Kwa cafa ngəraʼu: biyambə tsa dəmbəkə
9
Ma kə Kwa sləkəpə kaa Muyisə diɓa na : «Mbala kəsay Farawaŋ, ma pə gha kaa ngəciy: “A kə Kwa sləkəpə, Hiyala ka Ebərəy: Zlashi mbəzlee a ghəshi dza ta tsəfəku kwa kumee. 2 Mbaʼ pə gha kala zləɓa zlashi, mbaʼ gha zhiniy damətishiy, 3 ta ɓəkə biyambə dzee dzəmbə dəmbəkə tsa gha kwamti yən yən Kwa sləkəpə. Təruŋəy dza biyambə tsa vaa dzay dzəmbə Gədewesli gha lə kwantəmcahi gha, mbaʼ ngeləwbahi gha, mbaʼ slay gha, mbaʼ kwiy gha. 4 Ta təraghwa ghala dzee yən Kwa sləkəpəə, dzəghwa dəmbəkə tsa ka Izərayel lə tsa ka Ezhiptə. Ya kutiŋiy, ka dzaa dəmbəkə tsa ka Izərayel mətiyəw, kə Kwa sləkəpə” pə gha kaa ngəci,» kə.5 Dzəghwa Kwa sləkəpə mbaʼ slati vəghu tsa dza shiva ta məniva ti. Ma kə na: «Həzlimə həzlimə dzee ta məni kuma va tə hiɗi ka Ezhiptə,» kə. 6 Ma way pi tə həzlimə ki na, Dza Kwa sləkəpə mbaʼ mənti njasaa niy gəzəkə na va. Cəkeʼ dəmbəkə tsa ka Ezhiptə bəkuy. Mbə ni ka Izərayel na, mətiy ya kutiŋəw. 7 Dza Farawaŋ mbaʼ ghunashi mbəzli ta nighə dəmbəkə tsa ka Izərayel. Dza ghəshi na, kala kəsay tsaa mətiy ghəshi ya kutiŋ mbə shi. Zhini diɓa caslakə ghən tsa Farawaŋ zhiniy nziyiy kala zlashi ka Izərayel dzashi.
Kwa kwaŋa ngəraʼu: zheher
8 Zhini ma kə Kwa sləkəpə kaa kar Muyisə lə Aruŋ na: «Tivəm pəsər dərəkə mbə dəvə ghuy nza Muyisə dzaa kihway dzəta ghumə kwa kuma Farawaŋ. 9 Ta zhəghiy dza na ka kurbi tə hiɗi ka Ezhiptə gwanashi. Ka na dza na, mbaʼ pəpəsəkəvəri shiy gwərzlizlizl tə vəgha ke ngəri lə dəmbəkə tə hiɗi ka Ezhiptə gwanashi. Ka shi va dzay, mbaʼ ghəshi zhəzhəghəshi ka zheher,» kə.
10 Dzəghwa kar Muyisə lə Aruŋ mbaʼ ghəshi tivə pəsər dzaa kəsay Farawaŋ. Dza Muyisə mbaʼ pəhay dzəta ghumə. Dza pəsər tsa va mbaʼ pəsəkəvəri shiy gwərzlizlizl tə ke ngəri lə dəmbəkə. Dza shi va mbaʼ ghəshi zhəghəshi ka zheher. 11 Ka məni shi maɗaŋa maɗaŋa ni tə hiɗi ka Ezhiptəy, niy mbə ghəshiy dzəghwa kuma Muyisə va zheherəw. Sa nzanay, war zheher niy nza vəgha shi nja nihuti ka Ezhiptə gwanashi ni. 12 Dza Kwa sləkəpə mbaʼ zhəghəti ghən tsa Farawaŋ caslakəslakə kala zləɓa ma kuma kar Muyisə lə Aruŋ ghəci njasaa niy gəzanakə na va kaa Muyisə.
Kwa mbərfaŋa ngəraʼu : Kwacakasla
13 Ma kə Kwa sləkəpə kaa Muyisə diɓa na: «Həzlimə pətə mekəshiy, nza gha dzaa kəsay Farawaŋ . Ma pə gha dzaa ni kaa ngəciy: “Ma kə Kwa sləkəpə Hiyala ka Ebərəy: zlashi mbəzlee a ghəshi dza ta tsəfəku kwa kumee. 14 Nana kiy, ta shəkakənŋuy ngəreʼuere dzee gwanashi dzəkən gha lə mbəzli kwa dəgha gha, mbaʼ mbəzli tə hiɗi gha gwanashi. Ghalaɓay, ta sənay dza gha ndə tə hiɗiy yiməva lə yaw, pə gha. 15 Yən kə niy ɗi nzay, ee ɓəkə zəlghu tsa jikir tsaa dzəkən ghuy lə mbəzli tə hiɗi gha nza, mbaʼ Məntəŋwiy tə hiɗi. 16 Kala ɗi ma mənee tsəgha, mbaʼee zlaŋa tə ghuməŋa ta mbəə ciŋa bərcee, mbaʼ ta mbə slən tsee mbəə dzantəvay tə hiɗi gwaʼ gwaʼa. 17 Ya tsəgha nzə kiy, war ghulaŋa gha mbə zhini ghən, kala ɗi ma zlashi mbəzlee ta dzashi ghəshi. 18 Va tsəgha ki, geʼi lə vəghu tsa həzliməy, ta nzəməkə kwacakasla bəvə bəvə na dzee dalala. Gəla kwacakasla vay, səəkə naa nzəməhu nzəmə tə hiɗi ka Ezhiptə ghala nza ghəshiw. 19 Ma pə gha mənti kiy, ə pə gha ghunashi mbəzli a ghəshi dzaa kalayŋa dəmbəkə tsa gha lə shi gha tə ngula gwanashi. Sa dza kwacakasla vaa ghati nzəməy, slən shiy dzaa nza tə ngulashi ya ndə ngəri na, ya dəmbəkə na, kala dza kə ghəshiy dzashi dzəmbə cikiy, ta bakwamtishi dza na,” kə, pə gha kaa ngəci,» kə kwa sləkəpə.
