2
Ava tsəgha kəranti Hiyala məni kar ghumə lə hiɗi, mbaʼ shi ti shi gwanashi. 2 Ma sa kəɗamti na məni sləni nzə ki na, dzəghwa na tə kwa mbərfaŋa vici ka dəkəva sa ghəranti na sləni nzə va. 3 Mbaʼ təfakən miy kən kwa mbərfaŋa vici va, mbaʼ fiy ka na nzə vici, sa nzana fəcava ghənzə dəkəva sa kəɗamti na sləni məni shi mənəhu na va. 4 Ava tsəgha mənti Hiyala kar ghumə lə hiɗi.Pətsaa nza kwa taŋa ndə ngəri ti
Ghala vəghu tsaa niy mənti Hiyala kwa sləkəpə va kar ghumə lə hiɗiy, 5 niy pəsəshi shiy tə hiɗi, ya fəhi, ya guzənuw. Sa nzanay, ghalaɓa na, niy nzəməkə van Hiyala Kwa sləkəpəə dzəti hiɗi diw. Niy nza ndə ngəri tiɓa, ta za pi tsa tə hiɗiw. 6 Ya tsəgha nzə kiy, səəkə mbə hiɗi niy səvəri yam, ka məni pi tsa tə hiɗi gwanay neɓekə.
7 Dzəghwa Hiyala Kwa sləkəpə ki, mbaʼ ngati ndə ngəri lə kurbi mbə hiɗi. Sa nganti na na, mbaʼ viyanambə safə tsaa ɓanci piy dzati mbə kəshən tsa ci. Sa viyanambə na ki na, mbaʼ ntsa va məniy ka ndə ngəri tsaa piy. 8 Dzəghwa na diɓa, mbaʼ mənti pi lə fəhi ti tə hiɗi har məndiy Eden, njasaa dzəghwa ghumə, mbaʼ fiy ntsa ngati na va mbə shi. 9 Dza na pəsə pəsəkəvəri hulfə fəhi mbə hiɗi, fəhi wəzə wəzə ni kwa mətsə, ka ya yahi wəzə ni ta zəməshi. Dza na mbaʼ pəsəkəvəri nahuti dəŋw fə ka ya nzəə ɓə piy kaa ndə, mbaʼ dəŋw fə ka ndəə sənata kuma wəzə na lə na jikir na, ndə kə zəməhu, tə jipə jipə fəhi va.
10 Mbaʼ həl niy nza səəkə tə hiɗi Eden va, ka hu yam kwa dziy mbə fəhi tə pi tsa va va. Faɗə mbə niy təhəvərivay həl tsa va. 11 Kwa taŋa həl mbə shi faɗə ni vay, Pishuŋ, kə məndi kaa slən tsa ci. Həl tsa va niy dəzlay na hiɗi har məndi Havila, shi nza tsahi mbəzə ti shi. 12 Tsahi mbəzəə guranti tə dimə niy nzana tə hiɗi va. Tə hiɗi va diɓay, a diməə zən nja urdi niy nza tiɓa, Bedəliyim, kə məndi kaa slən tsa nzə, mbaʼ hərezli har məndiy ʼWənikəsə. 13 Kwa baka həl na, Gihuŋ, kə məndi kaa slən tsa ci, ghəci na həl tsaa niy dəzlay hiɗi Kush. 14 Kwa mahəkana həl na, Tigər, ghəci na həl tsaa niy hu njasaa dzəghwa ghumə va məlmə Asur. Kwa faɗa həl ki na, Əfəratə.
15 Dzəghwa Hiyala Kwa sləkəpə mbaʼ ɓəvə ndə ngəri mbaʼ dzaa fiy tə pi tsa nza fəhi va, tə hiɗi Eden, ta za pi tsa tiɓa ghəci, ka nighəə dzəkən fəhi tə pi tsa va va. 16 Ma kə kaa ngəci na: «A kwal va gha ta zəmə ya fəhi tə pi tsa ni gwanashi. 17 Ma na ya fəə ɓəpə sənata kuma wəzə na, lə sənata na jikir na va kumay, əntaa gha zəmə nava ma, fəca dza ghaa zəməhuy, ta mətiŋa dza gha», kə.
18 Zhini ma kə Hiyala kwa sləkəpə mbə zəzə kuma nzə na: «Wəzə na ndə ngəri kutiyəw, ta mananati ndə kəəti ci dzee ta nziy ghəci li,» kə. 19 Dzəghwa Hiyala Kwa sləkəpə ki mbaʼ mənivə hiɗi, mbaʼ ngangati shiy dza səɗa mbə gamba gwanashi, mbaʼ ʼegwer dziy tə ghumə. Sa ngantishi na na, dza na mbaʼ kaghəshi dzəghwa kuma ndə ngəri, ta favə slən tsa dza ndə ngəriy harəshi li. Ya nimaɓa shiy piy kiy, lə slən tsa dza ndə ngəri vaa fanatishi dza məndiy har shi. 20 Dzəghwa ndə ngəri fə fə fə fafanatishi sləneɗemer kaa dəmbeker kiy ghyi lə kaa saa dza səɗa tsa mbə gamba, mbaʼ kaa egweriy zli dziy tə ghumə. Ya tsəgha nzə ki na, shiy tiɓa ghəciy nashi ta na tsa ci ghən mbə shi va gar nziy ghəci li shi, ta nza ghəshi ka ntsaa kəətiw. 21 Sa nighəti Hiyala Kwa sləkəpə tsəgha ki na, dza na mbaʼ fati zal tə hi, ciŋ ciŋ ciŋ ghəci ɓanti hi. Dza na mbaʼ tsəhəvə islə tsa mbə slərpə ci kutiŋ, mbaʼ zhinti sliw tsa vəgha slərpə va njasaa niy nzana. 22 Dza na mbaʼ ngati mali lə islə tsa tsəhəvə na va, mbaʼ pəmanakə kaa zal. 23 Ma sa nata zal mali va ki, ma kə na:
«Əhəəmm, nana kiy, avanay ntsaa
səvəri mbə esleree, sliw tsa mbə na, see ghəci diɓa.
Mali dza məndiy har,
sa nzana səvəri mbə zal ghənzə səvəri,» kə.
24 Ava va tsəgha dza zal ɓarəvay vəgha kar diy lə mbəghiy, nza dzaa jakiy lə mali ci, ma nza ghəshi bakanashi mənishi ka vəgha kutiŋ.
25 Hasəhasəshi niy nza kar zal tsa va lə mali ci va. Ya tsəgha nzə ki na, niy sənay haʼu ghəshiw.