Hiyala ɓanavəshi shi zəmə har məndiy manə lə kayə kaa ka Izərayel
16
Dzəghwa ka Izərayel gwanashi mbaʼ ghəshi kafəshi tə pi tsa har məndi vaa Elim. Ma tə kwa məŋə lə cifə vici, tə kwa baka tir ghala səvərishi ghəshi mbə hiɗi Ezhiptə ki na, mbaʼ ghəshi tsəhəshi tə gamba Shin. Pətsa vay, kwa jipə kar Elim lə dəlagwa Shinay niy nza na. 2 Ma tiɓa mbə gamba va ki na, mbaʼ ka Izərayel gwanashi zhiniy pəslishi ta kar Muyisə lə Aruŋ. 3 Ma kə ghəshi na: «Wəzəɓaa niy bakwamtəŋiy Kwa sləkəpə tə hiɗi ka Ezhiptə na. Mbəɓay, vəgha shekiki paf paf va sliw niy nza ghiy, ka zəmə shiy ngəslə ngəslə ghiy. Ma sa dza ghuy sanay, mbaʼ ghuy pəməkəŋəy dzəti gamba na ta bəku ghiy gwanaŋiy va ma,» kə ghəshi.4 Ma kə Kwa sləkəpə kaa Muyisə na: «Avee dzaa nzəməkəŋuy peŋ səəkə mə ghumə nja van. Njasa səəkə vici dza mbəzliy dza ta ɓasə gar zəmə ghəshi mbə vici kutiŋ. Ava tsəgha dzee ta naghanti kuma ghuy ta mbee sənay nda ka nuw kuma pəhətee ghuy, nda kala nuw ghuy. 5 Tə kwa kwaŋa viciy, gar zəmə ta vici bakə kə məndi dzaa ɓasəvə, mbaʼ məndi gwəməy,» kə. 6 Dzəghwa kar Muyisə lə Aruŋ mbaʼ ghəshi dzaa gəzanshi kaa ka Izərayel gwanashi. Ma kə ghəshi na: «Hetihwer nay, ta sənay dza ghuy Kwa sləkəpə ɓəkəvəriŋuy na mbə hiɗi ka Ezhiptə kataŋ, pə ghuy. 7 Həzlimə mekishiy, ta nay shəndəkə tsa nzə dza ghuy. Sa nzanay, aa favə kuma gəəzə ghuy vaa dzəkən. Ta na na ghiy kiy, a mbəzli nza ghiy dza ghuy pəsli tə ghiya?» kə ghəshi. 8 Ma kə Muyisə diɓa na: «Ta sənay dza ghuy ghənzə na Kwa sləkəpə pə ghuy, sa dza naa ɓəkəŋuy sliw ta zəmə ghuy hetihwer, mekishi na, ka ɓəŋuy peŋ ngəslə ghuy. Sa nzanay, a Kwa sləkəpə favə kuma gəgəzə ghuy vaa dzəkən. Ta na na ghiy kiy, a mbəzli nza ghiya? Kaa ngəŋiy gəgəzə ghuy kwemer gəgəzə ghuy vaw, kaa Kwa sləkəpə gəzəshi ghuy,» kə.
9 Ma kə Muyisə kaa Aruŋ ki na: «Gəzanshi kaa ka Izərayel gwanashi a ghəshi səəkəə dzəghwa kuma Kwa sləkəpə. Sa nzanay, aa favə kuma gəgəzə ghəshi vaa dzəkən,» kə. 10 Dza Aruŋ ka gəzə kuma va kaa ka Izərayel gwanashi ki. Ma ghəci mbə gəzə kuma va na, mbaʼ ghəshi zhəghata kuma shi njasaa dzəmbə gamba. Nighə ghəshi na vətəghə shəndəkə tsa Kwa sləkəpə təzliy mbə timbətimbə. 11 Ma kə Kwa sləkəpə kaa Muyisə na: 12 «Ee favə kwemer gəgəzə ka Izərayel. Ma pə gha kaa ngəshiy: “Hetihwer na sa ka vici pəkutay, ta zəmə sliw dza ghuy, ma həzlimə mekishiy, ta ɓəkəŋuy peŋ dzee njasa ɗi ghuy. Ghalaɓay, ta sənay dza ghuy yən na Hiyala ghuy sləkəŋuy, pə ghuy,” kə Kwa sləkəpə pə gha kaa ngəshi,» kə.
