Səvəri 7

Ma kə Kwa sləkəpə kaa Muyisə ki na: «Avee fiyŋa nja Hiyala kwa kuma Farawaŋ, ma zəməŋa Aruŋuy, nza ghəci nzaa mətəkwal tsa gha. 2 kuma dzee gəzəkəŋa gwanatay, nza gha zhini kaa zəməŋa Aruŋ, ma ghəciy, nza ghəci gəzanci kaa Farawaŋ ta mbə ghəciy zlashi ka Izərayel ta səvərishi ghəshi mbə hiɗi ci. 3 Ya tsəgha nzə kiy, ta mənti ghən tsa Farawaŋ dzee caslakə, kee dza na, ka məni shi maɗaŋa maɗaŋa ni, lə shiy cipə kuma ɗaŋ, shi səəkə ma məndiy nashi tə hiɗi ci. 4 Ya tsəgha nziy, ka dza Farawaŋ fa kuma dza ghuy gəzanciw, kee dza ki na, mbaʼee canati bərcee kaa ka Ezhiptə, lə sanshi ngəraʼwer tərəŋu, ma nzee ɓəkəvəri hulfee ka Izərayel mbə hiɗi va kwa zərə kutiŋ. 5 Ghalaɓay, ta sənay dza ka Ezhiptə yən na Kwa sləkəpə, kə ghəshi, sa dzee cintishi bərcee, ta ɓə ka Izərayel səvəri mbə hiɗi va,» kə Kwa sləkəpə.

6 Dzəghwa kar Muyisə lə Aruŋ mbaʼ ghəshi dzaa mənti war njasa gəzanakəshi Kwa sləkəpə va. 7 Ghala vəghu tsaa niy tsəhəshi ghəshi va ta gəzə kuma kaa Farawaŋiy, piya dəghəsəmətsəkə niy nza sa Muyisə, ma na Aruŋ na, piya dəghəsəmətsəkə mahəkanə ti.

Zləɓavə kuma kar Muyisə lə Aruŋ Farawaŋuw

8 Ma kə Kwa sləkəpə kaa kar Muyisə lə Aruŋ diɓa na: 9 «Mbaʼ kə Farawaŋ dzaa ni: “məntim kuma maɗaŋa maɗaŋa na” kiy, nza gha gəzanci gha Muyisə kaa Aruŋ a ghəci ndəghati gəta ci tə hiɗi kwa kuma Farawaŋ, ta zhəghəta dza gəta va ka shishi,» kə.

10 Dzəghwa kar Muyisə lə Aruŋ ki, mbaʼ ghəshi dzaa kəsay Farawaŋ, mbaʼ ghəshi mənti njasa niy gəzanshi kwa sləkəpə va. Dza Aruŋ fiyəkə ndəghati gəta ciy dzəti hiɗi kwa kuma kar Farawaŋ lə mbəzli kwa dəgha ci, mbaʼ gəta va zhəghəta ka shishi. 11 Dzəghwa Farawaŋ kuraku ki daʼ daʼ haharashi mbəzliy sənata kuma lə ka məni shi maɗaŋa maɗaŋa ni tə hiɗi ci. Səəkə mbəzli va mbaʼ ghəshi mənti shi va lə shi ka ghəshi vaa ɗaŋə shiy njasa məntishi Aruŋ va. 12 Ya wa ndə mbə shi na, mbaʼ ndəghati gəta ci tə hiɗi, mbaʼ getesli va zhəzhəghəshi ka shesher. Dza na Aruŋ va gəta mbaʼ ndandahu ni shi va getesli. 13 Ya tsəgha nzə ki na, war caslakəslakə ghən tsa Farawaŋ nziyiy, njasa niy gəzəkə Kwa sləkəpə va, kala zləɓa ma kuma gəzanci kar Muyisə va lə Aruŋ ghəci.

