Səvəri 29

Njasa dza ndəə məniy ka ndə ta Hiyala

Ma kə Kwa sləkəpə kaa Muyisə diɓa na: «Avanay njasa dza ghaa məni ta nza kar Aruŋ lə ndərazhi ci ka ka ta Hiyala, ta ghəraɗa sləni: Ka gha dzay, mbaʼ gha təravə kəɓə məcar, mbaʼ gemimə bakə kala kuma tar shi. 2 Mbaʼ ghupə alkamari, mbaʼ gha tati peŋ tsa kama is mbə, mbaʼ gatwə tsa hwaɗitim lə in, kala is mbə, mbaʼ galetəhi kama is mbə shi, mbaʼ məndi vərətishi lə in. 3 Nza gha faghwa shi va kwa gatakar, nza gha vəlira vəli li shi kwasəbə kar kəɓə va lə gemimə va. 4 Ka gha dza na, mbaʼ gha pəməghə kar Aruŋ lə ndərazhi ciy dzəmiy gaska gamtaʼwaləə kumə lə ya yən Kwa sləkəpə, nza gha pishishi lə yam. 5 Sa ka gha dza kaa Aruŋ na ci ki na, nza gha panakən kwəɓeŋer ndə ta Hiyala: Kubaŋ tsa bitə tsa, mbaʼ tsahuti kubaŋ tsa bitə tsa, mbaʼ shi kwa hati, mbaʼ zlipa tə hati. Nza gha ngəzləɓati ghur tə shi kwa hati va, 6 mbaʼ gha paranati ghən tsa ci lə məgapa pəərə ghən, nza gha fati shi ghaslə dza məndi vaa sənay ntsa fiy məndi vəgha bəla kaa Kwa sləkəpə na kə məndi tə məgapa va. 7 Ka gha dza ki na, mbaʼ gha ɓəvə in tsaa shəkəə dzəkən ntsa təravə Kwa sləkəpə ta sləni nzə, nza gha shəkambə mbə ghən tsa ci ta ɓanci sləni. 8 Ma liy hum ki na, nza gha harashi ndərazhi ci a ghəshi kətivaa dzəvəgha gha. Nza gha panakənshi kubeŋer shi va bitə bitə ni. 9 Ka gha dza diɓa na, mbaʼ gha pahanambəshi məgapahi shi mbə hur shi, kaa kar Aruŋ lə ndərazhi ci, nza gha fanambəshi daghubahi shi mbə ghən shi. Mənti ma gha tsəghay, ka ta Hiyala dza ghəshiy nza. Ghəshi dza naa nza ka ka ta Hiyala. kumaa pəhəta ta nuw ghuy ya paʼ humɓa kə dzaa nza.

Avanay njasa dza ghaa ci fə tsa fambə gha kar Aruŋ lə ndərazhi ci mbə sləni ka ta Hiyala: 10 Ka gha dzay, mbaʼ gha kəsəkə kəɓə məcar tsa vaa dzəmiy gaska gamtaʼwaləə kumə lə ya yən Kwa sləkəpə, nza kar Aruŋ lə ndərazhi ci fakən dəvə kən ghən ci. 11 Nza gha slanti kwa kuma Kwa sləkəpə, kwa miy gaska gamtaʼwal va. 12 Nza gha kaʼuvə miymiy məcar tsa va, mbaʼ gha yəkuvəshi lə zəghu dəvə gha kutiŋ, nza gha sasaɗatishi tə shi nja təlimim ni va dzar tə miy bəlahi faɗə ni va tə pi tsaa ta Hiyala. Niy dzaa tərə miymiyiy, nza gha shəkətishi ta səɗa pi tsaa ta Hiyala tsa va. 13 Sa ka gha dza diɓay, laŋ gha ɓəvə gəkə kən her va gwanata, mbaʼ na kən məni, mbaʼ wəlisəhi bakanashi lə gəkə kən shi. Nza gha ndanti shiva gwanashi tə pi tsaa ta Hiyala. 14 Ma tsaa tərə sliw tsa məcar tsa va, lə huta ci, mbaʼ shir ciy, nza gha dzaa ndantishi pərikə tə ngula kala kama mbə məlmə. Ghəci na shi sliy məndi ta pəli kuma ka ta Hiyala jikir na.

15 Ka gha dza diɓay, bəhu gha kəsəvə gamə kutiŋ mbə gaməhi bakə ni va, nza kar Aruŋ lə ndərazhi ci fakən dəvə kən ghən nzə. 16 Nza gha slanti mbaʼ gha kaʼuvə miy miy nzə, nza gha məsatishi dəzlətsəɓə pi tsaa ta Hiyala. 17 Ka gha dzay, mbaʼ gha slaslati sliw gamə tsa va dzəɓəku dzəɓəku. Ka gha dza diɓa na, mbaʼ gha yaɓanti shi kwa hur mbaʼ cekucegumer nza gha tahakənshi kən sliw tsa dzəɓəku dzəɓəku tsa va lə kən ghən təmbəkə tsa va. 18 Gwanata tsa gamə va pə gha dzaa ndanti tə pi tsa ka məndiy ta Hiyala. Shi ndanta məndi gwanashi kaa Kwa sləkəpə na. Sa ka gha ndira shi va yən Kwa sləkəpiy, ju dza ghəshiy zənara wəzəw.

