2
A tsahuti ndə niy nza tiɓa mbə məlmə Betəlehem, Bəwazə kə məndi kaa slən tsa ci, ntsa vay, ndə lə shiy və, ka haꞌu məndi ti niy nzana. Mani ghəshi niy nza lə Elimelekə, zata Naꞌumiy tsaa mətiy va. 2 Tə nahuti vəciy, ma kə Rutə, Rutə zha ka muwabə va kaa Naꞌumiy na: Ndara kwal, ee dza ta pəla zləkə tə səəbə ka ngəli urzhə, ka dzee bashi kumavə ntsaa dzaa zləɓa yən pəla zləkə tsa ciw, kə. Mbala zhee, kə Naꞌumiy ngəta. 3 Dza Rutə ki kaf, kafəta ta pəla zləkə, mbaꞌ dzaa kəsay zləkə. Dza na ka pəla tə səəbə ka ngəli urzhə. Mbalaa za Bəwazə zəmbəghiy Elimelekə tsa va na sava.4 Kwa kuma juw ki na ndəs Bəwazə səkiy mbə məlmə Betəlehem ki. Sa tsəhiy na tə za na dza na ka səku ka ngəli urzhə. A kə kaa ngəshi na: usam mbə sləni, nza Hiyala nziyta lə ghuy, kə. A kə ghəshi kaa zləɓanci na: Yawa nza Hiyala kwa sləkəpə təfətəŋa miy, kə ghəshi. 5 Ma kə Bəwazə kaa dikə tsa ka sləni na: Mali wa na sa na shəki? Kə. 6 Ma kə ntsa va kaa zləɓanci na: Waa zha ka Muwabəə səəkə va kwasəbə Naꞌumiy, tə hiɗi ka Muwabə na. 7 Vəya ɗuvə na kwal ta pəla zləkə tə səəbə ka ngəli urzhə, ghala mekəshi na tiɓa mbə pəla zləkə tsa va, dəkəhu dəkəva na ya juw tsətsuw, kə. 8 Ma kə Bəwazə kaa Rutə ki na: Favə gha naa zhee Ka dza gha ta pəla zləkə mbə nahuti za ma, war tikə pə ghaa pəla zləkə kwasəbə miꞌiy ghəraɗa sləni ni. 9 Ə pə ghaa nighə dzəghwa tə pitsa ngəli zhər urzhə, nza gha nuw miꞌiy ghəraɗa sləni va. Ee gəzanshi kaa ka slənee, zlata tə ghuy mali va, pən. Mbaꞌ kə ndir ghəraŋay, kwa ceghughi tahay ghəshi va lə yam pə gha dzaa sa yam, Kə. 10 Dza Rutə tsəfəku tsəfəkuta, gaꞌ ꞌyambə kuma nzə mbə hiɗi. A kə kaa Bəwazə na: A shiy mənishi mənɗa gha wəzə hur tsətsə, ka ɗi kumee, kwa səəkə səəkee ngar kiya? Kə 11 A kə Bəwazə na: Cəkeꞌ slakəra məndi kuma mənti gha kaa shəŋa ghala mətiy zaŋa. Ee sənay a gha zlashi kar dəŋa lə məŋa, mbaꞌ hiɗi yakəŋa məndi ti shi, ta səəkə ta nziy mbə huləfə mbəzliy niy sənashi ma gha 12 Jəw ɗee Hiyala ngavəŋa səɗa gha tə mbərkə kuma mənti gha vaw. Njana nzana mbaꞌ gha səəkəŋaa dzəmbə hur Hiyala kwa sləkəpə ka Izərayeliy, war əə ɗi na ghənzə ngavəŋa səɗa gha dalala, kə. 13 Ma kə Rutə na: Kay, juw na hur tsa gha wəzə lə yaw ntsee dikə tsaw. Kuma gaga mətsahavəra kuma gha va bərciw, aa ndəŋara yən kwa sləni gha mbə nəfə tsee. A məniree gar nza yəm lə kwa sləni gha tala kiw, kə.
14 Ma sa mənta Vici zəmə shiy ki, ma kə Bəwazə kaa Rutə na: Səəkə ta zəmə shiy kwasəbə ghiy, ti peŋ, yəku er, a gha zəmə shiy, kə. Dza Rutə ki dərasə ndzəyta vəgha ka sləni. Dza Bəwazə mbaꞌ ɓanavə shi səli səli ni. Zəmə zəmə ghənzə zəməhu shiy bəhə bəhə ghənzə paꞌ ka tərə mbəvəli nzə. 15 Sa kəranti na zəmə shiy ki na, mbaꞌ zhata ta pəla zləkə tsa nzə. Dza ma kə Bəwazə kaa ka sləni ci na: Zlatam ghənzə pəla zləkə tsa nzə ya dzati tə pi tsa panti ma ghuy urzhə, ka gəzanta kuma ghuy ma. 16 Ndəndəghiy tə ghuy urzhə lə ɗi ghuy dzar tə səəbə ghuy ta mbə ghənzə imə, əntaa ghuy naɓə ma, kə. 17 Vəghwaməti na mbə pəla zləkə mbə za Bəwazə paꞌ hetəhwer ki, mbaʼa dəꞌuvə urzhə gar ghwani bakə 18 Sa dəꞌwamti na na, mbaꞌ dzataa jighi li. Sa tsəhəta na kiy ghyi na, mbaꞌ canati zləkə tsa pəlavə na kaa shəta, mbaꞌ ɓanavə mbəvəli shi zəməə niy tərə va və kwamti. 19 Dzəghwa shəta ka ɗuw kuma və, a kə na: Kuma pəlakə gha zləkə ndatsaa? Mbə za wa ghərakə gha sləniaa? Nza Hiyala təfanati miy kaa tsava ntsaa məntəŋa wəzə hur va, kə. A kə Rutə na: Waa Bəwazə kə məndi kaa ntsa pəlakee tsa zləkə mbə za ci ndatsə, kə. 20 Zhəghwa ma kə Naꞌumiy kaa Rutə na: Təfanati miy Hiyala kaa ntsava, yən nighiy, war mbə mənim wəzə hur na Hiyala ghummə ghummə shi tə ghumə ni njasa niy məni na va kaa niy bəkushi mbəzli gwaꞌ, kə. Ma kə diɓa na: Bəwazə tsa vay, mani nza ghummə li shi, tsahuti ntsa mbə ka zəmə ghyi tə ghummə na, kə. 21 Zhini ma kə Rutə ki na: A kə kaa ngəray, kwasəbə ka slənee va pə ghaa pəla zləkə tsa gha, paꞌ fəca dza ghəshiy kərə lə məni sləni kwamti, kə kaa ngəra, kə. 22 Ma kə Naꞌumiy kaa ngəta na: Wəzaa nava zhee, war kwasəbə miꞌiy ghəranci sləni va pə ghaa pəla zləkə tsa gha. Aa nza sana, mbaꞌ pə gha dzaa dzəmbə za tsahuti ndiy, kala məniŋa ma kuma wəzə məndi, kə. 23 Sa Rutəə dza ta pəla zləkə ki na, war kwasəbə miꞌiy ghəra sləni va kaa Bəwazə ghənzəə nza. Cəkeꞌ mbəzli va slamti urzhə, lə alkamari gwaꞌ, war ghənzə kwasəbə shi. Niy təhərivashi ghəshi lə shəta vaw, war ghəshi niy nzana li kiy ghyi tsa kutiŋ tsa.