Səvəri 14

Ka Ezhiptə mbə nuw ka Izərayel

Ma kə kwa sləkəpə kaa Muyisə na: 2 «Gəzanshi kaa ka Izərayel a ghəshi zhəghəva ta nziy vəgha hiɗi Pi-hahirwətə, kwa jipi hiɗi Migədwəl lə həl. Tiɓa pə ghuy dzaa liy ceker gamtaʼwalhi ghuy, kwa kuma hiɗi Baal-Sefuŋ, ndəku vəgha həl. 3 Mbə zəzə kuma Farawaŋiy: “A kwal zay va ka Izərayel tə hiɗee. Kwal tsa dza ghəshiy dzashi kwa tiɓa va gambaw,” dza naa ni. 4 Kee dzay mbaʼe mənti ghən tsa Farawaŋ caslakə ka na dzay, ka nuŋwiy. Sa kee dza ki na, mbaʼe ushanti lə mbəzli kwasəbə, ta mbee cikəvəri shəndəkə tsee. Ghalaɓa kiy, ta sənay dza ka Ezhiptə, yən na kwa Sləkəpə, kə ghəshi,» kə. Dza ka Izərayel mbaʼ ghəshi mənti tsəgha.

5 Mbaʼ məndi dzaa gəzanci kaa Farawaŋ : «A ka Izərayel dzashi,» kə məndi. Dza ghəshi lə mbəzli ka sləni ci mbaʼ ghəshi zhəghanti zəzə kumaa niy zəzə ghəshiy dzəkən ka Izərayel. Ma kə ghəshi na: «kuma ka waa na mənti ghummə na? Tawa zlashi ghummə ka Izərayel dzashi, mevivi ghummə ghəshi niy nzaa?» Kə ghəshi. 6 Dzəghwa Farawaŋ mbaʼ pəhati muwta kwa mbəzə ci tə gədewesli, ka dzay lə ka sawji ci. 7 Mutahi gədewesli ka mbəzə ci gura bələku bələku kwaŋ, mbaʼ nihuti mutiti gədewesli tə hiɗi ka Ezhiptə gwanashi niy nza na kwasəbə. Ya namaɓa muwtay, mbəzli mahəkanə niy nza na mə. 8 Dzəghwa Kwa sləkəpə ki, caslakəslakə zhəghəti ghən tsa Farawaŋ mazə ka Ezhiptə, tapə ghəci ta nuw ka Izərayel. Ghala pitsaa səvəri ka Izərayel mbə Ezhiptəy, nja mbəzliy gura ghən tsa shi niy nza ghəshi. 9 Dzəghwa ka Ezhiptə ki, ka nuwshi lə mutiti gədewesli shi gwanashi, mbaʼ ka zlərə gədewesli, mbaʼ ka mbəzə shi. Mbaʼ ghəshi dzaa kəsashi ka Izərayel tə pitsaa niy garəshi ghəshi va dziy vəgha həl, ndəku vəgha hiɗi Piy-Hahirutə kwa kuma hiɗi Bal-Sefuŋ.

10 A Farawaŋ kətikəvay lə mbəzli ci ki, ma sa nə ka Izərayel njəʼwə kə ghəshi na, ava ka Ezhiptə mbə nuwshi. Mbaʼ her shi dzashi tərəŋu, dza ghəshi ka har Kwa sləkəpə zlaŋ zlaŋ. 11 Ma kə ghəshi kaa Muyisə na: «Tawa pəməkəŋəy gha tikəə dzəti gamba ta bəkuŋiy məndia? Ə niy nza kwəlihi daw tə hiɗi ka Ezhiptə ta lalaŋəy na? Tawa ɓəkəvəriŋiy gha mbə hiɗi vaa? 12 A ghiy niy gəzəkəŋa ghiy ghulaŋəy tə hiɗi ka Ezhiptə: “Zlaŋəy a ghiy ghəranshi sləni kaa ka Ezhiptə. Wəzəɓa ghəranshi sləni na kən na dza ghiy dzaa bəkuŋiy mbə gamba,” pə ghiy niy ni kaa ngəŋa,» kə ghəshi. 13 Ma kə Muyisə kaa ngəshi na: «Ka hazləni ghuy ma, gwəŋəŋuy pə ghuy nziyŋuy. Ta nay dza ghuy njasa dza Kwa sləkəpə ta mbəliŋuy ndatsə. Ka Ezhiptə nashi ghuy ni sənzənvay, ka dza ghuy zhiniy nashi ka ghuy nza ghulaw. 14 Kwa sləkəpə dza na ta mbəzə kwa pi tsa ghuy, Na na ghuyiy, shiy tiɓa ghuy dzaa məniw,» kə.

