13
Dzəghwa ma kə Kwa sləkəpə kaa Muyisə na: 2 «Kwa taŋa zəghu yakə məndi mbə ka Izərayeliy, see pə ghuy dza fiy tsava. Ya zəghu zal tsa mbə ke ngəri na, ya sa mbə dəmbəkə nay, tsee na tsava,» kə.Muyisə zhananshi kuma gəzəkə Kwa sləkəpə kaa ka Izərayel
3 Ma kə Muyisə kaa ka Izərayel na: «Zəzə tə ghuy dzəkən vici səvəri ghuy na mbə hiɗi ka Ezhiptə, sa niy nza ghuy mevivi mbəɓa. Sa nzanay, lə bərci nzə va tərəŋu na ɓəkəvəriŋuy Kwa sləkəpə. Əntaa ghuy zəmə shi nza is mbə shi fəcava ma. 4 Ndatsə tə tir tsa har məndiy Abibəª səvəri ghuy. 5 A kwa Sləkəpə niy zəmanakəshi fəla kaa jijihiŋuy, ta ɓanshi hidi ka Kanan, lə shi ka Hit, mbaʼ shi ka Amur, mbaʼ shi ka Hivi, mbaʼ shi ka Yebwəzitə. Hiɗi nza ʼwa lə mbəzəku ti shiª tərəŋu. Sa ka na ɓəghəŋuy dzəti hiɗi vay, zəzə tə ghuy dzəkən məni makwaghwa na mbə tir tsa, njasa səəkə piya. 6 Vici mbərfəŋ pə ghuy dzaa mənti mbə zəmə peŋ tsa kama is mbə. Tə kwa mbərfaŋa viciy, nza ghuy məni makwaghwa ta fə shəndəkə dzəti Kwa sləkəpə. 7 Mbə vici mbərfəŋ na vay, peŋ tsa kama is mbə pə ghuy dzaa zəmə. Əntaa məndi kəsay peŋ tsa nza is mbə, ya is va ghuy tə hiɗi ghuy gwanashi tsa shi ma. 8 Mbə makwaghwa vay, ci tə ghuy kuma kaa ndərazhi ghuy. “Tə mbərkə shi mənti Kwa sləkəpə kaa ngəŋiy geʼi lə vəghu tsa səvəri ghiy mbə hiɗi ka Ezhiptə məni ghiy makwaghwa na” pə ghuy dzaa ni kaa ngəshi. 9 Njasa ka ndə vaa pəhaghwa shiy kwa dəvə ci, aw na mbaʼ ɗahaghwa shiy kwa dəghaŋ kuma ci ta mbəə zəzə dzəkən nahuti kuma, kə makwaghwa va dzaa nza va ghuy. Sa nzanay, mbə məni makwaghwa va dza ghuy zəzə kuma məntəŋuy Kwa sləkəpə, makwaghwa va dza naa zəzəŋuy gəzə kuma pəhəti Kwa sləkəpə kaa jijihiŋuy. Sa nzanay, ghənzə ɓəkəvəriŋuy na mbə hiɗi ka Ezhiptə lə bərci nzə va tərəŋu na. 10 Njasa səəkə piya geʼi lə vəghu tsa slati məndi va pə ghuy dzaa fə ghən ta məni kuma gəzəkəŋuy məndi na məni nzə,» kə Muyisə.
