Nəw kuma lə kwal tsa nzə
23
Ma kə Kwa sləkəpə diɓa kaa Muyisə na: «Əntaa ndə mbə ghuy pəli kuma dzərvə dzərvə na dzar mbə mbəzli ma. Ka yipə ghuy ta ntsa nza fəti və lə ka dəvə kaa dzərvə ma. 2 Əntaa ndə mbə ghuy nuw mbəzli sa nza ghəshi ɗaŋəɓa ghəshi, ta məni kuma jikir na ma. Mbaʼ kə məndi haray ndə ta ndəgha fəti mbə sla nguvəy, əntaa ghəci yimaghwa kumaa dzəghwa sa mbəzli ɗaŋ ni ta sla dzərvə ma. 3 Əntaa ndə kəti ndə ndərma mbə sla nguvə ma.4 Mbaʼ kə sla ndə mbəzə tsa gha ya kwantəmca ci zata, dzəghwa mbaʼ gha natay, kanaghə tə gha sa ci. 5 Mbaʼ kə ndə mbə ghuy kəsata kwantəmca ndə mbəzə tsa ci tərəta sa nza shiy shəndəkəshi vəy, əntaa ghəci zlay ma, kəətiti tə ghəci lə kafə nzəə sati.
6 Əntaa ndə mbə ghuy ʼiyapə ndə ndərma ghəci kə ɓəkə kuma ciy dzəti nguvə ta kəəti ghuy ma. 7 Ya ndə mbə ghuyiy, kərakə kə lə kuma dzərvə dzərvə na. Əntaa ndə mbə ghuy pəəsli ntsaa təvəti ma kuma, mbaʼ ntsaa nuti kuma lə kwal tsa nzə ma. Ntsaa məni shi tsəgha ni vay, ka dzee ni fəti vuw pənuw. 8 Əntaa ndə mbə ghuy zləɓa ndəə ngəɗəhu lə shi təgəm ma. Sa nzanay, kar shi tə gəm makəti ntsaa nighəə dzəkən kuma wəzə va nata na kataŋ na kuma, ka shi va dza na, mbaʼ ghəshi zhəghanti ntsaa nuw kuma lə kwal ta nuw ghəci.
9 Əntaa ndə mbə ghuy ʼiyapə ntsa səəkə səəkə tsa tə hiɗi ghuy ma. Ya ghuy dəʼu ghən tsa ghuyiy, a ghuy sənata kumaa dzəkən nza ka ndə səəkə səəkə, sa nzanay, ka səəkə səəkə niy nza ghuy tə hiɗi ka Ezhiptə kuraku,» kə Kwa sləkəpə.
Gəzə kumaa dzəkən piya dəkəva lə dzəkən vici dəkəva
10 Ma kə Kwa sləkəpə kaa Muyisə diɓa na: «Ya tsamaɓa ndə mbə ghuyiy, piya kwaŋ kə dzaa mənti mbə za shiy tə hiɗi nza ghuy ti shi, ka məni shiy səəkə kwaməti. 11 Ma tə kwa mbərfaŋa piyay, dəkəti tə ghəci hiɗi va. Tə nava piyay, nza ka ndərma mbə ghuy zəmə shiy dzaa mənishi tə hiɗi va. Niy dzaa tərə ta miy shiy, nza shi mbə gamba zəməshi. Tsəgha kə dzaa məni lə viŋə ci, zhini tsəgha lə fəhi har məndi vaa ulivə.
12 Ya tsamaɓa ndə mbə ghuyiy, vici kwaŋ kə dzaa mənti mbə ghəra sləni ci gwanata. Ma tə kwa mbərfaŋa viciy, nza ghəci dəkəva, ta mbə kar sla ci lə kwantəmca ciy dəkətəvashi, mbaʼ ta mbə ka sləni ci lə ka səəkə səəkə mbə ghuy kumavə bərci ta nuw lə sləni.
13 Fə tə ghuy ghən ta nuw kuma gəzaŋuy ya va gwanata. Əntaa ghuy cəʼu nihuti hiyalahi ma, ya slən tsa shiy, əntaa ghəci səkwa tə miy ghuy ma.
Makwaghwahi dza ka Izərayel məni
14 «Njasa səəkə piyay, mahəkanə səɗa pə ghuy dzaa məniɗa makwaghwa. 15 Kwa taŋa Makwaghway, makwaghwa peŋ tsa kama is mbə. Mbə vici mbərfəŋ na va titee tə tir Abibəy, war peŋ tsa kama is mbə pə ghuy dzaa zəmə njasa niy gəzəkəŋuyee va. Sa nzanay, tə tir tsa va niy səvəri ghuy mbə hiɗi ka Ezhiptə. Əntaa ghuy səəkəə dzəghwa kumee batəbatəŋuy ma. 16 Zhini diɓay, məni tə ghuy makwaghwaa məni kwa taŋa shiy səəkə kwamti, ghala vəghu tsa dza ghuy məni kwa taŋa shi zati ghuy səəkə kwamti. Sa ka viya warəta diɓay, məni tə ghuy makwaghwa məni shiy səəkə kwamti sa ka ghuy mənikə shiy səəkə kwamti. 17 Njasa səəkə piyay, mahəkanə səɗa kə zhər mbə hulfə ghuy gwanashi dzaa səəkəə dzəghwa kumee yən ntsaa gura dikə, yən Kwa sləkəpə.
