Səvəri 8

Ma kə kwa sləkəpə kaa Muyisə diɓa na: «Gəzanci kaa Aruŋ a ghəci kafata dəvə ci, a ghəci ci gəta ci va dza kwa həleɗemer lə yam diŋəzliti məndi lə kufahi, nza gwembimbi səməə təhay hiɗi ka Ezhiptə gwanashi,» kə. 2 Dzəghwa Aruŋ ki mbaʼ kafata dəvə ci dza kwa bəla həleɗemer tə hiɗi Ezhiptə, mbaʼ gwembimbi səvərishi dzəti hiɗi ka Ezhiptə gwanashi. 3 Dza ka məni shi maɗaŋa maɗaŋa ni tə hiɗi ka Ezhiptə, mbaʼ ghəshi mənti shiva tsəgha lə bərci ka ghəshi vaa ɗaŋə shiy, mbaʼ ghəshi ɓəkə gwembimbi dzəti hiɗi ka Ezhiptə.

4 Dzəghwa Farawaŋ mbaʼ harashi kar Muyisə lə Aruŋ, ma kə kaa ngəshi na: «Cəʼwəm Kwa sləkəpə a ghənzə ɓanti gwembimbi ni mbə ghiy lə mbəzli tə hiɗee, ma nzee zlashi ka Izərayel ta dzashi ghəshi ta hananta shiy,» kə. 5 Ma kə Muyisə kaa Farawaŋ na: «Tavəra vici dzee cəʼu Kwa sləkəpə tə gha lə ta ka sləni gha lə mbəzli tə hiɗi gha dəʼu ghən tsa gha mazə. Ta cəʼu Kwa sləkəpə dzee nza ghənzə ɓanti gwembimbi va vəgha gha lə kiy ghyeghyer gha, ma nza ghəshi tərə kwataka kwa həl Nil,» kə. 6 Ma kə Farawaŋ na: «Həzlimə pə ghaa cəʼu,» kə. Ma kə Muyisə na: «Ta məni dzee njasa ɗi gha va, ta mbə ghaa sənay ndə tiɓa ka yiməva lə Hiyala kwa sləkəpə ghiy vaw, pə gha. 7 Ta ɓarəvashi dza gwembimbi vəgha gha lə kiy ghyeghyer gha. Ta ɓarəvashi dza ghəshi mbə mbəzliy ghəraŋa sləni lə mbəzli tə hiɗi gha. Kwataka kwa həl Nil dza ghəshiy tərə,» kə.

8 Dzəghwa kar Muyisə lə Aruŋ ki, mbaʼ ghəshi səvərishi kiy ghyi tsa Farawaŋ. Dza Muyisə ka cəʼu Kwa sləkəpə a ghənzə ɓanti gwembimbiy niy ɓəkə na va ta sanci ngəraʼu kaa Farawaŋ. 9 Dzəghwa Kwa sləkəpə mbaʼ mənti kuma cəʼuti Muyisə va. Mbaʼ gwembimbi va bekushi dzar kiy ghyeghyer lə kwa tipəhi, mbaʼ dzar mbə gamba. 10 Ndizliw ndizliw məndi ɓaɓasətishi, war ə pi tsa tə hiɗi vaa zən. 11 Ma sa nighəti Farawaŋ fee ghəci va kuma va ki na, mbaʼ zhiniy mənti ghən tsa ci caslakə. Kala zləɓa ma kuma kar Muyisə lə Aruŋ ghəci njasa niy gəzəkə Kwa sləkəpə va.

Kwa mahəkana ngəraʼu: Vənzə

12 Ma kə kwa sləkəpə kaa Muyisə na: «Gəzanci kaa Aruŋ a ghəci kafata gəta ci va, nza ghəci ləkati tə kurbi tə hiɗi. Ta zhəghəshi dza ghəshi ka vənzə tə hiɗi ka Ezhiptə gwaʼ gwaʼa,» kə. 13 Dzəghwa mbəzli va mbaʼ ghəshi mənti tsəgha. Sa kafata Aruŋ gəta ci, mbaʼ ləkati tə kurbi tə hiɗi na, dza kurbi tə hiɗi ka Ezhiptə gwanashi mbaʼ ghəshi zhəghəshi ka vənzə. Təpələʼwə ghəci dzay dzəkən ke ngəri lə dzəkən dəmbəkə. 14 Dzəghwa ka məni shi maɗaŋa maɗaŋa ni tə hiɗi ka Ezhiptə ka dzəghə ɗaŋə tsa shi vənzə dza kwa tsa shi kwal ɗaŋə shiy na, shaŋ ghəshi. War vənzə ghaa nay ma tə ke ngəri lə tə dəmbəkə. 15 Ma kə ka məni shi maɗaŋa maɗaŋa ni va kaa Farawaŋ ki na: «Hiyala mənti na kuma va lə bərci nzə,» kə ghəshi. Ya tsəgha nzə ki na, caslakəslakə ghən tsa Farawaŋ nziyiy, kala fa ma kuma kar Muyisə lə Aruŋ ghəci njasa niy gəzəkə Kwa sləkəpə va.

