Səvəri 5

Kar Muyisə lə Aruŋ kwa kuma Farawaŋ

Ma liy hum kuma va ki na, mbaʼ kar Muyisə ghəshi lə Aruŋ dzaa kəsay Farawaŋ. Ma kə ghəshi kaa ngəci na: «Avanata kuma gəzəkə Kwa sləkəpə, Hiyala ka Izərayel: “Zlashi mbəzlee a ghəshi dza ta məniɗa makwaghwa mbə gamba,” kə,» kə ghəshi. 2 Ma kə Farawaŋ na: «Wa ndə na Kwa sləkəpə va kee ɗanta fəti ta zlashi ka Izərayel dzashia? Sənata yaw. Ka zlaŋuy yaa dzaŋuyəw,» kə. 3 Ma kə ghəshi kaa ngəci na: «Hiyala ghiy ghiy ka Ebərə təzlita na kaa ngəŋiy. Zlaŋəy a ghiy dza ta dza vici mahəkanə dzəmbə gamba ta dza ta hananta shiy kaa Hiyala Kwa sləkəpə ghiy, va nəghətaa ghənzə ɓakən nəfə dzəkən ghiy, mbaʼ bakwamtəŋiy lə zəlghu, aw na mbaʼ zlashi ka mbəzə ghiy nza ghəshi bakwamtəŋiy lə kafaʼi,» kə ghəshi. 4 Ma kə mazə ka Ezhiptə kaa ngəshi na: «Kar Muyisə lə Aruŋ, tawa ɗi ghuy makə ka Izərayel va məni sləni shi tay? Mbalam zhəmiy sləni ghuy di. 5 Nana mbəzli ni mənishi ɗaŋ na, nana ghuy ɗi ghəshiy zlata sləni na?» kə.

Farawaŋ zhiniy mətsahata sləni kaa ka Izərayel

6 Dza Farawaŋ fəcavata, daʼ daʼ haharashi ka Ezhiptəə nighəə dzəkən sləni ghəra ka Izərayel ghəshi lə nihuti ka Izərayel titivə məndi ta nza ka mbəzli dikə dikə ni dzar mbə shi. Ma kə kaa ngəshi na: 7 «Əntaa ghuy ɓanshi guzən kaa ka Izərayel ta dəʼu bərikə gula ma. Ghəshi dəʼu ghən tsa shi kə dzaa dza ta pəla. 8 Njasa niy dəʼu ghəshi va bərikə ɗaŋ tsa ci kwataŋay, war tsəgha tsəghavay pə ghuy dzaa gəzanshi dəʼu ci. Əntaa ghuy zləɓa brikə tiy ya kutiŋ mbə ma. Ka mar na ghəshi, va tsəgha nə ghəshi, “a ghiy ɗi dza ta hananta shiy kaa Hiyala ghiy” kə ghəshi. 9 Təruŋ pə ghuy ɓanshi sləni, ghalaɓay, ka dza vəghuə nza vəshi ta fafa dzərvə sla slanshim vaw,» kə.

10 Dza ka Ezhiptəə nighə vaa dzəkən sləni va ghəshi lə mbəzli dikə ni va tətəy məndi dzar mbə ka Izərayel, mbaʼ ghəshi səvərishi kiy ghyi tsa mazə, mbaʼ ghəshi dzaa kəsashi ka Izərayel. Ma kə ghəshi kaa ngəshi na: «A kə Farawaŋiy, “Ka ɓəŋuy guzənee ghulaw. 11 Ghuy kəə dza ta pala, ya dza kwamaɓa dza ghuy kumavə. A na ɗaŋ tsa bərikə na ciy, tsəgha tsəghavay dza ghuy dəʼu njasa kwataŋa,” kə,» kə ghəshi.

12 Dzəghwa ka Izərayel ki, ka dza ta pəla guzən ya dza kwamaɓa tə hiɗi ka Ezhiptə gwanashi. 13 War kwasəbəshi niy nza ka Ezhiptəə niy sləkə sləni va, war ka gəzanshi hwaɗəti hwaɗəti: «Ə pə ghuy kərkanti sləni ghuy. Njasa niy dəʼu ghuy va brikə ghala vəghu tsaa niy ɓəŋuy məndi guzənəy, war tsəgha pə ghuy dəʼu njasa səəkə vici,» kə ghəshi. 14 Ka ghəshiy dzay, ka dəʼu ka Izərayel fiy ghəshi va ta nighəə dzəkən sləni. «Sawana dəʼuvə ma ghuy brikə nana njasa niy dəʼu ghuy va kwataŋaa?» kə ghəshiy ni kaa ngəshi.

15 Dzəghwa mbəzli dikə dikə ni va fiy məndi mbə ka Izərayel ki, mbaʼ ghəshi dzaa kəsay Farawaŋ lə wahə shi. Ma kə ghəshi kaa ngəci na: «Sawana saŋəy gha ngəraʼu tsəgha ghiy mevivi ghaa kiya mazə? 16 Ka ɓəŋəy guzən məndi ghulaw, war ə pə ghuy dəʼu bərikə, kə məndi kaa ngəŋiy. Zhini diɓa na, mbə dəʼuŋəy məndi. A fəti va mbəzli gha va mazə,» kə ghəshi. 17 Ma kə mazə kaa ngəshi na: «Ka mar nza ghuy, ta na navay a ghuy mar, va tsəgha nə ghuy: “Dzammə ta həəni shiy kaa Kwa sləkəpə” pə ghuy. 18 Ka dza məndiy ɓəŋuy guzən ghulaw. Bərikə tsa ɗuw məndi va ghuyiy, cesl pə ghuy dzaa dəʼuti. Ə pə ghuy zhəghəva ta sləni gwaʼa tsəgha,» kə mazə kaa ngəshi.

19 Nighə kə mbəzli dikə dikə ni mbə ka Izərayel na, tərəŋuy ghəshi nay ngəraʼu tsa va kən shi. Tə sa nə məndi va: «Ka tiva bərikə ya kutiŋ mbə bərikə tsa ɗuw məndi va ghuy mbə viciw,» kə məndi ngəshi. 20 Ma sa səvərishi ghəshi kiy ghyi tsa Farawaŋ na, mbaʼ ghəshi kəsashi kar Muyisə lə Aruŋ mbə ndəghəshi, pizl ghəshi pəslishi ti shi. 21 Ma kə ghəshi kaa kar Muyisə na: «Əə ɗi na kwa sləkəpə nighətiy dzəkən shi mənti ghuy va, mbaʼ ɓasakənŋuy nguvə. Tə mbərkə ghuy ɗi ma mazə ka Ezhiptə lə mbəzli ta səɗa ci kuma ghummə. Shi mbəzə ɓanavəshi ghuy mbə dəvə shi ta bəkummə,» kə ghəshi.

22 Zhəghwa Muyisə ki, ka zhiniy cəʼu Kwa sləkəpə. Ma kə na: «A kwa sləkəpə, tawa sanshi gha ngəraʼu kaa mbəzli niaa? Tawa ghunikəra gha tikə kiya? 23 Ghala tsəhəree va Farawaŋ ta gəzanci kuma lə slən tsa ghay, war mbə sanshi ngəraʼu na kaa mbəzli mbə hulfə ka Izərayel. Shiy tiɓa ghaa məni ta mbəli mbəzli gha ni kiw.