Njasa ghava makwaghwa Pakə
12
Ma kə Kwa sləkəpə kaa kar Muyisə lə Aruŋ ghəshi tə hiɗi ka Ezhiptə na: 2 «Tə tir tsa dza piyaa ghava va ghuy, ghəci dza kwa taŋa tir tsa mbə piyaa nza . 3 Mbalam gəzanshim kaa mbəzli ka Izərayel gwanashi: Tə kwa maŋa vici tir tsay, ya wa ndə kiy ghyi tsa ci na, mbaʼ ghəci kəsəvə ya zəghu təmbəkə ya ugə. 4 Djuwshi kə mbəzli kiy ghyi kala gar zəmanti dəmbəkə kutiŋ kə ghəshiy, nza ghəshi jakəshi lə tsahuti ghyi tsa ka ghala tsaa gura ndəku li shi, gar nza ghəshi geʼi geʼi ta zəməhu. Dəmbəkə gar zəmanti mbəzli kiy ghyi tsa shi kə ghəshi dzaa kəsə. 5 Dəmbəkə tsaa zal, mbaʼ mənti piya kutiŋ pə ghuy dzaa kəsə, ya zəghu təmbəkə na, ya ugə na. Əntaa bəzə nza dzar kwa ma. 6 Sa ka ghuy kəsəvəy, nza ghuy pəhəy, ka ndəghu paʼ tə kwa məŋ lə faɗə vici tə tir tsa. Ma fəcava, sa ka vici pəkutay, nza slən ntsa mbə hulfə ka Izərayel sliy dəmbəkə tsa dza na vaa kəsəti. 7 Ka ghuy dza, ya kiy tsama ghyi tsa dza məndiy zəmə sliw tsa va na, mbaʼ ghuy kaʼuvə miymiy va, nza ghuy hway pi tsa tə miy dəghaa dzakə, mə ghən tsa nzə lə dzar vəgha bəla nzə bakanata. 8 Sa ka ghuy dza ki na, mbaʼ ghuy pəsati sliw tsa va pəsa pəsa, nza ghuy zəmə həvir va, lə peŋ tsa kama is mbə, mbaʼ er kəslifə eghwekə ni. 9 Əntaa ghuy zəmə sliw tsa va ya lə məciy, ya tata ma, war pəsa pəsa pə ghuy dzaa pəsati sliw tsa va gwanay, lə shi kwa hur ta, mbaʼ ghən, mbaʼ cekucegumer gwaʼa. 10 Əntaa ghuy dzaa tərə mbəvəli ta zəmə həzlimə ma. Mbaʼ kə sliw tsa va təriy, nza ghuy ndanti sa ka pi kəriy. 11 Ghuy mbə pərə sliw tsa vay, pəhambə tə ghuy shiy mbə hur ghuy, mbaʼ ghuy pambə kwekweher ghuy, mbaʼ gəta ta dəvə ghuy. Lə diva lə diva pə ghuy dzaa pərə. Ghənzə dza naa nzaa Pakə, makwaghwa dza ghuy məni kaa ngəra yən kwa sləkəpə.12 Həvir vay, ta dza dzee dzar mbə hiɗi ka Ezhiptə, cikeʼ dzee bakwanti kwa taŋa ndərazhi tə hiɗi va. Kwa taŋa ndərazhi mbə ke ngəri lə ni mbə dəmbəkə gwaʼa. Yən gəzə na, yən yən Kwa sləkəpə, tsəgha dzee ta sla nguvə dzəkən mbəreketi tsəfəku ka Ezhiptə va kwa kuma shi. 13 Miymiy dza ghuy vaa wati tə miy dəgha ghuyiy, ti shi dzee sənay ghyi tsa ghuy. Sa kee nashi miymiy vay, ta taŋəti tsava ghyi dzee, ka dza ngəraʼu bəku mbəzli tsa vaa tsəhiy kiy ni ghuy ghyeghyer ghala vəghu tsa dzee irə ka Ezhiptəw.
