Kwəbeŋer ka ta Hiyala
28
Zhini ma kə Kwa sləkəpə kaa Muyisə diɓa na: «Ka gha dzay Muyisəy, nza gha tərakəvəri kar Aruŋ lə ndərazhi ci: Nadavə mbaʼ Avihu, mbaʼ Eliyazar, mbaʼ Itamar mbə ka Izərayel gwanashi ni. Nza ghəshi nza vəgha gha ta ghəraɗa sləni ka ta Hiyala ghəshi. 2 Ka gha dzay, nza gha tsanati kubeŋer ka ta Hiyala kaa zəməŋa Aruŋ. Ta ci dimə ti, lə shəndəkə tsa ci. 3 Nza gha gəzanshi kaa mbəzli ɓanavəshee sənata kuma lə məcaŋa gwanashi nza ghəshi tsanati kubeŋer. Ta nza ghəci ka ntsa pəərəti məndi ta ghəraɗa sləni ndə ta Hiyala. 4 Avanashi kubeŋer dza ghəshiy tsa: zlipa ta fəə dzəghwa hati, mbaʼ shiy sərəə dzəghwa hati, mbaʼ kubaŋ tsa bitə tsa, mbaʼ tsahuti kubaŋ tsa bitə tsa, tsatsa lə shi ghaslə kwa hati ci, mbaʼ məgapaa pərə ghən, mbaʼ məgapaa pəhə dzar mbə hur. Ghəshi na kubeŋer dza ghəshiy məni kaa kar zəməŋa Aruŋ lə ndərazhi ci, ta pashi dzəkən ghən tsa shi ta ghəraɗa sləni. 5 Tə mbəzə kwa shamshama, mbaʼ ghur leŋ, mbaʼ ghur məgapa ghəwə ni, mbaʼ ni ghəm ni, mbaʼ ni ngezhezhi ni, kə ka tsa shiy dzaa tsa kubeŋer va.Shi kwa hati ndə ta Hiyala
6 Ka ka tsa shiy va dzay, mbaʼ ghəshi tsati shiy ta sərəshi dzəghwa hati ndə ta Hiyala lə ghur məgapa ghəwə ni, mbaʼ ni ghəm ni, mbaʼ ni ngezhezhi ni, mbaʼ ghur leŋ ka bərci. Nza ghəshi ghaslətishi lə mbəzə kwa shamshama. 7 Nza ghəshi caslati ghur bakə dzar tə miy tsa shi ta pəhəshi li shi. 8 Ghur tə shi kwa hati vay, shi kutiŋ ni kə ghəshi dzaa nza lə shi va. Tə mbəzə kwa shamshama, mbaʼ ghur məgapa ghəwə ni, mbaʼ ni ghəm ni, mbaʼ ni ngezhezhi ni, mbaʼ ghur leŋ ka bərci. 9 Ka gha dza diɓay, mbaʼ gha ɓəvə hərezli tə dimə har məndiy unikəsə bakə, nza gha tsaslati sləneɗemer ndərazhi Izərayel va ti shi. 10 Sləneɗemer kwaŋ tə kwa taŋa haku, ni kwaŋ ni tərə na tə kwa baka haku. Tə dikə tə dikə yakə ka gha tsasli sləneɗemer va. 11 Njasa ka məndi vaa tsasli shiy dzəti jaʼwa pə gha dzaa tsaslati sləneɗemer vaa dzəti hərezli bakə ni va. Ka gha dzay, mbaʼ gha faghwashi kwa mbəzə kwa shamshama bakə. 12 Dzəti ghur bakə ni va tə shi kwa hati va pə gha dzaa caslati hərezli bakə ni va, ta zəzəə dzəkən takəhi ka Izərayel va məŋ lə bakə ni. Ghala vəghu tsa dza Aruŋ nza kwa kumee lə sləneɗemer va tə bazli ci tə pi tsa dzee nzay, ta zəzə dzee dzəkən ghuy yən Kwa sləkəpə. 13 Shi dza shi bakə ni vaa nza kwa shiy, tə mbəzə kwa shamshama pə gha dzaa məntishi. 14 Nza gha manati mekərshi nja zəʼwə mbərə mbərə na bakə tə mbəzə kwa shamshama kama kaɓə mbə tə shi bakə ni va nza hərezli kwa shi.