20 Sa gəziy Muyisə kuma gəzəkə Kwa sləkəpə va kaa Farawaŋ na, mbaʼ nihuti mbə mbəzli ka ghəra sləni ci ɓəti kuma va ka kuma kataŋ na, mbaʼ ghəshi dzaa gəzanshi kaa ka sləni shi a ghəshi dzashiy dzakə ghyi lə dəmbəkə. 21 Ma nihuti na shi ki na, kala ɓəti ma kuma va ghəshi ka kuma kataŋ na, mbərəkə ghəshi zlay dəmbəkə tsa shi lə ka sləni shi tə ngula.
22 Ma kə Kwa sləkəpə kaa Muyisə na: «Kafata dəvə ghaa dzəta ghumə, a kwacakasla nzəməə dzəti hiɗi ka Ezhiptə, ka nzəməə dzəkən ke ngəri, lə dzəkən dəmbəkə lə dzəkən shi zati məndi tə hiɗi va gwanashi,» kə. 23 Dzəghwa Muyisə kafə kafata gəta ciy dzəta ghumə. Dza Kwa sləkəpə mbaʼ dərazlay van, ka nzəmə kwacakasla. Mbaʼ ghu dərazlikəvataa dzəti hiɗi, dza Kwa sləkəpə mbaʼ nzəməkə kwacakaslaa dzəti hiɗi ka Ezhiptə . 24 Ghala nza ka Ezhiptəy, səəkə ghəshiy nay gəla tsava ghyanakə nzəmə vanə tsəgha kwacakasla lə dərazli ghu mbuw. 25 Dzəghwa kwacakasla va zanakənakənakə didiʼwəy shiy niy nza tə ngula tə hiɗi va gwanashi, ke ngəri lə dəmbəkə gwaʼa. Cəkeʼ yiɗivəri shi zati məndi, mbaʼ ɓaɓalanti fəhi gwanashi. 26 A na hiɗi Gushen nza ka Izərayel va ti shiy, niy tsəhəta kwacakasla va ti shiw. 27 Dzəghwa Farawaŋ mbaʼ harashi kar Muyisə lə Aruŋ. Ma kə kaa ngəshi na: «Nana ɓashiy, ee mənti kuma jikir na. Kwa sləkəpə na saa nuti kuma lə kwal tsa nzə. A na na ghiy lə mbəzli tə hiɗi yay, a fəti va ghiy. 28 Mbalam ta cəʼu kwa sləkəpə a ghənzə garəti kwacakasla na lə dərazli van tsa. Ta zlaŋuy dzee dzaŋuy, ka nzay nza ghuy tikə ghulaw,» kə kaa ngəshi. 29 Ma kə Muyisə kaa ngəci na: «Sa dzee dzəvəriɗa mbə məlmə nay, ta kafashi divədivee dzee dzəta ghumə ta cəʼu Kwa sləkəpə. Ta garəti dərazli dza van, mbaʼ kwacakasla garəti nzəmə, ta mbə ghaa sənay shi Kwa sləkəpə na hiɗi, pə gha. 30 Ya tsəgha nzə kiy, ee sənay, ghulaŋuy nza ghuy kala hazləni ma va Hiyala Kwa sləkəpə, ghuy lə ka sləni ghaw,» kə.
31 A kwacakasla va niy yiɗivəri fə har məndiy leŋ lə shi har məndiy ʼwərzhə, sa niy nzanay, mbə ɓə hur niy nza ʼwərzhə, ma leŋ na, mbə mbərə ghu. 32 A na alkamari lə nahuti takə alkamariy niy yiɗishi ghəshiw, sa nzanay, liy hum niy zashi məndi, niy nakəkəshi ghəshiw.
33 Dzəghwa Muyisə ki, mbaʼ səvəriy kiy ghyi tsa Farawaŋ, mbaʼ səvəriy mbə məlmə. Dza na kafə kafata dəvə ciy dzəta ghumə mbaʼ cəʼuti Kwa sləkəpə. Dzəghwa van mbaʼ garəti dərazli, mbaʼ kar van lə kwacakasla garəti nzəmə. 34 Ma sa nay Farawaŋ Kala dərazli van ghula, mbaʼ kar van lə kwacakasla garəti nzəmə na, dza na mbaʼ gariy tə məni kuma ci va jikir na, lə zhini ghən tsa ci va. Tsəgha ka sləni ci mənti kuraku. 35 Dzəghwa mbaʼ ghən tsa Farawaŋ nziyiy caslakəslakə, kala zləɓa ma pəli ka Izərayel ghəci ta dzashi ghəshi, njasa niy gəzəkə Kwa sləkəpə va lə miy tsa Muyisə.