14 Nava viciy, əntaa ghuy za ghən ti ya humɓa ma. Nza ghuy məni makwaghwa dikə na fəcava kaa ngəra yən Kwa sləkəpə. Fə tə ghuy ghən ti paʼ va jijihiŋuy. kumaa pəhəta ta nuw ya paʼ humɓa kə dzaa nza.
Makwaghwa peŋ tsa kama is mbə
15 Mbə makwaghwa vay, vici mbərfəŋ dza ghuy mənti mbə zəmə peŋ tsa kama is mbə. Tə kwa taŋa vici vay, mbaʼ ghuy ɓəkəvəri shi har məndiy is kiy ghyeghyer ghuy. Ntsaa dzaa zəməhu peŋ tsa nza is mbə mbə vici mbərfəŋ na vay, ɓanti tə məndi tsava ndə mbə hulfə ka Izərayel. 16 Tə kwa taŋa vici va, mbaʼ tə kwa mbərfaŋa vici vay, nza ghuy ɓasəŋuy ta fə shəndəkə dzətee. Əntaa ghuy ndəŋu ya nama sləni mbə vici bakə na va ma. Kwataka shi dza ghuy ta zəmə, na shi ka ghuy tahu gwaʼa tsəgha.
17 Fə tə ghuy ghən ta məni makwaghwa dza ghuy vaa zəmə ma peŋ tsa nza is mbə. Sa nzanay, fəca vici va na vici dza ghuy zəzə vici ɓəkəvəree hulfə ghuy mbə hiɗi ka Ezhiptə. Paʼ tar jijihiŋuy pə ghuy dzaa nza mbə fə ghən ta məni makwaghwa va. kumaa pəhəta ta nuw ya paʼ humɓa kə dzaa nza. 18 Tə kwa taŋa tir, ghava na tə kwa məŋ lə faɗə vici ci hetihwer viciy pəku, paʼ tə kwa bakəmətsəkə tanti vici ci hetihwer viciy pəkuy, peŋ tsa kama is mbə pə ghuy dzaa zəmə. 19 Mbə vici mbərfəŋ na vay, əntaa məndi dzaa kəsay is kiy ghyeghyer ghuy ma. Ntsaa dzaa zəməhu peŋ tsa nza is mbə ghala vəghu tsa va, ya ntsa mbə hulfə ghuy na, ya ntsaa səəkiy ta nziy mbə ghuy nay, tahanti tə məndi tsava ndə mbə hulfə ka Izərayel. 20 Slən shi nza is mbə shiy, əntaa ghəshi dzəghwa miy ghuy mbə vəghu tsa va ma. Ya tima nza ghuy lə nziy tsa ghuyiy, peŋ tsa kama is mbə pə ghuy dzaa zəmə,» kə Kwa sləkəpə kaa kar Muyisə lə Aruŋ.
Gwəmava ta zəmə shi mbə Makwaghwa Pakə
21 Liy hum ki na, dza Muyisə mbaʼ dzaa ɓasəti mbəzli dikə dikə ni mbə ka zhəwifə gwanashi. Ma kə kaa ngəshi na: «Mbalam kəsəvəm ya zəghu təmbəkə ya ugə kaa mbəzli kiy ghyi tsa ghuy, nza ghuy slanti ta məni makwaghwa Pakə. 22 Ka ghuy dzay, mbaʼ ghuy sləkuvə dəvə fə har məndi vaa Iswəpə, nza ghuy yəkwambə mbə miymiy kwa kwakwa tsa dza ghuy kaʼwaghwa miymiy dəmbəkə tsa va. Sa ghuy dza ki na, ka hu miymiy va dzəvəgha bəla miy dəgha bakanata, mbaʼ məkə tə ghən. Liy hum kiy, nza ghuy dzaŋuy dzakə ghyeghyer ghuy, əntaa ndə dzaa səvəri kiy ghyi paʼ tə kəɗi pi ma. 23 Ta dzar dza kwa sləkəpə mbə hiɗi ka Ezhiptə ta irə mbəzli mbəɓa. Sa ka na nashi miymiy dzar vəgha bəlahi tə miy dəgha mbaʼ tə ghən nziy, ta taŋəti tsava ghyi dza na. Ka dza naa ɓanavə kwal kaa ngəraʼu tsaa bəku mbəzli ta dzakə ghyi tsa ghuyuw. 24 Fə tə ghuy ghən ta nuw kuma va gwanata. kumaa pəhəta ta nuw ghuy ya paʼa humɓa ghuy lə jijihiŋuy na. 25 Sa ka ghuy tsəhəŋuy tə hiɗi dza kwa sləkəpə va ta ɓəŋuy njasa niy gəzəkə na vay, nza ghuy fə ghən ta məni makwaghwa va. 26 Sa ka ndərazhi ghuy ɗuw shi ɗi makwaghwa vaa gəziy, 27 avanta kuma ka ghuy zləɓanshi: “Shiy na shi va sliy məndi kaa Kwa sləkəpə ta makwaghwa Pakə. Sa nzanay, ghala vəghu tsaa niy nza jijihimə ka Izərayel tə hiɗi ka Ezhiptəy, aa niy taŋəta dzəghwa kən ghyeghyer shi sa niy irə na ka Ezhiptə. Mbaʼ niy waslanti ni ghummə ghyeghyer” pə ghuy dzaa ni,» kə Muyisə.