11 Ma kə Muyisə diɓa na: «Sa ka Kwa sləkəpə ɓəghəŋuy dzəti hiɗi ka Kanan, mbaʼ ndaŋuyshi njasa niy gəzəkə na va ɓəshi kaa jijihiŋuy lə kaa ngəŋuytay, 12 Kaa ngəta pə ghuy dzaa ɓanavə kwa taŋa ndərazhiy zhər dza ghuy gha ya gwanashi, lə kwa taŋa saa zal tsa dza dəmbəkə tsa ghuy gha ya gwanashi. Shi Kwa sləkəpə kə ni va dzaa nza. 13 Kwa taŋa zəghu zal dza kwantəmcaa yakiy, mbərəti tə ghuy lə gamə aw na lə bəsə. Kala ɗi mbərə pə ghuy na, mbaʼ ghuy ɓərətanti. Ta na kwa taŋa ndərazhiy zhər ghuyiy, mbərəshi tə ghuy. 14 Sa ka ndərazhi dza ghuy ya kwa kuma ɗuw va ghuy dzaa nza: “Tawa məni ghuy shi vaa?” kə ghəshiy, avanta kuma dza ghuy zləɓanci kaa ngəshi: “Sa nzana, lə bərci nzə Kwa sləkəpə ɓəkəvəriŋiy mbə hiɗi ka Ezhiptə sa niy nza ghiy mevivi, 15 sa niy zləɓa ma Farawaŋ pəlaŋəyəy, dza Kwa sləkəpə mbaʼ bakwanti kwa taŋa ndərazhi tə hiɗi ka Ezhiptə gwanashi. Kafə na tə kwa taŋa zəghu ke ngəri paʼa tə sa dəmbəkə. Va tsəgha ki, vəlanta ghiy vəli kaa Kwa sləkəpə lə kwa taŋa zəghu zal tsa dəmbəkə tsa ghiy gwanay. Zhini ka mbəərə Kwa taŋa ndərazhiy zhər ghiy diɓa,” pə ghuy dzaa ni kaa ngəshi. 16 Njasa ka ndə vaa pəhaghwa shiy kwa dəvə ci, aw na, mbaʼ ɗahaghwa shiy kwa dəghaŋ kuma ci ta mbəə zəzə dzəkən nahuti kuma, dza məni kuma vaa nza va ghuy. Tə shi dza ghuy vaa ɓanta ka Kwa sləkəpə dza ghuy zəzə lə bərci nzə ɓəkəvərimmə na mbə hiɗi ka Ezhiptə, pə ghuy.
Hyalaa ʼwanshi kwal kaa mbəzli nzə
17 Liy hum sa zlashi Farawaŋ ka Izərayel ta dzashi ghəshiy, niy ɓanavəshi nuw kwal tsaa dza kwa hiɗi ka Filisteŋ Hiyala, ya tsəgha nzana ghəci kwal tsa ndəku tsaw. Sa nzanay, sa ka ghəshi nay mbəzə tərəŋu kwa kuma shiy, ta dzashi dza her shi, ka gha nighə na, ghəshi zhəghanti zəzə kuma, ka zhəghəvaa zhimbə hiɗi ka Ezhiptə. Ava kumaa niy hazləni Hiyala və, va tsəgha niy zlashi ma na ta dza ghəshi kwa tsava kwal. 18 Va tsəgha ki na, dza na mbaʼ zhəghashi dza kwa kwal tsa tə gamba va, ta dzar kwa həl tsa har məndi vaa həl ghuvəl. Kwa zərə kutiŋ niy kafə ka Izərayelª. 19 Dzəghwa Muyisə mbaʼ ɓasəvə iyesler Zhuzefə. Sa nzanay, a Zhuzefə niy gəzanshi kaa ka Izərayel: « Ee sənay, ta kəətitəŋuy dza Hiyala ta ɓarvaŋuy mbə hiɗi ni, ghuy maɗiy, ɓasəvə tə ghuy iyeslere, zəməkəram fəlaª,» kə niy ni kaa ngəshi.
20 Dzəghwa ka Izərayel ki, mbaʼ ghəshi kafəshi tə hiɗi Swəkwətə, mbaʼ ghəshi dzaa ləliy ceker gamtaʼwalhi shi tə hiɗi Etam dziy vəgha gamba. 21 Kwa sləkəpə niy ʼwanshi na kwal dəʼu ghən tsa nzə. havəghuy, mbə timbətimbə niy nza na ta ʼwanshi kwal, ma həvir na mbaʼ nziyta mbə ghani ghu, ta mananshi waŋ pi. Ya havəghu, ya həvir kiy, war mbə dza niy nza ka Izərayel. 22 havəghuy, war kwa kuma shi niy nza timbətimbə, ma həvir na, war kwa kuma shi ghani ghu.