Səvəri 10

Kwa dəghasa ngəraʼu: Jir

Ma kə Kwa sləkəpə kaa Muyisə diɓa na: «Mbala kəsay Farawaŋ, yən zhəghəti na ghən tsa ci lə sa mbəzliy ghəranci sləni caslakə, ta mbee məni kuma maɗaŋa maɗaŋa na mbə jipə shi. 2 Nza gha mbəə slanshi kaa ndərazhi gha lə kaa jijihiŋa, njasa sanamiyshee ngəraʼu kaa ka Ezhiptə, mbaʼ kuma maɗaŋa maɗaŋa na mənəhwee tə hiɗi shi. Ghalaɓa kiy, ta sənay dza ghuy, yən na Kwa sləkəpə pə ghuy,» kə.

3 Dza kar Muyisə lə Aruŋ mbaʼ ghəshi dzaa kəsay Farawaŋ, ma kə ghəshi kaa ngəci na: «A kə Kwa sləkəpə, Hiyala ka Ebərəy: “Hwəm dza ghaa zlay zhiniɗa ghən, kala ɗi ma fəti ta kuma gəzəŋa yaa? Zlashi mbəzlee va a ghəshi dzashi ta dza ta ghəraɗa sləni. 4 War ghulaa pə gha Kala zləɓa ma zlashiy, ta ɓəkə jir dzee dzəti hiɗi gha həzlimə. 5 Ta təhay pi tsa tə hiɗi gha dza na. Ka dza ndəə nay pi tsa tə hiɗi va vuw. Shiy tərə ta miy kwacakasla dza naa zəmə. Cəkeʼ dza naa pəranti fəhi ghuy tə gamba. 6 pefə pefə dza naa təhay ghyi tsa gha lə sa ka ghəraŋa sləni gha gwanashi, mbaʼ sa ka Ezhiptə gwanashi. Ghala nza jijihiŋuy paʼa va ndatsiy, səəkə məndiy nay gəla tsa va ngəraʼuw,” kə Kwa sləkəpə,» kə ghəshi.

Dzəghwa Muyisə mbərəkə zlay Farawaŋ, ka dzay. 7 Ma kə ka ghəra sləni Farawaŋ dikə dikə ni na: «Hwəm dza ntsaa zlay sammə ngəraʼua? Zlashi ka Izərayel va a ghəshi dza ta tsəfəku kwa kuma Kwa sləkəpə Hiyala shi. Əə sənay ma gha mbə zhəghəva na hiɗi Ezhiptə zhiy liy hum pə gha na?» kə ghəshi. 8 Dza məndi mbaʼ məndi harkə kar Muyisə lə Aruŋ dzəghwa kuma Farawaŋ. Ma kə kaa ngəshi na: «Mbalam ta tsəfəku kwa kuma Kwa sləkəpə Hiyala ghuy va. Nanzə kiy, kar wa kar wa dza na ta dzaa?» kə. 9 Ma kə Muyisə kaa ngəci na: «Gwanaŋəy dzaŋəy ghiy: ndərazhi lə mətikukur, mbaʼ zhər lə miʼi. Mbaʼ teŋkesli ghiy lə kwiy ghiy mbaʼ slay ghiy. Sa nzanay, ta məni makwaghwa dza ghiy kaa Kwa sləkəpə ghiy,» kə. 10 Ma kə Farawaŋ kaa ngəshi na: «Kwa səbə ghuy kə Kwa sləkəpə. Sa təkə ghuy na, kataŋ dzee ta zlaŋuy dzaŋuy lə ghyi tsa ghuy na? A ghuy təkəti məni kumaa kama wəzə na. 11 Na təkəti ghuy va kumay, ka məntaw. War zhər gwaʼa tsəgha dza na ta dzashi ta tsəfəku kwa kuma Kwa sləkəpə njana nzana ghənzə kuma ɗuw ghuy vəya,» kə. Dza məndi ki, mbaʼ məndi tahantishi kwa dəgha Farawaŋ.

12 Ma kə Kwa sləkəpə kaa Muyisə diɓa na: «Kafata dəvə ghaa dzəkən hiɗi ka Ezhiptə ta ɓə jir səəkə, nza təhay pi tsa tə hiɗi va nza ghəci pəranti fəhiy tərə ta miy kwacakasla gwanashi,» kə. 13 Dzəghwa Muyisə ki, Kafə kafata gəta ci dzəkən hiɗi Ezhiptə. Dza Kwa sləkəpə mbaʼ ɓəkə safə tsaa səəkə kwa ghumə dzəti hiɗi ka Ezhiptə, vəghu na, hi na mbə viy. Ma tə mekəshi ki na, mbaʼ safə tsa va ɓəkə jir. 14 Dza jir tsa va mbaʼ pəlatəvay tə hiɗi ka Ezhiptə, ka laʼwə ya timaɓa nzə. Təruŋ dalala niy nza na, ghala nza məndiy, səəkə məndiy nay tsa va ɗaŋ jirəw, ka dza məndiy zhiniy nay diɓaw. 15 Dza pi tsa tə hiɗi va gwanay, mbaʼ zhəghiy ngəriy sa təhay jir tsa va. Dza na cəkeʼ pəranti guzən, mbaʼ ya fəhiy niy tərə ta miy kwacakasla. Ya kumaɓa tə hiɗi ka Ezhiptə gwanashiy, niy tərə shi neɓekə ni ya kutiŋ, ya mə fə, ya mbə zaw.

