Pətsaa ta Hiyala
27
Ma kə Kwa sləkəpə kaa Muyisə diɓa na: «Sa ka gha dza diɓay, mbaʼ gha dəʼuti pi tsaa tara yən Kwa sləkəpə tə shighu akasiya. Yimyim kə bəlahi ci faɗanashi dzaa nza. Kutiŋ tə basa mbaʼ vəli dəvə kutiŋ kə bitə tsa ci dzaa nza dzati dzati, tsəgha bəŋw tsa ci diɓa. Bitə tsa ciy dzəta ghumə na, bazli kutiŋ mbaʼ vəli dəvə kutiŋ. 2 Ka gha dza diɓa na, mbaʼ gha manati shiy nja təlimim tə miy bəlahi faɗə ni va məkə məkə tə ghən, nza gha vasakən mbəzə ghəm na kən shi. Shi vay, yim ka shiy kutiŋ kə ghəshi dzaa nza lə pi tsaa sla shiy tsa va 3 Ka gha dza diɓa na, mbaʼ gha vasəti kwekwer ta pa pəsər tə pi tsa va, mbaʼ shiy həlɓə shiy tə pi tsa va, mbaʼ hupehuperiy məsə miymiy, mbaʼ shiy i sliw, mbaʼ shiy ndi urdi ti shi. Shi va gwanashiy, tə mbəzə ghəm na ka gha vasətishi. 4 Ka gha dza diɓa na, mbaʼ gha tsavəgha shiy nja zləku tə mbəzə ghəm na vəgha pi tsa va, nza gha vasati jaʼwahi məntim tə mbəzə ghəm na dzar tə miy bəlahi shi va faɗanashi. 5 Shi nja zləku ni vay, takə takə pə gha dzaa fəshi, Kafə tə mətsəni pi tsa va paʼa mbə jipə. 6 Ka gha dza ki na, mbaʼ gha fəɗivə getesli tə shighu akasiya, ta ɓə pi tsaa ta Hiyala va, nza gha vasakən mbəzə ghəm na kən shi, 7 nza gha ighə getesli va dzar mbə jaʼwahi va, dzar vəgha slərpəhi pi tsaa slasla shiy tsa va, ta ɓə ti shi. 8 Pətsa vay, lə shighu pə gha dzaa dəʼuti. Lə hur kə dzaa nza mbə. War njasa citəŋee tsa tikə mə dəlagwa pə gha dzaa mənti,» kə.Ngulaa dəzlay gaska nza Kwa sləkəpə mbə.
9 Ma kə Kwa sləkəpə diɓa na: «Ka gha dza diɓay, mbaʼ gha sliy ngula dəzlətsəɓə dzar vəgha gaska nza Kwa sləkəpə va mbə. Lə ghur məgapa leŋ ka bərci pə gha dzaa tsati shiy fə ghala ngula va. Dza kwa bəlaa dzəghwa həciy, basa bakəmətsəkə cifəti kə bitə tsa shi va dzaa nza. 10 Ka gha dza diɓa na, mbaʼ gha ləliy shəlhi bakəmətsəkə ta nza shi dza gha vaa tsati dzar vəgha shi, nza gha səsərəghə shiy dzati shiɗəshiɗə shi. Tə mbəzə ghəm na kə shəlhi va dzaa nza lə shi lati shiɗəshiɗə shi va gwaʼa. Ka gha dzay, nza gha mənti shiy jakə shəlhi va lə shiy kəlaʼu shiy ti shi tə tsahi gəna, ta kəlaʼu shi tsatsa ni va dzar ti shi. 11 Dza kwa bəlaa dzati kwa muw diɓay, war tsəgha kə bitə tsa shi va dzaa nza, tsəgha shəlhi va, tsəgha shiy kəlaʼu shiy va lə shiy jakə shəlhi va, zhini tə gha shi məntishi məndi li shi diɓa. 12 Dza kwa bəla nza ngula va dəkwə, dza kwa mərkwiy, basa məŋ lə