Rutə
1
A tsahuti vəghu niy nza tiɓay, ka sla ngwuvə niy sləkə na mbəzli mbə hulfə ka Izərayel. Ma geꞌi ghala vəghu tsa va ki na, mbaꞌ tsahuti ndə təɗəhu ghyi tsa ci mbə məlmə Betəlehem tə hiɗi ka Zhuwda, ta dzaa nziyiy tə hiɗi ka Muwabə, ghəshi lə mali ci, mbaꞌ ndərazhiy zhər ci bakə. 2 Ntsa vay, Elimelekə, kə məndi niy ni kaa slən tsa ci, ma mali ci na, Naꞌumiy, ndərazhi ci va na, kar Mahəlaŋ lə kilyuŋ. Mbə takə tsa ka Efərata, mbə məlmə Betəlehem, tə hiɗi ka Zhuwda niy nza ghəshi. Ma ghəshi tə hiɗi ka Muwabə va lə ghyi tsa shi ki na 3 dzəghwa Elimelekə ɓəlahə mətiy. Sa mətiy na na, mbaꞌ Naꞌumiy nziyta ka məgumba ghəshi lə ndərazhi nzə va bakə ni. 4 Dzəghwa ndərazhi va mbaꞌ ghəshi ɓəɓəvə ghyehi ka Muwabə ka mi ꞌi shi. ꞌWərəpa, kə məndi kaa slən tsa nahuti, ma nahuti na, Rutə. Ma liy hum piya shi məŋ tə hiɗi ka Muwabə na, 5 mbaꞌ kar Mahəlaŋ lə kilyuŋ bəkushi, dzəghwa Naꞌumiy ki kutita tərə sa bəkushi ndərazhi nzə lə zata.6 Ma Naꞌumiy tə hiɗi ka Muwabə ki na, mbaꞌ favə, a Hiyala mananatishi wəzə hur kaa mbəzli tə hiɗi nzə,mbaꞌ ghəshi zavə shi zəmə tərəŋu, kə məndi. Ma sa favə na tsəgha na, dza na ka gumava ta zhəghəvaa zhəti hiɗi ka Zhuwda, ghəshi lə mekukwi nzə va bakə ni. 7 Dza ghəshi ki, kafə ghəshi kafəshi gwanashi ta dzəti hiɗi kaa Zhuwda. 8 Ma ghəshi mbə kwal ki, ma kə Naꞌumiy kaa mekukwi nzə va na: A ghehee, mbalam jighi, ya wa ndə mbəghuyiy, ə kə dzay dzəvəgha mbəghiy. Nza Hiyala məntəŋuy wəzə njasa mananatishi ghuy va kaa zhər ghuy va bəkushi, lə kaa ngəra gwaꞌ. 9 Ya wa ndə mbə ghuyiy, nza Hiyala ɓanavə nziy tsa wəzə tsa lə zal tsa dza naa ɓəvə, kə. Dza na ka səkushi ta dzata. Ma sa səkushi na tsəgha na, bəghə miꞌi va tə wahə (kwaw miꞌi va faghwa wahə) tərəŋu tərəŋu. 10 Ma kə ghəshi kaa ngəta na: Tiɓa tepuw, ghummə dzammə naa dzəmbə mbəzli gha va, kə ghəshi. 11 Zhini ma kə Naꞌumiy kaa ngəshi na: Zhəghəvam jighi pəraa ghehee, ta wa dza ghuy nura shəka? əə mənɗee gar yakə ndərazhi ghula ta nza ghəshi ka zhər ghuy shəkəna? 12 Zhəghəvam, mbalam jighi pəraa ghehee, gar ɓə zal nzee ghulaw, ee halira. Ya ə niy nə ya ee dzaa kumavə zal həvir na gar ndara hur ghəci , nzee yakə ndərazhi pəniy, 13 ta ndəghəvə kəli tsa shi ghuy par shəkəna! Naa ta bashanti ɓə nihuti zhər ghuy par na! Tiɓaw ghyehi yaw, tə ya mənti Hiyala ngəraꞌu tsa, tə ghuy naw. Caslakəta na kuma kənee na tə ghuy, kə.
14 Sa gəzəkə na tsəgha na, mətsəhə mekukwi nzə va mətsahata wahə. Liy hum ki na, dza ꞌWərəpa mbaꞌ səkuti shəta, tərəɗə zhəghətəvata. Ma Rutə nanzə ki na, kala zləɓa ɓarva kwasəbə shəta va. 15 Ma kə Naꞌumiy kaa Rutə ki na: Ava ghaa nata marəŋa zhataa zhəvəgha mbəzli nzə, lə zhimbə ta mbəreketi nzə, gha kuraku kiy, ə pə ghaa zhəghəva nja ghənzə, kə 16 Ma kə Rutə kaa zləɓanta na: Ka ɗee ghaa ꞌyapəra, ta zlaŋee zhəghətəvara va mbəzli yaw, dzəti pitsa dza ghay, dzəti dzee, tə pitsa dza ghaa nzay, tiɓa dzee nza, huləfə ghay, ghənzə dza huləfee nza, Hiyala ghay, ghənzə dza Hyalee nza. 17 Tə pi tsa dza ghaa mətiy, tiɓa dzee məti, tiɓa dza məndiy lara kuraku. Kala məti kə dzaa təhəra lə ghay, mbaꞌ Hiyala slakənɗa ngwuvə tərəŋu na, kə. 18 Ma sa nighəti Naꞌumiy Rutə garəta tə nuw nzə, kala ɗi zhəghəva ghənzə na, mbaꞌ zlata gagata.
19 Dza ghəshi ki, ka nuw lə kwal dzashi bakanashiy dzəmbə məlmə Betəlehem. Ma sa tsəhəshi ghəshi mbə məlmə Betəlehem na, mbaꞌ məhərli mbəzli səəta sa nashi məndi. Ma kə miꞌi na: Naꞌumiy na sana kataŋ ɓay! Kə ghəshi. 20 Ma kə Naꞌumiy kaa zləɓanshi na: Ka harɗa ghuy Naꞌumiy(mali mbə vəshi ma), Mara (mali mbə ngəraꞌu) pə ghuy harɗa. Sanzanay, a Hiyala kwa bərci samiyra ngəraꞌu tərəŋu dalala. 21 Ghala vəghu tsaa kafee tikiy, ɗaŋ niy nza ghiy, ma dza Hiyala kwa sləkəpə sanay, mbaꞌ zhəkəra tsəghara kutira. Sa wana dza ghuy harɗaa Naꞌumiy, mbaꞌ ghuy nata Hiyala kwa bərciy sləkəpə zhəghavəra hum, mbaꞌ faghwa wahə kwa mətsee kiyaa? Kə.
22 Ava tsəgha zhəghəkəvata Naꞌumiy tə hiɗi ka Muwabə ghəshi lə makwa nzə Rutə, zha ka Muwabə. Ghala pi tsa tsəhə ghəshi va mbə məlmə Betəleheməy, məndi mbə məni shi har məndi vaa urzhə, səəkə kwamti niy nzana.