Ioabiꞌ mokámbáróá Datu Daudiꞌ
19
Ara to lao mopahaweꞌ i Ioabiꞌ, nauliꞌ node: “Bona nuisá, datu teriaꞌ hai masusa laluna ánti kamatena Abisalo.” 2 I alo iti, penangi mewaliꞌ poteriaꞌ i upu-upu surudadoꞌ, láwiꞌ i alo iti surudadoꞌ mohádiheꞌ tauna manguliꞌ, “Masusa laluna datu ánti kamatena Abisalo ánáꞌna.” 3 Onoꞌ miꞌi haneꞌi i alo iti, surudadoꞌ mesuaꞌheꞌ ngkaniiꞌ-niiꞌ i lalu kótá, nodo surudadoꞌ to mahili láwiꞌ melangkaheꞌ mengkatueꞌ hangko i pombeala.4 Datu moháláꞌ lindoꞌna hai teriaꞌ napasimbuku, nauliꞌ, “Ee Abisalo ánáꞌkuꞌ, Abisalo ánáꞌkuꞌ, ánáꞌkuꞌ!”
5 Hangko ionoꞌ, Ioabiꞌ mesuaꞌ i lintuꞌ iti molaluita hai datu, nauliꞌ, “Ee datu, i alo deꞌe, mopakahiliákoꞌ surudadoꞌmu upu-upu. Hira to mampeámpárái katueꞌmu, hai katueꞌraꞌ ánáꞌmu tobaleilo hai towawine, toinámuheꞌ hai towawine to nupiaraꞌ. 6 Agáiáná nupomahile mani tauna to mokáhihiꞌkoꞌ, haneꞌi tauna to mampomahilekoꞌ nukáhihiꞌ, láwiꞌ alo deꞌe, tongawaꞌ tadulako surudadoꞌ hai surudadoꞌmuheꞌ tiꞌara mobunduꞌ i peitámu. Hai tongawaꞌ miꞌi woꞌo i kódóꞌ, ane rápáꞌna Abisalo to tueꞌ mani, hai kaiꞌ mateangkaiꞌ upu-upu, kegóeꞌ lalumu. 7 Mewaliꞌ deꞌe-deꞌe datu, hangaa-ngaa mesuwuꞌkoꞌ lao mopamaróhó laluraꞌ surudadoꞌmu. Kudándi miꞌi i lalu hangaꞌna PUEꞌ, ane tiꞌarakoꞌ mesuwuꞌ mampolaluitaꞌáheꞌ, deiná káindi tiꞌara piꞌi ina ara haweꞌ hadua to meuláꞌ i hio. Hai kapári to nulámbiꞌ iti ina rumihi mani hangko i upu-upu kapári to nulámbiꞌ miꞌi mantepuꞌu hangko i kaꞌánángkóiꞌmu haweꞌ deꞌe-deꞌe.”
8 Mewaliꞌ lao mpuꞌu miꞌi datu mehoda i babaꞌá kótá. I karapahaweꞌáraꞌ surudadoꞌna, “Datu mehoda miꞌi i babaꞌá kótá,” laoheꞌ upu-upu surudadoꞌna mampombelámbiꞌá Daudiꞌ.
Tunggáiáraꞌ toSáráeliꞌ bona Daudiꞌ mesuleꞌ i Ierusale
Agáiáná surudadoꞌ toSáráeliꞌ to meuláꞌ i Abisalo, melangkaheꞌ mesuleꞌ lao i wánuáraꞌ hadua-hadua. 9 Upu-upu tauna hangko i tina-tina toSáráeliꞌ mombehániꞌ-hániꞌheꞌ, rauliꞌ, “Datu Daudiꞌ mampelaekeꞌ hangko i taeraꞌ ewálintaꞌ. Ia miꞌi to mokábáhákeꞌ hangko i toPelisitiꞌ. Agáiáná deꞌe-deꞌe, ia mopálehi miꞌi kótá Ierusale ánti peꞌewaꞌna Abisalo. 10 Agáiáná Abisalo, to tapileꞌi mewaliꞌ datuntaꞌ, mate miꞌi i lalu pombeala. Mewaliꞌ deꞌe-deꞌe, moapa riꞌi roo-roo pekou, tiꞌarakou moánti datu mai mesuleꞌ?”