19 Liy hum diɓay, nza gha kəsəvə nahuti gamə va. Ka kar Aruŋ lə ndərazhi ci dza na, mbaʼ ghəshi fakən dəvə kən ghən nzə. 20 Ka gha dza na, mbaʼ gha slanti, kaʼwə gha kaʼuvə miy miy va, nza gha manatishi tə sləmə kwa bəzəmə kar Aruŋ lə ndərazhi ci. Manatishi tə gha tə gislə dəvə kwa bəzəmə shi mbaʼ tə gislə səɗa kwa bəzəmə shi. Niy tərə miymiyiy, məsatishi tə gha tə pi tsa ka məndiy ta Hiyala dəzlətsəɓə pi tsa va. 21 Ka gha dzay, nza gha ɓəvə miymiy tə pi tsa ka məndi vaa ta Hiyala, mbaʼ in tsa ɗewɗew tsa, nza gha məsatishi tə Aruŋ lə shi kən ghən ci, zhini tsəgha ndərazhi ci lə shi kən ghən shi. Tsəgha dza kar Aruŋ lə ndərazhi ci, lə kubeŋer va kən ghən shiy zhəghəshi ka mbəzli ka ghəra sləni kaa Hiyala. 22 Sa dza ghaa sliy gamə va dza məndiy sənay, a ndərazhi Aruŋ ghati ghəranta sləni kaa Kwa sləkəpə kə məndi. Ka gha dzay, mbaʼ gha ɓəvə shigə gamə va, mbaʼ gəkə kən shi kwa hur, mbaʼ na kən məni, mbaʼ wəlisəhi bakanashi lə gəkə kən shi, mbaʼ val tsa səɗa kwa bəzəmə. 23 Nza gha ɓəvə peŋ tsa dilil tsa kutiŋ, mbaʼ gatwə tsa hwaɗiti məndi lə in kutiŋ, mbaʼ galetə kutiŋ, kwa gatakar tsa ka məndi vaa fə peŋ tsa kama is mbə kwa kumee Yən Kwa sləkəpə. 24 Shiva gwanashiy, nza gha fambəshi mbə dəvə kar Aruŋ lə ndərazhi ci. Nza gha gəzanshi, a ghəshi ɓərashi, ka məni njasa ka məndiy məni mbə ɓəra shiy yən Kwa sləkəpə. 25 Ma liy hum ki na, nza gha zhinəhu vəli va mbə dəvə shi, nza gha ndanti tə pi tsaa ta Hiyala kwasəbə shi ka məndiy ndi kaa Hiyala. Sa ka gha ndira shi va yən Kwa sləkəpiy, ju dza ghəshiy zənara wəzəw. 26 Ka gha dza na, mbaʼ gha ɓəvə sliw tsa kwa hati kwa baka gamə hənanti gha va ta ɓə sləni kaa Aruŋ. Nza gha dəʼu ghən tsa gha mənti njasa ka məndiy məni mbə ɓəra shiy yən Kwa sləkəpə, nava bəla sliwəy, na gha na nava. 27 Sliw tsa kwa hati va, lə val səɗa kwa bəzəmə bəvə məndi tə gamə va, mbaʼ məndi ndarashi njasa ka məndiy ɓə shiy kaa Kwa sləkəpə, ghala pi tsa fə məndi kar Aruŋ lə ndərazhi ciy dzəmbə sləniy, vəgha bəla pə ghaa dzaa fiy tsava sliw. 28 Kaa kar Aruŋ lə ndərazhi ci dza məndiy dza li. Va tsəgha dza ka Izərayel ɓanavəshi nava bəla dəmbəkə kaa kar Aruŋ lə ndərazhi ci. Tsəgha dza ka Izərayel məni ya humɓa hənira ghəshi shiy ta pəla zərkə lə ya yən Kwa sləkəpə.

29 Sa ka Aruŋ mətiyəy, kaa mbəzli mbə takə tsa ci kə məndi dzaa dza lə kubeŋer ndə ta Hiyala ci, nza ghəshi pa shiy dzəkən ghən fəca dza məndiy shikə in dzəmbə ghən tsa shi ta fəshiy dzəmbə sləni. 30 Ntsaa dzaa zəmə ghyi mbə ndərazhi Aruŋ ta nza ka ndə ta Hyalay, vici mbərfəŋ dza naa mənti li shi kən ghən ci ka na gha dzəmbə gaska gamtaʼwaləə kumə lə ya yən kwa sləkəpə, ta ghəra sləni tə pi tsa ɗewɗew tsa.

