Njasa dza məndiy la Gaska Kwa sləkəpə
(25-31)
Tsəhə shiy ta la Gaska Kwa sləkəpə
25
Ma kə Kwa sləkəpə kaa Muyisə ghəci mə dəlagwa va ki na: 2 «Mbala gəzanshi kaa ka Izərayel a ghəshi vəlira vəli. Ya va tsama ndiy, njasa nza vəshi ci pə ghuy dzaa ɓə vəli va və. 3 Avanashi shi dza ghəshiy vəli dza ghuy ɓəshi: Tsahi mbəzə shamshama ni, mbaʼ gəna, mbaʼ mbəzə ghəm na, 4 mbaʼ məgapa ghəwə na, mbaʼ sa ghəm na, mbaʼ na ngezhezhi na, mbaʼ məgapa leŋ kuɗəkuɗə na, mbaʼ shiti kwiy. 5 Mbaʼ hutahi gemimə ləvətim lə shi ghəm ni, mbaʼ hutahi ka bərci, lə shighu fə har məndiy Akasiya, 6 mbaʼ in tsaa tsə gərkuwa, mbaʼ shiy zən wəzə ta ta in tsaa vərə shi ghəra məndi sləni Hiyala li shi, ya ntsa təravə Hiyala ta sləni nzə, mbaʼ ta məni shiy zən nja urdi ta ndishi kaa Hiyala, 7 mbaʼ hərezli har məndiy unikəsə, mbaʼ nihuti hərezli tə dimə ta nahəshiy dzəti shi ka məndiy sərəə dzəghwa hati lə dzəti zlipa tə hati kubaŋ tsa kən ghən ndə ta Hiyala tsa dikə tsa, mbaʼ dzəti zlipa tə hati ci. 8 Ka ka Izərayel dzay, mbaʼ ghəshi məntəɗa pi nziy ta falɗa, ta nziyee mbə jipə shi. 9 War njasa dzee citəŋa pə ghuy dzaa mənti pi tsa va, tsəgha ya nimaɓa shi dza məndiy ghəra sləni li shi mbəɓa diɓa.Sərndəkə tsaa sla kiri
10 Ka ghuy dzay, mbaʼ ghuy ɗəʼwəti sərndəkə tə shighu akasiya. Bitə tsa ci dzati dzatiy, vəli dəvə bakə mbaʼ reta. Buŋ tsa ci na, vəli dəvə kutiŋ lə reta. bitə tsa ciy dzəta ghumə na, vəli dəvə kutiŋ lə reta. 11 Ka ghuy dzay, mbaʼ ghuy vəsay kwa hur ci lə tə hum ci lə mbəzə kwa shamshama kala kaɓə mbə. Zhini dəzlətsəɓə ghuy ghaslay dzar tə miy ci lə mbəzə kwa shamshama. 12 Sa ka ghuy dza diɓa na, mbaʼ ghuy vasati jaʼwahi faɗə tə mbəzə kwa shamshama dzar tə miy bəlahi ci faɗanashi, bakə tar nahuti bəla, bakə tar nahuti. 13 Ka ghuy dza diɓay, mbaʼ ghuy fəɗivə getesli akasiya bakə, nza ghuy vasakən mbəzə kwa shamshama kən shi. 14 Sa ka ghuy dza na, mbaʼ ghuy sərəghəshi dzar mbə jaʼwahi vəgha bəlahi sərndəkə tsa va va, ta mbə məndiy ɓə ti shi. 15 fambə ma ghuy getesli va dzar mbə jaʼwahi vay, mbəɓa pə ghuy dzaa zlashi, əntaa ghuy zhiniy tiɗishi səvəri ghula ma. 16 Sa kee ndaŋa hərezli ɓəleʼi ɓəleʼi ni va ndəgha fəti ta sla kiri kwa jipə ghummiy, kwa sərndəkə tsa va pə gha dzaa fiyshi
17 Sa ka ghuy dzay, mbaʼ ghuy vasəvə gal tsaa kəəli sərndəkə tsa va tə mbəzə kwa shamshama kala kaɓə mbə. Bitə tsa ciy, vəli dəvə bakə lə reta, bəŋw tsa ci na, vəli dəvə kutiŋ lə reta. 18 Ka ghuy dzay, mbaʼ ghuy vasəvə Sherubeŋhiª bakə tə mbəzə kwa shamshama, nza ghuy fatishi dzar tə bəlahi bakə tə miy gal tsa va. 19 Kutiŋ tə miy nahuti bəla, kutiŋ tə miy nahuti pə ghuy dzaa manati Sherubeŋhi va, nahə ghəshi ka shiy kutiŋ lə gal tsa miy sərndəkə tsa va, dzar tə miy bəlahi ci va bakə ni. 20 Ya tsama mbə sherubeŋhi vay, dza kwa tsahuti kə kuma ci dzaa nza. Ma nighə pi tsa shi na, kən gal tsa miy sərndəkə tsa va kə dzaa nza, mbaʼ ghəshi pəlakən bəkəbəkəhi shi ta ndəghu ci. 21 Sa ka gha dza kaa hərezli ɓəleʼi ɓəleʼi ni va va ndəgha fəti ta sla kiri dzee ta ɓəŋa na, mbaʼ gha faghwashi kwa sərndəkə tsa va, nza gha kalay lə gal tsa miy va. 22 Ava tiɓa tə gal tsa va, kwa jipə Sherubeŋhi bakə ni va kən sərndəkə tsa nza kuma pəhətee va kwa dzee kumə lə gha. Tiɓa dzee ta gəzəŋa kuma ɗee ka Izərayel məni gwanata.
