Səvəri 4

Hiyala canati bərci nzə kaa Muyisə

Ma kə Muyisə kaa Kwa Sləkəpə na: «Ka dza ka Izərayel zləɓa kuma yaw, ka dza ghəshiy ɗi fəti viyaw. Təzlita Kwa sləkəpə kaa ngəŋaw dza ghəshiy ni kaa ngəra,» kə. 2 Dza Kwa sləkəpə ka ɗuw kuma və: «A ni ta dəvə gha vaa?» kə, «gəta» kə Muyisə. 3 Ma kə Kwa sləkəpə kaa ngəci na: «Ndəghati tə hiɗi,» kə. Fəyikə ghəci ndəghati tə hiɗi. Dza gəta va mbaʼ zhəghəta ka shishi. Bəvləpə Muyisə fati tə bali. 4 Ma kə Kwa sləkəpə kaa ngəci na: «Təɗata dəvə gha, kəsə shishi tsa va tə shigə ci,» kə. Dza na mbaʼ təɗata dəvə ciy kəsəti. Dza shishi tsa va mbaʼ zhiniy zhəghiy ka gəta mbə dəvə ci.

5 Ma kə Kwa sləkəpə kaa ngəci na: «Ava shiy dzaa cintishi, ee təzlira kaa ngəŋa yən Kwa Sləkəpə, Hiyala jijishi ka Izərayel, Hiyala Abəraham, Hiyala Izakə, Hiyala Zhakubə,» kə. 6 Ma kə kaa ngəci diɓa na: «Fati dəvə gha tə hati gha,» kə. Dza Muyisə ki, bəm fati. Ma sa ɓanti na, njəʼwə kə kaa dəvə ci va na, tezlezlezl ghənzə va dərna pay na. 7 Ma kə Kwa sləkəpə ka ngəci na: «Zhanati dəvə gha tə hati gha,» kə. Dza na mbaʼ zhiniy zhanati dəvə ci tə hati ci va. Ɓə na na, mbaʼ zhinita njasa kwataŋa. 8 Ma kə Kwa Sləkəpə kaa ngəci ki na: «Mbaʼ kə ka Izərayel kala dzaa zləɓa kuma gha, kala ɗi ma fəti va gha tə kwa taŋa kuma maɗaŋa maɗaŋa na vay, tə kwa baka vay, ta zləɓa dza ghəshi. 9 Mbaʼ kə ghəshi dzaa ɗi ma zləɓa kuma gha, kala ɗi ma fəti va gha, Liy hum kuma maɗaŋa maɗaŋa na va bakə nay, nza gha dzaa tivə yam kwa həl Nil shəkatishi tə hiɗi. Mbər ka miy miy dza yam vaa nza tə hiɗi,» kə.

Hiyala təravə Aruŋ ta kəəti Muyisə

10 Ma kə Muyisə kaa Kwa Sləkəpə na: «Titihu Kwa Sləkəpə, ka ɓə nəfə ghaa dzəkənee ma. Yənəy, shəndəkəta na ghanee. Yən zəghuy, niy nza məcaŋaa gəzə kuma vəyaw, war tsəgha nzee paʼa va vəghu tsa gəzəra gha tsa kuma. Na ɗee gəzə kumay, ka mbə ghanee ɓəkəvəriw,» kə. 11 Ma kə Kwa sləkəpə kaa ngəci na: «A ntsaa ɓanavə miy kaa ndə ngəria? A ntsaa nahay ghani ci ka naa mbata ma gəzə kuma, aw na mədəŋ ghəci, ya ka nay pi ghəci, aw na ka ghulfə ghəcia? Yən yən Kwa Sləkəpə sa? 12 Nana kiy, mbala, Yən dza naa nza kwasəbə gha. Yən dza naa fəŋa na dza ghaa gəzə kumaa dzəghwa miy tsa gha,» kə. 13 Ma kə Muyisə na: «Titihu Kwa Sləkəpə, tsahuti ndə pə ghaa ghuni,» kə.

14 Dzəghwa Kwa sləkəpə mbaʼ ɓakən nəfə dzəkən Muyisə, ma kə na: «A zəməŋa tiɓaa Aruŋ, ndə ta Hiyala ghəci. Na na ciy, ee sənay wəzə mbata na gəzə kuma. Mbə səəkə na ta kumə ghuy li. Naŋa ma nay, vəshi vəshi dza nəfə tsa ciy nza. 15 Nza gha gəzanci kuma dza naa gəzə. Kwasəbə ghuy dzee nza bakanaŋuy. Yən dza naa ciŋuy na dza ghuy məni kuma. 16 Ghəci dza naa gəzə kuma ɗi gha gəzə kaa mbəzli. Ghəci dza miy tsa ghaa nza. Gha na, nza gha nza nja Hiyala ci. 17 Ta na gəta nay, ɓəvə ta dəvə. Təruŋ dza gha ta məni kuma maɗaŋa maɗaŋa na li.