18 Ya tsama ndə mbə ghuy slara na dəmbəkiy, əntaa ghəci ɓə peŋ tsa nza is mbə kwasəbə ma. Əntaa ghəci zlata gəkə dəmbəkə tsa dza na vaa sliyra ta makwaghwa ka hi paʼa tə həzlimə mekishi ma. 19 Kwa taŋa shi dza ya tsama ndə mbə ghuy mənikə mbə shi dza naa zatiy, ɓəkəshi tə ghəciy dzəmbə cikə tsee yən Hiyala ghuy, Kwa sləkəpə. Əntaa ndə ta ugə mbə ʼwa mbəghiy ma.
Hyalaa gəzanshi kuma dza na ta mananshi kaa mbəzli nzə
20 «Ta ghunay ndə kwal tsee dzee ta dza ghəci kwa kuma ghuy, ta ndəghuŋuy ghəci, mbaʼ ta pəməŋuy ghəciy dzəti hiɗi gumatee va kaa ngəŋuy. 21 Fə tə ghuy ghən ta kuma dza naa gəzəŋuy, ka yi fəti və. Əntaa ghuy zhananci ghən ma. Ka dza naa zlaŋuy ghuy kəə zhananci ghənuw. Sa nzanay lə slən tsee dza naa ghəra sləni. 22 Mbaʼ pə ghuy fa kuma dza naa gəzəŋuy wəzə wəzə, ka məni kuma gəzaŋuya ghuy gwanatay, ndə jaka tsa ka jaka ghuy dzee nza, zhini də mbəzə tsa ka mbəzə ghuy yən dzaa nza diɓa.
23 Sa ka ndə kwal tsee dza kwa kuma ghuy mbaʼ pəməghəŋuy dzəti hiɗi ka Amur, lə shi ka Hit, mbaʼ shi ka Perizhitə, mbaʼ shi ka Kanan, mbaʼ shi ka Hivi, mbaʼ shi ka Zhibwəzitəy, ta zanti mbəzli ti shi dzee. 24 Nanzə kiy, əntaa ghuy tsəfəku kwa kuma hiyalahi shi va ma, əntaa ghuy cəʼushi ma, əntaa ghuy məni shi ka ghəshiy məni tə hiɗi shi ma. Ə pə ghuy dzaa babaʼwanti shi ngati ghəshi va ka hiyalahi shi, mbaʼ ghuy ngangazlanti hərezli shi va gagariy ghəshi ka hiyalahi shi. 25 Kwa kumee Yən kutira yən Kwa sləkəpə Hiyala ghuy pə ghuy dzaa tsəfəku. Ghalaɓay ta təfətəŋwiy miy dzee, ta kumavə shi zəmə ghuy lə shi sa, ta ndəghuŋuy dzee va zəleghwer. 26 Ka dza miʼiy bəlaɗi ndərazhi tə hiɗi ghuyuw, ka dza jəŋahiy nza tiɓaw. Mbəzli tə hiɗi ghuyiy, ta zlay piy tsa shi dzee biti.
27 Favə ma mbəzli gaka ghuy mbə səəkə dzəti hiɗi shiy, ta dzanti her shi dzee. Ta səvəri mbəzli dza ghuy tsəhəŋuy tə hiɗi shi dzee. Ta tahanti ka mbəzə ghuy gwanashi dzee kwa kuma ghuy. 28 Ta ghunashi dimbəlizəhi dikə dikə ni dzee kwa kuma ghuy ta tahanti ka Hivi, lə ka Kanan mbaʼ ka Hit kwa kuma ghuy. 29 Ka dzee tahantishi kwa kuma ghuy tə piya kutiŋətaw. Mbaʼ pən tahantishi tsəghay, ta zhighəshi dza hiɗi va ka gamba. Ka shi mbə gamba dza na, ka yava ti shi ta gagaŋuy. 30 Jəw juw juw dzee ghərmə tihə ka mbəzə ghuy va. Paʼ ghala vəghu tsa dza ghuy yaŋuy ɗaŋ tə hiɗi va, ta nza ghəshi ka shi ghuy. 31 Ghalaɓa kiy, ghava na tə həl ghuvəl paʼ tə kufa dikə na va har məndiy Mediterane vəgha hiɗi ka Filisteŋ, zhini ka ghava tə gamba Shinay paʼ tə həl tsa dikə tsa va har məndiy Əfəratə dza ghala hiɗi ghuy nza. Sa nzanay, ta fambə mbəzli tə hiɗi va va dzee mbə dəvə ghuy, nza ghuy tahantishi. 32 Əntaa ghuy sla kiri ta jikəva li shi ta nza ka mbəzli kutiŋ ma. Əntaa ghuy dzar kwa hiyalahi shi ma. 33 Əntaa ghuy zlashi ghəshiy nziy tə hiɗi ghuy ma, nəghətaa ghəshi ngaɗambuŋy mbə məni kuma jikir na kaa ngəra, ka ghuy nighə na, ghuy tərəŋuəy dzəmbə tsəfəku kwa kuma hiyalahi shi va», kə Kwa sləkəpə ka Muyisə.