Dzəghwa ka Izərayel ki, mbaʼ ghəshi tsətsəfəkushi ta fə shəndəkə dzəti Kwa sləkəpə. 28 Sa maɗi ka Izərayel ki na, mbaʼ ghəshi dzaa mənti war njasa niy gəzanshi Kwa sləkəpə va kaa kar Muyisə lə Aruŋ.
Kwa kərni ngəraʼu: məti kwa taŋa ndərazhi ka Ezhiptə
29 Mbə dankala virɗi na, dza Kwa sləkəpəə mbaʼ səəkə bakwanti kwa taŋa ndərazhi ka Ezhiptə gwanashi. Ghava na tə kwa taŋa zəghu Farawaŋ niy dzaa zəmə ghyi ta mazə tsa ci paʼ tə kwa taŋa ndərazhi mbəzli kwa fərshina.Tsəgha ghənzə bakwanti kwa taŋa ndərazhi mbə dəmbəkə gwanashi diɓa. 30 Dzəghwa kar Farawaŋ lə mbəzli ta səɗa ci gwanashi, mbaʼ ka Ezhiptə gwanashi mbə virɗi va mbaʼ ghəshi kafəshi ka wahə. Sa nzanay, niy nza ghyi tiɓa ya kutiŋ kala mbəri kiyɓaw. 31 Dzəghwa Farawaŋ mbə dankala virɗi va mbaʼ harashi kar Muyisə lə Aruŋ, ma kə kaa ngəshi na: «Kafəm a ghuy ɓarəvaŋuy tə hiɗee ghuy lə nihuti ka Izərayel gwanashi. Mbalam ta tsəfəku kwa kuma Kwa sləkəpə njasa gəzəkə ghuy va. 32 Kavəm lə dəmbəkə tsa ghuy va gwanay njasa niy gəzə ghuy va, a ghuy dzaŋuy, nza ghuy cəʼu Hiyala ghuy va a ghənzə təfətəra miy». kə kaa ngəshi. 33 Ta bəku dza ghiy gwanaŋiy, niy nə ka Ezhiptə, va tsəgha niy di ghəshi ka Izərayel ta ɓarvashi tə hiɗi shi kyaŋwkyaŋw. 34 Va tsəgha ki na, dza ka Izərayel ka ɓə ghupəə niy hwaɗiti ghəshi ta ta peŋ ghənzə ghula ta pə, mbaʼ ghəshi ɓəvə kwa shi ka məndiy hwaɗi ghupə, pəərə mbə kubeŋer shi, ka dzashi li tə bazli.
35 A ka Izərayel niy mənti njasa niy gəzanshi Muyisə va, mbaʼ ghəshi niy cəʼuvə shi vastim tə tsahi mbəzə, mbaʼ ni pəslitim tə tsahi gəna, mbaʼ kubeŋer va ka Ezhiptə. 36 Sa ɗuw ghəshi shi vay, a Kwa sləkəpə niy dapashi nefer ka Ezhiptə, mbaʼ ghəshi niy ɓaɓanavəshi shiy niy ɗuw ghəshi va. Ava tsəgha niy panti ka Izərayel shiy va ka Ezhiptə.
