kumaa dzəkən kar Kayən lə Abel
4
Ma liy hum ki na, mbaʼ Adam jakiy lə mali ci Evə, mbaʼ ɓəvə hur, dzəghwa na baw yakə Kayən. Ma kə mali va ki na: «A Kwa sləkəpə kəətitəra mbaʼee yavə zəghu zal,» kə. 2 Zhəghwa na diɓa mbaʼ ɓəvə hur, baw yakə Abel, zəmbəghiy Kayən.Mbaʼ Abel məniy ka ndə kəli dəmbəkə. Ma Kayən na, ndə za. 3 Ma geʼi lə tsahuti vəghu ki na, dzəghwa Kayən mbaʼ tikə shiy mbə shi zakə na ta ɓə vəli ci kaa Kwa sləkəpə. 4 Dzəghwa Abel kuraku ki mbaʼ həəniy kwa taŋa ndərazhi dəmbəkə tsa ci, mbaʼ ɓanakə tsa nza gəkə ti sliw kaa Kwa sləkəpə. Dzəghwa Kwa sləkəpə mbaʼ falti Abel, mbaʼ vəli ci va təɓanati. 5 Ma Kayən na ci ki na, kala falti ma ghənzə, kala təɓanati vəli ci va diɓa. Sa nata Kayən kuma va tsəgha na, mbaʼ nəfə tsa ci satiy tərəŋu, tifəmmə məntəvay. 6 Ma kə Kwa sləkəpə kaa ngəci na: «Tawa satiy nəfə tsa gha Zhini tifəmmə gha məntəvaŋa shəkaa Kayən? 7 Mbaʼ pə ghaa məni kumaa təɓəy, gha dza naa nza tə ghən. Kala məni kumaa təɓə pə ghay, kwa miy dəgha gha na kuma jikir na nja zhəl ta sləkəŋa. Mbaʼ pə ghaa ɗi kumay, ə pə ghaa zhananta ghən,» kə.
8 Ya tsəgha nzə ki, ma kə Kayən kaa Abel, zəmbəghiy tsa va na: «Dzam dzəmti zəmə,» kə kaa ngəci, mbaʼ ghəshi dzashi. Ma sa tsəhəshi ghəshi tə gamba na, dzəghwa Kayən mbaʼ zlatəvay tə zəmbəghiy Abel paslanti.
9 Liy hum ki, ma kə Kwa sləkəpə kaa Kayən na: «kuma na zəməŋa Abel shəkaa Kayən?» Kə. Ma kə kaa zləɓa na: «kuma ya sənayaree? Yən ka naa ndəghu zəmərə na?» Kə. 10 Ma kə Kwa sləkəpə na: «Tawa mənti gha gəla kuma tsəgha na vaa? Mbə favə miymiy zəməŋa nzee mbə ngumə lala kaa ngəra səəkə mbə hiɗi ta wanci shi ci. 11 Ghala ndatsiy, avee bazlantəŋa. Avee tahantəŋa tə hiɗiy ghunanti miy tsa shi va ta kaʼu miymiy zəməŋa tsa pəəsliti gha va. 12 Sa dza ghaa zati za tə hiɗiy, ka dza ghaa mənivə shiy ti shi tərəŋuw. War daŋərə dza ghaa daŋərə tə hiɗi, ka dza ghaa nziy tə pi kutiŋuw,» kə.
13 Ma kə Kayən kaa Kwa sləkəpə na: «nguvə tərəŋu naa sava kənee, ka dzee mbay ɓakənuw. 14 Avanaŋaa tihəra tikə tə hiɗi ni ndatsə, kərakə dzee nza lə gha, ka dza ghaa nara ghulaw. Kee dza na, ka dadaŋərə kala nziy ma tə pi kutiŋ, ya wa ntsaa dzaa naray, ta pəəslira dza na,» kə. 15 Ma kə Kwa sləkəpə kaa ngəci na: «Ka pəəslivəŋa nduw, mbaʼ kə ndə pəəslitəŋay, lə mbəzli mbərfəŋ dza naa kəsli kərhi tsa gha,» kə.
Sa gəzəkə na tsəgha na, dza na mbaʼ fati səkwa nzə tə Kayən, ta mbəə nza, ya wa ntsaa dzaa kəsay na kala dza ghəciy pəəsli. 16 Dza Kayən ki, mbaʼ kafiy dzay kərakə lə Kwa sləkəpə. Mbaʼ dzaa nziyiy tə hiɗi nudə, njasaa dzəghwa ghumə va hiɗi Eden.
Mbəzli mbə hulfə Kayən
17 Dzəghwa Kayən mbaʼ jakiy lə mali ci, mbaʼ ɓəvə hur, mbaʼ yakə Enukə. Dza na mbaʼ lati məlmə, mbaʼ fanati slən Enukə, nja slən tsa zəghu ci va. 18 Dzəghwa Enukə mbaʼ yakə Iradə, dzəghwa Iradə, mbaʼ yakə Mehujayel, dzəghwa mehujayel baw yakə Metukayel, dzəghwa Metukayel, baw yakə Lemekə.
19 Dzəghwa Lemekə mbaʼ ɓəvə miʼi bakə. Kwa taŋay, Ada, kə məndi kaa slən tsa nzə. Ma kwa baka na Shela. 20 Dzəghwa Ada baw yakə Yabal, ghəci na jijihiy ka nziy mbə ciki gamtaʼwal. Ka kəli dəmbəkə niy nza ghəshi. 21 A zəmbəghiy Yabal niy nza tiɓa, Yubal, kə məndi kaa slən tsa ci, ghəci niy nza jijihiy ka tsa gəzəpəli lə ka viy sherey gwanashi. 22 Dzəghwa Shela, kwa baka mali Lemekə va mbaʼ yavə tsa nzə zəghu kuraku, Təwbal Kayən, kə məndi kaa slən tsa ci. Ghəci niy nza naa ndə pəsli, zhini ndə vas mbəzə ghəci niy nza diɓa. A zhambəghiy niy nza tiɓa: Naama kə məndi kaa slən tsa nzə.
23 Ma kə Lemekə kaa miʼi ci va tə nahuti vici na:
A kar Ada lə Shela, favəm kuma ɗee na gəzaŋuy,
Miʼi Lemekə, fə tə ghuy ghən ta kumee.
Mbaʼ kə ndə ləkamtəray, ə kee pəəsliti zal.
Mbaʼ kə ndə manatəra zhi na, mbaʼee pəəsliti zəghu.
24 Mbəzli mbərfəŋ kə məndi dzaa bəku ta kəsli kərhiy dzəghwa Kayəniy,
mbəzli mbərfəŋəmətsəkə mbərəfəŋti dza məndiy bəku ta kəsli tsee» kə Lemekə.
25 Zhəghwa kar Adam ghəshi lə mali ci Evə, mbaʼ ghəshi zhiniy yavə tsahuti zəghu. Setə kə Evə kaa slən tsa fanati na. Ma kə niy ni mbə zəzə kuma nzə ghənzəə fə slən tsa vay: A Hiyala ndara tsahuti zəghu dzəghwa pi tsa Abel tsa pəəsliti Kayən va, kə niy niy.
26 Dzəghwa Setə mbaʼ yavə tsa ci zəghu kuraku. Enushə kə kaa slən tsa ci. Ghalaɓa gha mbəzliy har Hiyala mbə cəʼu, Kwa sləkəpə.