Ghava tsa shiy
Ghava tsa shiy
Njasa mənti Hiyala shiy gwanashi
1
Tə kwa tan tanəy, dzəghwa Hiyala mbaʼ təzlikəvəri kar ghumə lə hiɗi. 2 War rayiyi niy nza hiɗi, niy nza shiy ti shi ya waɓaw, tislə niy kalay kusli yaməə kərkəva ma, ka viy safə tsa Hiyala dzar tə ghən shi.3 Dzəghwa, ma kə Hiyala na: «Ə kə waŋ pi təzliy», kə. Mbaʼ waŋ pi təzliy. 4 Shiy wəzə Hiyala nay waŋ pi tsa va. Dzəghwa na ki, mbaʼ faghwa ghala kwa jipə kar kusli lə waŋ pi. 5 «havəghu», kə kaa har waŋ pi. Ma kusli na: «vərɗi», kə kaa har nzə. Vəghwaməti pi, hyaməti na, kwa taŋa vici nava tsəgha ki.
6 Ma kə Hiyala diɓa na: «Ə kə shiy mənishi ta təhəvəri yam bakə mbə,» kə 7 Sa gəzəkə na tsəgha na, mbaʼ shi va mənishi njasa gəzəkə na va. Dzəghwa na tsəgha ki, mbaʼ mənti shi va, ta təhəvəri yam va bakə mbə. Mbaʼ nihuti takə takə, mbaʼ nihuti məɓa məɓa. 8 Ma kə kaa slən tsa shi va ki na, ghumə, kə kaa har shi. Vəghwaməti pi, hiyamti na. Kwa baka vici nava tsəgha ki.
9 Ma kə Hiyala diɓa na: «Ə kə yam takə takə va ta ghumə ɓaɓasəshi tə pi kutiŋ, mbaʼ pi tsa kama yam ti təzliy» kə. Dza mbaʼ shi va mənishi njasa gəzəkə na va. 10 Dzəghwa na, Hiɗi, kə kaa har pi tsa kama yam va ti, ma yaməə ɓaɓasəshi va na, yaməə kərəkəva ma, kə kaa har shi. Shiy wəzə ghənzə nashi shiva. 11 Zhini ma kə Hiyala diɓa na: «Ə kə shiy ghənghən ghənghən pəsə dzar tə hiɗi, ka pəsə ya tsamaɓa guzən lə hulfə ci, ka pəsə ya nimaɓa takə fəhiy ya lə hulfə shi, ya timaɓa tə hiɗi,» Kə. Dza mbaʼ shi va mənishi njasa gəzəkə na va. 12 Dzəghwa shiy ghənghən ghənghən mbaʼ ghəshi pəsəshi, ya tsamaɓa takə guzən na, lə na ci hulfə, ya namaɓa takə fəə ya na, lə hulfə nzə. Shiy wəzə Hiyala nashi shiva. 13 Vəghwaməti pi, hiyamti na. Kwa mahəkana vici nava mənita tsəgha ki.
14 Ma kə Hiyala diɓa na: «Ə kə shiy məni waŋ pi təzlishi dziy tə ghumə, nza ghəshi təhəvəri kar havəghu lə həvir. Li shi dza məndiy ɓəla vici lə piya, ka bərkə vəghu li shi, ta məni makwaghwahi. 15 Ə kə shivaa mbərə dziy tə ghumə, ka məni waŋ pi tə hiɗi,» kə Hiyala. Mbaʼ shi va mənishi njasa gəzəkə na va. 16 Ava tsəgha mənti Hiyala shi dikə dikə ni bakə, ta məni waŋ pi. Vici ghənzə naa guranti dikə na, ka mbərə havəghu, ma tir ghəci tsa jiw tsa na, ka mbərə həvir. Zhini na mbaʼ mənti sasərkuhi. 17 Dzəghwa na mbaʼ fəfiy shiva dziy tə ghumə ta məni waŋ piy dzəti hiɗi. 18 Nza ghəshi mbərə havəghu lə həvir, mbaʼ ghəshi təhəvəri kar kusli lə waŋ pi. Shiy wəzə Hiyala nashi shiva. 19 Vəghwanti pi, hiyanti na, kwa faɗa vici nava fəcava ki.