11 Laluitaraꞌ toSáráeliꞌ iti nahádi woꞌo Datu Daudiꞌ, onoꞌ haneꞌi ia mohuoꞌheꞌ Sadoꞌ hai Abiata tadulako menómbá bona laoheꞌ mekuneꞌ i totosaeraꞌ toIudá node: “Moapa riꞌi haneꞌi mewaliꞌkou to tepaibókóka moánti datu mesuleꞌ i támbi kadatuána? 12 Tiꞌara paꞌi kómu halalungkuꞌ, hai hawaheꞌ-waheꞌkeꞌ? Moapa riꞌi haneꞌi kómu to tepaibókóka membiáꞌ bona mesuleꞌaꞌ?” 13 Hai Daudiꞌ membiáꞌ woꞌo bona mopahaweꞌheꞌ laluitana i Amasa node: “Tiꞌara paꞌi io woꞌo hawaheꞌ-waheꞌkuꞌ? Kupembiáꞌ i Pueꞌ Ala bona Nahukuaꞌ, ane tiꞌarakoꞌ kulántiꞌ mewaliꞌ kapalaꞌ tadulako surudadoꞌkuꞌ mopaháwángi Ioabiꞌ.” 14 Noꞌonoꞌ miꞌi rárána Datu Daudiꞌ mopamalulu laluraꞌ upu-upu toIudá bona hampepekiriheꞌ. Hangko ionoꞌ, mopakatuheꞌ tewái i datu bona mesuleꞌ i támbi kadatuá hingkakani hai upu-upu topobágóꞌna.
Datu Daudiꞌ mesuleꞌ i Ierusale hai nadupaꞌ Simei
15 Datu Daudiꞌ pohuꞌ ina mesuleꞌ lao i Ierusale, hai ia haweꞌ i wiwi uwai Iarade. Tempó onoꞌ woꞌo, handaꞌ toIudá morámpu i kótá Giligá bona laoheꞌ modupaꞌ datu hai mopalimba i uwai Iarade. 16 Noꞌonoꞌ woꞌo Simei ánáꞌna Gera toBenami to hangko i wánuá Bahuri,a manggagu woꞌo lao modupaꞌ datu, hingkakani hai toIudá. 17 Hai ara woꞌo hasábu toBenami hingkakani hai Simei, tepasuaꞌ Siba topokádipurá támbina Saulu, ánáꞌnaheꞌ tobaleilo hampuloꞌ hai lima, hai hawiꞌnaheꞌ rompuloꞌ. Manggaguheꞌ lao i uwai Iarade hangko tiꞌara mani haweꞌ datu. 18 Mewaliꞌ mengkalimbaheꞌ i poweta-wetaꞌá bona peisáheꞌ mopalimba datu hai upu-upu tinána, láwiꞌ timamaheꞌ metulungi i apa peá to naparaluu datu.
Timama miꞌi datu ina mengkalimba i uwai Iarade, haweꞌ miꞌi Simei ánáꞌna Gera i datu. Ia kásáliu molingkudu motóngkóꞌ i bitina datu, 19 nauliꞌ, “Datu, ineeꞌ nupailalu kamasalaꞌkuꞌ wongkódóꞌá, hai ineeꞌ nubuhinao salaꞌna hawiꞌmu deꞌe to kubábehi i alo kapohuꞌmu hangko i Ierusale. 20 Láwiꞌ hawiꞌmu deꞌe moisá miꞌi dósá to kubábehi, agáiáná alo deꞌe, hangko i upu-upu toSáráeliꞌ,b kódóꞌ miꞌi to rungu-runguna mai modupaꞌ datu.”
21 Hangko ionoꞌ, molaluita miꞌi Abisai ánáꞌna Seruia,c nauliꞌ, “Tiꞌara paꞌi hintotoꞌ Simei rahuku mate? Ia to mokambokoꞌ to napileꞌi miꞌ PUEꞌ mewaliꞌ datu.”
