Səvəri 32

Ka Izərayel dzəghwashi kən kuma sla kiri tsa slati ghəshi lə Hiyala

Ka Izərayel vasəvə meceri, ta nza ghənzə ka hiyala shi

Ma sa nighəti ka Izərayel war ghulay Muyisə mə dəlagwa va, kala səkwa ghəci ɓəlaŋ na, dza ghəshi mbaʼ ghəshi səəkəə ɓasəshi kwa kuma Aruŋ. Ma kə ghəshi kaa ngəci na: «Ngatəŋəy hiyala, nza ghənzə dza tə kuma ghiy, kwa pi tsa dza ghiy. Sa nzanay, sənata kumaa kəsay Muyisə, ntsaa ɓəkəvəriŋiy tsa mbə hiɗi ka Ezhiptə ghiyuw,» kə ghəshi. 2 Ma kə Aruŋ kaa ngəshi na: «Mbalam səsərəkəram shi mbə sləmə vasəti məndi va tə mbəzə kwa shamshama dzar mbə slimim miʼi ghuy lə ndərazhiy zhər ghuy, mbaʼ ghyehi ghuy,» kə.

3 Dzəghwa ka Izərayel gwanashi ki, mbaʼ ghəshi dzaa səsərəkə shi dzar mbə slimim shi va mənti məndi tə mbəzə kwa shamshama, mbaʼ ghəshi panakəshi kaa Aruŋ. 4 Dza Aruŋ ɓasə ɓasəvəshi, mbaʼ yəwatishi, naʼi shəkaghwashi kwa shiy, mbaʼ vasəkəvəri shiy nja pa məceri. Ma sa nashi ka Izərayel shi va ki, ma kə ghəshi na: «Ava ghənzə na Hiyala ghummə va ɓəkəvərimmə mbə hiɗi ka Ezhiptə, ghummə ka Izərayel» kə ghəshi. 5 Sa nighəti Aruŋ tsəgha na, dza na nga ngati pi tsa ka məndiy ndi shiy ti kaa Hiyala kwa kuma shi nja pa meceri ni va. Mbaʼ zlapəy zlapə, ma kə na: «Həzliməy, ta məni makwaghwa dza ghummə ta fə shəndəkəə dzəti Kwa sləkəpə,» kə. 6 Ma tə həzlimə pətə mekəshi ki na, dza ghəshi mbaʼ ghəshi sləsliy shiy ndanatishi kaa Kwa sləkəpə, mbaʼ ghəshi sləsliy nihuti tə mbərkə zərkə tsa kwa jipə shi. Dzəghwa ghəshi mbaʼ ghəshi nzənziyshi ta zəmə shiy lə ta sa shiy. Mbaʼ ghəshi satishi ta tsə.

7 Ma kə Kwa sləkəpə kaa Muyisə ki na: «Zhəghəvaa dzəghwa kiyaŋu kiyaŋu, sa nzanay, a mbəzli gha va ɓəkəvəri gha mbə Ezhiptə mənti kuma jikirkir na. 8 Ndaʼ juw zlay ghəshi nuw kwal tsaa niy canatishee. A ghəshi vasəvə shiy nja pa məceri ka tsəfəku kwa kuma shi va, mbaʼ ghəshi sləslənəy shiy. Ma kə ghəshi na: “Ava ghənzə na Hiyala ghummə va ɓəkəvərimmə mbə hiɗi ka Ezhiptə, ghummə ka Izərayel” kə ghəshi. 9 Sa nighə yay, caslakə na ghən tsa mbəzli va. 10 Ghənzə tsəghay, zlaree ɓakən nəfə kən shi ee zantishi, nzee yakəvəri mbəzli ɗaŋ səvəri mbə gha,» kə.

