kuma pəhəti Hyalaa dzəkən mevivi kaa ka Izərayel
21
Ma kə Kwa sləkəpə kaa Muyisə diɓa na: «Avanta nahuti kuma dza ghaa gəzanshi kaa ka Izərayel ta nuw ghəshi: 2 Mbaʼ kə ndə mbə ghuy pavə mava tə ndə ka Ebərəy, piya kwaŋ dza naa nza ka mava. Tə kwa mbərfaŋa piyay, nza gura ghən tsa ci. Shiy tiɓa ghəci dzaa wa ta mbəərə ghən tsa ciw. 3 Kutiy kə niy nza ghala vəghu tsaa niy pa məndiy, kutiy dza naa dzay. Lə mali kə niy nzay, lə mali ci kə dzaa dzay. 4 Mbaʼ kə ntsaa pavə va niy ɓanavə mali ghala vəghu tsaa nza naa mava, dza mali va mbaʼ yanakə ya ndərazhiy zhər, ya niy ghyehiy, shi ntsaa pavə mava va dza kar mali vaa nza lə ndərazhi nzə va. Ghəci kutiy dza naa nza ka ntsaa gura ghən tsa ci. 5 Ma mbaʼ kə mava tsa va ni: “Ee ɗi nziyra lə ntsaa pakəra va lə malee mbaʼ ndərazhee, ka ɗi dzaree ta gura ghən tsee yaw,” kiy, 6 ghalaɓa na, nza ntsaa pakə va fiy Hiyala ka ndə ndəgha fəti kwa jipə shi. Ka na dza na, mbaʼ pəməghə dzəvəgha gəzli miy dəgha ci, aw na dzəvəgha tsəm tsaa dzəmə vəgha miy dəgha. Ka ntsaa pakə va dza na, mbaʼ ʼyanti sləmə ti lə shi kiɗəku miy ni. Ghalaɓa ki na, nza ghəci nza ka mava tsa ci ya paʼ humɓa.7 Mbaʼ kə ndə ɗəlanti zha ci ta nza ghənzə ka mavay, ka dza naa zhiniy gura ghən tsa nzə nja meviviy zhərəw. 8 Ma mbaʼ kə ntsaa sləkə va pavə ta nza ghənzə ka mali ci kala zhini ghəciy ɗiy, Dəta zha va kə dzaa zhiniy mbərəhu sa ci. Kwal va ntsa va ta ɗəlanavə kaa ka məlmuw. Mbaʼ kə mənti tsəghay, aa dzəghway kən kuma niy pəhəti ghəshi. 9 Mbaʼ kə pavə ta nza ghənzə ka mali zəghu ciy, shi ka məndiy məni məndi kəə ɓə zha kə dzaa mənti. 10 Mbaʼ kə ntsaa ɓəhu mava ci va ka mali ci ɓəvə nahuti maliy dzəkəniy, əntaa ghəci tanti shiy ya kutiŋ mbə shiy niy mananta na kwataŋa ma. Njasa niy ɓanta na shi zəmə kə dzaa nuw lə ɓantashi, tsəgha panta shiy dzəkən ghən tsa nzə, zhini tsəgha həni li. 11 Kala mananta shi mahəkanə ni va kiy, ta mbay dza mali vaa gura ghən tsa nzə, kala mbəərə ma ghən tsa nzə mbəərə mbəərə tə gəna.
kuma dza ndəə mənti ka məndi pəsli ndə ti
12 «Mbaʼ kə ndə ləkanti ndə ka mbəriy, paslanti tə məndi kuraku. 13 Ma kalaa tarəkə pəsli ci kə mbə nəfə tsa ci, war yən yən Hiyala kə bərkəti məti ntsa va mbə dəvə ciy, ta citəŋa pi dzee nza ntsaa pəəsliti ndə va kala kama lə ɗi ci dzaa mbiy ti. 14 Nanzə ki mbaʼ kə ndə tarəkə pəəsli ndə, mbaʼ pəəsliti kwa tsəhuliy, ya vəgha pi tsa ngati məndi ta ndira shiy ti dza naa mbiyəy, dza tə ghuy kəsəkə, mbaʼ ghuy paslanti. 15 Mbaʼ kə ndə ləkanti ya diy, ya mbəghiyəy, ə kə məndi dzaa paslanti ntsa va. 16 Ya wa ntsaa dzaa kəsəhu ndə lə ghəli, ya ə dza naa dzaa ɗəlanti ntsa ghələhu na va, ya ə dza naa fiy sa ci kiy ghyiy, ə kə məndi dzaa paslanti. 17 Ya wa ntsaa dzaa gəzəkə kuma bəzlaa dzəkən diy, ya dzəkən mbəghiyəy, ə kə məndi dzaa paslanti.
kumaa dzəkən ntsaa ləkanti ndə ya manati zhi tə ndə
18 Mbaʼ kə mbəzliy məni miy, dzəghwa tsahuti mbə shi mbaʼ ləkiy tsahuti lə dəvə, ya lə haku, kala mətiy kə ntsa ləkantim va, kəray həni na həniy na tə pi həni tsa ci, 19 dzəghwa na mbaʼ mbəə tiŋəkəvərivay dzəti ngula lə gətay, ka dza məndiy ɓasə nguvə dzəkən ntsaa ləkanti vaw. Ə na na dza naa wati shi yəɗanti məndi mbə zəlghu ntsa ləkanti na va, zhini mbaʼ wanati vəghu tsa mənti na va kala ghərahu ma sləni ci.
