Kar Muyisə lə ka Izərayel mbə fal Kwa sləkəpə kwa cəm
15
Dzəghwa kar Muyisə lə ka Izərayel ka fal Kwa sləkəpə kwa cəm ki, ma kə ghəshi na:«Ta fal Kwa sləkəpə dzee kwa cəm.
Aa ushanti ka mbəzə nzə wəzə wəzə.
Aa shashakati gədewesli lə ka zlərə gədewesli tə ghən yam.
2 Kwa sləkəpə na bərcee, kaa ngəta hee cəm tsa.
Aa mbəlantəra,
Ghənzə na Hyalee, ta fal dzee.
Hiyala dirə na,
ta ha dikə tsa nzə dzee kwa cəm.
3 Ndə mbəzə tsa dikə tsa na Kwa sləkəpə,
Kwa sləkəpə na slən tsa nzə.
4 Aa shakati mutiti gədewesli,
lə ka sawji Farawaŋ tə yam.
mbəzliy guranti tə mbəzə mbə ka Ezhiptəy,
a ghəshi zashi kwa həl ghuvəl.
5 Dza yam məɗakə ndahushi, mbaʼ ghəshi dzashiy dzəghwa hur yam nja hərezli.
6 Bərci gaga na mbə dəvə kwa bəzəmə ghaw Kwa sləkəpuw.
A dəvə gha va ʼyapəvəri ka mbəzə gha.
7 Təruŋ na dikə tsa məni gha,
aa gha ndəɓati ka mbəzə gha tə pi.
Njasa ka ghu vaa ndi vəghəməy,
tsəgha ka nəfə tsa ghaa ndanti ka mbəzə gha ghəci kə satiy.
8 Sa piyəkə gha piy mbə kəshən tsa ghay,
mbaʼ yam ɓasəshi.
Dza yam va mbaʼ ghəshi təhəvərivashi bakə mbə,
mbaʼ ghəshi mənishi nja kələm.
Dzəghwa pi tsa tə hur yam mbaʼ zhəghiy caslakə.
9 Ma kə ka mbəzə ghiy niy niy:
“Nəwshi ghummə a ghummə dzaa kəsashi,
nza ghummə titihəhu shi shi,
nza shiy nza ɗaŋshi va ghummə.
Tiɗikəvəri ma ghummə kafaʼihi ghumiy,
ta mbashi dza ghummə,” kə ghəshi niy ni.
10 Sa dza gha na gha kiy Kwa sləkəpiy, mbaʼ gha viyay safə tsa gha,
dzəghwa ray yam dzashiy dzəkən shi,
tikətikə ghəshi zashi tə hur yam tərəŋu ni va,
nja tsahi bənɓa ka məndiy nighə hur tsa ta yam li shi.
11 A hiyalaa dza vaa nza nja gha mbə hiyalahi kiya Kwa sləkəpə?
A tsa ɗewɗew tsa nja gha,
gar fal məndia?
Ndə ka hazləni məndi və nza gha.
A ntsaa dzaa mbay məni kuma maɗaŋa maɗaŋa na nja ghaa?
12 Kafə, kafata gha dəvə kwa bəzəmə gha, mbaʼ hiɗi ndahu mbəzliy niy nuŋəy.
13 Sa mbəlanti gha mbəzli ghay,
dza gha mbaʼ gha pəməvəshi lə wəzə hur tsa gha,
mbaʼ gha pəhəghəshi lə bərci ghaa dzəti pi tsa nza gha ti ɗuwɗuw tsaª.
14 Sa favə nihuti hulfəhi mbəzli kuma va na, war e ghəshiy gwərgwərə va kuma va.
Dza hazləni mbaʼ kəsəvə ka Filisti.
15 Dzəghwa ki, mbaʼ her mbəzli dikə dikə ni tə hiɗi ka Edum dzashi.
Ka bərci mbə ka Muwabə na, ka gurəgurə va hazləni,
ya wa ntsa tə hiɗi Kanahaŋ na kwəshey vəgha ci zhəghəta.
16 A hazləni kəsəvəshi tərəŋu, tərə her kwa hur shiw.
Sa cikəvəri gha bərci gha va iyahə iyahəta nay Kwa sləkəpiy,
disl kalay ghəshi miy tsa shi, tərəm tərəmmə ghəshi nziyshi nja hərezli,
War ə mbəzli gha vaa dzar kwa kuma shi,
mbəzli gha va mbərəkə gha.
