Səvəri 18

Kar Muyisə lə Zhetərwə

A shiy Muyisə niy nza tiɓa, Zhetru, kə məndi kaa slən tsa ci, ndə ta Hiyala tsa mbə hulfə ka Madiyaŋ ghəci. Dzəghwa mbaʼ favə məndiy gəzəə dzəkən shi mananati Hiyala gwanashi kaa Muyisə lə kaa mbəzli nzə ka Izərayel. Mbaʼ favə njasa ɓəkəvəri Kwa sləkəpə ka Izərayel mbə hiɗi ka Ezhiptə. 2 Dzəghwa na ki, pəm pəməvə Sefura mali Muyisə, sa nzana mbaʼ Muyisə niy zlata vəgha. 3 Dza na diɓa pəm pəməvə ndərazhi Sefura va bakə ni. Gershum, kə Muyisə niy ni kaa slən tsa tsa dikə tsa, ɗi naa gəziy: “Ndə səəkə səəkə nzee tə pi tsa”. Sa nzanay «tə hiɗi mbəzli səəkee nziyra,» kə niy ni . 4 Eliyezer kə kaa slən tsa tsa juw tsa, ɗi na gəziy: “A Hyalee kəətitəra”. Sa nzanay: «A Hiyala dirə kətitəra mbaʼ ndəghutəra va pəəslitəra mazə ka Ezhiptə,» kə niy ni.

5 Dzəghwa Zhetru ki mbaʼ kafiy lə ndərazhi Muyisə va, mbaʼ mali ci va, mbaʼ dzaa kəsay mbə gamba, tə pi tsaa niy ləliy ghəshi va ceker gamtaʼwalhi shi, ndəku vəgha dəlagwa Hiyala va. 6 Dza na mbaʼ ghunay ndə ta gəzanci kaa Muyisə: «Yən shəŋa Zhetru səəkəra na va gha lə ndərazhi gha va bakə ni, mbaʼ mali gha, kə Shəŋa, pə gha kaa Muyisə,» kə kaa ntsa va. 7 Ma sa dza məndiy gəzanci kaa Muyisə ki na, mbaʼ kafiy ta dza ta kumə lə shiy tsa va. Kwəmə tsa kumə ghəshi na, mbaʼ tsəfəkuy kwa kuma ci, mbaʼ hutəməvə. Liy hum sa səkwantəvashi ghəshi ki na, mbaʼ ghəshi dzashiy dzəmbə ciki gamtaʼwal tsa Muyisə. 8 Dzəghwa Muyisə mbaʼ slanakə shiy mənti Kwa sləkəpə lə Farawaŋ gwanashi mbaʼ ka Ezhiptə tə mbərkə ka Izərayel kaa shiy. Mbaʼ gəzanakə kwemeriy kakasashi caslakə caslakə ni gwanashi mbə kwal, lə njasa mbəlantishi kwa sləkəpə mbə kwemer va. 9 Sa favə Zhetru kuma va na, dza na ka vəshi tə mbərkə wəzə tsa mananatishi Kwa sləkəpə va gwanay kaa ka Izərayel, mbaʼ mbəlantishi mbə dəvə ka Ezhiptə. 10 Ma kə na: «ʼWəsa pə ghummə kaa Kwa sləkəpə ghənzə saa mbəlantəŋuy mbə dəvə mazə ka Ezhiptə lə mbə dəvə mbəzli ci. ʼWəsa pə ghummə ka ngata ghənzə sa mbəlanti hulfə ka Izərayel. 11 Nanay ee sənay dikəɓa Kwa sləkəpə na kən nihuti hiyalahi gwanashi pən. Aa cikəvəri dikə tsa məni na ghala vəghu tsaa niy irə ka Ezhiptə va ka Izərayel lə ngəraʼu,» kə.

12 Dzəghwa Zhetru shiy Muyisə ki mbaʼ kəəsəkə dəmbəkə ta ndanta kaa Hiyala, zhini mbaʼ ɓəkə nihuti ta sliy shi məndi kaa ngəta. Dza kar Aruŋ lə mbəzli dikə dikə ni mbə ka Izərayel gwanashi, mbaʼ ghəshi səəkəə zəməhu shiy kwa kuma Hiyala ghəshi lə kar shiy Muyisə ki.