13 Hetihwer va ki na, mbaʼ iyegwer har məndiy kay səəkəshi, mbaʼ ghəshi lalaushi tə pi tsa nza ka Izərayel va, gwaʼ gwaʼa ghəshi təhay pi tsa va. Ma tə mekishi na, mbaʼ mini səvəritaa dəzlay pi tsa va. 14 Ma sa maɗi miniy shəkəta na, wəɗ nihuti shiy tsahushi tə hiɗi, juw juw juw nja cizlə, pay pay shi, kifəkifə ghəshi diɓa. 15 Sa nashi ka Izərayel na, kala sənashi niva shiy ghəshi. Dza ghəshi ka ɗəɗuw kwa jipə shi: «Manə hu» kə ghəshi lə ghani shi. Ɗi kuma vaa gəziy: «A slən tsa nini shiya?» ɗi naa gəzə. Ma kə Muyisə kaa ngəshi ki na: «Peŋ tsa ɓəkəŋuy Kwa sləkəpə ta zəmə ghuy na sava. 16 Avanta kuma gəzəkə Kwa sləkəpə: “Ya wa ndiy geʼi gar zəməhu ghəci kə dzaa pavə. Gar kwakwa kutiŋ pə ghuy dzaa pavə tə ndə tə ndə, njasa nza mbəzli mbə ciki gamtaʼwal tsa shi” kə,» kə Muyisə kaa ngəshi.
17 Dzəghwa ka Izərayel mbaʼ ghəshi mənti tsəgha ki. Jəw juw nihuti ɓasəvə shi va, ɗaŋ ɗaŋ nihuti ɓasəvəshi. 18 Ma sa bəbərkətishi ghəshi na, kala kama ghəshi ɗaŋshi va mbəzliy niy ɓasəvəshi va ɗaŋ, niy niy ɓasəvəshi juwshi na, niy nza ghəshi daw vəshiw. Ya wa ndiy, war geʼi gar zəməhushi ghəci niy ɓasəvəshi na.
Gəzə kuma dzəkən shi zəmə har məndiy Manə
19 Ma kə Muyisə kaa ngəshi diɓa na: «Nəghəta ndə ya kutiŋ mbə ghuy fə mbəvəli tə shi va ta həzlimə ma,» kə. 20 Ya tsəgha nzə ki na, kala fa ma kuma gəzanshi Muyisə va nihuti, mbaʼ ghəshi fiy mbəvəli ta həzlimə. Mbaʼ mətəlaʼi dzashiy dzəmbə shi, ka zən ghəshi gəmgəməshi. Dzəghwa mbaʼ nəfə tsa Muyisə satiy dzəkən mbəzli va. 21 Njasa səəkə viciy, war mbə ɓasə shiva niy ghəshi nza ki, geʼi geʼi gar zəməhushi ghəshi. Ma sa ka vici maɗita ta mbərə na, mbaʼ niy tərmbə dzar tə hiɗi yədəɓəshi.