bakə mbaʼ bazli kutiŋ kə bitə tsa shi dza gha vaa tsati dzaa nza. Shəlhi məŋ pə gha dzaa lati, mbaʼ gha səsərəghə shiy dzati shiɗəshiɗə shi. 13 Dza kwa nahuti bəla dəkwə na, dza kwa ghumə, kwa miy pi tsa dza məndiy dzəghway, basa məŋ lə bakə mbaʼ bazli kutiŋ kə bitə tsa ngula va dzaa nza. 14 Ka gha dza tar nahuti bəla kwa miy pi tsa vay, mbaʼ gha slavə pi, nza gha hati lə shi tsatsa ni va, bazli mbərfəŋ mbaʼ vəli dəvə kutiŋ, mbaʼ gha liy shəlhi mahəkanə mbaʼ shiy sərəə dzati shiɗəshiɗə shi mahəkanə 15 Tar nahuti bəla na, tsəgha gha slavə pi, mbaʼ gha hati lə shi tsatsa ni va, bazli mbərfəŋ mbaʼ vəli dəvə kutiŋ, nza gha liy shəlhi mahəkanə mbaʼ shiy sərəə dzati shiɗəshiɗə shi mahəkanə diɓa. 16 Ka gha dzay, mbaʼ gha kəlati miy pi tsaa dzəghwa ngula va lə gwadə. Bitə tsa gwadə tsa vay, basa cifə. Tə ghur leŋ ka bərci, mbaʼ ni ghəwə ni, mbaʼ ni ghəm ni, mbaʼ ni ngezhezhi ni kə ka tsa shiy dzaa tsati gwadə tsa va. ka gha dzay, mbaʼ gha sərati tə shəlhi faɗə, mbaʼ gha sərəghə shiy dzati shiɗəshiɗə shi faɗanashi. 17 Shəlhiy hay ngula va gwanashiy, tə tsahi gəna pə gha dzaa mənti shiy jakəshi lə shiy kəlaʼu shiy ti shiy. Ma shiy sərəə dzati shiɗəshiɗə shəlhi va na tə tsahi ghəm ni. 18 Dza kwa bəla dza ngula vaa nza bitəy, basa bakəmətsəkə cifəti kə dzaa nza. Dza kwa na dəkwə na bəla na, basa məŋ lə bakə mbaʼ bazli kutiŋ. Məgapa dza məndi vaa tsati ta dəzli ngula vay, basa kutiŋ mbaʼ vəli kutiŋ kə bəŋw tsa nzə dzaa nza. Shi dza shiɗəshiɗə shəlhiy nza kwa shi na, tə mbəzə ghəm na ka gha məntishi. 19 Ya nima shi dza məndiy ghəra sləni li shi mbə pi tsa va, lə shi dza məndiy laa dzəghwa hiɗi ta ha pi tsa va, lə ni la məndi ta ha ngula va gwaʼay, tə mbəzə ghəm na pə gha dzaa məntishi,» kə.
In tsaa shikəə dzəghwa gərkuwahi
20 Ma kə Kwa sləkəpə kaa Muyisə diɓa na: «Ka gha dza diɓay Muyisəy, mbaʼ gha gəzanshi kaa ka Izərayel nza ghəshi ɓəɓəkəŋa ghən in tsa tati məndi tə ya fə har məndiy ulivə ta tsə gərkuwa, ta mbə gərkuwahi vaa mbərə virəvirə. 21 Ka kar Aruŋ lə ndərazhi ci dzay, mbaʼ ghəshi fiy shiy fə gərkuwahi mbə gaska gamtaʼwaləə kumə lə Kwa sləkəpə kwa kuma gwadə tsaa kəlati sərndəkə tsa nza hərezli ɓəleʼi ɓəleʼi ni va ndəgha fəti ta sla kiri kwa. Kafə na hetihwer paʼa tə kəɗi piy, lə ghu kə dzaa nza tə gərkuwahi va kwa kumee yən Kwa sləkəpə. kumaa pəhəta ta nuw ka Izərayel kə sava dzaa nza paʼa tar jijihi shi,» kə.