22 Agáiáná molaluita miꞌi Daudiꞌ i Abisai hai i Ioabiꞌ wutuꞌna, nauliꞌ, “Ee ánáꞌnakou Seruia. Moapa riꞌi haneꞌi nipesuaꞌi urusiángkuꞌ hai moewaꞌ peundeꞌángkuꞌ? Alo deꞌe, tiꞌara ara tauna to ina rahuku mate, láwiꞌ mewaliꞌmoꞌ huleꞌ daturaꞌ toSáráeliꞌ.” 23 Onoꞌ miꞌi haneꞌi nauliꞌ datu i Simei, “Kudándiákoꞌ, tiꞌarakoꞌ ina rahuku mate.”
Mepibose modupaꞌ datu
24 Mepibose ueꞌna Saulu lao woꞌo modupaꞌ datu. Hungkáꞌna Datu Daudiꞌ pohuꞌ hangko i kótá Ierusale, Mepibose iti tiꞌara mobahoꞌi bitina, tiꞌara mokáiꞌ danggona, hai tiꞌara woꞌo mobahoꞌi waruꞌna, duuꞌna Daudiꞌ mesuleꞌ i kamaroꞌa-roꞌa. 25 Mewaliꞌ Mepibose pohuꞌ hangko i Ierusale lao mampombelámbiꞌá datu. Kahaweꞌna i datu, mekuneꞌ datu i hia, nauliꞌ, “Mepibose, moapa riꞌi haneꞌi tiꞌarakoꞌ meuláꞌ i kódóꞌ?”
26 Mehániꞌ Mepibose, “Ó pueꞌkuꞌ datu, kódóꞌ hawiꞌmu deꞌe mongkuhaꞌaꞌ, onoꞌ miꞌi haneꞌi kupohawaꞌá hawiꞌkuꞌ, kuꞌuliꞌ, ‘Lampiáꞌaꞌ kalide bona kupesaweꞌi. Ina pohuꞌaꞌ hingkakani hai datu.’ Agáiáná Siba hawiꞌkuꞌ moákálángiaꞌ. 27 Hai napakadakeaꞌ i lindoꞌna datu. Agáiáná pueꞌkuꞌ datu nodo malaꞌekana Pueꞌ Ala, mewaliꞌ apa to nupekiri maroꞌa, iti miꞌi to nubábehi. 28 Upu-upu pemuleꞌána umángkuꞌ, hintotoꞌangkaiꞌ nahuku mate datu, agáiáná kehapiꞌ noꞌonoꞌ, nupaliuaꞌ hawiꞌmu mandeꞌ i támbi kadatuámu. Deꞌe-deꞌe tiꞌara hintotoꞌ ane membiáꞌaꞌ apa-apa hangko i datu.”
29 Agáiáná nauliꞌ datu, “Tiꞌara piꞌi ara bunduꞌna molaluitakeꞌ. Pobutusingkuꞌ node: io hai Siba hangaa-ngaa mogáláꞌkou tampoꞌna Saulu.”d
30 Hangko ionoꞌ, nauliꞌ Mepibose i datu, “Peisánto Siba moala upu-upuna, láwiꞌ pueꞌkuꞌ datu mesuleꞌ miꞌi i kótá Ierusale i kamaroꞌa-roꞌa.”
Barasilai meuláꞌ i datu mengkalimba i uwai Iarade
31 Barasilai toGileaꞌ haweꞌ woꞌo hangko i Rogeli, lao meuláꞌ i Datu Daudiꞌ moweta i uwai Iarade. 32 Barasilai iti sae ntepuꞌu miꞌi, uwalu miꞌi puloꞌna parena tinuwuꞌna. Ia topebuku, hai hungkáꞌna datu ara i Mahanai, Barasilai iti to mopatimama pandeꞌna. 33 Datu molaluita i Barasilai, nauliꞌ, “Meuláꞌmokoꞌ i kódóꞌ. Ina kukádipurákoꞌ i kótá Ierusale.”
