6
Ma kə Kwa sləkəpə kaa Muyisə na: «Nanay, ta nashi shi dzee ta mananci kaa Farawaŋ dza gha. Ta iyapəti dzee lə dəvə kwa bərcee, ta mbə ghəciy zlashi ka Izərayel ta dzashi. Ta iyapəti dzee lə dəvə kwa bərcee ta mbə ghəciy tihəshi tihə tihə səvəri mbə hiɗi ci» kə.Hyalaa gəzanci kaa Muyisə: «ta mbəli ka Izərayel dzee,» kə.
2 Ma kə Hiyala kaa Muyisə diɓa na: «Yən na Kwa sləkəpə. 3 Ee niy canati ghən tsee ka Hiyala kwa bərci kaa kar Abəraham, lə Izakə mbaʼ Zhakubə. Niy canatishee: “Kwa sləkəpə” na tsahuti slən tsee pənuw. 4 Ee niy slati kiri li shi, “Ta ndaŋuy hiɗi Kanahaŋ nza ghuy va ka ka səəkə səəkə ti shi dzee ka shi ghuy,” pən niy ni kaa ngəshi mbə sla kiri tsa va. 5 Sana kiy, ee favə ngəlvə ngəlvə ka Izərayel va ngəraʼu tsa sanshi ka Ezhiptə sa nza ghəshiy mevivi shi. Mbaʼee zəzətiy dzəkən sla kiri tsa kwa jipə tsee li shi. 6 Va tsəgha kiy, mbala gəzanshira: “Yən na Kwa sləkəpə. Ta ɓəkəvəriŋuy dzee mbə sləni iyapəŋuy məndi va li. Ta mbəlantəŋuy dzee mbə mava tsa məni ghuy va mbə dəvə ka Ezhiptə. Lə bərcee va iyahə iyahəta na dzee ta ɓasə nguvəə dzəkən shi, kee dzay, mbaʼee mbəlantəŋuy mbə dəvə shi. 7 Ta məntəŋuy dzee ka hulfə ni ya mbəzli. Yən dza Hiyala ghuy nza. Ghalaɓay, ta sənay dza ghuy, yən Kwa sləkəpə na Hiyala ghuy, yən mbəlantəŋuy na mbə sləni iyapəŋuy ka Ezhiptə va li pə ghuy. 8 Ta ɓəghəŋuy dzee dzəti hiɗi zəməkee va fəla ta ɓanshi kaa kar Abəraham, lə Izakə, mbaʼ Zhakubə. Ta ndaŋuy shi dzee ka shi ghuy. Yən gəzə na yən Kwa sləkəpə,” Kə Kwa sləkəpə, pə gha kaa ngəshi» kə. 9 Dza Muyisə mbaʼ dzaa gəzanshi kuma va kaa ka Izərayel. Ma ghəshi na, kala zləɓa ghəshi sa nzana mbaʼ ghəshi niy tashi va irə tsa irəshi məni mava tsa nza ghəshi va mbə.
10 Ma kə Kwa sləkəpə kaa Muyisə diɓa na: 11 «Mbala gəzanci kaa Farawaŋ mazə ka Ezhiptə a ghəci zlashi ka Izərayel, a ghəshi ɓarvashi tə hiɗi ci,» kə. 12 Ma kə Muyisə kaa ngəta na: «Zləɓa kuma gəzanshee ka Izərayel ya ghəshi sanaw na, tərə naa Farawaŋ ka na zləɓa kumee lə ghanee na shəndəkəta na na.» kə. 13 Dzəghwa Kwa sləkəpə ki mbaʼ gəzanshi kaa kar Muyisə lə Aruŋ a ghəshi dzaa kəsashi ka Izərayel zhini mbaʼ ghəshi kəsay Farawaŋ mazə ka Ezhiptə, ta mbə ka Izərayel dzashi tə hiɗi ka Ezhiptə.