Pətsa dza məndiy fə peŋ tsa vəli məndi kaa Hiyala ti
23 Sa ka ghuy dza diɓay, mbaʼ ghuy dəʼuti tabəl tə shighu akasiya. Bitə tsa tabəl tsa va dzati dzatiy, vəli dəvə bakə, bəŋw tsa ci na, vəli dəvə kutiŋ, bitə tsa ciy dzəta ghumə na, vəli dəvə lə reta. 24 Ka ghuy dza na mbaʼ ghuy vasakən tsahi mbəzə kama kaɓə mbə shi kən, dəzlətsəɓə ghuy ghasləti lə mbəzə kwa shamshama dzar tə miy tsa ci. 25 Ka ghuy dza diɓay, mbaʼ ghuy kəəsəti shəɗeshəɗer ci faɗanashi lə shighu, ɓəleʼi ɓəleʼi ni, nja dəvə bəŋw tsa shi. Nza ghuy ghasləti shighu va dəzlətsəɓə dzar tə miy tsa shi lə mbəzə kwa shamshama. 26 Ka ghuy dza diɓa na, mbaʼ ghuy vasəvə jaʼwahi faɗə tə mbəzə kwa shamshama, nza ghuy fafatishi dzar tə miy bəlahi ci faɗanashi, dzar vəgha shiɗəshiɗə ci va faɗanashi. 27 Ndəku vəgha pi tsa kəəsəti məndi va shəɗeshəder tabəl tsa va kə jaʼwahi vaa dzaa nza, ta i getesli dzar mbə shi, ta ɓə tabəl tsa va ti shi. 28 ka ghuy dzay, mbaʼ ghuy fəɗivə getesli akasiya bakə nza ghuy vasakən mbəzə kwa shamshama kən shi ta ɓə tabəl tsa va li shi. 29 Nza ghuy vasəvə kwekwer tehəteleʼi tehəteleʼi ni, mbaʼ shiy sa shiy, mbaʼ ghulpəhi, mbaʼ shiy ta shəkə tay tsa dza məndiy vəli kaa Hiyala kwa shi. Shi va gwanashiy, tə tsahi mbəzə shamshama kama kaɓə mbə shi pə ghuy dzaa məntishi. 30 Tə tabəl tsa va pə ghuy dzaa fə peŋ tsa vəlira ghuy vəli li. Ya humɓay, war lə peŋ kə dzaa nza tiɓa kwa kumee.
Shiy fə gərkuwahi
31 «Ka ghuy dza diɓay, mbaʼ ghuy vasəvə mbəzə kwa shamshama kala kaɓə mbə, nza ghuy pəsliti Shiy fə gərkuwahi ti shi. Səɗa shi va, mbaʼ divədivi ti shi, mbaʼ hupehuper ti shi, mbaʼ dəghesler shi, mbaʼ ghaslə tsa ti shi nja mbərə ghuy, jakə kə ghəshi dzaa nza ti ka shiy kutiŋ. 32 Dividivi kwaŋ kə dzaa nza tə na tə jipə va gəta. Dividivi mahəkanə tarkə, mahəkanə tarkə. 33 Ya tə nama dəvə mbə divədivi kwaŋ ni vay, mbaʼ ghuy manati hupehuper mahəkanə nja ya fə har məndiy amandə pa shi, lə dəghesler, mbaʼ shiy nja mbərə ghu ti shi. 34 Tə naa dzati va tə jipə gətay, nza ghuy manati hupehuper faɗə nja ya fə har məndiy Amandə, lə dəghesler mbaʼ shiy nja mbərə ghu ti shi. 35 Manati tə ghuy dəghəslə tə pi tsa jakəva divədivi bakə bakə ni va mahəkanə niy dzəti na tə jipə va gəta. 36 Dəghesler va lə divədivi vay, shiy kutiŋ kə ghəshi dzaa nza lə nihuti bəlahi tə shiy fə gərkuwa va. Gwanashi tsa shi vay, tə mbəzə kwa shamshama kala kaɓə mbə pə ghuy dzaa pəslitishi. 37 Ka ghuy dzay, nza ghuy mənti gərkuwahi mbərfəŋ. Nza ghuy fatishi tə shiy fə gərkuwahi mbaʼ ghuy tsəʼwati ghu ti shi ta mbə pi tsa kwa kuma shi nza waŋə. 38 Nza ghuy mənti shiy hasli məgapa gərkuwa, mbaʼ kwakwa tsaa kaʼwə pəsər tsa va tə tsahi mbəzə kama kaɓə mbə shi. 39 Mbəzə kwa shamshama kama kaɓə mbə kiluw mahəkanəmətsəkə kə shəndəkə tsa shiy fə gərkuwahi va lə shi ti dzaa nza. 40 Muyisə, gha dəʼu ghən tsa gha dza naa nighəə dzəkən sləni va. War njasa citəŋee tsa tikə mə dəlagwa pə gha dzaa mənti,» kə Kwa sləkəpə.