Hyalaa gəzanci kaa Muyisə a ghəci kafə ta dzəti kwal lə ka Izərayel
33
Ma kə Kwa sləkəpə kaa Muyisə na: «Kafəm tə pi tsa, ghuy lə mbəzli ɓəkəvəri gha va mbə hiɗi ka Ezhiptə. Mbalam dzəti hiɗiy niy gəzanakəshee va kaa kar Abəraham lə Izakə mbaʼ Zhakubə ta ɓanavəshi dzee kaa jijihiŋuy pən niy ni ngəshi, mbaʼee niy zəmanakəshi fəla. 2 Ta ghunay Ndə kwal tsee dzee kwa kuma ghuy, kee dzay, mbaʼee tahanti ka Kanan, lə ka Amur, mbaʼ ka Hit, mbaʼ ka Perizhitə, mbaʼ ka Hivi, mbaʼ ka Zhebuz. 3 Mbalam dzəti hiɗi nza ʼwa va lə mbəzəku ti shi tərəŋu. Ma na nee dəʼu ghən tseyiy, ka dzee dza kwasəbə ghuyuw. Sa nzanay, caslakə na ghən tsa ghuy, ka gha nighiy, yən Məntəŋwiy kwa kwal,» kə. 4 Sa favə ka Izərayel kuma gəzəkə Kwa sləkəpə va caslakəta ki na, dza ghəshi mbaʼ ghəshi zhəghəshi nja mbəzli ta mbəri, Tərəhə ntsaa pa kubeŋer wəzə ni mbə shi. 5 Ma kə Kwa sləkəpə kaa Muyisə na: «Gəzanshi kaa ka Izərayel: “Ghuyəy, mbəzli caslakə ghən ni nza ghuy. Mbaʼ pən nuŋwiy ya ta vəghu juw tsətsiy, ta Məntəŋwiy dzee. Sanay, ə pə ghuy zlashi kubeŋer ghuy wəzə ni vəgha bəla, nzee nighəti shi dzee ta məni lə ghuy kə Kwa sləkəpə,” pə gha kaa ngəshi» kə. 6 War sa kafəshi ka Izərayel vəgha dəlagwa Hurebə na, mbaʼ ghəshi zlashi pa kubeŋer wəzə niy dzəkən ghən shi.Gaskaa kumə lə Hiyala
7 Dzəghwa tə pi tsa ka ka Izərayel nziyshiy, ka Muyisə dza mbaʼ liy gaska Hiyala vəgha bəla, vəri kərakə lə mbəzli. Gaska vay, gaska gamtaʼwaləə kumə lə Kwa sləkəpə niy har məndi. Ya wa ntsaa ɗi ɗuw kuma va Kwa sləkəpiy, a ka naa səvəriy tə pi tsa nza mbəzli dzəvəgha bəla, nza ghəci dzaa dzəmbə gaska va. 8 Ya humɓa dza Muyisə ta dzəmbə gaska vay, gwanashi ka mbəzli kafəshi, ya wa ndə na, mbaʼ nziyiy miy ciki gamtaʼwal tsa ci, ka nighə Muyisə paʼa ghala pi tsa dza naa dzay dzəmbə gaskaa kumə va lə Hiyala. 9 Sa ka Muyisə dzəmbiy ki na, ka timbətimbə dza mbaʼ səkwata dzəmiy gaska va. Ma nza Kwa sləkəpə gəzə kuma ghəshi lə Muyisə ki. 10 Nata ma ka Izərayel timbətimbə va səkwataa dzəmiy gaska va ki na, ka ghəshi dza gwanashi mbaʼ ghəshi satishi. Ya wa ndə na mbaʼ gələɓəy tə shinin ci kwa miy ciki gamtaʼwal tsa ci. 11 Ka Kwa sləkəpə dza ki na, ka gəzə kuma lə Muyisə miy lə miy, njasa gəzə ndə ngəri kuma lə ndə ngəri nja ghəci. Liy hum ki na, nza Muyisə zhəghəvaa dzəmbə mbəzli. Ma Zhuzəwe zəghu Nun, ntsaa ghəra sləni kwasəbə Muyisə na ci ki na, mbaʼy ghəci mbə gaska va di.
Kar Hiyala mbə gəzə kuma lə Muyisə
12 Ma kə Muyisə kaa Kwa sləkəpə na: «A Kwa sləkəpə, gha gəzara na pəmə mbəzli ni. Ə na na nzanay, citəra ntsa dza gha ta ghuni ta kətira ghaw. A gha niy gəzara ngar, “Ee sənaŋa wəzə wəzə, ta məntəŋa wəzə hur dzee” pə gha niy ni. 13 Ma ghənzə tsəgha ki, mbaʼ pə ghaa ɗi məniɗa wəzə hurəy, citəra kuma ɗi gha məni, ta mbee sənaŋa wəzə wəzə. Galaɓay, ta sənay dzee a gha məntəra wəzə hur lə kataŋ pən. Sənay tə gha, mbəzli vay, mbəzli gha na ghəshi,» kə. 14 Ma kə Kwa sləkəpə kaa ngəci na: «Yən dza na ta dza dəʼu ghən tsee kwasəbə ghuy, ka səəva gha lə zəzə kuma ma,» kə.
15 Zhini ma kə Muyisə na: «Kala dza pə ghaa dza kwasəbə ghiy dəʼu ghən tsa gha na navay, ka maw ghaa gəzaŋəy kafə tikə ma. 16 Kala dza pə gha kwasəbə ghiy sana kiy, njaa dza məndiy sənay a gha məntəɗa wəzə hur tsa gha, ghiy lə mbəzli gha ni, kə məndi kiya? Tə mbərkə sa dza ghaa nza kwasəbə ghiy dza ghiy nza ghənghən lə hulfəhi nihuti mbəzli gwanashi ni tə hiɗi,» kə. 17 Ma kə Kwa sləkəpə kaa ngəci na: «Ta mənti kuma gəzəkə gha va dzee. Sa nzanay, ee tarəkə məniŋa wəzə hur tsee, ee sənaŋa njasa nza gha wəzə wəzə,» kə.
18 Ma kə Muyisə kaa ngəta na: «Ə cəʼuŋee citəra shəndəkə tsa gha,» kə. 19 Ma kə Kwa sləkəpə na: «Ta dzar dzee kwa kuma gha, ta citəŋa wəzə tsee dzee gwanay tsa ci, kee dzay, mbaʼee gəzaŋa nza tsa nzee ka “Kwa sləkəpə”. Ntsa ɗee mananci wəzə hurəy, kaa ngəci kee məni wəzə hur, ntsa ɗee hur tsee zhəra tiy, ti ka hur tsee zhəra. 20 Ya tsəgha nzə kiy, ka dzaa ghaa nara kwa mətsə yaw, sa nzanay, ndə ngəri tiɓaa nara kwa mətsee mbaʼ ghəci ghulay tə ghumiyəw. 21 Avanay pi tikə vəghee mə haku, limə a gha garəŋa məɓa. 22 Sa dzee dzar lə ci shəndəkə tseyiy, ta mbəliyŋa dzee kwa kəʼu tsa tə haku tsa va va, mbaʼee fakən dəvee dzəkən gha yən mbə dzar. 23 Ma sa kee dzarɗay, nzee ɓanti dəvee kən gha, ma nza gha nara liy hum tsee. Sa nzanay, ka nara ndə ngəri kwa mətsə yaw,» kə.