20 Ma kə Hiyala diɓa na: «Ə kə shiy piy tsatsahushi dzar mbə yam, mbaʼ egwer təzlishi tə hiɗi ka zli dzar tə ghumə,» kə. 21 Dzəghwa Hiyala mbaʼ mənti shi dikə dikə ni piy mbə yam lə nihuti takə tsa shiy nziy ka dza dzar mbə yam gwaʼ gwaʼa. Tsəgha ghənzə mənti takə tsa egwer gwanashi. Shiy wəzə Hiyala nashi shiva. 22 Dzəghwa na ki, mbaʼ təfanatishi miy, ma kə na: «hulfə shiy piy mbə yam gwaʼay, ə kə ghəshiy ya, ka tava, ka təhay yaməə kərəkəva ma, hulfə egweriy zli tə ghumə diɓay, ə kə ghəshiy ya tə hiɗi,» kə. 23 Vəghwaməti pi, hyaməti na, kwa cafa vici nava tsəgha ki.
24 Ma kə Hiyala diɓa na: «Ə kə hulfə shiy dza səɗa, lə takə tsa shi təzlishi tə hiɗi: hulfə dəmbəkə tsa kiy ghyi gwanay lə hulfə shiy dza lə hur, lə hulfə saa dza səɗa tsa mbə gamba, kə ghəshi təzlishi,» kə. Mbaʼ shi va mənishi njasa gəzəkə na va. 25 Ava tsəgha mənti Hiyala hulfə takə saa dza səɗa tsa mbə gamba, mbaʼ hulfə takə dəmbəkə tsa kiy ghyi, mbaʼ hulfə takə shiy dza lə hur tə hiɗi gwanashi. Sa manantishi na tsəgha na, shiy wəzə ghənzə nashi. 26 Dzəghwa ma kə Hiyala diɓa na: «Mənti ndə ngəri ghummə nja pa ghummə, war weʼi ghən tsa ghummə pə ghummə mənti. Ghəci kə dzaa məni mazə dzəkən kərpi mbə yam lə dzəkən ʼegweriy zli dziy tə ghumə, lə dzəkən dəmbəkə tsa kiy ghyi, lə dzəkən saa dza lə hur mbaʼ shi tə hiɗi gwanashi,» kə.
27 Dzəghwa Hiyala ki mbaʼ ngati ndə ngəri
nja pa nzə ghənzə Hiyala,
kar zal lə mali ghənzə ngatishi
28 Dzəghwa na mbaʼ təfanatishi miy, ma kə ngəshi na: «Ə pə ghuy ya, ka tava, ka təhay pi tsa tə hiɗi, ghuy kə dzaa sləkə pi tsa ti shi. Ə pə ghuy sləkə kərpi mbə yam, lə ʼegweriy dziy tə ghumə, mbaʼ shiy dza səɗa tə hiɗi gwanashi,» kə. 29 Zhini ma kə ngəshi diɓa na: «Avee ndaŋuy shiy pəsə tə hiɗi gwanashi ka ya, fəhiy ya lə esler mbə shi, lə ni nza cizli mbə shi gwaʼa, nza ghuy zəməshi. 30 Zhini diɓay, avee ɓanavəshi shiy pəsəshi tə hiɗi ka ni shi shi zəmə kaa shiy dza səɗa tə hiɗi gwanashi, lə kaa egweriy zli dziy tə ghumə, mbaʼ kaa slən saa kufəghə tə hiɗi nza piy mbə,» kə Hiyala. Mbaʼ shi va mənishi njasa gəzəkə na va. 31 Nighə, kə Hiyala kaa shi mənti na va gwanashi na, wəzə tərəŋu ghənzə nashi. Vəghwanti pi, hiyamti na, kwa kwaŋa vici na va tsəgha ki.