Hiyala slati kiri lə ka Izərayel
24
Ma kə Kwa sləkəpə kaa Muyisə diɓa na: «Səməə dzəmə dəlagwaa dzəvəghee ghuy lə kar Aruŋ mbaʼ Nadavə mbaʼ Avihu mbaʼ pəhepəhir mbərfəŋəmətsəkə mbə ka Izərayel. Nza ghuy tsəfəkuŋuy kwa kumee ghuy kərakəŋuy lə ya. 2 Ma gha gha Muyisəy, nza gha kətivaa dzəvəghee gha kutiŋa. Nəghətaa nihuti mbəzli va kətivaa dzəvəghee ma. Nəghətaa nihuti mbəzli gəmshi ni dzəmə dəlagwa kwasəbə ghuy ma,» kə Kwa sləkəpə. 3 Dza Muyisə ki, mbaʼ dzaa gəzanshi kuma gəzəkə Kwa sləkəpə va gwanata lə kuma pəhəti na va gwanata kaa ka Izərayel. Dzəghwa ghəshi gwanashi, miy kutiŋ ghəshi zləɓati kuma va. Ma kə ghəshi na: «Ya wa kuma gəzəkə kwa sləkəpiy, ta məni dza ghiy» kə ghəshi.4 Dza Muyisə ki mbaʼ tsasliti kuma gəzanakə Kwa sləkəpə va gwanata. Ma həzlimə pətə mekəshi na, dza na mbaʼ ngati pi ta ta Hiyala ta dəlagwa va. Dza na mbaʼ gariy hərezli məŋ lə bakə njasa nza takəhi ka Izərayel va. 5 Dza na mbaʼ ghunashi gula ka Izərayel ta slasla dəmbəkə nza ghəshi ndishi kaa Kwa sləkəpə. Ka ghəshi dza diɓa na, ka slasla kəɓəhi slay tə mbərkə zərkə tsa kwa jipə shi lə Kwa sləkəpə. 6 Dza Muyisə diɓa mbaʼ təhəvəri miymiy dəmbeker slaslanti məndi va bakə mbə. Mbaʼ shəkaghwa nahuti bəla kwa deghwer, ma nihuti niy tərə na, mbaʼ ɓaslatishi tə pi tsa ngati məndi va ta ndi shiy ti kaa Hiyala. 7 Dza na diɓa laŋ ɓəvə zliya sla kiriª, mbaʼ jangəti zlaŋ zlaŋ kwa kuma ka Izərayel. Ma kə ghəshi na: «Ya wa kuma gəzəkə Kwa sləkəpə gwanatay, ta məni dza ghiy, ta ɗi fəti dza ghiy ta kuma nzə» kə ghəshi. 8 Dzəghwa Muyisə ki mbaʼ ɓəvə miymiy kwa deghwer va məs məs məməsatishi tə ka Izərayel. Ma kə na: «Miymiy ni ci na sla kiri tsa slati Kwa sləkəpə lə ghuy, mbaʼ ndaŋuy kuma nzə pəhəti na gwanata,» kə.
9 Liy hum kuma va ki na, dza Muyisə mbaʼ dzay dzəmə dəlagwa lə kar Aruŋ, mbaʼ Nadavə, mbaʼ Avihu, mbaʼ mbəzli dikə dikə ni mbərfəŋəmətsəkə mbə ka Izərayel. 10 Dza ghəshi mbaʼ ghəshi nata Hiyala ka Izərayel. Pətsa ta shiɗəshiɗə nzə na, nja pi tsa tsəti məndi lə hərezli Safir, ka mbərə ɗewɗewɗew nja ghumə. 11 Məni kuma jikir na Hiyala kaa mbəzli dikə dikə ni va mbə ka Izərayeluw. A ghəshi niy nata Hiyala, mbaʼ ghəshi zəməhu shiy ka sahu shiy.
Muyisə kumay lə Hiyala mə dəlagwa
12 Ma kə Kwa sləkəpə kaa Muyisə na: «Səməə dzəmə dəlagwa dzəvəghee a gha nziyŋa tiɓa. Ta ɓəŋa hərezli ɓəleʼi ɓəleʼi ni tsaslatee kuma pəhətee lə kuma gəzəkee ta məni məndi ti shi dzee, nza gha ɓananshi kaa ka Izərayel,» kə. 13 Dza Muyisə mbaʼ kafiy ghəshi lə Zhuzəwe ntsa ta səɗa ci, ka dzay dzəmə dəlagwa Hiyala va. 14 Ma kə kaa mbəzli dikə dikə ni mbə ka Izərayel ghəciy kafə na: «Ndəghəŋəyim tikə paʼa va vəghu tsa dza ghiy zhəghəkəvaŋəy. Ava kar Aruŋ lə Hur tiɓa kwasəbə ghuy. Mbaʼ kə kuma dzaa səəti ndə gar nighə məndiy dzəkəniy, nza ghəci dza və shi,» kə. 15 Ma Muyisə mbə dzəmə dəlagwa va ki na, tisl timbətimbə kalay pi tsa məɓa. 16 Dza shəndəkə tsa Hiyala mbaʼ səkway dzəkən dəlagwa Shinay, vici kwaŋ timbətimbə va mənti war tsəgha. Ma tə kwa mbərfaŋa vici na, dza Kwa sləkəpə mbə jipə jipə timbətimbə va mbaʼ haray Muyisə. 17 Sa nighə ka Izərayel shəndəkə tsa Kwa sləkəpə na, nja ghu mbə ndi shiy ghəciy pəəzli mə ghən dəlagwa va. 18 Dza Muyisə mbaʼ dzay dzəmbə timbətimbə va, ka dzəmə dəlagwa va. Vici faɗəmətsəkə lə virɗi faɗəmətsəkə ghəci mənti məɓa.