34 Agáiáná mehániꞌ Barasilai, “Hangapa mani paꞌi parengkuꞌ tueꞌ i wongko duniáꞌ deꞌe, haneꞌi paraluuaꞌ lao i Ierusale hingkakani hai datu? 35 Deꞌe-deꞌe tinuwuꞌkuꞌ uwalu miꞌi puloꞌna parena. Tiꞌara piꞌi kuisá mampopontaniꞌ to marasa hai to tiꞌara marasa. Peisá maniaꞌ paꞌi mampemina kamatamaꞌna apa to kuandeꞌ hai kuinu? Ba kuhádi maniheꞌ paꞌi toponani tobaleilo hai towawine? Apa bunduꞌna hawiꞌmu deꞌe mopamapári pueꞌkuꞌ datu? 36 Tiꞌaraꞌaꞌ hintotoꞌ motarima háwángina to noꞌonoꞌ hangko i datu. To kuꞌundeꞌ peá, mouláꞌ datu moweta i uwai Iarade hai ina meuláꞌaꞌ hampaiꞌ mani. 37 Roo onoꞌ, kupembiáꞌ bona nupaliuaꞌ mesuleꞌ i támbingkuꞌ, bona peisáꞌaꞌ mate i wánuángkuꞌ, hai ratawu i hintáiꞌna popatawuá tosaengkuꞌ. Agáiáná deꞌe miꞌi Kimiha ánáꞌkuꞌ. Ia peisá meuláꞌ i datu mopaháwángiaꞌ. Peisá datu mobábehi apa peá to napomaroꞌa datu.”
38 Nauliꞌ datu, “Maroꞌa, Kimiha ina meuláꞌ i kódóꞌ, hai ina kukádipurá hintotoꞌ hai peundeꞌámu. Hai hinángkáꞌ to nupembiáꞌ i kódóꞌ ina kupabukeꞌi.”
39 Roo onoꞌ, upu-upu tauna mengkalimbamoheꞌ i uwai Iarade, haneꞌi datu woꞌo mengkalimba. Ia moángki Barasilai hai mepálákáná. Hangko ionoꞌ, Barasilai mesuleꞌ lao i wánuána. 40 Kalimbaraꞌ i uwai Iarade, datu mopaliliu polumaona lao i Giligá, hai Kimiha meuláꞌ i hia.
ToSáráeliꞌ hai toIudá mombeheheꞌheꞌ kana i datu
Upu-upu surudadoꞌ toIudá hai hantangaꞌ surudadoꞌ toSáráeliꞌ, molumaoheꞌ woꞌo mouláꞌ datu. 41 Agáiáná tiꞌara marue, handaꞌ toSáráeliꞌ lao i datu mosalaꞌi surudadoꞌ toIudá, rauliꞌ, “Datu, moapa riꞌi haneꞌi halalungkiꞌ toIudá mampehindorungi meuláꞌ i datu moweta i uwai Iarade, hingkakani hai hantámbiámu hai surudadoꞌmuheꞌ?”
42 Mehániꞌheꞌ toIudá, rauliꞌ, “Moántiangkaiꞌ datu mesuleꞌ, láwiꞌ ia hangkaꞌ toIudángkiꞌ. Moapa riꞌi haneꞌi mabukoꞌkou? Ba mandeꞌangkaiꞌ pandeꞌ to naweꞌiangkaiꞌ datu? Ba molámbiꞌangkaiꞌ rasiꞌ hangko i datu? Bateꞌna tiꞌara.”
43 Agáiáná mehániꞌheꞌ toSáráeliꞌ i toIudá, rauliꞌ, “Kaiꞌ toSáráeliꞌ, hampuloꞌ tina, mewaliꞌ gáláꞌkiꞌ i datu mahile mani hangko i kómu. Moapa riꞌi haneꞌi nipakóiꞌangkaiꞌ? Nibuhinao, kaiꞌ to rungu-runguna moliwo moánti datu mesuleꞌ.”
Agáiáná toIudá mopakaróhó mpuꞌu polaluitaraꞌ hai monangiheꞌ toSáráeliꞌ.