi hai watu to handaꞌ.
Tempó iti woꞌo, upu-upu surudadoꞌ toSáráeliꞌ to meuláꞌ i Abisalo, melangkaheꞌ mesuleꞌ lao i wánuáraꞌ hadua-hadua.
18 I tempóna Abisalo tueꞌ mani, ia moala hambuaꞌ áriꞌi watu, napatindáꞌ i lembo Datu láwiꞌ tiꞌara ara ánáꞌna tobaleilo to peisá mopaꞌara pemuleꞌána. Watu pambuhinaoá iti nahangaꞌ mouláꞌ hangaꞌna haduduána, hai haweꞌ i karaukiꞌána sura deꞌe, raisá tauna watu iti ia miꞌi watuna Abisalo.
Kamatena Abisalo rapahaweꞌ i Daudiꞌ
19 Roo karapapatena Abisalo, Ahimasa ánáꞌna Sadoꞌ molaluita miꞌi i Ioabiꞌ, nauliꞌ, “Ane maroꞌai, kódóꞌ ina melangkaꞌaꞌ lao mopahaweꞌ bámbári to maroꞌa iti i datu, láwiꞌ PUEꞌ mopatongawaꞌ miꞌi kamanótóna datu, hai ia tekábáhá miꞌi hangko i taeraꞌ ewálina.”
20 Agáiáná nauliꞌ Ioabiꞌ, “Alo deꞌe, ineeꞌ io to mopahaweꞌ bámbári iti. Ane i alo ntániꞌna, io to mopahaweꞌ, agáiáná alo deꞌe tiꞌarakoꞌ peisá mopahaweꞌ bámbári, láwiꞌ ánáꞌna datu mate miꞌi.”
21 Hangko ionoꞌ, molaluita miꞌi Ioabiꞌ i hadua toEtiopia, nauliꞌ, “Io, laokoꞌ mopahaweꞌ i datu apa to nuita.” Motóngkóꞌ miꞌi toEtiopia iti i Ioabiꞌ haneꞌi melangka pohuꞌ.
22 Agáiáná Ahimasa ánáꞌna Sadoꞌ molaluita wopiꞌi i Ioabiꞌ, nauliꞌ, “Kehapiꞌ apa to mewaliꞌ, kupembiáꞌ bona nupaliuaꞌ woꞌo melangka motutuhá toEtiopia iti.”
Agáiáná nauliꞌ Ioabiꞌ, “Ánáꞌkuꞌ, moapa riꞌi haneꞌi rumihi gaga kanupári-páringkuꞌ? I poántimu bámbári iti, tiꞌarakoꞌ ina molámbiꞌ rasiꞌ.”
23 Mehániꞌ Ahimasa, “Tiꞌaranto moapa.”
Hangko ionoꞌ, nauliꞌ Ioabiꞌ, “Ane noꞌonoꞌi, laomokoꞌ.” Mewaliꞌ melangka mpuꞌu miꞌi Ahimasa mouláꞌ rárá i lembo Iarade, onoꞌ haneꞌi ia peisá mampehindorungi toEtiopia, álána ia to ioru haweꞌ i datu.
24 Tempó iti, Daudiꞌ mehoda i tangaꞌ, i hiliꞌna babaꞌá kótá tándáꞌ i rawa hai tándáꞌ i lalu, hai topekámpáina mengkaheꞌ i tukaꞌ lao i wongko babaꞌá bente kótá iti. Tangaꞌna mampepeita, ia moita ara hadua tauna to melangka mai. 25 Hangko ionoꞌ, mekióꞌ miꞌi topekámpái iti mopahaweꞌ i datu apa to naita iti, mewaliꞌ nauliꞌ datu, “Ane haduduána, lempóna bámbári to maroꞌa to naꞌánti.”
Tauna iti kahungkuꞌ-hungkuꞌá miꞌi, 26 agáiáná topekámpái iti moita ara to haduána to melangka mai, mewaliꞌ molaluita wopiꞌi, nauliꞌ, “Peita! Ara mani hadua to melangka mai.”
Mehániꞌ datu, “Hangaa-ngaa bámbári to maroꞌa woꞌo to naꞌánti.”
27 Roo onoꞌ, nauliꞌ topekámpái, “Ane kupeita pelangkana tauna to ioru mai iti, nodo pelangkana Ahimasa ánáꞌna Sadoꞌ.”
Nauliꞌ datu, “Ahimasa iti tauna to maroꞌa. Ia mai mopahaweꞌ bámbári to maroꞌa.”
28 Ahimasa mekióꞌ i datu, nauliꞌ, “Roꞌa ngkatueꞌ haweꞌ i datu!” I kahaweꞌna i datu, ia molingkudu miꞌi motóngkóꞌ haweꞌ i tampoꞌ i bitina datu, haneꞌi nauliꞌ, “Tetóiá miꞌi PUEꞌ Ala to nupenómbái! Ia mohuhuꞌmoheꞌ i hio tauna to moewaꞌ pueꞌkuꞌ datu.”
29 Mekuneꞌ datu, “Ba maroꞌa-roꞌanto Abisalo, tauna to maleheꞌ iti?”
Mehániꞌ Ahimasa, “Ininá tempóngkuꞌ nahuoꞌ Ioabiꞌ mai i hio, kuita pohewo to rumihi, agáiáná tiꞌara kuisá apa to mewaliꞌ.”
30 Nauliꞌ datu, “Laomokoꞌ meángkáꞌ ionoꞌ.” Mewaliꞌ lao mpuꞌu miꞌi Ahimasa meángkáꞌ ionoꞌ.
31 Roo onoꞌ, haweꞌ miꞌi toEtiopia haneꞌi nauliꞌ, “Pueꞌkuꞌ datu, ara bámbári to maroꞌa, láwiꞌ PUEꞌ mopatongawaꞌ miꞌi katiꞌárámu masalaꞌ, hai mokábáhá miꞌi pueꞌkuꞌ hangko i upu-upu tauna to moewaꞌkoꞌ.”
32 Agáiáná mekuneꞌ wopiꞌi datu i toEtiopia iti, nauliꞌ, “Ba maroꞌa-roꞌanto Abisalo, tauna to maleheꞌ iti?”
Nahániki toEtiopia iti, nauliꞌ, “Hampóáꞌworia upu-upu ewálina datu hai upu-upu tauna to moewaꞌ datu, hibaliheꞌ hai tauna to maleheꞌ iti.”
33 Tingkáráꞌ Daudiꞌ hai masusa laluna, onoꞌ miꞌi haneꞌi ia mengkaheꞌ i lintuꞌ to i wongkona babaꞌá bente kótá hai teriaꞌ. Ia molaluita ngkalao, nauliꞌ, “Ee Abisalo ánáꞌkuꞌ! Ánáꞌkuꞌ Abisalo! Rángina miꞌi kódóꞌ to mate mopaháwángikoꞌ ánáꞌkuꞌ. Ee ánáꞌkuꞌ Abisalo!”