Hiyala slati kiri lə ka Izərayel
(19-24)
19
1-2 Dza ka Izərayel ki mbaʼ ghəshi kafəshi tə pi tsa har məndi vaa Refidim, tə kwa taŋa vici mbə kwa mahəkana tir, ghala kafəshi ghəshi mbə hiɗi Ezhiptə. Sa kafə ghəshi tiɓa na, nishə ghəshi tsəhəshi mbə gamba Shinay, mbaʼ ghəshi ləliy ceker gamtaʼwalhi shi mbə gamba va, ndəku vəgha dəlagwa Shinay. 3 Dzəghwa Muyisə mbaʼ dzay dzəmə dəlagwa va ta dza ta kumə lə Kwa sləkəpə.Dza Kwa sləkəpə ka har səəkə mə ghən dəlagwa va. Ma kə kaa ngəci na: «Ma pə gha dzaa ni kaa mbəzli mbə hulfə ka Izərayel jijihiy Zhakubəy: 4 “A ghuy nashi shi mənəhwee lə ka Ezhiptə lə mətsə ghuy. A ghuy nay njasa ɓəkəŋuyee tikə, ndəku vəghee. Njasa ka zəlikə vaa ɓə ndərazhi nzə tə hum ɓəkəŋuyee. 5 Avanay sana, mbaʼ pə ghuy dzaa fa kuma viya, ka nuw kuma slatee kiri lə ghuy tiy, mbəzli gura dimə ti shi dza ghuy nza viya mbə mbəzli gwanashi. Ya tsəgha nza mbəzli gwanashi ka shiya. 6 Na na ghuyiy, nee hulfə ka ta Hiyala dza ghuy nza, ni ya mbəzli ka shiya” kə Kwa sləkəpə, pə gha kaa ka Izərayel,» kə Kwa sləkəpə kaa Muyisə.
7 Dzəghwa Muyisə ki, mbaʼ zhəghəkəghwavay, səəkə na ɓasə ɓasəti mbəzli dikə dikə ni mbə ka Izərayel, mbaʼ zhananavəshi kuma gəzanci Kwa sləkəpə va gwanata. 8 Ma kə mbəzli gwanashi, sa favə ghəshi na: «Ta məni kuma gəzəkə Kwa sləkəpə va dza ghiy gwanata,» kə ghəshi. Dza Muyisə mbaʼ dzaa zhananavə kuma gəzəkə ka Izərayel va kaa Kwa sləkəpə. 9 Ma kə Kwa sləkəpə kaa ngəci ki na: «Ta tsəhə dzee paʼ vəgha gha mbə timbətimbə tərəŋu na. Ghalaɓay ta favəra dza ka Izərayel mbə gəzə kuma lə gha. Ma nza ghəshi zləɓavə kuma gha ka sa kataŋ na ya humɓa kuraku,» kə. Dza Muyisə mbaʼ zhananavə kuma gəzəkə ka Izərayel va kaa Kwa sləkəpə.
Kar Hiyala lə Muyisə mə dəlagwa Shinay
10 Ma kə Kwa sləkəpə kaa Muyisə diɓa na: «Zhəghəva a gha dzaa kəsashi ka Izərayel, nza gha gəzanshi, a ghəshi mənti shi ka məndiy məni ta nza ɗewɗew kwa kwəme, ndatsə mbaʼ həzlimə, mbaʼ ghəshi yaɓanti kubeŋer shi diɓa. 11 Ma tə kwa mahəkana viciy, nza ghəshi gumatəvashi, sa nzanay, fəca va dzee ta səkwa səəkə mə dəlagwa Shinay, ka nara ghəshi gwanashi. 12 Nza gha fiy ghala pi tsa dza ghəshiy garə ti, kala taŋə ma. Ma pə gha dzaa ni kaa ngəshiy: “Əntaa ghuy dzəmə dəlagwa na ma, əntaa ghuy kəətiva ya dzəvəgha ma. Ya wa ntsaa dzaa kətəghəvay dzəvəghay, ta paslanti dza məndi. 13 Ya ndə ngəri na, ya dəmbəkə nay, paslanti tə məndi. Ka dza məndiy ndəŋu lə dəvuw. Lə hərezli kə məndi dzaa pəʼwə, aw na ka hə lə havə ta pəəsli ci. Ma sa ka mbəzli favə gaka viy təlimə kiy, nza nihuti mbəzli dzəmə dəlagwa va” pə gha dzaa ni kaa ngəshi,» kə Kwa sləkəpə. 14 Dza Muyisə mbaʼ zhəkəghway dzəvəgha mbəzli, mbaʼ gəzanshi məni shi ka məndi məni ta nza ɗewɗew kwa kuma Kwa sləkəpə, mbaʼ gəzanshi yaɓanti kubeŋer shi. 15 Ma kə kaa ngəshi ki na: «Gwəmatəvaŋuyim ta vici həzlimədzə. Əntaa ghuy həni lə miʼi ghuy ma,» kə kaa ngəshi.