16 Dza mazə ki, kiyaŋu kiyaŋu harashi kar Muyisə ghəshi lə Aruŋ. Ma kə kaa ngəshi na: «Ee mananati kuma jikir na kaa Kwa sləkəpə Hiyala ghuy lə kaa ngəŋuyta. 17 Pəlataram kumee na jikir na məntee diɓa. Cəʼwəm Kwa sləkəpə Hiyala ghuy va, a ghənzə ɓanti tsa tsa ngəraʼu ndə pəəslipə tsa kənee,» kə. 18 Dza Muyisə mbaʼ dzay vəgha mazə, ka cəʼu Kwa sləkəpə. 19 Dzəghwa Kwa sləkəpə mbaʼ ɓəkə safə kwa mərkwi. Dza safə tsa va mbaʼ panti jir tsa vaa dzaa shəkaghwa kwa həl ghuvəl. Niy tərə jir ya kutiŋ tə hiɗi ka Ezhiptə gwanashiw. 20 Ya tsəgha nzə ki na, dza Kwa sləkəpə mbaʼ zhəghəti ghən tsa Farawaŋ caslakə. Kala zlashi ma ka Izərayel ghəci ta dzashi.

Kwa məslaɗa ngəraʼu: Kwəsli

21 Ma kə Kwa sləkəpə kaa Muyisə diɓa na: «kafata dəvə ghaa dzəta ghumə. Tərkwəsl dza pi tsa tə hiɗi ka Ezhiptəə mənəy. Ka dza ndəə nay piw, tiɓə tiɓə dza məndiy tiɓə pi,» kə. 22 Dza Muyisə, kafə kafata dəvə ciy dəta ghumə. Vici mahəkanə hiɗi ka Ezhiptə gwanashi mənti mbə kusli tərkwəsləkwəslə. 23 Mbə vici mahəkanə na vay, tərəhə tsaa kuməti lə tsahuti, tərəhə ntsaa səvəriy kiy ghyi tsa ci. Ta na ka Izərayel gwanashi nashi ki na, waŋ niy nza pi tə pi tsa nza ghəshi. 24 Dzəghwa Farawaŋ daʼ haray Muyisə. Ma kə ngəci na: «Mbalam ta tsəfəku kwa kuma Kwa sləkəpə. A ghuy mbəə dza lə miʼi ghuy mbaʼ ndərazhi ghuy. War teŋkesli ghuy lə kwiy ghuy mbaʼ slay ghuy na shiy dzaa nza tiɓashi,» kə. 25 Ma kə Muyisə kaa ngəci na: «Tiɓa tepuw. Gha dəʼu ghən tsa gha dza naa ndaŋəy dəmbəkə tsa dza ghiy ta hənanta, lə tsa dza ghiy ta ndanta kaa Kwa sləkəpə Hiyala ghiy. 26 Zhini diɓay, lə dəmbəkə tsa ghiy dza ghiy ta dzaŋəy. Ka tərə dəmbəkə tsa ghiy ya kutiŋ tikuw. Sa nzanay, ta hananta nihuti dza ghiy kaa Kwa sləkəpə Hiyala ghiy mbə shi. Kala tsəhəŋəy pə ghiy tə pi tsa vay, ka sənay ghiy nda nima dza ghiy ta həəni mbəshiw,» kə.

27 Ya tsəgha nzə ki na, dza kwa Sləkəpə mbaʼ mənti ghən tsa Farawaŋ caslakə. kala zləɓa ma zlashi ghəci ta dzashi ghəshi. 28 Ma kə kaa Muyisə na: « Ɓarvaŋa tiɓa, əntaa gha zhiniy səəkəə dzəghwa kumee ghula ma. Mbaʼ pəgha dzaa zhikəŋaa zhəghwa kuma yay, mbəri dza ghaa nza,» kə. 29 Ma kə Muyisə kaa ngəci na: «Tsəgha na, njasa gəzə gha vay, ka zhinee zhikəə dzəghwa kuma ghaw,» kə.