Kwa faɗa ngəraʼu: Zheɓesli nza havə kwa miy shi

16 Ma kə Kwa sləkəpə kaa Muyisə diɓa na: «Həzliməy, nza gha kafəŋa pəətə mekəshi, mbaʼ gha dzaa tsəhəŋa kwa kuma Farawaŋ sa ka na dza ta dzəmiy həl Nil. Ma pə gha dzaa ni kaa ngəciy: “Ma kə Kwa sləkəpiy: Zlashi mbəzlee a ghəshi dza ta tsəfəku kwa kumee. 17 Kala zlashi pə ghay, avee taa ghunikə zhebesli nza havə mbə miy shi dzəkən gha lə dzəkən mbəzliy ghəraŋa sləni, lə dzəkən mbəzli tə hiɗi gha, mbaʼ dzəkən mbəzli kiy ghyeghyer gha. War zheɓesli va dza pi tsa kiy ghyeghyer ka Ezhiptəə nza, tsəgha pi tsa dzar tə hiɗi shi. 18 Fəcavay, ta təraghwa ghala dzee kwa jipə hiɗi Gushen nza mbəzlee va ti shi, lə nihuti hiɗi ka Ezhiptə gwanashi ni. Ka dza zheɓesli vaa nza tə hiɗi ni ya va mbəzliw, ta mbə ghaa sənay tə hiɗi Gushen va nzee yən Kwa sləkəpə, pə gha. 19 Ta waslanti ni ya va mbəzli dzee va ngəraʼu tsaa dza vaa nza kən mbəzli gha. Həzlimə dza nava kuma maɗaŋa maɗaŋa na ta məniva,” kə Kwa sləkəpə, pə gha kaa ngəci,» kə Kwa sləkəpə kaa Muyisə.

20 Dzəghwa Kwa sləkəpə mbaʼ mənti njasa gəzəkə na va. Kwəlkwəlkwəl zheɓesli nza havə kwa miy shi tsahushi kiy ghyi tsa Farawaŋ lə kiy ghyi tsa mbəzliy ghəranci sləni, lə tə hiɗi ka Ezhiptə gwanashi. Təpələʼwə ghəshi dzashiy dzəkən mbəzli tə hiɗi va gwanashi. 21 Dzəghwa Farawaŋ daʼ harashi kar Muyisə lə Aruŋ, ma kə kaa ngəshi na: «Mbalam ta hananta shiy kaa Hiyala ghuy va, a na nzanay, tikə tə hiɗi ni pə ghuy dzaa hanantashi,» kə. 22 Ma kə Muyisə na: «Ka dzava na ghiy məni tsəghaw. Sa nzanay, Shi dza ghiy vaa hananta kaa Hiyala ghiy Kwa sləkəpiy, mahalakə na ghəshi va ka Ezhiptə. Sa dza ghəshiy naŋəy mbə həni shi vay, ta bakwamtəŋiy dza ghəshiy dza lə hərezli. 23 Dzəti gamba dza ghiy dza, vici mahəkanə dza ghiy mənti mbə dza ta dzəti pi tsa va, sa ka ghiy tsəhəŋəyəy, nza ghiy hananta shiy kaa Hiyala ghiy Kwa sləkəpə njasa dza naa gəzaŋəy,» kə. 24 Ma kə Farawaŋ na: «Ta zlaŋuy dzee ta dzaa dzəti gamba ta hananta shiy kaa Hiyala Kwa sləkəpə ghuy. Ə na na nzanay, əntaa ghuy dza kərakə tərəŋu ma, cəʼu tə ghuy tə ya,» kə. 25 Ma kə Muyisə na: «Sa kee dzəvəriɗa kiy ghyi tsa ghay, ta cəʼu Kwa sləkəpə dzee tə gha. Həzliməy ta tahanti zheɓesli va dza na kərakə lə gha, lə mbəzliy ghəraŋa sləni, mbaʼ mbəzli tə hiɗi gha gwanashi. Nanzə kiy, əntaa gha dzaa sawaŋəy, ka zhiniy makə ka Izərayel va dza ta hananta shiy kaa Kwa sləkəpə ma,» kə.

26 Dzəghwa Muyisə ki, mbaʼ səvəriy kiy ghyi tsa Farawaŋ, mbaʼ cəʼuti Kwa sləkəpə ta mbə ghənzəə ɓanti zheɓesli va. 27 Dza Kwa sləkəpə mbaʼ mənti kuma ɗuwti Muyisə va. Cəkeʼ tahanti zheɓesli va vəgha kar Farawaŋ lə ka sləni ci mbaʼ mbəzli tə hiɗi ci, kala tərə ma ghəshi ya kutiŋ. 28 Ya tsəgha nzə diɓa ki na, mbaʼ Farawaŋ zhiniti ghən kala zlashi ma ka Izərayel ghəci ta dzashi ghəshi.