Hiyala Pəhəti kuma məŋ kaa ka Izərayel ta nuw ghəshi
( Nəw 5.6-21)
20
Dzəghwa ma kə Hiyala kaa kuma gəzanakəshi na gwanata kaa hulfə ka Izərayel ki na:2 «Kwa sləkəpə nzee, Hiyala gha ɓəkəvəriŋa mbə Hiɗi ka Ezhiptə sa niy nza ghaa mava mbəɓa.
3 Əntaa gha tsəfəku kwa kuma nihuti hiyalahi dzəghwa kənee ma.
4 Əntaa gha dzaa nga shiy ta nza ghəshi ka mbəri tsa gha ma. Ya shiy nja pa shi məɓa mə ghumə, ya nja pa shi tikə tə hiɗi, ya nja pa shi mbə yam taɓa ta hiɗiy, əntaa gha ngashi ta nza ghəshi ka mbəri tsa gha ma 5 Əntaa gha tsəfəku kwa kuma gəla mbəreketi va ma, əntaa gha fə shəndəkə dzəti shi ma, sa nzanay Kwa sləkəpə nzee, Hiyala gha. Ka ɗee ghaa tsəfəku kwa kuma nihuti shiy dzəghwakən yaw. Mbaʼ kə mbəzli kala ɗi kumayay, karee sla nguvəə dzəkən shi, ka slaa dzəkən ndərazhi shi paʼ tə kwa mahəkana lə kwa faɗa jijihishi. 6 Ma mbaʼ kə mbəzli ɗi kumee, ka nuw kuma pəhanatishi yay, kuma wəzə na kee mananshi, ka nuw dzar lə mananshi kaa jijihi shi paʼa tə kwa diwi diwi məŋ jijihi shi.
7 Əntaa gha hamiy slən tsee yən Hiyala gha sləkəŋa tə gəm tə gəm ma. Sa nzanay, ka zlay sla ngwəvee dzəkən ntsaa hamiy slən tsee tə gəm tə gəmuw.
8 Fə tə gha ghən ta vici dəkəva, mbaʼ gha mənti nava vici ka vicee. 9 Vici kwaŋ dza ghaa mənti mbə ghəra sləni, ka məni ya nama sləni ɗi gha məni. 10 Ma kwa mbərfaŋa viciy, vici dəkəva na nava, nee vici na nava yən Kwa sləkəpə Hiyala gha. Əntaa gha məni ya nama sləni fəcava ma. Ya gha, ya zəghu zal tsa gha, ya zha gha, ya ndə ghəraŋa sləni tsaa zal na, ya naa mali gwaʼa, ya dəmbəkə tsa gha, ya ndə səəkə səəkə mbə məlmə ghay, əntaa ghəshi ghəra sləni fəcava ma. 11 Sa nzanay, vici kwaŋ məntee mbə məni kar ghumə lə hiɗi lə shi ti shi, mbaʼ yam lə shi mbə shi, ma tə kwa mbərfaŋa viciy, mbaʼee dəkətəvara. Va tsəgha təfakənee miy kən vici dəkəva, mbaʼe fiy ka nee vici.
12 Ə pə ghaa fə shəndəkə dzəti kar dəŋa lə məŋa, ta mbə gha hiŋa tə hiɗi ndaŋee va yən Kwa sləkəpə, Hiyala gha.
13 Əntaa gha pəəsli ndə ma.
14 Əntaa zal həni lə mali tsahuti zal ma, əntaa mali həni lə zata nahuti mali ma.
15 Əntaa gha ghəli ma.
16 Əntaa gha ndəgha fəti lə dzərvəə dzəkən tsahuti ndə ma.
17 Əntaa gha məni mətsə ta ghyi tsa ndə ma, əntaa gha məni mətsə ta mali ci, ya ta ndə sləni tsa ci, ya ta maliy ghəranci sləni, ya ta sla ci, ya ta kwantəmca ci, ya ta nimaɓa shi ci ma,» kə Hiyala.
18 Ghala vəghu tsa vay, gwanashi niy favə ka Izərayel dərazli va lə viy təlimə va. Gwanashi ghəshi nay wampiɗi pi tsa va lə inəghu tsaa takusə va mbə dəlagwa va. War ə ghəshiy gurəgurə va hazləni, mbaʼ ghəshi nziyshi kərakə. 19 Ma kə ghəshi kaa Muyisə na: «Gha kəə gəzəŋəy kuma, ta fa dza ghiy. Ka gəzəŋəy kuma Hiyala dəʼu ghən tsa nzə ma, nəghətaa ghiy dzaa bəkuŋiy,» kə ghəshi. 20 Ma kə Muyisə kaa ngəshi na: «Ka hazləni ghuy ma, ta nighəti kuma ghuy kəətikəvata Hiyala, ta mbə ghuy ɗi fəti və, nəghətaa ghuy məni kuma jikir na,» kə 21 Kərakə niy nziyshi mbəzli. Ma Muyisə na, mbaʼ kəətəghəvay dzəvəgha timbətimbə tərkuslna va nza Hiyala mbə.
kuma pəhəti Hiyala dzəkən pi tsa dza məndiy slanta shiy ti.
22 Ma kə Kwa sləkəpə kaa Muyisə na: «Ma pə gha kaa ka Izərayeliy: “A ghuy nay dəʼu ghən tsa ghuy, səəkə mə ghumə gəzəŋuy ya kuma. 23 Əntaa ghuy dzaa nga nihuti hiyalahi ya tə tsahi gəna, ya tə tsahi mbəzə ta nza ghəshi ka hiyalahi ghuy, ta tsəfəku kwa kuma shi njee ma. 24 Ka ghuy dzay, mbaʼ ghuy ngatəra pi tə gəzəm, ta ndira təŋkesli ghuy lə kwiy ghuy mbaʼ slay ghuy, mbaʼ ta slaslarashi ghuy ta nza zərkə kwa jipə ghuy lə ya. Ya dzəghwa tima dzee səəkə ta ci ghən tsee kaa ngəŋuyəy, nzee təfəŋuy miy. 25 Sa ka ghuy ngara pi lə hərezli ta slara shiy tiy, ənta ghuy dza fəɗi hərezli va lə shiy ma. Sa nzanay, shi dza ghuy vaa fəɗi hərezli va li shiy, ta zhəghanti hərezli va dza ghəshi ka shiy kama shi ɗewɗew ni kwa Kwəme. 26 Əntaa ghuy dzaa nga pi tsa dza ghuy vaa slara shiy ti ɗal tərəŋu, ta dzəmə məndi dzəmə dzəmə ma, va nəghətaa məndi nay ntsa məɓa hasəy sa ka məndi nighəə dzəmə,” pə gha kaa ka Izərayel,» kə Kwa sləkəpə kaa Muyisə.