Zlipa ndə ta Hiyala tsa dikə tsa
15 Ka gha dza diɓay, mbaʼ gha gəzanci kaa ntsa nza məcaŋa və ta tsa shiy, nza ghəci tsati zlipa kwa hati ta sla nguvə. Njasa tsati məndi va shi kwa hati kə dzaa tsati. Tə mbəzə shamshama na, mbaʼ ghur ghəwə ni, mbaʼ ni ghəm ni, mbaʼ ni ngezhezhi ni, mbaʼ ghur leŋ ka bərci. 16 Yimyim kə bəlahi zlipa va dzaa nza faɗanashi, bəlakə dəvə kutiŋ bitə tsa nzə, tsəgha bəŋw tsa nzə. 17 Ghasləti tə ghuy lə hərezli ka dimə zərə faɗə. Tə kwa taŋa zərəy, haku Sardəwanə, mbaʼ haku twəpazə, mbaʼ haku emerudə. 18 Tə kwa baka zərə na, haku eskarbukəl, mbaʼ haku lazulitə, mbaʼ haku zhasəpə. 19 Tə kwa mahəkana zərə na, haku agatə, mbaʼ haku kurnalinə, mbaʼ haku ametistə, 20 Tə kwa faɗa zərə ki na, haku kirizulitə, mbaʼ haku berilə, mbaʼ haku unikəsə. Ya tsama hakwiy, kwa mbəzə kwa shamshama kə dzaa nza. 21 Ya tə tsama hakwiy, tsaslati tə gha slən tsa zəghu Izərayel kutiŋ njasa ka məndi vaa mənti jaʼwa. Hərezli məŋ lə bakə ni vay, ka məjəʼa takəhi ka Izərayel va məŋ lə bakə ni niy nza ghəshi.
22 Ka gha dzay, mbaʼ gha tsati mekərshi tə mbəzə kwa shamshama kama kaɓə mbə tə zlipa kwa hati va. 23 Ka gha dza diɓa na, mbaʼ gha vasəvə jaʼwahi bakə tə mbəzə kwa shamshama, nza gha caslatishi dzar tə miy zlipa va. Kutiŋ tarkə, kutiŋ tarkə. 24 Ka gha dza diɓa na, mbaʼ gha fambə mekərshihi mbəzə kwa shamshama va bakə ni dzar mbə jaʼwahi bakə ni va dzar tə miy zlipa kwa hati va. 25 Zhini ka gha dza diɓa na, mbaʼ gha fati nihuti miyhi mekərshihi bakə ni va dzəti shiy hasli shiy bakə ni va tə ghur shi kwa hati va dza kwa kuma. 26 Ka gha dzay, mbaʼ gha vasəvə jaʼwahi bakə tə mbəzə kwa shamshama. Nza gha fatishi tə zlipa va takə takə, mbəɓa mbəɓa mbəɓa mbəɓa, dza kwa naa dapə shi kwa hati va bəla. 27 Ka gha dza diɓa na, mbaʼ gha vasəvə jaʼwahi bakə tə mbəzə kwa shamshama, nza gha fatishi tə ghur bakə ni va tə shi kwa hati va. takə takə, kwa kuma, ndəku vəgha pi tsa cislishi məndi va, məkə tə ghən məgapaa pəhə shi kwa hati va. 28 Jakay tə gha jaʼwahi tə zlipa va lə ni tə shi kwa hati va lə ghur ghəwə ni, ta mbə zlipa vaa nza məkə tə ghən ghur shi kwa hati va nəghətaa ghənzə təhəva lə shi kwa hati va.
29 Sa ka Aruŋ dzəmbə gaska gamtaʼwal dzee vaa nza mbiy, lə slən tsa ndərazhi Izərayel dza naa nza tə zlipa kwa sla nguvə kwa hati ci va. Ghalaɓa kiy, ya paʼa humɓa na, ta zəzə dzee dzəkən ghuy yən Kwa sləkəpə. 30 Ka gha dzay Muyisəy, mbaʼ gha faghwa hərezli ʼwərim lə tumimª kwa zlipa kwa sla nguvə va. Ya humɓa dza Aruŋ dzəghwa kuma yay, kwa zlipa kwa hati ci kə hərezli va dzaa nza ta mbə ghəciy sənata kuma ɗee ka Izərayel məni.