22 Tə kwa kwaŋa vici na, mbaʼ Ka Izərayel ɓasəvə shi va gar zəməshi mbə vici bakə, gar kwakwa bakə ta ndə kutiŋ. Dzəghwa mbəzli dikə dikə ni mbə shi, mbaʼ ghəshi dzaa gəzanci njasa mənti ghəshi kaa Muyisə. 23 Ma kə Muyisə kaa ngəshi na: «Tsəgha niy gəzəkə Kwa sləkəpə kuraku, həzliməy Saba na, vici dəkəva, Viciy Fə shəndəkə dzəti Kwa sləkəpə. Səlivəm ni ɗi ghuy səli shiy, mbaʼ ghuy tavə ni ɗi ghuy ta. Sa ka ghuy zəməvəshiy, nza ghuy fiy niy dzaa tərə ta həzlimə,» kə. 24 Dzəghwa mbaʼ ghəshi fiy shi zəmə va paʼ tə həzlimə njasa gəzanakəshi Muyisə va. Shaŋ ghəshi ta zənshi, kala dza ma mətəlaʼiy dzəmbə shi. 25 Ma kə Muyisə kaa ngəshi tə həzlimə va ki na: «Zəməm nini shiy ndatsə ki. Sa nzanay, vici dəkəva na ndatsə, viciy fə Shəndəkə dzəti kwa Sləkəpə. Ya əə səvəri ghuy dzəti ngulay, shiy tiɓa ghuy dzaa kəsashiw. 26 Vici kwaŋ dza ghuy mənti mbə səvəri ta ɓasə shi zəmə va. Ma kwa mbərfaŋa viciy, vici dəkəva na. Ka dza shi zəmə vaa nza tiɓaw,» kə.
27 Ya tsəgha nzə ki, tə kwa mbərfaŋa vici vay, a nihuti mbə ka Izərayel niy səvərishi ta ɓasə shi zəmə va, kala kəsashi ghəshi. 28 Ma kə Kwa sləkəpə kaa Muyisə ki na: «Hwəm dza ghuy gha zlay dzəghwa kən kuma pəhətee lə kuma gəzaŋuyee mənia? 29 Sənay tə ghuy, e ndaŋuy vici ta dəkəva ghuy fəcava, va tsəgha ɓəŋuy ya shi zəmə ta zəməshi ghuy mbə vici bakə Fəca kwa kwaŋa vici. Tə kwa mbərfaŋa vici kiy, ya wa ndə na, kiy ghyi tsa ci kə dzaa nziyiy. Əntaa ndə səvəri ma,» kə. 30 Sa gəzəkə Kwa sləkəpə tsəgha ki na, dza Ka Izərayel ka dəkəva tə kwa mbərfaŋa vici ki.
31 Dzəghwa ka Izərayel ki, mbaʼ ghəshi fanati slən manə kaa shi zəmə va. Shi vay, shiy nja ya fə juw juw juw niy nza ghəshi, pay pay shi. Nja gatwə tsa tati məndi dzavəɗə lə mbəzəku niy nza ghəshi mbə miy.
32 Ma kə Muyisə na: «A kə Kwa sləkəpiy: “Pavəm manə va gar gyaɗə mbə kwakwa, nza ghuy fiy ta ci kaa ndərazhi ghuy lə ni dza ghəshiy ya paʼa tarɓa, ta mbə ghəshiy sənashi shi zəməə niy zəməŋuyee mbə gamba ghala pi tsaa niy ɓəkəvəriŋuyee mbə hiɗi ka Ezhiptə” kə,» kə Muyisə. 33 Ma kə Muyisə kaa Aruŋ ki na: «Mbala ɓəvə gatakar a gha taghwa manə kwa, nza gha dzaa fiy kwa kuma Kwa sləkəpə, ta mbə ghuy ndəghuti manə va jiwu kaa ndərazhi ghuy lə ni dza ghəshi ta ya paʼa tarɓa,» kə. 34 Dzəghwa Aruŋ mbaʼ dzaa mənti njasa gəzanakə Kwa sləkəpə va kaa Muyisə ki. Dza na mbaʼ dzaa fiy gatakar tsa va kwa kuma hərezliy ndəgha fəti va ta sla kiri, ta mbə məndiy ndəghuti tiɓa.