Pətsa dza Hyalaa nza ti
26
Ma kə Kwa sləkəpə diɓa na: «Ta məni pi tsa dzee nziy tiy, nza mbəzliy tsa məgapa tsati gwadəhi məŋ lə ghur məgapa leŋ ka bərci jakə lə ni ghəwə ni, mbaʼ ni ghəm ni, mba ni ngezhezhi ni. Ka ghəshi dzay, mbaʼ ghəshi ghaslətishi lə sherubeŋhiª. 2 Gwanashi tsa gwadəhi vay, yim yimshi kə ghəshi dzaa nza. Bitə tsa shiy, mbərfəŋ tə basa, bəŋw tsa shi na kutiŋ tə basa. 3 Ka gha dzay, mbaʼ gha jakəti gwadəhi cifə. Zhini tsəgha gha jakəti ni cifə ni va tərə diɓa. 4 Ka gha dzay, mbaʼ gha manati ghur məgapa ghəwə ni dzar tə miy kwa cafa kwa taŋa gwadə mbə gwadəhi jakə jakə ni va. Tsəgha gha mənti lə kwa taŋa gwadə tsa kwa baka gwadəhi jakə jakə ni va diɓa. 5 Nza gha caslati ghur məgapahi cifəmətsəkə dzar tə miy nahuti bəla kwa taŋa gwadəhi dza gha vaa jakəti cifə ni, zhini tsəgha dzar tə miy nahuti bəla kwa baka gwadəhi va diɓa. Ngula kutiŋ na kə dzaa nza kwa jipə ghur tə gwadəhi va va bakanashi. 6 Ka gha dza diɓay, mbaʼ gha vasəvə shiy kəlaʼu shiy cifəmətsəkə tə mbəzə kwa shamshama ta jakəti gwadəhi bakə ni va. Ghalaɓa kiy, nza gaska kən pi tsa dzee vaa nza mbə nza ka pi kutiŋ.7 Ka gha dza diɓay, mbaʼ gha tsati gwadəhi məŋ lə tan tə shiti kwiy, ta plishi dzəkən pi tsa dzee vaa nza mbə. 8 Basa mbərfəŋ mbaʼ bazli kutiŋ kə bitə tsa gwadə kutiŋ dzaa nza. Bəŋw tsa ci na, basa kutiŋ. Gwadəhi məŋ lə tan ni vay, yimyim pə gha dzaa tsatishi gwanashi. 9 Ka gha dzay, mbaʼ gha jakəti nihuti gwadəhi va cifə, ma nihuti na, kwaŋ gha jakətishi, nza kwa kwaŋa tsa va pliva dzəghwa kwa miy gaska gamtaʼwal va. 10 Ka gha dza diɓay, mbaʼ gha manati ghur cifəmətsəkə dzar ta mətsəni tsaa kəray va mbə kwa taŋa gwadəhi jakə jakə ni va, zhini cifəmətsəkə gha manatishi dzar tə mətsəni tsaa kəray va mbə nihuti va. 11 Nza gha vasəvə shiy kəlaʼu shiy tə mbəzə ghəm na cifəmətsəkə, nza gha kəlaʼu ghur va li shi ta jakə gwadəhi va. Ta mbə gaska gamtaʼwal vaa nza ka shiy kutiŋ. 12 Gwadəhi vay, taŋə dzəghwa kən gaska gamtaʼwal va kə ghəshi dzaa nza. Reta bəla shi kə dzaa pəliva dzəghwa liy hum, gaska kən pi tsa dzee vaa nza mbə. 13 Ma dza kwa na bitə na bəla shiy, paʼa ta vəli dəvə kə bəla gwadəhi va dzaa tərə ka pəliva dzəghwakən gaska kən pi tsa dzee va nza ti. Ta mbə shiy nza kən pi tsa dzee vaa nza ti wəzə wəzə. 14 Ka gha dza diɓay, mbaʼ gha jakəti hutahi gemimə ləvətim lə shi ghəm ni ta pəlishiy dzəkən gaska kən pi tsa va, zhin kaa nihuti hutahi ka bərci kən niva diɓa.
