Yam səvəri mbə kəlɓa
(Ɓəla 20:2-13)
17
Dzəghwa ka Izərayel gwanashi ki, sa gəzanshi Kwa sləkəpə, mbaʼ ghəshi kafəshi mbə gamba Shin, dza tiɓa garəshi, dza tiɓa garəshi. Nishə ghəshi tsəhəshi tə pi tsa har məndiy Refidim, mbaʼ ghəshi ləliy ceker gamtaʼwalhi shi tiɓa. Ma tə pi tsa va na, kala yam tiɓa ta sashi ghəshi. 2 Dzəghwa ghəshi pizl ghəshi pəslishi ta Muyisə. Ma kə ghəshi na: «Ndaŋəy yam a ghiy sa shi,» kə ghəshi. Ma kə Muyisə kaa ngəshi na: «Tawa pəsli ghuy tə ya? Tawa nighə ghuy kuma Kwa sləkəpəa?» kə kaa ngəshi. 3 Ma sa ghəranshi ndir kaa Ka Izərayel ki na, war ə ghəshiy ghurvə dzəkən Muyisə, a kə ghəshi na: «Tawa ɓəkəvəriŋiy gha mbə hiɗi ka Ezhiptəa? Ta bakwamtəŋiy ɗi gha lə ndir ghiy lə ndərazhi ghiy, mbaʼ dəmbəkə tsa ghiy na?» kə ghəshi. 4 Sa nighəti Muyisə tsəgha na, dza na, ka cəʼu Kwa sləkəpə lə bərci. Ma kə na : «Njaa dzee mənti lə mbəzli niaa? Avashi dzaa pəʼwəra lə hərezli, ta pəəslira,» kə. 5 Ma kə Kwa sləkəpə kaa Muyisə na: «Mbalaa dzəghwa kuma shi, mbaʼ gha pəməvə nihuti mbə mbəzli shi dikə dikə ni. Ɓəvə tə gha gətaa niy sləvati gha va tə həl Nil ta dəvə gha. 6 Avee dzaa garəɗa kwa kuma gha məɓa tə kəlɓa, mbə dəlagwa Hurebə. Sa ka gha tsəhəŋay, nza gha ləkə gəta gha vaa dzəti kəlɓa va, ta səvəri dza yam mbəɓa, nza ka Izərayel sashi,» kə. Dzəghwa Muyisə ki, mbaʼ mənti kuma va tsəgha kwa kuma mbəzli dikə dikə ni va mbə ka Izərayel.7 Dzəghwa na mbaʼ fanati slən: Masa mbaʼ Meriba kaa pi tsa va. Ɗi slən tsa vaa gəziy: nighə kuma mbaʼ pəsli ta ndə. Sa nzanay dzəghwa tə pi tsa va niy pəslishi ka Izərayel ta Muyisə, mbaʼ ghəshi niy nighəhu kuma Kwa sləkəpə. Ma kə ghəshi niy ni na: «Mbə jipə ghiy na Kwa sləkəpə shəkənaa, naa kala mbə jipə ghiy na?» kə ghəshi niy ni.
Mbəzli Amalek mbəzə lə ka Izərayel
8 Dza mbəzli Amalek mbaʼ ghəshi səəkəshi ta mbəzə lə ka Izərayel tə pi tsa har məndi vaa Refidim. 9 Ma kə Muyisə kaa Zhuzəwe ki na: «Mbala təratəmmə zhər, nza ghuy dza li shi ta mbəzə lə mbəzli Amalek. Həzliməy, mə ghən hum pi dzee nza lə gəta Hiyala va ta dəvee» kə. 10 Dzəghwa Zhuzəwe ki, mbaʼ dzay ta mbəzə lə mbəzli Amalek njasa gəzanakə Muyisə va. Ma kar Muyisə lə Aruŋ, mbaʼ Hur ghalaɓa na, ka dzashiy dzəmə ghən hum pi. 11 Ghala vəghu tsa ka Muyisə kafata dəvə ciy, ka Izərayel na shiy mbashi mbəzli. Mbərəkə kə zlataa səkwata na, mbəzli Amalek shiy mbashi mbəzli. 12 Ma sa ghati divədivi Muyisə dalishi na, dza kar Aruŋ lə Hur mbaʼ ghəshi ɓəvə hakuə fiy ta mətsəni ci, das nziyiy ti. Dza kar Aruŋ lə Hur ka jihə divədivi ci. Tar bəla kwa zleɓi ci tsahuti, tar kwa bəzəmə ci tsahuti. Tsəgha gha divədivi ciy nziyshi ta ghumə paʼa va pəku tsa vici. 13 Dza Zhuzəwe ki, mbaʼ ushanti mbəzli Amalek, ka nzəratishi tə kafaʼi.
14 Ma liy hum ki, ma kə Kwa sləkəpə kaa Muyisə na: «Tsaslati kuma va gwanata tə zliya, va nəghəta məndi zanti ghən ti. Gəzanci kaa Zhuzəwe, “Kərəpə dzee ta zanti mbəzli Amalek. Raʼi dza ghən tsa mbəzli tə hiɗi gwanashiy zay ti shi” kə Kwa sləkəpə, pə gha kaa ngəci» kə. 15 Dzəghwa Muyisə mbaʼ ngati pi ta ta Hiyala ti. «Kwa sləkəpə kətira na ta ushanti ka mbəzee» kə kaa slən tsa pi tsa va. 16 Ma kə diɓa na: «Njana nzana, mbaʼ mbəzli Amalek kafəshi ta mbəzə lə mbəzli məni Kwa sləkəpə mazə mbə shiy, war mbə mbəzə dza Kwa sləkəpəə nza li shi ya paʼa humɓa,» kə.