Njasa yakə məndi Muyisə
2
Dzəghwa tsahuti ndə mbə takə tsa Levi mbaʼ ɓəvə mali nza ghəshi mbə takə tsa kutiŋ tsa li. 2 Dza mali va mbaʼ ɓəvə hur, baw yakə zəghu zal. Təruŋ ghənzə nay məgəla tə zəghu va, mahəkanə ghənzə mənti tir mbə mbəə dzəkən. 3 Sa mbay ma naa mbakən mbəə dzəkən na, dza na laŋ ɓəvə likə tsatim tə slirə, kə hu hwakən dimə, lə nihuti shiy dzaa makə yam va dzəghwa likə va. Dza na bəm faghwa zəghu va kwa. Mbaʼ dzaa fiy mbə ghuvəl dziy miy həl Nil. 4 Dzəghwa zhambəghiy zəghu va, mbaʼ dzaa nziyta vəri kərakə ta nighə kumaa dzaa məniva lə zəghu va.5 Ma liy hum juw ki na, mbaʼ zha Farawaŋ səəkətaa dzəghwa həl Nil ta pi. Ghala vəghu tsa va ki na, dza mevivi nzə ka turə dziy miy həl. Tsaʼ kə zha va na, mbaʼ nata likə va dziy mbə ghuvəl. Mbaʼ ghunata nahuti kutiŋ mbə mevivi nzə va ta ɓanakə. 6 Sa ɓanakə na na, dza na ɓəŋ ghunanti. Njəʼu kə na, zəghu zal kwaɓa mbə wahə. Mbaʼ hur tsa nzə slanati ti. Ma kə na: «Zəghu ka Ebərə na sa sa,» kə. 7 Dza zhambəghiy zəghu va kəətə kətəghəvataa dzəvəgha zha Farawaŋ va. Ma kə kaa ngəta na: « Ka ɗi ghee dzaa harataŋa mali ka Ebərə nza ghənzə kəlitəŋa zəghu va na?» Kə. 8 «Yə, mbala harkə» kə zha Farawaŋ va kaa ngəta.
Dza zha va mbaʼ dzaa pəməkə mbəghiy zəghu va. 9 Ma kə zha mazə va kaa ngəta na: «ɓəvə zəghu na, sancira ʼwa. Ee taa watəŋa zhəmə gha,» kə. Dza mali va laŋ ɓəvə zəghu va ka sanci ʼwa ki.
10 Sa kəliy zəghu ki na, mbaʼ mbəghiy ɓanakə kaa zha Farawaŋ. Mbər mbərəy ka zəghu nzə. Ma kə na: «Muyisə na slən tsa ci, sa nzanay, mbə yam ɓəkəvəree,» kə.
Muyisə huy dzəti hiɗi Madiyan
11 Ma sa kəliy Muyisə ki na, dzəghwa na tə nahuti vici mbaʼ dzay ta turə vəgha ngwardiy ka Ebərə. Dza na mbaʼ nay ngəraʼu tsa kən shi va sləni caslakə na ʼyapəshi məndi li. Mbaʼ nay tsahuti ndə ka Ezhiptə mbə dəʼu ndə ka Ebərə zəmbəghiy. 12 Njəʼu njəʼwə Muyisə naghay pi. Ya dza kwa namaɓa bəla na, nay nduw. Dza na pəslə paslanti ndə ka Ezhiptə, laʼ lambə mbə ndarghə. 13 Ma way pi tə həzlimə na, mbaʼ səəkəə kəsashi ka Ebərə bakə mbə mbəzə. Dzəghwa ma kə kaa tsa nza fəti va və na: «Tawa ləkə gha zədəŋa kiya?» Kə. 14 Ma kə ntsa va kaa zləɓanci na: «A ntsaa fiyŋa ka mazə ta sla nguvəə dzəkən ghiya? Na aa ɗi gha paslantəra njasa paslanti gha va ndə ka Ezhiptə na?» Kə. mbaʼ her Muyisə dzashi. Ma kə mbə zəzə kuma ci na: «Ya njaɓay, a mbəzli sənata kuma məntee va,» kə. 15 Dzəghwa mbaʼ Farawaŋ favə kuma va kuraku, dza na ka pəla kwal tsaa pəsli Muyisə ki. Mbaʼ Muyisə huy dzəti hiɗi ka Madiyaŋ. Sa tsəhiy na na, mbaʼ nziyiy miy yam.
16 A ghyehi mbərfəŋ niy nza va Zhetərwə ndə ta Hiyala tsa ka Madiyaŋ. Dza ghəshi mbaʼ ghəshi səəkəshiy gati yam tatahay shi ka dəmbəkəə sa yam kwa shi, ta sa yam kaa kwiy lə teŋkesli dəshi. 17 Dza nihuti ka makə shiy mbaʼ ghəshi səəkəə tahanti ghyehi va. Dzəghwa Muyisə mbaʼ yəpəti yəpə ti shi, mbaʼ sanamiyshi yam kaa dəmbəkə tsa shi. 18 Mbaʼ ghəshi zhəghəghəvashiy dzəvəgha dəshi Rewəl. Ma kə dəshi kaa ngəshi na: «A naa mənta zhəghəkəvaŋuy ghuy kiyaŋu kiyaŋu ndatsaa?» kə. 19 Waa tsahuti ndə ka Ezhiptə yəpəti na yəpə tə ghiy va nihuti ka makə shi. Zhini mbaʼ kətitəŋəy lə ga yam kaa dəmbəkə tsa ghiy,» kə ghəshi. 20 Ma kə kaa ghyehi ci va na: «kuma na ntsa vaa? Sawa na zlay ghuy liy humaa? harayim a ghummə zəmə shiy li,» kə.
21 Sa harkə ghəshi Muyisə na, mbaʼ zləɓavə nziy kiy ghyi tsa ntsa va. Dzəghwa ntsa va mbaʼ ɓanavə zha ci Sefura ka mali ci. 22 Dza mali va mbaʼ yanakə zəghu zal. Ma kə Muyisə na: «Njana nza na ndə səəkə səəkee tikə tə hiɗi niy, Gwershum dza məndiy har» kə. Gershum tsa vay : «ndə səəkə səəkə,» ɗi naa gəzə.
Hiyala təravə Muyisə ta mbəli mbəzli nzə
23 Ma sa hiy hi tərəŋu dalala ki na, mbaʼ mazə ka Ezhiptə mətiy. Dzəghwa ka Izərayel ka ngəlvə, ka wahə ngəraʼu tsa kən shi. Dza wahəshi va mbaʼ tsəhəta va Hiyala. 24 Dza Hiyala mbaʼ favə wahəshi va, mbaʼ zəzətiy dzəkən sla kiri tsa kwa jipə shi lə kar Abəraham, mbaʼ Izakə mbaʼ Zhakubə. 25 Dzəghwa nighə kə kaa ka Izərayel na, mbaʼ nay ngəraʼu tsa kən shi.