Mbəzliy səvəri kwa miy dəghahi kar Ruben lə Shiməyuŋ, mbaʼ Levi
14 Avanashi sləneɗemer didihi ka ghyi ka Izərayel:
Hanuk, mbaʼ Palu, mbaʼ Hecərwəŋ, mbaʼ Karmi. Ghəshi na ndərazhi Ruben, kwa taŋa zəghu Zhakubə. Didihi ka ghyi mbə takə tsa Ruben na ghəshi.
15 Kar Yemwəl, mbaʼ Yamin, mbaʼ ʼWəhad, mbaʼ Yakin, mbaʼ Tswəhar, mbaʼ Shawəl ntsa yakə zha ka Kanan. Ndərazhi Shiməyuŋ na ni va. Ghəshi na jijihishi mbəzli mbə takə tsa Shiməyuŋ.
16 Avanashi sləneɗemer mbəzliy səvəri kwa miy dəgha Levi, njasa nza jijihishi ghənghən ghənghən: Ni yakə Leviy, kar Gershuŋ, lə Kehatə, mbaʼ Merari. Piya bələku mbaʼ mahəkanə mətsəkə mbərfəŋəti ghən kən niy mənti na tə hiɗi.
17 Bakə niy yakə Gershuŋ ndərazhi: Kar Libəni ghəshi lə Shimeyi. Ya wa ndə mbə shi na, mbaʼ yavə tsa ci takə. 18 Faɗə niy yakə Kehatə ndərazhi: Kar Aməram, mbaʼ Yisəhar, mbaʼ Hebərwəŋ, mbaʼ ʼWəziyel. Piya bələku mbaʼ mahəkanə mətsəkə mahəkanti niy hiy na tə hiɗi. 19 Bakə niy yakə Merari ndərazhi: Kar Mahəli lə Mwəshi. Ava tsəgha na takəhiy səvəri mbə Levi, njasa nuwva ghəshi.
20 Dzəghwa Aməram mbaʼ ɓəvə Ywəkeveɗ zhambəghiy diy ka mali ci, mbaʼ mali va yanakə kar Aruŋ lə Muyisə. Piya bələku mbaʼ mahəkanə mətsəkə mbərəfəŋti niy mənti Aməram tə hiɗi.
21 Mahəkanə niy yakə Yisəhar ndərazhi: kar Kwəre lə Nefegə, mbaʼ Zikiri. 22 Mahəkanə niy yakə ʼWəziyel ndərazhi: Kar Mikayel lə Elshafaŋ, mbaʼ Shitəri.
23 Dzəghwa Aruŋ mbaʼ ɓəvə Elizabetə zha Aminadavə, zhambəghiy Nashuŋ ka mali ci, mbaʼ yanakə ndərazhi faɗə: Kar Nadavə mbaʼ Avihu, mbaʼ Eleyazar, mbaʼ Itamara.
24 Mahəkanə niy yakə Kwəre ndərazhi: Kar Ashir lə Eləkana, mbaʼ Aviyasafə. Ghəshi na takəhiy səvəri mbə Kwəre.
25 Dzəghwa Eliyazar zəghu Aruŋ mbaʼ ɓəvə zha mbə ghyehi Putiyel ka mali ci, mbaʼ yanakə zəghu, Pinəhasə kə məndi kaa slən tsa ci.
Ava tsəgha na didihi ka ghyiy səvəri mbə takə tsa Levi.
26 Kaa kar Aruŋ lə Muyisə niy gəzanshi Kwa sləkəpə: «Mbalam a ghuy dzaa pəməkəvəri ka Izərayel mbə hiɗi ka Ezhiptə kwa zərə kutiŋ,» kə. 27 Ghəshi na shiy dza vaa kəsay Farawaŋ mazə ka Ezhiptə ta gəzanci a ghəci zlashi ka Izərayel ta səvərishi mbə hiɗi ci.
Hiyala zhiniy gəzanci kuma dza na ta məni kaa Muyisə