Hiyala təhanti kar zal lə mali tə pi tsa nza fəhi
3
Mbə shi mbə gamba mənti Hiyala Kwa sləkəpə gwanashiy, shishi niy guranti na tə tsəhuli. Dzəghwa na tə nahuti vici ki təhu səəkiy dzəvəgha mali, ka ɗuw kuma və, ma kə na: Ana mali, kataŋ gəzəkəŋuy Hiyala, əntaa ghuy zəmə ya fəhi tə pi tsa ni gwanashi ma kə na?» Kə. 2 Ma kə mali va kaa zləɓanci kaa shishi na: «A kwal va ghiy ta zəmə ya fəhi tə pi tsa ni. 3 Ma na fə tə jipə fəhi va va na nanziy, a Hiyala gəzəkə: “Əntaa ghuy zəmə ya nzə ma, əntaa ghuy ndəŋuə ya ndəŋu ma, va nəghətaa ghuy dzaa bəkuŋuy,” kə Hiyala kaa ngəŋiy,» kə. 4 Zhəghwa ma kə shishi kaa mali na: «Tiɓa teepuw, ka bəkuŋuy ghuyuw. 5 Ə na na nzanay, a Hiyala sənay, fəca dza ghuy zəməhu ya fə vay, ta ghunishi dza mətsəhi ghuy ta sənashi shiy. Nja ghənzə dza ghuy nza, ka sənashi təra ni wəzə ni shiy lə ni jikir ni kə,» kə shishi.6 Nighə kə mali va kaa ya fə va na, wəzə ghənzə nata kwa mətsə nzə, geʼi geʼi gar zəmə, ya fə lə dimə ti gar ghunanti məhərli ndə ta sənata kuma ghənzə nata. Dza na ki, kuslatsə ngəlivə ka zəmə, sa zəməvə na na, mbaʼ ɓanavə kaa zata tsa vəgha va, mbaʼ zal tsa va ɓəvəə zəməhu kuraku. 7 War sa zəməhu ghəshi ya fə va ki na, mbaʼ mətsəhi shi ghughunishi bakanashi, ka sənata kuma, waa diriŋ diriŋəm nza ghum di na, kə ghəshi. Dza ghəshi mbaʼ ghəshi ɓəɓəlivə kəslifə fə har məndiy figə, mbaʼ ghəshi tsati shiy dzəti shi.
8 Ma safə mbə viy fetə fetə hatihwer ki na, mbaʼ ghəshi favə Hiyala kwa sləkəpə mbə gaka, ghənzə mbə turə dzar mbə fəhi. Dza kar zal tsa va lə mali ci va ki na, mbaʼ ghəshi mbəmbəshi dzar mbə fəhi va, va nəghətaa Hiyala Kwa sləkəpə nashi. 9 Dzəghwa Hiyala Kwa sləkəpə ki, ka har zal tsa va: «A zal, kuma nza ghaa?» Kə. 10 Dza zal ka zləɓa, ma kə na: «Gaka ghaa favee dzar mbə fəhi, mbaʼ hazləni kəsəvəra, ma mbəree sa nzee hasəra,» kə. 11 Ma kə Hiyala Kwa sləkəpə kaa ngəci na: A ntsaa gəzaŋa hasəŋa nza gha kəa? Əə zəməhu gha ya fəə niy makətəŋee va va zəmə nzə shəkəna?» Kə. 12 Ma kə kaa zləɓa nzə na: «Mali ndara gha na ta nza ghiy liy, ghənzə ngəlivə na ya fə vaa ndara mbaʼee zəməhu,» kə.
13 Ma kə Hiyala Kwa sləkəpə kaa mali na: Tawa mənti gha tsəgha shəkaa mali?» Kə. Ma kə kaa zləɓa nzə na: «Waa shishi həərətəra na ta zəmə nzə, va tsəgha zəməhwee,» kə.
14 Ma kə Hiyala kwa sləkəpə kaa shishi ki na:
«Njana mənti gha tsəgha na ghay shishiy, avee bazlantəŋa
kutiŋa mbə dəmbeker, lə mbə shiy dza səɗa mbə gamba gwanashi.
Lə hur dza ghaa dza na na gha,
hiɗi dza ni gha shi zəməə nza,
ya humɓa mbə nziy tsa gha.
15 Ta faghwa jaka dzee kwa jipə ghuy lə mali, ka jaka dza hulfə ghaa nza lə na nzə hulfə.
Naŋa ma ghəshiy, ka jaʼu ghən tə gha,
gha kuraku na ka həcishi ta tatəl səɗa tsa shi,» kə.
16 Ma kə kaa mali na: «Gha na na ghay maliy,
ta ndaŋa sa ngəraʼu dzee tərəŋu va hur tsa dza ghaa ɓəvə.
Təruŋ dza ghaa sa ngəraʼu mbə ya zəghu,
war tə zaŋa dza mətsə ghaa nza,
ghəci na, ka sləkəŋa,» kə.
17 Ma kə kaa zal na ci ki na: «Zal, njana zləɓavə gha məni kuma gəzəkəŋa mali gha, mbaʼ gha zəməhu ya fəə niy makətəŋee va va zəmə nziy,
avee bazlanti hiɗi tə mbərkə kuma gha.
Dalala dza ghaa sahu ngəraʼu,
ka gha gha kumavə shi zəmə səvəri mbə hiɗi,
ya paʼa humɓa mbə nziy tsa gha.
18 Shi ka tekesli ghənghən dza naa pəsə
səvəri mbə hiɗi kaa ngəŋa,
shiy pəsə tə za zati gha dza ghaa zəmə.
19 Ghyiffə ghutəghutə
dza ghaa kumavə shiy dzəghwa hur tsa gha,
paʼa fəca dza ghaa mətiŋa mbaʼ məndi lambəŋa
mbə hiɗi ngatəŋa məndi va li shi.
Sa nzanay, lə hiɗi ngatəŋa məndi,
hiɗi dza ghaa zhəghəŋa sa ka gha mətiŋa,» kə Hiyala.
20 Ma liy hum ki na, dzəghwa Adam, zal tsa va, mbaʼ fanati slən Evə kaa mali ci va. Slən tsa vay, Piy ɗi na gəzə, sa nzana ghənzə dzaa ya mbəzliy piy gwanashi. 21 Dzəghwa Hiyala Kwa sləkəpə mbaʼ mananatishi kubeŋer tə huta kaa kar Adam lə mali ci, mbaʼ panakənshi. 22 Ma kə ki na: «Avanay sanay, a ndə ngəri məniy nja ghummə, ka sənata təra na wəzə na kuma lə na jikir na, ghənzə tsəgha nana kiy, ə kə məndi makəti va ngəli ya fəə ɓəpə piy. Sa nzana mbaʼ kə dzaa zəməhuy, ta va dza na tə ghumə paʼ kwa ndimndim,» kə. 23 Dzəghwa na ki mbaʼ təhanti ndə ngəri mbə fəhi tə hiɗi Eden va, ta dza ghəciy za hiɗiy niy ngati na va ndə ngəri li shi. 24 Sa təhanti na na, dza na mbaʼ fiy ka kwal har məndiy Sherəbəŋəhi, njasaa dzəghwa ghumə fəhi va, lə kafaʼihi nja ghani ghu, war ka biriwini ya dza kwa namaɓa bəla ta ndəghu kwal tsaa dzəvəgha fəə ɓəpə piy va.