Muyisə cəʼu Hiyala ta ka Izərayel

11 Dzəghwa Muyisə ki, ka dəpə nəfə tsa Hiyala ci Kwa sləkəpə. Ma kə na: «Lə bərci gha tərəŋu na, bərci gha va mbəma məndiy zhananta ghən gha ɓəkəvəri mbəzli gha mbə hiɗi ka Ezhiptə kiy, tawa dza ghaa ɓakən nəfə kən shi kiya? 12 Mbaʼ pə gha mənti tsəghay, “Kwa ndərəm na Kwa sləkəpə va tsəgha ɓəkəvəri na ka Izərayel mbə hiɗi ghummə, ta mbəə bakwantishi dzar mbə kəleŋer, ta mbəə zantishi tə hiɗi,” dza ka Ezhiptəə ni. Titihu, ka ɓə nəfə ghaa dzəkən mbəzli gha ma, zlata mananshi kuma jikir na. 13 Zəzətiy dzəkən ka sləni gha, kar Abəraham lə Izakə mbaʼ Zhakubə. Gha dəʼu ghən tsa gha niy zəmanakəshi na fəla, ma pə gha niy niy: “Ta yati ndərazhi ghuy lə jijihiŋuy dzee ɗaŋ dalala nja sasərkuhi dziy tə ghumə. Kee dzay, mbaʼee ndaŋuy hiɗiy niy gəzəkee va ɓəŋuy ta nza ghəshi ka shi ghuy paʼa kwa ndimndim” pə gha niy ni kaa ngəshi,» kə. 14 Sa gəzəkə Muyisə tsəgha ki na, dzəghwa Kwa sləkəpə mbaʼ bashanti məni jikir tsaa niy ɗi na va məniy dzəkən mbəzli nzə.

15 Dza Muyisə ki, ka zhəkəghway səəkə mə dəlagwa. Lə hərezli ɓəleʼi ɓəleʼi ni va bakə ni niy nza kuma pəhəti Hiyala ti shi ta dəvə ci. Tsasl pərikə tsasl pərikə niy nza kuma va ti shi bakanashi. 16 Hərezli vay, Hiyala niy məntishi na. Ghənzə niy tsaslati na kuma ti shi dəʼu ghən tsa nzə. 17 Ma ghəshi mbə səkwa ki na, mbaʼ Zhuzəwe favə gaka lala sa ngumə ka Izərayel. Ma kə kaa Muyisə na: «A gaka mbəzə gaka mbə ka Izərayel» kə. 18 Ma kə Muyisə na: «Tiɓaw, gaka va yən fay, mənta naa gaka mbəzliy mbashi mbəzli mbə mbəzə, ya gaka mbəzli mbashi məndiw. Njasa ha məndi cemer mbə makwaghwa favee,» kə.

19 Ma sa tsəhəshi ghəshi ndəku vəgha pi tsa nza mbəzli va va ti ki na, mbaʼ Muyisə nata məceri vasəti ghəshi va, mbaʼ nashi mbəzli mbə tsə. Dzəghwa mbaʼ nəfə tsa ci satiy, dza na ʼwapə kihuy hərezliy niy nza va ta dəvə ci ta səɗa dəlagwa va, mbaʼ ghəshi babaushi. 20 Dza na mbəghəɗə ɓəvə məceri vasəti ghəshi va, mbaʼ ndanti mbə ghu, mbaʼ zhəghəvəri ka pəsər, mbaʼ shəkambə pəsər tsa va mbə yam, ka sanshi kaa ka Izərayel. 21 Ma kə kaa Aruŋ na: «A shi məntəŋa mbəzli ni fambəshi ghaa dzəmbə məni kuma jikirkir na na tsətsaa?» kə. 22 Ma kə Aruŋ na: «Titihu ka ɓə nəfə gha ma ndə sləkəra ma. Ya ghay, a gha sənashi mbəzli va njasa ɗi ghəshi məni kuma jikir na. 23 “Ngatəŋəy hiyala, nza ghənzə dza tə kuma ghiy, kwa pi tsa dza ghiy. Sa nzanay, sənata kumaa kəsay Muyisə ntsaa ɓəkəvəriŋiy tsa mbə hiɗi ka Ezhiptə ghiyuw,” kə ghəshi kaa ngəra. 24 “A ntsa nza mbəzə kwa shamshama vaa?” pən kaa ngəshi. Dza ghəshi mbaʼ ghəshi ngangalavəra shi mbə slimim shi. Dzee ki mbaʼee yəwatishi mbə ghu, mbaʼee vasəkəvəri meceri va li shi,» kə.