17 Sana kiy Kwa sləkəpiy, mbə pəməshi nza ghaa dzəmə dəlagwa gha,
ta dza ta fiyshi məɓa.
Ghəci na pi tsa gumati gha ta nziy gha ti,
pi tsa ɗewɗew tsa ngati gha dəʼu ghən tsa gha.
18 Mazə nza gha paʼa kwa ndimndim Kwa sləkəpə,».
19 Ghala vəghu tsa dzəghwashi gədewesli mazə ka Ezhiptə vaa dzəghwa həl lə mutiti gədewesli ci mbaʼ ka zlərə gədewesli ciy, dza Kwa sləkəpə mbaʼ zhinikə yam kwa həl dzəkən shi. Ma ka Izərayel na shi kiy, dzar tə ndarəghə niy taŋə ghəshi həl.
20 Dzəghwa Miriyam, kwa gəzə kuma Hiyala, zhambəghiy Aruŋ laŋ ɓəvə bambaɗə tsa nzə, ka tsa. Dza miʼi ka Izərayel gwanashi ki ka nuw lə dəʼu bembeɗer, ka tsə. 21 Ka ʼwanshi cəm Miriyam, ma kə na:
«Faləm kwa sləkəpə kwa cəm.
Sa nzanay, aa ushanti ka mbəzə nzə wəzə wəzə.
Naʼi shəkati na gədewesli lə mbəzli mə shi tə yam.
Njasa dzahu ka Izərayel dza mbə gamba
(15-18)
Yam iyeghweki ni tə pi tsa har məndiy Mara
22 Dzəghwa Muyisə ki mbaʼ kafiy lə ka Izərayel kwa həl tsa har məndiy həl ghuvəl, ka dzashi njasaa dzəmbə gamba Shur. Vici mahəkanə ghəshi mənti mbə dza tə gamba, shaŋ ghəshi ta kəsashi yam. 23 Ma sa tsəhəshi ghəshi tə pi tsa har məndi vaa Mara na, mbaʼ ghəshi kəsashi yam. Kala mbay ghəshiy sa yam va sa nza ghəshi iyeghweki. Va tsəgha niy har məndi pi tsa vaa Mara, ɗi naa gəziy, iyeghweki. 24 Dzəghwa ka Izərayel ki, mbaʼ ghəshi pəslishi dzəkən Muyisə, «A shi dza ghiy sa?», kə ghəshi ngəci. 25 Dza Muyisə ka cəʼu Kwa sləkəpə lə bərci, mbaʼ Kwa sləkəpə cinti tsəm tsa nahuti fə, laŋ Muyisə ɓəvə tsəm tsa vaa ndəghati tə yam va, mbaʼ ghəshi zhəghəshi wəzə ta sa shi.
Tə pi tsa va pəhəti Kwa sləkəpə kuma kaa ka Izərayel ta nuw ghəshi, mbaʼ cintishi njasa dza ghəshiy nziy. Tiɓa ghənzə naghanti kuma shi diɓa. 26 Ma kə Kwa sləkəpə kaa ngəshi na: «Ə pə ghuy fa kuma wəzə viya yən Hiyala ghuy sləkəŋuy, ka məni kumaa təɓə kwa mətsee, ka ɗi fəti ta kuma gəzaŋuyee, ka nuw kuma pəhətee gwanata. Mbaʼ pə ghuy məni tsəghay, Ka dzee ɓə zəleghwer ɓəkee vaa dzəkən ka Ezhiptəə dzəkən ghuy ya kutiŋəw. Sa nzanay, yən na Hiyala kwa mbəliŋuy» kə.
27 Liy hum ki na, mbaʼ ka Izərayel tsəhəshi tə pi tsa har məndiy Elim. Mbaʼ ghəshi kəsay pi tsa hu yam səəkə mbə hiɗi məŋə lə bakə tiɓa, mbaʼ dəŋw slərpə mbərfəŋəmtsəkə. Dza ghəshi ki, mbaʼ ghəshi ləliy ceker gamtaʼwalhi shi tiɓa dzar vəgha yam.