Kwa sləkəpə təhəvəri yam kwa həl bakə mbə

15 Ma kə Kwa sləkəpə kaa Muyisə na: «Tawa harɗa gha ta kəətiŋaa? Ə pə gha gəzanshi kaa ka Izərayel a ghəshi kafəə dzəti kwal. 16 A na na ghay, ɓəvə gəta gha va a gha kafata dziy kən həl tsa va, nza gha təhəvəri yam kwa va bakə mbə. Təhu kwal dziy kwa jipə shi, ma nza ka Izərayel taŋə dzəvəri tə ndarghə. 17 Sa kee dza nee kiy, nzee mənti ghəneɗemer ka Ezhiptə caslakəslakə, ka ghəshi dza na ka dzəghwa ta nuŋwiy dzəvəri. Ma nzee ushanti kar Farawaŋ lə ka sawji ci gwanashi, mbaʼ mutiti gedewesli ci, mbaʼ ka zlərə gədewesli ci. Ma tsəghay, nzəə citi shəndəkə tsee. 18 Sa kee citi shəndəkə tsee lə shi dzee vaa mənti tsəgha niy, ta sənay dza ka Ezhiptə ghalaɓa, yən na Kwa sləkəpə, kə ghəshi,» kə.

19 Dzəghwa Ndə kwal Hiyala tsaa niy ʼwanshi kwal va kaa ka Izərayel kwataŋa, mbaʼ səyiy liy hum shi. Zhini timbətimbəə niy nza va kwa kuma shi mbaʼ səyta liy hum shi diɓa. 20 Səəkə na mbaʼ dzataa dzəghwa jipə ka Izərayel kwa zərə shi, lə ka Ezhiptə kwa na shi zərə. Dza kwa bəla nza ka Ezhiptəy, kusli niy nza timbətimbə va, ma dza kwa bəla nza ka Izərayel na, ka mbərə waŋ. Sa nzana tsəgha kiy, ya nima mbə zəərəhi bakə ni va na, niy mbay ghəshiy kətivaa dzəvəgha nihuti həvirəw.

21 Dzəghwa Muyisə ki, kafə kafata dəvə ci dziy kən həl tsa va. Kə Kwa sləkəpə həvir, mbaʼ viykə safə tsa tərəŋu tsa səəkə kwa ghumə, hyamti na mbə viy, mbaʼ panti yam kwa həl. Bakə mbə yam təhəvərivashi, təhu kwal dzəvəri tə jipə shi. 22 Dzəghwa ka Izərayel mbaʼ ghəshi taŋəshi dzəvəri kwa kwal tsa va tə ndarghə ki. Dza kwa bəla kwa zleɓi shi lə kwa bəzəmə shi gwaʼa na, mbaʼ yam nziyshi nja kələm. 23 Dzəghwa ka Ezhiptə ka nuwshi, mbaʼ gədewesli Farawaŋ gwanashi lə mutiti ci, mbaʼ mbəzli mə gədewesli dzashiy dzəti jipə həl tsa va kwasəbə ka Izərayel. 24 Ma piy maɗi ta kəɗi ki na, dza Kwa sləkəpə ghənzə mbə jipə ghani ghu va lə mbə timbətimbə va ka nighə ka Ezhiptə. Dza na mbaʼ səsəvərishi kwa jipə shi. 25 Dza na, mbaʼ yaɗanti shiɗəshiɗə mutiti gədewesli shi, kala zlərəva ma ghəshi ghula. Sa nighəti ka Ezhiptə tsəgha ki, ma kə ghəshi na: «Hummə ghummə va ka Izərayel, sa nzanay, Kwa sləkəpə mbəzə na lə ghummə ti shi,» kə ghəshi.

26 Ma kə Kwa sləkəpə kaa Muyisə na: «Kafata dəvə gha dzar kən həl tsa va nza yam zhikəə dzəkən mutiti gədewesli ka Ezhiptə lə ka zlərə gədewesli shi,» kə 27 Dzəghwa Muyisə mbaʼ kafata dəvə ci dzar kən həl tsa va, ma piy maɗi ta kəɗi na, mbaʼ yam zhinishi njasa niy nza ghəshi. Ma ka Ezhiptə mbə hushi ki, nighə ghəshi na, yam tə kuma shi. Mbaʼ Kwa sləkəpə zantishi mbə yam va. 28 Zhinə yam zhinishi ki, mbaʼ ghəshi zanti ka sawji Farawaŋ va niy nuwəghə ka Izərayel dzəghwa həl gwanashi, mutiti gədewesli va, lə ka zlərə gədewesli gwaʼa. Ya kutiŋ na, ndə tiɓaa mbəliyiw. 29 Ta na ka Izərayeliy, tə ndarghə niy taŋə ghəshi, mbaʼ yam mənishi nja kələm tar kwa bəzəmə shi lə kwa zleɓi shi.

30 Ava tsəgha mbəlanti Kwa sləkəpə ka Izərayel mbə dəvə ka Ezhiptə fəcava. Dza ka Izərayel ka nighə mbəreketi ka Ezhiptə dziy miy həl. 31 Dzəghwa mbaʼ ka Izərayel nata bərci kwa sləkəpə njasa citi na ta mbəzə lə ka Ezhiptə ki, mbaʼ ghəshi sənay dikə tsa məni Hiyala, mbaʼ ghəshi ɓanavə nefer shi kaa ngəta lə kaa Muyisə ndə sləni tsa nzə.