16 Ma tə kwa mahəkana vici, mekishi mekishi ki na, war ə shiy dərazli, ka wampiɗi, mbaʼ timbətimbə səkwata tərəŋu mə dəlagwa va, mbaʼ viy təlimə gakata lə bərci tərəŋu. War ə mbəzli gwanashiy gwərəgwərə va hazləni tə pi tsa ləliy ghəshi va ceker gamtaʼwalhi. 17 Dzəghwa Muyisə ki, mbaʼ pəməvəshi tə pi tsa nza ghəshi va, ta kumə ghəshi lə Kwa sləkəpə mbaʼ ghəshi səəkə garəshi ta səɗa dəlagwa va. 18 Dzəghwa Kwa sləkəpə ki mbaʼ səkwata dzəmbə dəlagwa va mbə jipə ghu. Tisl inəghu kalay pi tsa mbəɓa, war ə inəghu takusə ya dza kwamaɓa, njasa pəhəy məndi ghu tərəŋu na, dza dəlagwa va gwanata ka gərəgərə tərəŋu. 19 Ma gaka viy təlimə va na, war ə ghənzə mətsəhəva. Gəzəkə ma Muyisə kuma kaa Hiyala na, ka zləɓanci ghənzə, nja dərazli van məli nzəə gaka.
20 Ava tsəgha səkwata Kwa sləkəpə dzəmə ghən dəlagwa Shinay va. Dza na ka har Muyisə səəkə məɓa. Dzəghwa Muyisə ki mbaʼ dzəməy ta kumə li. 21 Ma kə Kwa sləkəpə kaa ngəci na: «Ləghwa a gha gəzanshi kaa mbəzli va nəghəta ghəshi diva ta kətivaa dzəvəghee ta nighəra. Kala tsəghay, ta bekushi dza mbəzli ɗaŋ mbə shi. 22 Ya ka ta Hiyala dəʼu ghən tsa shi ghəshi shiy dzəvəgha yay, ə kə ghəshi mənti kuma ka ghuy məni ta nza ɗewɗew kwa kumee, va nəghətee dzaa ghəratishi. 23 Ma kə Muyisə kaa Kwa sləkəpə na: «Ka dza mbəzliy pəla dzəmə dəlagwa Shinayəw, sa nzanay, a gha niy gəzaŋəy kwatsəməta: “Ə pə gha sliy ghala dzar ta dəlagwa va, mbaʼ dəlagwa va mənta ka pi tsa ɗewɗew tsa” pə gha niy ni,» kə Muyisə. 24 Ma kə Kwa sləkəpə kaa ngəci na: «Zhəghəvaa dzəghwa a gha dzaa pəməvə Aruŋ nza ghuy səəmə li. Ka ta Hiyala lə mbəzli gwanashi niy, əntaa ghəshi diva ta səəmə dzəvəghee ma, kala tsəghay ta ghəratishi dzee,» kə. 25 Dzəghwa Muyisə ki mbaʼ səkwaa kəsashi mbəzli, mbaʼ gəzanshi.