Ghava tsa shiy
Ghava tsa shiy
kuma dza ghumməə gha sənataa dzəkən zliya na
Kwa taŋa zliya kwa zliya Hyalay: «Ghava tsa shiy» na slən tsa nzə. Sa nza nay, dzəkən njasa mənti Hiyala hiɗi, lə shi ti shi, lə ke ngəri, mbaʼ dzəkən hulfə ka Izərayel gəzə na kuma.
Mbə zliya vay, bakə na bəla dikə dikə na. Kwa taŋa bəla dikə nay, tə vəh 1 paʼa tə vəh 11:26 na. Nava bəlay, dzəkən njasa mənti Hiyala shiy gwanashi, lə njasa gha kuma jikir naa təzlita tə hiɗi, lə njasa zanti Hiyala slən shiy piy tə hiɗi lə yam va kuma məni ke ngəri jikir na. Zhini mbaʼ zhanati shi tə hiɗi kwasəbə Nəwe sa nza na ntsaa nuw kuma lə kwal ghəci niy nza gəzə na kuma. Mbaʼ kə məndiy ɗi sənata kumaa dzəkən hiɗi nza ghummə ni ti shi sənzənva, lə dzəkən ndə ngəri, lə dzəkən nda ta wa nza na tə hiɗi, lə nda sa wa na nza kuma jikir na tə hiɗi, lə nda sa wa na həhərəva mbəzli kwa jipə tsa shiy, ta favə dza məndi mbə nava bəla.
Kwa baka bəla dikə nay, tə vəh 11:27 ghava na paʼa tə vəh 50. Dzəkən njasa gha Hyalaa pəla kwal tsaa mbəli ndə ngəri, mbaʼ haray Abəraham, kwa taŋa jijihishi mbəzli dza məndiy har hulfə ka Izərayel gəzə na kuma. Zhini ka gəzə kuma dzəkən miy tsa dza na ta təfanshi kaa mbəzli tə hiɗi gwanashi dza kwa (vəh 12:3). Mbə bəla vay, a Hiyala slati kiri lə Abəraham mbaʼ jijihiy gwanashi. Ya tsəgha niy citi Hiyala ghən tsa nzə ka Hiyala ka Izərayeliy, Hiyala mbəzli tə hiɗi gwanashi na.
Njasa nuwva kuma mbə zliya na
Ghava tsa shiy (vəh 1-2:3).
kumaa dzəkən kwa taŋa ke ngəri lə nihuti shi mənti Hiyala (vəh 2:4-4:26).
kumaa dzəkən hulfə Adam paʼa va Nəwe (vəh 5:1-6:8).
kumaa dzəkən hulfə Nəwe (vəh 6:9-9)
kumaa dzəkən hulfə kar Sem lə Sham, mbaʼ Zhafetə (vəh 10-11:9)
kumaa dzəkən hulfə Sem (vəh 11:10-26)
kumaa dzəkən hulfə Tera diy Abəraham (vəh 11:27-25:11).
kumaa dzəkən hulfə Isəmayel zəghu Abəraham (vəh 25:12-18).
kumaa dzəkən hulfə Izakə zəghu Abəraham (vəh 25:19-35).
kumaa dzəkən hulfə Isaw zəghu Izakə (vəh 36-37:1).
kumaa dzəkən hulfə Zhakubə diy Zhuzefə (vəh 37:2-50).