Zhetru canci tsəhuli kaa Muyisə

13 Way pi tə həzlimə ki na, mbaʼ Muyisə nziyiy ta slaslaka kwemer dzar kwa jipə mbəzli. Ghava na tə mekishi paʼa hetihwer na, war kwa kuma ci mbəzli mbə sləka kuma 14 Ma sa nata shiy tsa va kuma məni na va gwanata kaa ka Izərayel ki, ma kə kaa ngəci na: «Tawa məni gha tsəghaa? tawa məni gha sləni va kutiŋa, war gagarə mbəzli kwa kuma gha ghala mekishi paʼ hetihwer ta ndəghə sləka kuma shia?» kə kaa ngəci. 15 Ma kə Muyisə kaa zləɓanci na: «Ta ɗuw kuma va Hiyala səəkə mbəzli va vəya. 16 Mbaʼ kə kuma həərəti mbəzli kwa jipə shiy, a ka ghəshiy səəkə vəya ta sləkashee. Kee dza na, mbaʼee sləkatishi, ka canshi kuma pəhəti Hiyala lə na ɗi na məndiy məni,» kə.

17 Ma kə shiy kaa ngəci na: «Wəzə na gəla kuma məni gha va tsəgha naw. 18 Kwəp dza ghaa taŋa, tsəgha mbəzli kwa səbə gha ni diɓa. Təruŋəta na sləni va kən gha. Ka dza ghaa mbata kutiŋaw. 19 Favə kuma dzee na ta ciŋa, nza Hiyala kəətiŋa. Na na ghay, ntsaa dzəghwa kuma Hiyala lə slən tsa mbəzli, ka ɓanta kumaa səshi, pə gha məniŋa. 20 Gha dza naa canshi kuma pəhəti Hiyala kaa ngəshi, ka ɓananshi kuma ɗi na ghəshiy məni. Gha dza naa canshi kwal tsa kuma, ka canshi njasa dza ghəshiy nziy kwa jipə shi. 21 Ta na niy tərə kwemeriy, ə pə gha təravə zhər tsər tsər ni, zhər nza hazləni Hiyala mbə nefer shi, ka ɗi na tiɗiɗə na kuma, kala gar dakəhushi məndi lə shiy. Nza gha fəfiyshi ta sləkə mbəzli. Nihutiy ka sləkə mbəzli diwiy diwiy məŋ, nihuti na ka sləkə mbəzli diwiy, nihuti na ka sləkə mbəzli cifəmətsəkə, nihuti na ka sləkə mbəzli məŋ. 22 Ya humɓay, nza ghəshi sləka kuma kwa jipə mbəzli. Mbaʼ kə kuma taŋanatishi bərciy, nza ghəshi ɓəŋa na va. Na juw juw na kuma na, ka sləka nava ghəshi dəʼu ghən tsa shi. Ghalaɓa kiy, ka dza sləniy nza tərəŋuəta kən ghaw. Sa nzanay ghuy li shi dza naa təhəhu sləni va. 23 Mbaʼ pə gha mənti njasa gəzaŋee va, ka ciŋa kuma dza ghaa məni Hyalay, ka dza ghaa daliŋaw. Ya wa ndə mbə mbəzli niy, lə zərkə dza naa zhəghəvaa jəghyi,» kə kaa Muyisə. 24 Dzəghwa Muyisə ki mbaʼ zləɓavə kuma shiy va, mbaʼ mənti kuma gəzanakə na va gwanata. 25 Dza na mbaʼ təravə zhər tsər tsər ni mbə ka Izərayel, mbaʼ fəfiyshi ka ka sləkə mbəzli. Nihuti na, ka sləkə mbəzli diwiy diwiy məŋ, nihuti na ka sləkə mbəzli diwiy, nihuti na, ka sləkə mbəzli cifəmətsəkə, nihuti na, ka sləkə mbəzli məŋ. 26 Mbəzli va niy sləka na kuma kwa jipə mbəzli ya humɓa. Naa taŋanatishi bərci kuma na, ka ɓə ghəshi kaa Muyisə. Ma na juw juw na kuma na, ka sləka nava ghəshi dəʼu ghən tsa shi.

27 Dza shiy mbaʼ kafiy vəgha Muyisə, ka zhay dzəti hiɗi ci ki.