37 Dzəghwa ka Izərayel ki, mbaʼ ghəshi kafəshi mbə məlmə Raməses ta dzəmbə məlmə Swəkwətə. Mbəzli diwiy diwiy kwaŋ, kwaŋəmətəkə diwiy, niy nza ghəshi, mbərəkəshi miʼi lə ndərazhi, mbaʼ pəhepəhir. 38 Dzəghwa mbəzli ɗaŋ, ghənghən ghənghən mbaʼ ghəshi dzashi kwasəbəshi, kaʼ ghəshi kavə teŋkesli lə kwiy, mbaʼ slay, ɗaŋ tərəŋu dalala. 39 Sa garəshi ghəshi mbə kwal ki na, dza ghəshi kaa ghupəə niy hwaɗiti ghəshi va ghəshi mbə səvəri mbə Ezhiptə, mbaʼ ghəshi tahu kwasay tsa kama is mbə ti. Sa nzanay, ghala pi tsaa niy tihəshi məndi va səvəri mbə hiɗi va na, niy ndəghəvə pə tsa ghupə va ghəshiw. Zhini diɓay, niy pəlati shi dza ghəshi ta zəmə mbə kwal ghəshiw.
40 Piya diwiy diwiy faɗə mbaʼ mahəkanəmətsəkə ghən kən niy mənti ka Izərayel tə hiɗi ka Ezhiptə. 41 Liy hum piya diwiy diwiy faɗə na va mbaʼ mahəkanəmətsəkə ghən kən ki na, dzəghwa ka Izərayel, mbəzli Kwa sləkəpə va fəca vici va, mbaʼ ghəshi səvərishi mbə hiɗi ka Ezhiptə kwa zərə kutiŋ. 42 Njasa niy hiyanti Kwa sləkəpə va mbə virɗi va virəvirəvir mbə ɓə mbəzli nzə va səvəri mbə hiɗi ka Ezhiptəy, tsəgha dza ka Izərayel gwanashi hi virəvirəvir mbə fə shəndəkəə dzəti Kwa sləkəpə mbə virɗi va paʼa tar jijihi shi kuraku.
kuma dza məndiy nuw ta məni makwaghwa Pakə
43 Ma kə Kwa sləkəpə kaa kar Muyisə ghəshi lə Aruŋ diɓa na: «Avanta kuma pəhətee dzəkən Makwaghwa Pakə: Slən ndə səəkə səəkiy, ənta ghəci zəmə shi tati məndi ta makwaghwa va ma. 44 Mava tsa pavə məndi tə gənay, əntaa ghəci zəmə shi ma. War məndi slananti na fəʼyasa. 45 Mbaʼ kə ndəə ndə məlmə, ya sləni gəna ciy ghəra ndə mbə ghuyiy, əntaa ghəci zəməshi ma. 46 Kiy ghyi kə məndi dzaa zəmə dəmbəkə tsa va. Əntaa məndi ɓə sliw tsa vaa dzəti ngula ma. Əntaa məndi jaʼu islə tsa ci ma. 47 Gwanashi kə mbəzli mbə hulfə ka Izərayel dzaa məni makwaghwa va. 48 Mbaʼ kə ndə səəkə səəkə tsa mbə ghuy ɗi məni makwaghwa Pakə ta fə shəndəkəə dzəti kwa Sləkəpəy, ə kə dzaa slanantishi fəʼyasa kaa zhər kiy ghyi tsa ci gwanashi. Ghalaɓa kiy, nza ghəci məni makwaghwa va nja ka Izərayel. Slən ntsaa slanti ma fəʼyasa nanziy, əntaa ghəci zəmə ma.
49 kuma kutiŋ na pəhəta na kaa ka Izərayel lə kaa mbəzliy təɗikə ghyi tsa shiy dzəmbə ghuy» kə Kwa sləkəpə.