Səvəri 11

Kwa sləkəpə ghuni Muyisə ta gəzə kwa kərni ngəraʼu

Ma kə kwa sləkəpə kaa Muyisə diɓa ki na: «Ta ɓəkə kwa kərni ngəraʼu dzee dzəkən Farawaŋ lə dzəkən ka Ezhiptə. Liy hum ngəraʼu tsa vay, ta zlaŋuy dza na ta dzaŋuy. Lə tihəta dza naa tahantəŋuy, ta kwa ndimndim tikə. 2 Mbala gəzanshi kaa ka Izərayel a ghəshi cəʼu shi vasəti məndi tə tsahi mbəzə lə tə tsahi gəna. Ya tsamaɓa zaliy, ka cəʼushi va ndə ghalay, ya namaɓa mali na, ka cəʼushi va kwa ghalata,» kə. 3 Dza Kwa sləkəpə ki, mbaʼ zhəghəti nefer ka Ezhiptə ta ɗi kuma ka Izərayel ghəshi. Muyisə, dəʼu ghən tsa ciy, ndə ka haʼu məndi ti tərəŋu tə hiɗi ka Ezhiptə niy nza na. Təruŋ niy haʼu ka ghəra sləni Farawaŋ lə mbəzli gwaʼa ti.

4 Ma kə Muyisə kaa Farawaŋ na: «A kə Kwa sləkəpiy: “Mbə yam vərɗiy, ta dza dzee dzar mbə hiɗi Ezhiptə. 5 Slən shi gha məndiy ya tə hiɗi ka Ezhiptəy, ta bekushi dza ghəshi. ʼWava na tə kwa taŋa zəghu Farawaŋ, sa dza vaa zəmə ghyi ta mazə tsa ci, paʼa tə kwa taŋa zəghu mava mali mbə hə kwa vəna. Ya kwa taŋa sa gha məndiy ya mbə dəmbəkiy ta mətiy dza na. 6 Təruŋ dza mbəzli ta wahə tə hiɗi ka Ezhiptə gwanashi. Gəla wahə vay səəkə məndiy wahəhuw, ka dza məndiy zhiniy wahəhu ka məndi nza diɓaw. 7 Ma na kiy ka Izərayel gwanashiy, ka dza məndiy favə ya kiriy ʼwaŋə ya ta ndə ngəri, ya ta saa dza səɗaw. Ghalaɓay, ta sənay dza ghuy, yən kwa sləkəpiy ee təraghwa ghala kwa ka Izərayel lə ka Ezhiptə pə ghuy” kə Kwa sləkəpə,» kə Muyisə. 8 Ma kə Muyisə diɓa na: «Ghalaɓa kiy, ta səəkə dza mbəzli kwa dəgha gha ni tikə gwanashi ta tsəfəku kwa kwəme, ka gəzəra: “Mbala ghuy lə mbəzli mbə hulfə gha va gwanashi” dza ghəshiy ni. Kee dza ki na ka dzara,» kə Muyisə. Dzəghwa na mbaʼ səvəriy kiy ghyi tsa Farawaŋ sati sati nəfə tsa ci tərəŋu.

9 Ma kə kwa sləkəpə kaa Muyisə na: «Ka dza Farawaŋ ɗi fa kuma dza ghuy gəzanciw, va tsəgha dzee ta mətsəhə məni shi maɗaŋa maɗaŋa ni tə hiɗi ci,» kə. 10 A kar Muyisə lə Aruŋ niy mənəhu shi maɗaŋa maɗaŋa ni ɗaŋ kwa mətsə Farawaŋ. Ya tsəgha nzə kiy, A Kwa sləkəpə niy mənti ghən tsa ci caslakiy, kala zləɓa zlashi ka Izərayel ghəci ta dzashi tə hiɗi ci.