25 Dzəghwa mbaʼ Muyisə fəti ghən, a Aruŋ niy zlashi ka Izərayel ta məni kuma ɗi nəfə tsa shi, ka ka mbəzə shi dza na, ka sawa shi, kə. 26 Sa nighəti na tsəgha ki na, dza na mbaʼ dzaa gariy kwa miy pi tsaa dzəmbə mbəzli va. Ma kə zlaŋzlaŋ na: «Mbəzliy ɗi Kwa sləkəpiy, səəkə ghəshi tikəə dzəvəghee,» kə. Dzəghwa mbəzli mbə takə tsa Levi gwanashi mbaʼ ghəshi ɓasəkəvashiy dzəvəgha. 27 Ma kə kaa ngəshi na: «Avanta kuma gəzəkə Kwa sləkəpə Hiyala ka Izərayel: “Ya wa ndə mbə ghuyiy, ə kə ɓəvə kafaʼi ci, nza ghuy dzar mbə mbəzli va, ka zhakar mbə shi tə pi tsa ʼwava ghəshi paʼa tə pi tsa kərkə ghəshi. Ka ghuy dzay, ka bəku ngwardəhiŋuy lə madigahiŋuy, mbaʼ ka ghalahiŋuy,” kə,» kə Muyisə. 28 Dzəghwa mbəzli mbə takə tsa Levi mbaʼ ghəshi mənti njasa gəzanakəshi Muyisə va. Mbaʼ mbəzli gar diwiy diwiy mahəkanəmətsəkə bekushi mbə ka Izərayel fəcava. 29 Zhini ma kə Muyisə kaa mbəzli mbə hulfə Levi va ki na: «Ndatsəy, a Kwa sləkəpə fiyŋuy vəgha bəla ta nza ghuy ka ka ghəranta sləni. Sa nzanay, a ghuy zləɓavə bəku ya ndərazhi ghuy ya ngwardəhiŋuy sa gəzəkəŋuy na. Va tsəgha kiy, nza Kwa sləkəpə təfətəŋwiy miy ndatsə,» kə.

Muyisə cəʼu Kwa sləkəpə a ghənzə pəlashi ka Izərayel mbə nəfə nzə

30 Way pi tə həzlimə ki, ma kə Muyisə kaa ka Izərayel na: «A ghuy mənti kuma jikir na tərəŋu. Sanay, ta zhimə dəlagwa dzee ta dzəghwa kuma Kwa sləkəpə, ta cəʼu nda nza naa pəlataŋwiy kuma ghuy va jikir na,» kə.

31 Dzəghwa Muyisə ki, mbaʼ zhəghəghəvay zhimə Kwa sləkəpə. Ma kə kaa Ngəta na: «Aya Kwa sləkəpə, a mbəzli va mənti kuma jikir na tərəŋu, mbaʼ ghəshi vasəvə hiyala shi tə mbəzə kwa shamshama. 32 Titihu əə cəʼuŋee pəlata kuma shi va jikir na, kala tsəghay, mbaʼ gha ɓanti slən tsee kwa zliya tsaslaghwa gha va slən tsa mbəzliy dzaa piy ta kwa ndimndim,» kə. 33 Ma kə Kwa sləkəpə kaa ngəci na: «Nava tiɓaw, ntsaa məntəra kuma jikir nay, ghəci na sa dzee ta ɓanti slən tsa ci Kwa zliyee va. 34 Sanay, mbala pəmə mbəzli vaa dzəti pi tsa gəzaŋee va. Ta ghunay ndə Kwal tsee dzee ta ʼwaŋa kuma ghəci. A na nayay, fəca dzee ni, ndatsə pəniy, ta ɓasanakənshi nguvə dzee tə mbərkə kuma mənti ghəshi va jikir na,» kə. 35 Dzəghwa Kwa sləkəpə mbaʼ ɓasanakənshi nguvə kaa ka Izərayel, tə mbərkə sa niy nə ghəshi: «Məntəŋiy pa shiy nja məceri» kə ghəshi kaa Aruŋ.