22
Mbaʼ kə ndə kəsay ndə ghəli mbə bətəkwə kələm həvir ta ghəli, dzəghwa mbaʼ ləkiy ka mbəriy, kəsli kərhi tiɓa ta məti ciw. 2 Ma mbaʼ kə pəəsliti ndə ghəli tsa va ghəci mbə ghəli havəghuy, ta kəsli kərhi dza na ta miymiy ci. Ndə ghəliy, ta wa kuma dza na, kala shiy və ta wa kumay, mbaʼ məndi ɗəlanti ta nza ghəci ka mava, nza məndi wati ghəli ci va lə gəna va. 3 Mbaʼ kə ndə ghəlivə ya sla na, ya kwantəmca na, ya təmbəkə na, ya kwə na, mbaʼ məndi dzaa kəsay dəmbəkə tsa va və lə məciyiy, dəmbəkə tsa va dza məndiy zhinəhu və, mbaʼ ghəci zhiniy kəsəkə dəmbəkə bakə dzəvəgha tsa va.kumaa dzəkən shi ndə
4 Mbaʼ kə ndə zlay dəmbəkə tsa ciy dzəmbə za tsahuti ndə, ya dzəmbə fəhi ka məndiy ta tay tə ya shi, mbaʼ ghəshi pərantiy, ə kə ntsa va dzaa wanatishi lə na gura shiy mənishi ti mbə zahi ci, viŋəª kə na, lə naa guraa mənta.
5 Mbaʼ kə ndəə ndi tekesli, mbaʼ ghu va mbəlita və, mbaʼ dzaa ndanti ya alkamari sliy tsahuti ndə pəhə pəhə na, ya na ta ghuməta na, ya na ʼwar pəsə nay, ə kə ntsaa tsəʼuy ghu va dzaa wati shi ndanti na va.
6 Mbaʼ kə ndə fiy ya gəna ci na, ya nihuti shi nza dimə ti shi ghəshi va tsahuti ndə, dzəghwa mbaʼ ndə ghəli səəkə ghələhushi vəy, mbaʼ kə məndi kəsəvə ndə ghəli tsa va na, shi va bakə səɗa kə dzaa wati. 7 Kala kəsəvə ndə ghəli tsa va kə məndiy, nza ntsa fiy məndi va shiy və səəkəə dzəghwa kumee yən Hiyala, nzee sla nguvəə dzəkən ta sənay nda ghəci gwəfəhu na shi ntsa va va. 8 Mbaʼ kə shiy zashi, mbaʼ məndi kumavəshi, ka njəghəzliva mbəzli bakə ti shi, shi ya kə tsatsa, shi ya kə tsatsa, ya sla na, ya kwantəmca na, ya təmbəkə na, ya kwə na, ya kubaŋ na, ya nimaɓa shiy ghəshiy, ə kə mbəzli bakə ni va njəghəzliva va dzaa tsəhəshi kwa kwəme yən Hiyala. Ntsa dzee ni: «Gha na ndə dzərvə pən kaa ngəciy, bakə səɗa kə dzaa wa shi va kaa tsahuti tsa va.
9 Mbaʼ kə ndə fiy ya kwantəmca ci, ya sla ci, ya təmbəkə tsa ci, ya kwə ci, ya tsama dəmbəkə tsa ci va tsahuti ndə, dzəghwa dəmbəkə tsa va mbaʼ mətiy, aw na mbaʼ səɗa ɓəlita ti, aw na, mbaʼ ka ghəli kəsəhu kala ndə tiɓaa garə gəzəkəvəri tsəgha mənita kuma va kataŋ kiy, 10 ə kə ntsa fiy məndi va shiy və dzaa zəməkə fəla lə slən tsee yən Kwa sləkəpə, “yən gwəfəhu na dəmbəkə tsa vaw,” kə dzaa ni. Ma nza ndə dəmbəkə tsa va zləɓavə fəla va. Ghalaɓay, shiy tiɓa ntsaa fiy məndi va dəmbəkə və dzaa waw. 11 Ma mbaʼ kə məndi ghələhu dəmbəkə tsa va kiy ghyi vəy, ə kə dzaa wanati dəmbəkə tsa ntsaa fiy va və. 12 Ə kə sakwaday kəsəhu dəmbəkə tsa vay, nza ntsa va ɓəkə sliw tsaa tərə ta miy sakwaday tsa va, ta mbə məndiy sənay kataŋ pəəsliti sakwaday, kə məndi. Ghalaɓay shiy tiɓa ghəci dzaa waw.