Kwa taŋa ngəraʼu: Yam zhəghəshi ka miymiy

14 Ma kə Kwa sləkəpə kaa Muyisə diɓa na: «Njana zhini Farawaŋ ghən, kala ɗi ma zlashi ka Izərayel ghəci ta dzashiy, 15 nza gha dza və həzlimə mekəshi ghala vəghu tsa dza naa səvəri ta dzəmiy həl Nil, nza gha ndəghə miy həl tsa va. Ɓəvə tə gha gətaa niy zhəghəta va ka shishi mbə dəvə gha. 16 Ma pə gha dzaa ni kaa ngəciy: “Kwa sləkəpə, Hiyala ka Ebərə ghunara na ta gəzaŋa kuma, ma kiy: Zlashi mbəzlee va a ghəshi dzəti gamba ta dza ta tsəfəku kwa kumee, pən na, kala zləɓa ma gha paʼa sana ɓay? 17 Ndata tsəgha nay, ta sənay dza gha yən na Kwa sləkəpə pə gha, tə shi dzee ni ta məni. Avanaɗa Yən Muyisə dzaa sləvati gətee naa dzəti yam kwa həl tsa niy, ta zhəghəshi dza ghəshi ka miymiy. 18 Ta bəku dza kərpi mbə yam va, ka yam va dzay, ka zən, ka dza ka Ezhiptəə zləɓa sa yam kwa həl tsa vaw,” pə gha dzaa ni kaa ngəci,» kə Kwa sləkəpə. 19 Ma kə Kwa sləkəpə kaa Muyisə diɓa na: «Gəzanci kaa Aruŋ: kafata gəta gha va a gha ci dəvə gha dza kwa bəla nza yam tə hiɗi ka Ezhiptə gwanashi, dza kwa bəla nza həleɗemer, lə ni diŋəzliti məndi yam, lə kufahi, ya dza kwa nama bəla na yam, nza ghəshi mbərəshi ka miymiy. War miymiy kə pi tsa tə hiɗi ka Ezhiptə gwanay, ya kwa kwekwer fəɗitim tə tsəm, ya kwa ni məntim tə hərezli gwaʼa,» kə.

20 Dzəghwa kar Muyisə lə Aruŋ, mbaʼ ghəshi mənti kuma gəzanakəshi Kwa sləkəpə va. Dza Aruŋ kafə kafata gəta ci mbaʼ ləkati tə həl Nil kwa kuma kar mazə ka Ezhiptə lə mbəzli kwa dəgha ci. Dzəghwa yam kwa həl tsa va gwanashi, mbaʼ ghəshi zhəghəshi ka miymiy, 21 mbaʼ kərpi mbə shi bakwantəvashi, war ə yam vaa zən, kala mbay ka Ezhiptəə sashi ghula. War miymiy ghaa nay ma pi tsa tə hiɗi va gwanashi.

22 Dza ka məni shi maɗaŋa maɗaŋa ni tə hiɗi ka Ezhiptə, mbaʼ ghəshi mənti shiy tsəgha lə shi ka ghəshiy məni maɗaŋa kuraku. Dzəghwa war caslakəslakə ghən tsa Farawaŋ nziyiy, kala zləɓa ma kuma kar Muyisə lə Aruŋ ghəci njasa niy gəzəkə Kwa sləkəpə va. 23 Dza na mbaʼ zhəghətəvay, ka dzay jighyi kala shashanci ma niva shiy. 24 Dzəghwa ka Ezhiptə gwanashi ki, ka hu mbə yam dzar vəgha həl Nil ta sa shi, sa nzana kala sava ma ni kwa həl tsa va yam. 25 Vici mbərəfəŋ niy nza na ghala sanamiyshi Kwa sləkəpə ngəraʼu kaa ka Ezhiptə lə shi mənti na va lə yam kwa həl Nil.

Kwa baka ngəraʼu: Gwembimbi

26 Zhini ma kə Kwa sləkəpə kaa Muyisə diɓa na: «Mbala kəsay Farawaŋ, ma pə gha kaa ngəciy: “Ma kə Kwa sləkəpiy: Zlashi mbəzlee a ghəshi dzashi ta dza ta tsəfəku kwa kumee. 27 Kala zləɓa zlashi pə ghay, avee dzaa ɓəkə gwembimbi dzəti hiɗi gha gwanashi, ta sanshi ngəraʼu kaa mbəzli gha. 28 Ta təhay pi tsa kwa həl Nil dza ghəshi, ka ghəshi dzay, ka səəməə dzakə ghyi tsa gha, ka dzəmbə paʼa mbə ciki tsa ka ghaa həni, ka dzəmə tə pi həni tsa gha. Ka ghəshi dza diɓay, ka dzakə ghyi tsa ka ghəra sləni tə hiɗi gha, ka dzakə ghyi tsa mbəzli tə hiɗi gha gwanashi, ka dzəghwa leter, ka dzəghwa shi ka məndiy hwaɗi ghupə kwa shi ta ta peŋ. 29 Ka ghəshi dza diɓay, ka dzəmə tə gha, ka dzəmə tə mbəzli tə hiɗi gha, ka dzəmə tə mbəzliy ghəra sləni tə hiɗi gha,” pə gha kaa ngəci,» kə Kwa sləkəpə.