Səvəri
Njasa ɓəkəvəri Hiyala ka Izərayel mbə hiɗi ka Ezhiptə
(1-15)
Ka Izərayel zhəghəshi ka mevivi tə hiɗi ka Ezhiptə
1
Avanashi sləneɗemer ndərazhi Zhakubə tsa har məndi vaa Izərayel dzashiy dzəti hiɗi ka Ezhiptə. Ghəshi lə dəshi tsa va niy dzashi na, ya wa ndə na lə Ghyi tsa ci: 2 Ruben, mbaʼ Shimeyuŋ, mbaʼ Levi, mbaʼ Zhuwda, 3 mbaʼ Isakar, mbaʼ Zabuluŋ, mbaʼ Benzhameŋ, 4 mbaʼ Daŋ, mbaʼ Neftali, mbaʼ Gad, mbaʼ Aser. 5 Gwanashi tsa mbəzliy səvəri kwa miy dəgha Zhakubəy, mbərfəŋ mətsəkə niy nza ghəshi. Ta na na Zhezhefiy, tə hiɗi ka Ezhiptə va niy nza na mbəradziy. 6 Liy hum sa hishi ghəshi ki na, mbaʼ kar Zhuzefə lə ngwardiy gwanashi bekushi, lə mbəzliy niy nza ghəshi li shi ghala vəghu tsa va gwanashi. 7 Dzəghwa ka Izərayel ki, ka ya ndərazhi, war ə ghəshiy mətsəhəva, tərəŋu ghəshi yashi, mbaʼ ghəshi kumavə bərci dalala, gwaʼ gwaʼa ghəshi təhay hiɗi ka Ezhiptə.8 Dzəghwa mbaʼ məndi pəərəti yəwun mazə tə hiɗi ka Ezhiptə ki. Tsava maziy, niy sənay Zhuzefə naw. 9 Ma kə kaa ka Ezhiptə na: «Nay ghuy naa mbəzlee, avanashi ka Izərayel mənishi ɗaŋəɓa ghəshi kaa ngəmmə, zhini tərəŋuɓa və shi bərci diɓa. 10 A pə ghummə pəlavə tsəhuli ta makətishi va mətsəhəva. Kala tsəghay, sa ka ghummə dza ta mbəzə lə nihuti mbəzli na, ta jakəva dza ghəshi lə ka mbəzə ghummə ta yivaa dzəkən ghummə, nza ghəshi ɓarəvashi tə hiɗi ghummə,» kə. 11 Dzəghwa ka Ezhiptə ki, mbaʼ ghəshi zhəghəti ka Izərayel ka mevivi shi, mbaʼ ghəshi tivə mbəzli ta sləkəshi mbə sləni, ka sanshi ngəraʼu lə ʼyapanshi məni sləni caslakə na. Mbə sləni va lati ka Izərayel məlmə Pitumə lə məlmə Raməsesə. Məlməhi vay, mbə shi ka məndiy fə shi zəmə Farawaŋ mazə ka Ezhiptə. 12 Ya tsəgha niy sanshi ka Ezhiptə ngəraʼu tərəŋu dalalay, tərəŋu niy ya ghəshi ka tavaa dzəmbə mbəzli paʼ ka dzashi her ka Ezhiptə və shi, kala ɗi ma kuma shi ghəshi. 13 Dzəghwa ghəshi ka irə ka Izərayel lə gulaŋ, lə sləni nja mevivi. 14 Mbaʼ ghəshi zhəghanatishi nziy caslakə kaa ka Izərayel lə məni sləni njaa kar: hwaɗi gəzəm, dəʼu bərikə mbaʼ lə ghəra sləni kwamti. Ya humɓay, war mbə ʼyapəshi ghəshi lə məni ya namaɓa sləni caslakə caslakə na, kala zhanshi ma hur tsa shi ti shi.
Farawaŋ pəla kwal tsaa bakwanti ndərazhiy zhər mbə hulfə ka Izərayel
15 Bakə niy nza miʼiy ya miʼi va ka Ebərəª, kar Shifəra lə Pəwa. Ma kə mazə ka Ezhiptə kaa ngəshi na: 16 «Ghuy mbə ya miʼi ka Ebərəy, nighəti tə ghuy zəghu yakə ghəshi wəzə. Zal kiy, paslanti tə ghuy. Zha kə na, mbaʼ ghuy zlata tə ghuməta,» kə. 17 Ma na miʼi bakə ni va kiy, a ghəshi niy hazləni va Hiyala, niy ɗi fəti ghəshi ta kuma mazə ka Ezhiptə vaw. A ghəshi niy zlashi ndərazhiy zhər tə ghuməshi. 18 Dza mazə ki daʼ harashi, ma kə kaa ngəshi na: «Tawa mənti ghuy tsəghaa? Tawa zlashi ghuy ndərazhiy zhər tə ghuməshiaa?» Kə. 19 Ma kə miʼi va kaa zləɓanci na: «Nja miʼi ka Ezhiptə na miʼi ka Ebəruw, a bərci vəshi. Ka mali kwa ya miʼi tsəhiy, ghəshi yashi,» kə ghəshi.
20 Tsəgha niy kəti Hiyala miʼi va. War a ka Izərayel mətsəhə ya va. Təruŋ ghəshi kumavə bərci. 21 Dza Hiyala ki, mbaʼ ɓanavəshi ndərazhi kaa miʼi va sa nza hazləni nzə mbə nəfə tsa shi. 22 Dzəghwa ma kə Farawaŋ kaa mbəzli ci gwanashi na: «Mbaʼ kə məndi yakə zəghu zal mbə ka Ebərəy, dzəti həl Nil pə ghuy dzaa ndəghati. Ma ghyehi na na shiy, zlashi tə ghuy ni va tə ghuməshi» kə.