Səvəri
Shi dza məndiy gha sənashi dzəkən zliya na
Zliya nay, Muyisə tsasliti na (Səvəri 24:4; 34:27), ta mbə jijihi ka Izərayel sənay njasa ghava mbəraghuti hiɗi shi.
Səvəri tsa har məndi va zliya nay, sa nzana dzəkən njasa ɓəkəvəri Hiyala ka Izərayel mbə mava tsaa niy məni ghəshi tə hiɗi ka Ezhiptə gəzə na kuma. Sa mənti ghəshi piya bələku bələku faɗə mbə məni mava na, mbaʼ Hiyala zəzətiy dzəkən sla kiri tsaa niy slati na lə kar Abəraham mbaʼ Izakə mbaʼ Zhakubə (Səvəri 2:24), dza na mbaʼ zəzətiy dzəkən ka Izərayel sa nay na ngəraʼu tsa kən shi. Dzəghwa mbaʼ ɓəkəvərishi mbə ngəraʼu tsa va lə məni kuma maɗaŋa maɗaŋa na ghənghən ghənghən (Səvəri 7:3). Dza na ki mbaʼ slati kiri li shi, mbaʼ pəhanatishi kuma dza ghəshiy nuw (Səvəri 20:1-17).
Zliya nay, əə ci na njasa nza Hiyala mbə mbəzli nzə, ka dza kwasəbə shi, Hiyala shi ghənzə (Səvəri 29:43-46).
Avanata kuma dza ghummə ɓənivə mbə zliya na ta nziy tsa ghummə ndatsə:
Kar Hyalaa zlay ngəraʼuə dzəkən mbəzliy nuw ta mbə ghənzəə məni kuma bərkəti na ti shi.
Mbaʼ pə ghummə ɓanavə nəfə tsa ghummə kaa Hiyala, ka ɗi fəti ta kuma gəzəkə nay, ta mbəlantəmmə dza na.
Avanay njasa dza məndiy mbəə tihəvəri kuma mbə zliya na
Zliya nay, mahəkanə mbə dza məndiy təhəvəri:
I - Vəhə 1-18. Njasa mbəlanti Hiyala ka Izərayel mbə mava tsa məni ghəshi tə hiɗi ka Ezhiptə
- Ngəraʼwə tsa sa ka Izərayel mbə Ezhiptə, njasa yakə məndi Muyisə, njasa haray Hiyala (vəhə 1-4).
- Ngəraʼwə tsa sanamiy Hiyala kaa ka Ezhiptə gha Farawaŋ pəlashi ka Izərayel ta dzashi (vəhə 5-13:16).
- Səvəri tsa ka Izərayel mbə Ezhiptə lə njasa taŋə ghəshi həl (vəhə 13:17- vəhə 15)
- Ka Izərayel mbə gamba, njasa pəslishi ghəshiy dzəkən Muyisə, mbaʼ Hiyala ɓanavəshi shi zəmə har məndi manə mbaʼ yam (vəhə 16-18).
II - Vəhə 19 - 24 Hyalaa sla kiri lə ka Izərayel
- Nzəy tsa ka Izərayel ta dəlagwa shinay lə njasa səəkə Hiyala ta kumə lə Muyisə mə dəlagwa va mbaʼ gəzəhu kuma li (vəhə 19).
- Hiyala pəhanatishi kuma kaa mbəzli nzə ta nuw ghəshi (vəhə 20:1-17).
- kumaa dzəkən sla kiri (vəhə 20:18 - vəhə 23)
- Hiyala slati kiri lə mbəzli nzə vəhə 24.
III - Vəhə 25-40 kumaa dzəkən pi tsa dza Hyalaa nza mbə
- Hyalaa gəzə njasa dza məndiy məni shiy ta la pi tsa dza Hyalaa nza ti (vəhə 25-31).
- Njasa yiɗivəri ka Izərayel sla kiri tsa kwa jipə shi lə Hiyala (vəhə 32-34).
- Ka Izərayel la pi tsa dza Hiyala nza ti (vəhə 35-40).