20 Mbaʼ kə ndə ləkanti ya mava tsaa zal tsa ci, ya saa mali tsa ci lə ghədəm ka mbəriy, wanati tə məndi shi mava tsa va ti. 21 Ə na na nzana mbaʼ kə mava tsa va mənti ya vici kutiŋ ya vici bakə məti nay, ka dza məndiy wanci shi mava tsa va tə ntsaa pakə vaw. Sa nzanay, tə gəna ci pavə na.
22 Mbaʼ kə zhər mbəzə, dza ghəshi mbaʼ ghəshi tsəkwata mali lə hur, dzəghwa mali va baw yata kala məniy tirə tsa nzə, zhini kala shiy tiɓaa manantay, shi ɗi zata mali va kə ntsaa tsəkwata va dzaa wati. Njasa dza ka sla nguvəə gəzəkə. 23 Ma mbaʼ kə bəzə kəsata mali vay, ɓasakən tə məndi nguvə kən ntsa va. Mbaʼ kə mətita, ya zəghu nzə va mətiy nay, paslanti tə məndi ntsaa tsəkwata va. 24 Mbaʼ kə ndə yahwanti mətsə tə ndiy, yahwanti tə məndi na ci mətsə kuraku. Mbaʼ kə ndə ɓəlanti slini ndiy, ɓəlanti tə məndi na ci kuraku. Mbaʼ kə ndə ɓəlanti dəvə ya səɗa tə ndiy, ɓəlanti tə məndi dəvə ya səɗa ci kuraku. 25 Mbaʼ kə ndə ndati zhi tə ndə lə ghuy, ndanati tə məndi zhi lə ghu kuraku. Mbaʼ kə ndə bəhati zhi tə ndiy, bəhanati tə məndi zhi kuraku. Mbaʼ kə ndə ləkanti ndə lə gətay, ləkanti tə məndi lə gəta kuraku.
26 Mbaʼ kə ndə ləkanti ya mava tsaa zal tsa ci, ya saa mali tə mətsə, dza mətsə va mbaʼ yahutay, zlay tə ghəci mava tsa va a ghəciy gura ghən tsa ci dzəti mətsə ci va yahwanti na. 27 Mbaʼ kə ɓəlanti slini mava tsa ci, ya saa zal na, ya saa mali nay, zlay tə ghəci a ghəci gura ghən tsa ci dzəti slini ci va ɓəlanti na. 28 Mbaʼ kə məcar ʼyanti ya zal, ya mali ka mbəriy, paslanti tə məndi məcar tsa va lə hərezli. Əntaa məndi zəmə sliw tsa ci ma. Ma na ndə məcariy ka dza məndiy ɓanci fətiw. 29 Nanzə ki, mbaʼ kə məcar tsa va niy nzaa ndə gulaŋ ka i i mbəzli, mbaʼ ndə məcar niy sənay kala ndəghu ghəci, mbaʼ ʼyanti ndə ka mbəriy, paslanti tə məndi məcar tsa va lə hərezli, zhini mbaʼ məndi paslanti ndə məcar tsa va lə hərezli kuraku. 30 Mbaʼ kə məndi ni war gha kəsliti kərhi, kə məndi kaa ndə məcar tsa va, ta mbə ghəciy nza tə ghumiyəy, ya wa shi dza məndiy ɗuw və na fiyshi tə ghəci. 31 Mbaʼ kə məcar dzaa ʼyanti ya zəghu zal na, ya zha na ka mbəriy, sa kutiŋ na kə nguvə va dzaa nza. 32 Mbaʼ kə məcar ʼyanti ya mava tsaa zal na, ya saa mali na ka mbəriy, Gəna kwa tsahi mahəkanəmətsəkə kə ndə məcar tsa va dzaa wati kaa ndə mava. Ka məndi dzay, mbaʼ məndi pəʼwanti məcar tsa va lə hərezli, ka mbəri.
33 Mbaʼ kə ndə dzaa ghunanti wawərə kala kalay ghəci, aw na mbaʼ latiy zlata buŋta, dzəghwa mbaʼ ya məcar, ya kwantəmca səəkə ndəghaghwavata kway, 34 ə kə ndə wawərə tsa va dzaa kəsliti kərhi lə gəna kaa ndə dəmbəkə tsa va. Ma dəmbəkə tsaa mətiy va na, sa ndə wawərə dza naa nza.
35 Mbaʼ kə məcar tsa ndə ʼyanti məcar tsa tsahuti ndə ka mbəriy, ə kə ghəshi dzaa ɗəlanti tsaa ʼyanti məcar va. Nza ka slay va təhəhu gəna va, ka ghəshi dza diɓa na, mbaʼ ghəshi təhəhu sliw tsa tsaa mətiy va. 36 Nanzə ki, mbaʼ kə məcar tsa va niy nzaa ndə gulaŋ ka i i mbəzli, mbaʼ ndə məcar niy sənay kala ndəghu ghəci, mbaʼ ʼyanti tsahuti məcariy, ə kə dzaa kəsanavə tsahuti məcar kaa ntsa vaa dzəghwa məcar tsa ci. Nza ghəci ɓə tsaa mətiy va.
kumaa dzəkən ka ghəli dəmbəkə
37 Mbaʼ kə ndə ghələhu ya məcar na, ya təmbəkə na, ya kwə na, mbaʼ hənəhu, aw na mbaʼ ɗəlantiy, slay cifə kə dzaa kəəsəkə ta wanci məcar tsa va kaa ndə məcar. Mbaʼ kə ya kwə ya təmbəkiy, Kwəy faɗə aw na teŋkesli faɗə kə dzaa wa.