13 Mbaʼ kə ndə cəʼuvə dəmbəkə va tsahuti ndə ta sləni, dzəghwa mbaʼ səɗa ɓəlita tə dəmbəkə tsa va, aw na mbaʼ mətiy kala ndə dəmbəkə tsa va tiɓa ghala məniva shi vay, ə kə ntsaa cəʼuvə dəmbəkə va dzaa wanati sa ntsa va. 14 Ma mbaʼ kə ndə dəmbəkə tsa va niy nza tiɓay, ka dza ntsaa cəʼuvə dəmbəkə vaa wanci shiyəw. Ə kə niy ɓəvə dəmbəkə tsa va tə gənay, gənaa niy sləkati ghəshi dza naa wati gwaʼa tsəgha.
kumaa dzəkən shiy ghənghən ghənghən
15 Mbaʼ kə ndə dzaa ngəɗivə zhaa səəkə maa hənəhu həni lə zal, kala kama məndi mbə mə, dza na mbaʼ hənəhu həni liy, ə kə ntsa va dzaa ɓəhu zha va ka mali ci, mbaʼ fambə shiy mbə njasa ka məndiy fə shiy dzəmbə mali. 16 Mbaʼ kə didi ndə zha kala ɗi ɓə zha ci kaa ntsaa hənəhu həni va liy, war ə kə ntsa va dzaa wati gəna ka məndiy fəə dzəmbə zhaa səəkə maa hənəhu həni lə zal.
17 Əntaa ghuy zlata maliy məni ɗəfəl tə ghuməta ma. 18 Ya wa ntsaa hənəhu həni lə dəmbəkiy, ə kə məndi dzaa paslanti. 19 Ya wa ntsaa dzaa slanta shiy kaa nihuti hiyalahi dzəghwakənee yən Kwa sləkəpiy, ə kə məndi dzaa paslanti ta fə shəndəkə dzəti Kwa sləkəpə.
20 Əntaa ndə mbə ghuy iyapə ndə səəkə səəkə ma, əntaa ghuy sanshi ngəraʼu ma. Sa nzanay, ya ghuy na a ghuy sənay ka səəkə səəkə niy nza ghuy tə hiɗi ka Ezhiptə kuraku. 21 Əntaa ndə mbə ghuy sanci ngəraʼu kaa məzəti lə mali mbəri ma. 22 Mbaʼ kə ndə mbə ghuy sanshi ngəraʼu, dzəghwa ghəshi ka wahəra wahəy, ka dzee zlay fa wahə shi vaw. 23 Ka nəfə tsee dzay, mbaʼ satiy, kee dza ki na, mbaʼee zlashi mbəzli nza ghəshi bakwantəŋuy lə kafaʼihi mbə mbəzə. Ma nza miʼi ghuy nza ka miʼi mbəreketi, ndərazhi ghuy na mizhititi kuraku.
24 Mbaʼ kə ndə mbə ghuy ɓanavə təm kaa ndə ndərma, ndə ka Izərayel nja ghəciy, əntaa ghəci ni war gha watəra lə yam kə, njasa ka nihuti mbəzliy ɓə təm va kaa mbəzliy məni ma.
25 Mbaʼ kə ndə bəvə shiy va ndə mbə ghuy, mbaʼ fiyŋuy kubaŋ tasli tsa ci ta səəkə ghəci ta mbərəy, zhananavə tə ghuy sa ci ka vici pəku. 26 Sa nzanay, kwataka ghəci na shi və ta pəliy dzəkən ghən va tasli. Kala zhananavə pə gha kiy, mbə wa dza naa hia? Sa ka na harɗa ta kəəti ciy, ta fa cəʼu ci dzee, sa nzanay Hiyala kwa zhəhur nzee na nee.
27 Əntaa ndə mbə ghuy tsəərəɗa yən Hiyala ma. Əntaa ndə mbə ghuy gəzə kuma bəzlaa dzəkən ntsaa məni dikə mbə hulfə ghuy ma.
28 Əntaa ndə mbə ghuy bashi ɓəra ni ya shiy mbə shi dza naa zakə, ya mbə məəli dza naa ɓəsə mbə ya fəhi ci ma. Kwa taŋa zəghu zal tsa dza ndə mbə ghuy yakiy, kaa ngəra kə dzaa ndara.
29 Ya kwa taŋa zəghu sla na, ya zəghu təmbəkə na, ya ugə nay, war tsəgha pə ghuy dzaa mənti li. Sa ka na mənti vici mbərfəŋ ta mbəghiyəy, nza ghuy sliyra tə kwa dəghasa vici. 30 Ni ya mbəzli ka shi ya pə ghuy dzaa nza. Əntaa ghuy zəmə sliw tsa pəəsliti shi mbə gamba ma. Kaa kəreketi pə ghuy dzaa ndəghanavə,» kə Kwa sləkəpə.