3
Ghala vəghu tsa vay, mbə makə kwiy lə teŋkesli niy nza Muyisə kaa shiy Zhetru ndə ta Hiyala tsa ka Madiyaŋ. Ma tə nahuti vici na, mbaʼ dzay ta makə shiy mbə gamba kərakə. Dza na, mbaʼ tsəhiy mə dəlagwa Hurebə, dəlagwa Hiyala. 2 Dzəghwa ndə kwal tsa Kwa sləkəpə mbaʼ təzliy mbə jipə jipə ghu kaa ngəci mbə fə. Njəʼu kə Muyisə kaa fə va na, mbə tsə ghu mbə nanzə ngar na, ka ndiw. 3 Ma kə mbə zəzə kuma ci na: «Kadiw ee dzarɗa vəgha fə va ta nighə na na kuma maɗaŋa maɗaŋa na, nda sa wa na ndi ma fə va,» kə. 4 Sa nighə Kwa sləkəpə ghəciy dzar vəgha fə va ta nighə na, dza na ka har səvəri mbə jipə fə va: «Muyisə! Muyisə!» kə. «Way, avanara» kə Muyisə. 5 Ma kə kaa ngəci na: «Ka kəətiva ghaa sar ma, təɗanti kwakweher gha. Sa nzanay pi tsa ɗewɗew tsa na sa garəŋa gha va ti 6 Yən na yən Hiyala dəŋa, Hiyala Abəraham, Hiyala Izakə, Hiyala Zhakubə,» kə. Dza Muyisə mbaʼ mbəkway kuma ci sa niy hazləni na va nata Hiyala. 7 Ma kə Kwa sləkəpə kaa ngəci diɓa na: «Ee nay ngəraʼu tsa kən mbəzlee tə hiɗi ka Ezhiptə. Ee favə wahəshi va ngəraʼu tsa sanshi mbəzliy sləkəshi. Ee sənay ngəraʼu tsa kən shi va. 8 Va tsəgha səkwaree ta mbəlantishi mbə dəvə ka Ezhiptə. Ta ɓəkəvərishi mbə Ezhiptə ta ɓəghəshiy dzəti hiɗi wəzə ni, hiɗi bəŋw ni, hiɗi nza ʼwa lə mbəzəku ti shiª tərəŋu. Hiɗi nza ka Kanan, lə ka Hit, mbaʼ ka Amur, mbaʼ ka Perizhitə, mbaʼ ka Hivi lə ka Zhebuz ti shi. 9 Sənzənvay, a wahə ka Izərayel tsəhəta paʼ vəya, mbaʼe nay ngəraʼu tsa sanshi ka Ezhiptə diɓa. 10 Nana kiy, əə ghuniŋee va Farawaŋ. Mbala ɓəkəvəriɗa mbəzlee ka Izərayel mbə Ezhiptə,» kə.Hiyala canati slən tsa nzə kaa Muyisə
11 Ma kə Muyisə kaa Hiyala na : «A ndə nzee kee dzaa kəsay Farawaŋ ta ɓəkəvəri ka Izərayel mbə Ezhiptəa?» kə. 12 Ma kə Hiyala kaa ngəci na: «Yən dza naa nza kwasəbə gha. Avanay njasa dza ghaa sənay yən ghunaŋa na pə gha: Sa ka gha ɓəkəvəri hulfə ka Izərayel mbə Ezhiptəy, ta tsəfəku dza ghuy kwa kumee mə dəlagwa na,» kə. 13 Ma kə Muyisə na: «Tsəgha na, ta dza dzee kəsashi ka Izərayel mbaʼee dzaa gəzanshi “Hiyala jijihiŋuy ghunara na va ghuy” pən. Ya sa ka ghəshi ɗuw slən tsa gha vəyay, njaa dzee ni kaa ngəshi kiya?» kə.
14 Ma kə kaa Muyisə na: «Yən na ntsa nzee Yən, na slən tsee. Avanata kuma dza ghaa gəzə kaa ka Izərayel “Yən nzee ghunara na va ghuy” ghaa ni. 15 Ma pə gha dzaa ni diɓay: “Kwa sləkəpə ghunara na va ghuy, Hiyala jijihiŋuy, Hiyala Abəraham, Hiyala Izakə, Hiyala Zhakubə”. Slən tsee ta paʼ kwa ndimndim na sava. Lə slən tsa va dza mbəzli harɗa ya paʼ humɓa. 16 Mbala ɓasəti pəhepəhir zhər ka Izərayel ma pəgha kaa ngəshiy: “A Kwa sləkəpə, Hiyala jijihiŋuy, Hiyala Abəraham, Hiyala Izakə, Hiyala Zhakubə təzlita kaa ngəra. Ma kə ngəray: Ee tarəkə mbəliŋuy va ngəraʼu tsa saŋuy ka Ezhiptə. 17 Ee tarəkə ɓəkəvəriŋuy mbə hiɗi saŋuy məndi ni ngəraʼu mbə shi. Ta pəməghəŋuy dzee dzəti hiɗi ka Kanan, lə shi ka Hit lə shi ka Amur, mbaʼ shi Perizhitə, mbaʼ shi ka Hivi mbaʼ shi ka Zhebuz, hiɗi nza ʼwa lə mbəzəku ti shi tərəŋu, kə, pə gha kaa ngəshi”.
18 Ta favəŋa dza ka Izərayel. Liy hum ki na, nza ghuy lə pəhepəhir zhər mbə shi dzaa kəsay mazə ka Ezhiptə. A pə ghuy dzaa ni kaa ngəciy: “A Kwa sləkəpə, Hiyala ka Ebərə citəŋiy ghən tsa nzə. Va tsəgha kiy, ndaŋəy kwal a ghiy dza ta dza vici ghiy mahəkanə mbə dzaa dzəti gamba ta hananta shiy kaa Hiyala ghiy Kwa sləkəpə,” pə ghuy dzaa ni kaa ngəshi. 19 Ta na navay ee sənay, ka dza mazə ka Ezhiptəə ndaŋuy kwal ta dzaŋuy ghuy kala war məndi iyapəti naw. 20 va tsəgha kiy, ta kafakati dəvee dzee ta sanshi ngəraʼu kaa ka Ezhiptə lə məni shi maɗaŋa maɗaŋa ni ghənghən ghənghən kwa jipə shi. Liy hum ki na, nza ndaŋuy kwal ta dzaŋuy ghuy. 21 Ta mənti dzee nza ka Ezhiptə mbəə ɗi kuma ghuy. Ghala vəghu tsa dza ghuy səvəri mbə hiɗi shiy, ka dza ghuy kafə batəbatəŋuyəw. 22 Sa ka ghuy kafiy, ya nama mali na ɗuw tə ghənzə shi məntim tə tsahi gəna, lə shi tə tsahi mbəzə, mbaʼ shiy paa dzəkən ghən va kwa ghalata, lə va maliy səəkəta ta nziy kiy ghyi tsa ghuy. Ava tsəgha dza ghuy papahu shiy va ka Ezhiptə nza ghuy ɓanavəshi kaa ndərazhi ghuy lə kaa ghyehi ghuy,» kə.