31 Ka gha dzay, mbaʼ gha ɓəvə sliw tsa gamə hənəhu məndi va ta fə ka ta Hyalaa dzəmbə sləni, nza gha pəlavə piy tati sliw tsa va dzar vəgha gaska gamtaʼwal va. 32 Sa ka gha tatiy, nza kar Aruŋ lə ndərazhi ci zəmə sliw tsa va miy gaska gamtaʼwaləə kumə lə ya yən Kwa sləkəpə, lə peŋ tsa kwa gatakar va. 33 Ghəshi kutishi kə dzaa zəmə shi ɓəkəra məndi va ta pəli kuma shi jikir na, geʼi lə vəghu tsa fəshi məndi vaa dzəmbə sləni ta nza ghəshi ka ka ghəraɗa sləni. Əntaa tsahuti ntsa gəm tsa zəməshi ma, sa nzanay, shi ɗewɗew ni na ghəshi. 34 Mbaʼ kə kar sliw tsa va lə peŋ tsa va dzaa nza ghulashi paʼa tə həzlimə mekəshiy, ndantishi tə gha. Əntaa ndə zəməshi ma, sa nzanay, shi ɗewɗew ni na ghəshi.

35 War njasa gəzəkəŋee va məni kaa kar Aruŋ lə ndərazhi ciy, tsəgha pə gha dzaa mənti. Vici mbərfəŋ pə gha dzaa mənti mbə mananshi kuma ka məndiy məni ta fə ka ta Hyalaa dzəmbə sləni.

36 Njasa səmə viciy, tsəgha dza ghaa kəsəkə kəɓə məcar ta ta Hiyala, ta pəli jikir, ta mbəə ɓanti kuma jikir na. Ka gha dzay, mbaʼ gha fati shi hənəy gha va ta pəli kuma jikir na tə pi ta Hiyala tsa va, mbaʼ gha mənti shi ka məndiy məni ta ɓanti kuma jikir na ti. Ka gha dza ki na, mbaʼ gha shəkati in dzəti ta nza ghəci ka pi tsa dza məndiy ghəraɗa sləni ti. 37 Vici mbərfəŋ pə gha dzaa mənti mbə məni kuma va tsəgha. Liy hum vici mbərfəŋ na vay, nza pi tsa va zhəghiy ka pi tsaa ta Hiyala. Pətsee kutira dza pi tsa vaa nza. Ghalaɓa, ya ndə dza naa dapayiy, see dza tsava ndəə nza, nihuti shiy kə dzaa dapayiy, shiya dza niva shiy nza.

Shi dza məndiy ndi kaa kwa sləkəpə njasa səmə vici

38 Njasa səmə viciy, tsəgha pə gha dzaa sla gemimə ka piya kutiŋ bakə dzəti pi tsaa ta Hiyala, ya paʼa humɓa. 39 Tsahuti kutiŋiy, mekishi. Tsahuti na, sa ka vici pəkuta. 40 Kwasəbə gamə dza gha vaa sla mekishiy, nza gha ɓəvə ghupə kilu mahəkanə, mbaʼ məndi hwaɗiti ghupə va lə in tsaa gura wəzə litər kutiŋ mbaʼ reta, mbaʼ tay litər kutiŋ mbaʼ reta ta vəlirashi. 41 Sa ka gha sla na dza gha vaa sla gamə vici pəkutay, tsəgha pə gha dzaa ɓəvə ghupə lə in mbaʼ tay ta vəlirashi kwasəbə diɓa. Sa ka gha ndira shi va yən Kwa sləkəpiy, juw dza ghəshiy zənara wəzəw. 42 Ava tsəgha na shi dza ghuy ndira ya paʼa humɓa, paʼa tar jijihiŋuy. Miy gaska gamtaʼwaləə kumə lə ya yən Kwa sləkəpə pə gha dzaa ndi shi va, kwa kumee. Tiɓa dzee kumə lə ghuy, tiɓee dzaa gəzəŋa kuma diɓa.

43 Tiɓa tə pi tsa va dzee kumə lə ka Izərayel. Ta zhəghəti pi tsa va dza shəndəkə tsee ka pi tsa ɗewɗew tsa. 44 Ta zhəghəti gaska gamtaʼwaləə kumə lə ya yən Kwa sləkəpə, mbaʼ pi tsaa ta Hiyala dzee ka pətsee ɗewɗew tsa. Ta fiy kar Aruŋ lə ndərazhi ci dzee, nza ghəshi ghəraɗa sləni ka ta Hiyala. 45 Mbə jipə ka Izərayel dzee nza lə nziy tsee, yən dza Hiyala shiy nza. 46 Ta sənay dza ghəshi, yən na Kwa sləkəpə Hiyala shi, kə ghəshi. Ta sənay dza ghəshi yən ɓəkəvərishi na mbə Ezhiptə ta nzee mbə jipə shi, kə ghəshi.

Yən na Kwa sləkəpə, Hiyala shi,» kə Kwa sləkəpə.