Nihuti kubeŋer ka ta Hiyala
31 Kubaŋ tsa dikə tsa dza məndiy pa shi kwa hati vaa dzəkəniy, ghəwəy kə dzaa nza gwanay. 32 Tə jipə kubaŋ tsa va kə wəri dzaa nza. Tsati tə ndə tsa shiy shiy dzar ta wəri tsa va ta mbəə ɓanci bərci, va sləkwə ghəci. 33 Ka gha dzay, mbaʼ gha ghasləti kubaŋ tsa va dzar ta mətsəni ci lə shiy nja ya fə grənadə. lə ghur ghəwə ni, mbaʼ ni ghəmə ni, mbaʼ ni ngezhezhi ni pə gha dzaa tsati shi va. Zhini mbaʼ gha cacaslaghwa kureŋahi mbəzə kwa shamshama dəzlətsəɓə dzar kwa jipə shi va. 34 Kutiŋ shi nja ya grənadə ni va, kutiŋ kureŋa, kutiŋ shi nja ya grənadə ni va, kutiŋ kureŋa pə gha dzaa cicislitishi dzar ta mətsəni kubaŋ tsa va gwanay. 35 Kubaŋ tsa va dza Aruŋ paa dzəkən ghən tsa ci sa ka na dza ta ghəra sləni ndə ta Hiyala. Sa ka na dzəmbə gaska gamtaʼwal dzee vaa nza mbə ta dzəghwa kumee lə ghəciy səvəriy, ta favə gaka kureŋa va dza məndi. Ghalaɓa kiy, ka dza naa mətiw.
36 Ka gha dzay, nza gha mənti shiy ghaslə nja mbərə ghu fə tə mbəzə kwa shamshama kama kaɓə mbə. Nza gha tsaslati kuma tə shi va njasa ka məndi vaa tsasli shiy dzəti jaʼwa: «Ntsa fiy məndi vəgha bəla kaa Kwa sləkəpə» pə gha dzaa ni ti shi. 37 Nza gha caslati shi ghaslə vaa dzəti məgapaa pəərə ghən lə ghur məgapa ghəwə ni. Tə kuma ka gha caslatishi. 38 Shi vay, war kwa dəghaŋ kuma Aruŋ kə ghəshi dzaa nza ghəciy dzəghwa kumee yən Kwa sləkəpə. Tə mbərkə shi vay, ta zləɓa shi dza ka Izərayel fə tar bəla ta vəlishi kaa ngəra dzee ya aa mənti ghəshi kuma gəm gəm na geʼi lə vəghu tsa ɓərashi ghəshiy səəkə.
39 Kaa Aruŋuy, nza ndə tsa shiy tsati kubaŋ lə leŋ, mbaʼ shiy pəərə ghən tə leŋ, mbaʼ məgapa tsatsa na lə ghaslə ti ta pəhə dzəvəri mbə hur.
40 Kaa ndərazhi Aruŋ na, nza gha tsanatishi kubeŋer dikə dikə ni, mbaʼ məgapahiy pəhə dzəvəriy mbə hur, mbaʼ daghubahi ta ci dikə tsa shi lə shəndəkə tsa shi.
41 Gha gha Muyisə dəʼu ghən tsa gha kə dzaa panakənshi kubeŋer va kaa kar zəməŋa Aruŋ lə ndərazhi ci. Nza gha shikambə in mbə ghən tsa shi, nza gha fambə slənee mbə dəvə shi, nza ghəshi nza ka ka ghəraɗa sləni ka ta Hiyala. 42 Ka gha dzay, mbaʼ gha tsanatishi kempi ta mbəku mətsəni shi lə ghur leŋ. Bitə tsa shiy, kafə na mbə mətsəni paʼa mbə ghula kə dzaa nza. 43 Nza kar Aruŋ lə ndərazhi ci pashi ghəshiy dzəmbə gaska gamtaʼwaləə kumə lə ya, ya ghəshiy dzəvəgha pi tsaa tara ta ghəra sləni tə pi tsa ɗewɗew tsa va. Ghalaɓa kiy, ka dza ghəshiy bəku tə mbərkə sa nza ghəshi hasəhasəshiw. Ya paʼa humɓay, tsəgha dza kar Aruŋ məni lə takə tsa ci paʼa kwa ndimndim,» kə Kwa sləkəpə.