Muyisə zhəghəvaa dzəvəgha mbəzli ci tə hiɗi ka Ezhiptə

18 Liy hum ki na, mbaʼ Muyisə zhəghəghəvay dzəvəgha shiy Zhetru. Ma kə kaa ngəci na: «Titihu zlara ee dzaa nighəti ngwardirə tə hiɗi ka Ezhiptə nda ghulashi na ghəshi tə ghuməshi,» kə. «Mbala kuriŋ,» kə Zhetru kaa ngəci.

19 Ma kə Kwa sləkəpə kaa Muyisə tə hiɗi Madiyaŋ na: «Zhəghəvaa zhəti hiɗi ka Ezhiptə sa nzanay, cəkeʼ bekushi mbəzliy niy ɗi pəsliŋa va,» kə. 20 Dzəghwa Muyisə pəm pəməvə mali ci lə ndərazhi ci mbaʼ faməshi mə kwantəmcahi ka zhəghəvaa dzəti hiɗi ka Ezhiptə. Mbə dəvə ci niy nza gəta gəzanci Hiyala va ɓə. 21 Ma kə Kwa sləkəpə kaa ngəci na: «Ee ndaŋa bərci ta məni ya namaɓa kuma maɗaŋa maɗaŋa na. Sa ka gha tsəhəŋa tə hiɗi ka Ezhiptəy, nza gha mənishi kwa kuma Farawaŋ. Na nee kiy, ta zhəghəti nəfə tsa ci dzee caslakə əntaa ghəci ɓanavəshi kwal tsaa dzashi kaa ka Izərayel. 22 Ma pə gha dzaa ni kaa Farawaŋiy: “Avanata kuma gəzəkə Kwa sləkəpə: Hulfə ka Izərayeliy, nja kwa taŋa zəghwee na. 23 Ee gəzaŋa, zlayra zəghwee va ghəci dza ta tsəfəku kwa kumee pən kaa ngəŋa, kala zləɓa gha. Va tsəgha kiy, ta paslanti kwa taŋa zəghu gha dzee, kə kwa sləkəpə,” pə gha dzaa ni kaa ngəci,» kə.

24 Ma Muyisə mbə kwal na, mbaʼ gariy ta hi tə tsahuti pi. Dza Kwa sləkəpə mbaʼ pəslita ti, ka pəla pəsli ci. 25 Dzəghwa Sefura laŋ ɓəvə cakasla, piyəŋ slanti guzhiɓə tə kwala zəghu nzə. Dza na dapə dapata kwala Muyisə li shi. Ma kə na: «Zal tsa mbəlitee lə miymiy nza gha vəya,» kə. 26 Dza Kwa sləkəpə ki, mbərəkə zlay Muyisə ka dzata. Tə mbərkə sla fəʼyasa va niy nə Sefura “zal miymiy,” kə.

27 Ma kə Kwa sləkəpə kaa Aruŋ na: «Maɗiy dzəti gamba ta kumə lə Muyisə,» kə. Dzəghwa Aruŋ ki, kafə kafiy, mbaʼ dzaa kəsay zəmbəghiy mə dəlagwa Hiyala, hutəm hutəməvə. 28 Dza Muyisə mbaʼ slanakə kuma ghunay Kwa sləkəpə va ta gəzə gwanata. Zhini mbaʼ gəzanci shi maɗaŋa maɗaŋa ni va gəzanakə na mənishi. 29 Dzəghwa ghəshi ki, mbaʼ ghəshi dzaa ɓasəti pəhepəhir zher ka Izərayel gwanashi. 30 Dza Aruŋ mbaʼ zhananakəshi kumaa niy gəzanakə Kwa sləkəpə va kaa Muyisə gwanata. Dza na mbaʼ mənti shi maɗaŋa maɗaŋa ni va kwa kuma ka Izərayel. 31 Dza ghəshi mbaʼ ghəshi zləɓati kuma va. Mbaʼ ghəshi sənay na, a Kwa sləkəpə nay njasa sanshi məndi ngəraʼu na səəkə na ta mbəlishi kə ghəshi. Dza ghəshi ki, mbaʼ ghəshi tsəfəkushi ka fal Kwa sləkəpə.