15 Nza gha jakəti shighu Akasiyaa, mbaʼ gha fiyshi məgarə məgarə ta ɓanci bərci kaa pi tsa dzee vaa nza ti. 16 Shighu jakə jakə ni va kutiŋiy, basa bakə mbaʼ bazli kutiŋ kə bitə tsa shi dzaa nza dzar dzar. Bəŋw tsa shi dzəmə dzəmə na, vəli dəvə kutiŋ mbaʼ reta. 17 Shighu məgarə vay, kəəsətishi tə gha lə nihuti shəghu bakə, mbaʼ tsahuti pərikə, mbaʼ tsahuti pərikə. Tsəgha pə gha dzaa jajakəti shighu ɓə bərci va kaa gaska kən pi tsa dza Kwa sləkəpə vaa nza ti gwanashi. 18 Shighu jakə jakə ni vay, bakəmətsəkə pə gha dzaa fəfiyshi dza kwa naa dzəghwa həci bəla gaska va. 19 Mbaʼ gha vasəvə shiy faɗəmətsəkə tə tsahi gəna ta sərəshiy dzəti miy shighu. Bakə bakə bakə ta dzati miy shighu bakə ni va kəsəti ni məgarə va shighu bakəmətsəkə ni. Tsəgha tsəgha ti shi gwanashi. 20 Dza kwa nahuti bəla pi tsa va njasaa dzati muwiy, bakəmətsəkə pə gha dzaa fiy shighu jakə jakə ni va, 21 mbaʼ gha mənti shiy sərəə dzati miy shighu faɗəmətsəkə tə tsahi gəna. Ya nima shighu jakə jakə ni na, shiy bakə ta sərəə dzati miy shəghu. Tsəgha tsəgha ti shi gwanashi. 22 Dza kwa na liy hum bəla pi tsa va, dza kwa mərkwiy, shighu jakə jakə ni kwaŋ pə gha dzaa fiy. 23 Ka gha dza diɓay, mbaʼ gha mənti nihuti shighu jakə jakə ni bakə, nza gha zhiniy fiyshi liy hum gaska va, ta nza ghəshi ka shəlhi. 24 Shighu bakə ni vay, lə ngula kə dzaa nza kwa jipə shi takə takə, ma məkə tə ghən na, nza ghəshi jikəshi kwa tsahi nja jaʼwa. Tsəgha pə gha dzaa jakəti shighu va bakanashi nza ghəshi nza ka shəlhiy jihəti gaska va. 25 Ghalaɓa kiy, dəghəsə dza shighu jakə jakə ni vaa nza, məŋ lə kwaŋ shi məntim va tə tsahi gəna ta sərəshiy dzati miy shighu. Bakə bakə bakə ta shighu jakə jakə ni va.
26 Sa ka gha dza diɓay, mbaʼ gha fəɗivə shighu Akasiya cifə, nza gha zlaŋələghəshi dzar mbə shighu jakə jakə ni va, dza kwa kwa taŋa bəla pi tsa va. 27 Tar kwa baka bəla pi tsa va na, zlaŋəlihi cifə, zhini cifə tar na liy hum bəla dza kwa mərkwi. 28 Tsəm tsaa dzaa nza dzar tə jipə shighu vay, dzar mbə jipə shighu jakə jakə ni va kə dzaa nza, kafə na pəri nahuti bəla gaska va paʼa pəri nahuti bəla. 29 Ka gha dzay, mbaʼ gha vasakən mbəzə kwa shamshama kən shighu jakə jakə ni va lə kən zlaŋəlihi va. Nza gha mənti jaʼwahi tə mbəzə kwa shamshama ta i zlaŋəlihi va dzar mbə shi. 30 Muyisə, war njasa citəŋee tsa tikə mə dəlagwa na pə gha dzaa mənti pi tsa dzee vaa nza mbə.
31 Ka gha dzay, mbaʼ gha tsati gwadə ta kəla pi lə ghur leŋ ka bərci jakə lə ghur məgapa ghəwə ni, mbaʼ ni ghəm ni, mbaʼ ni ngezhezhi ni. Ghaslə gha ghaslətishi lə sherubeŋhi. 32 Nza gha fəɗivə shighu Akasiya faɗə ta sərə gwadə tsa vaa dzəti shi, mbaʼ gha vasakən mbəzə kwa shamshama kən shi. Mən kaa shiy kəlaʼu shiy ti shi lə mbəzə kwa shamshama. Mbaʼ gha vasəti shiy faɗə tə tsahi gəna ta fə shiɗəshiɗə shighu vaa dzəghwashi. 33 Dzəti shiy kəlaʼu shiy va pə gha dzaa sərə gwadə tsa va.
Liy hum gwadə tsa va ki na, nza gha fiy sərndəkə tsa nza hərezli ɓəleʼi ɓəleʼi ni va ndəgha fəti ta sla kiri kwa. Gwadə tsa va dza naa təhəvəriŋwiy pi tsa ɗewɗew tsa lə pi tsaa gura ɗewɗew. 34 Ka gha dza na, mbaʼ gha famiy gal miy sərndəkə sla kiri tsa va, mbə pi tsaa gura ɗewɗew va. 35 Ka gha dza diɓa na, mbaʼ gha fiy tabəl kwa kuma gwadə tsa va dza kwa bəlaa dzati muw, mbaʼ gha fiy shiy fə gərkuwahi kwa kuma tabəl tsa va dza kwa bəlaa dzəghwa həci.
36 Ka gha dza diɓay, mbaʼ gha tsati gwadə ta kəla pi tsaa dzəmbə gaska gamtaʼwal va lə ghur leŋ ka bərci, mbaʼ ni ghəwə ni, mbaʼ ni ghəm ni, mbaʼ ni ngezhezhi. 37 Ka gha dza diɓa na, mbaʼ gha fəɗivə shighu akasiya cifə ta kəlaʼu gwadə tsa vaa dzəti shi. Nza gha vasakən mbəzə kwa shamshama kən shighu va, mbaʼ gha manati shiy kəlaʼu shiy dzəti shi lə mbəzə kwa shamshama. Ka gha dza ki na mbaʼ gha vasəvə shiy cifə tə tsahi ghəm ni ta sərəshiy dzati shighu va,» kə.